1-3. (a) O ā nisi o suiga e ono faigatā iā i tatou ona faia pe a māeʻa le papatisoga? (e) O ā fesili atonu e tatou te fesili ai pe a faigatā ona agaʻigaʻi i luma? (Tagaʻi i ata i luga aʻe o le matua.)

INA ua aʻoaʻoina e Kevin ^[1] le upu moni, e leai se isi mea na sili ona tāua iā te ia nai lo o le mauaina o se faiā lelei ma Ieova. Peitaʻi, i le tele o tausaga na aafia ai o ia i taaloga faitupe, ulaula, inu tele i le ʻava malosi, ma fualaau faasāina. Sa tatau iā Kevin ona tuua ia masaniga leaga, ina ia maua ai le finagalo malie o le Atua. Sa faalagolago o ia iā Ieova, ma le mana o lana Afioga e suia ai olaga.—Epe. 4:12.

² Pe na muta suiga na faia e Kevin i lona olaga, ina ua māeʻa lona papatisoga? E leai, na manaʻomia pea ona ia galue e atiaʻe ma faaleleia ona uiga faa-Kerisiano. (Efe. 4:31, 32) O se faaaʻoaʻoga, na faateʻia o ia i le faigatā ona pulea o lona maitaita. Na ia faapea mai: “O le taumafai e pulea loʻu maitaita, sa faigatā atu nai lo o le tuua o masaniga leaga.” Sa faia e Kevin suiga manaʻomia  e ala i tatalo faatauanau ma suʻesuʻega loloto o le Tusi Paia.

³ E pei o Kevin, o le toʻatele o i tatou na faia ni suiga tetele a o leʻi papatiso, ina ia faaōgatusa o tatou olaga ma tapulaa a le Tusi Paia. Ina ua uma ona tatou papatiso, na tatou iloa e manaʻomia pea ona fai ni suiga aemaise i vaivaiga e iloagatā, ina ia matuā faaaʻoaʻo ai i le Atua ma Keriso. (Efe. 5:1, 2; 1 Pete. 2:21) O se faaaʻoaʻoga, atonu e tatou te mātauina ua tatou aafia i le uiga faitio, fefe i tagata, le faitala taufaaleaga, po o nisi lava vaivaiga. Po ua faigatā atu ona tatou faia suiga i nei vala nai lo o le mea na tatou faatalitalia? Pe afai o lea, atonu e te tomānatu: ʻUa māeʻa ona ou faia suiga tetele, ae aiseā ua faigatā ai ona ou faia ni suiga lāiti? E faapefea ona ou faia atili nisi suiga ma faaauau ai pea ona suia e le Tusi Paia loʻu olaga?’

4. Aiseā e lē mafai ai ona tatou faafiafiaina Ieova i mea uma e tatou te faia?

⁴ E tatou te faanaunau ma o tatou lotoatoa e faafiafia Ieova, ona ua tatou iloa o ia ma alolofa iā te ia. E ui i lea, po o le ā lava le malosi o lenā faanaunauga, ae e lē mafai ona tatou faafiafiaina o ia i taimi uma, ona o lo tatou tulaga lē lelei atoatoa. E tutusa o tatou tulaga ma le aposetolo o Paulo o lē na tusi: “Auā ou te loto e fai le mea lelei, a ou te lē iloa ona fai o le mea lelei.”—Roma 7:18; Iako. 3:2.

5. O ā suiga na tatou faia a o leʻi papatiso, ae o ā vaivaiga atonu o loo tatou tauivi ai pea?

⁵ Ua tatou lafoaʻia amioga leaga ia e mafai ona aveesea ai i tatou mai i le faapotopotoga Kerisiano. (1 Kori. 6:9, 10) E ui i lea, o loo tatou lē lelei atoatoa pea. (Kolo. 3:9, 10) O lea, e lē tatau ona tatou faatalitalia e uma loa ona papatiso po o le umi foʻi ona iai i le upu moni, ona taulau lea i taimi uma a tatou taumafaiga, lē toe faia mea sesē, ma lē toe tauivi ma faanaunauga ma uunaʻiga sesē. Atonu e faaauau pea ona tatou tauivi ma na faanaunauga sesē mo le tele o tausaga.

6, 7. (a) O le ā ua mafai ai ona avea i tatou ma uō a Ieova e ui ina tatou lē lelei atoatoa? (e) Aiseā e lē tatau ai ona tatou faatalatū e talosaga atu iā Ieova mo le faamagaloga?

⁶ O lo tatou tulaga lē lelei atoatoa e lē tatau ona taofia ai i tatou mai i le mauaina o se faauōga ma Ieova, ma faaauau ona auauna iā te ia. Seʻi manatu i lenei mea: Ina ua tosina atu e Ieova i tatou iā te ia, na ia silafia o le a tatou lē taulau i nisi taimi. (Ioa. 6:44) Talu ai e silafia e Ieova o tatou uiga ma o tatou loto, na ia silafia foʻi o tatou faanaunauga lē lelei atoatoa o le a avea ma luʻi iā i tatou. Sa ia silafia o le a tatou faia mea sesē mai lea taimi i lea taimi. Peitaʻi, na finagalo pea Ieova e avea i tatou ma ana uō.

⁷ O le alofa na uunaʻia ai le Atua e aumai se meaalofa tautele mo i tatou, o le taulaga togiola lea a lona Alo pele. (Ioa. 3:16) E faavae i lana sauniuniga tāua ua tatou saʻilia ai le faamagaloga a Ieova pe a tatou faia mea sesē, e tatou te mautinoa ai o loo lelei pea la tatou faauōga ma ia. (Roma 7:24, 25; 1 Ioa. 2:1, 2) Pe e tatau ona tatou faatalatū e talia aogā o le togiola, ona e tatou te manatu e tatou te lē mamā ma agasala? E leai! E tai pei lenā mea o lo tatou mumusu e faaaogā le vai e fufulu ai o tatou lima pe a palapalā. Ua saunia le taulaga togiola mo tagata agasala ua salamō. O le togiola ua mafai ai ona tatou olioli i se faauōga ma Ieova, e ui i lo tatou tulaga lē lelei atoatoa.—Faitau le 1 Timoteo 1:15.

8. Aiseā e tatau ai ona tatou lē amanaʻia o tatou vaivaiga?

⁸ E lē tatau ona tatou lē amanaʻia o tatou vaivaiga. O le atiaʻe o se faauōga ma Ieova  e aofia ai le finafinau e faaaʻoaʻo i le Atua ma Keriso, ma avea ma ituaiga tagata e la te finagalo malie i ai. (Sala. 15:1-5) E aofia ai foʻi le taumafai e pulea o tatou faanaunauga lē lelei atoatoa, po o le manumalo ai. E tusa pe faatoʻā papatiso po ua loa foʻi ona tatou iai i le upu moni, e tatau lava ona ʻfaaauau ona toe faasaʻo o tatou manatu.’—2 Kori. 13:11.

9. E faapefea ona iloa e mafai lava ona tatou ofuina le tagata fou?

⁹ E manaʻomia taumafaiga faifai pea ina ʻtoe faasaʻo o tatou manatu,’ ma oofu i “le tagata fou.” Na faamanatu atu e Paulo i uso talitonu: “Ia outou tuu ese le tagata tuai e tusa ai ma a outou amioga sa faia muamua, lea ua faaleagaina i ona tuʻinanauga taufaasesē; a ia [faaauau ona] faafouina le malosi e pulea ai o outou mafaufau, ma ia oofu i le tagata fou na foafoaina e tusa ma le finagalo o le Atua, i le amiotonu moni ma le faamaoni.” (Efe. 4:22-24) O le faaupuga “ia faaauau ona faafouina” e faaalia ai o le ofuina o le tagata fou, o se gaoioiga e faaauau pea ona fai. O se mea e faalaeiauina ai, auā ua faamautinoa mai iā i tatou e tusa lava po o le ā le umi o tatou auauna iā Ieova, e mafai ona tatou agaʻigaʻi pea i luma i le atiaʻe ma le faaleleia o uiga faa-Kerisiano ia e faia ai le tagata fou. Ioe, e mafai ona faaauau ona suia e le Tusi Paia o tatou olaga.

10. O le ā e tatau ona tatou faia ina ia faia pea suiga ma le fesoasoani a le Tusi Paia, ma o ā fesili atonu e tatou te fesili ai?

¹⁰ E tatau ona tatou finafinau ina ia faaauau ona suia e le Afioga a le Atua o tatou olaga. Aiseā e manaʻomia ai a tatou taumafaiga malolosi? Pe e lē faigofie ona tatou agaʻigaʻi i luma faaleagaga pe afai e faamanuia e Ieova a tatou taumafaiga? Pe e lē mafai e Ieova ona faafaigofie a tatou taumafaiga ina ia faia le mea saʻo?

11-13. Aiseā e faatalitalia ai e Ieova e faia a tatou lava taumafaiga malolosi ina ia pulea ai o tatou vaivaiga?

¹¹ Pe a tatou manatunatu i le vateatea, e tatou te iloa ai le telē o le mana o Ieova. O se faaaʻoaʻoga, na ia faia le lā lea e matuā malosi lava. O sekone taʻitasi e gaosia ai e le lā se aofaʻiga tele o le malamalama ma le vevela. Ae e na o se vaega itiiti o lenā malosiaga e manaʻomia ina ia faatumau ai le ola i luga o le lalolagi. (Sala. 74:16; Isa. 40:26) E finagalo Ieova e foaʻi mai le malosi talafeagai i ana auauna pe a latou manaʻomia. (Isa. 40:29) E mafai foʻi ona ia aveesea o tatou faanaunauga sesē uma, pe aumaia le malosi e tatou te manumalo ai i so o se vaivaiga e aunoa ma a tatou taumafaiga. Ae aiseā ua ia lē faia ai faapea?

¹² Ua aumaia e Ieova iā i tatou se meaalofa tautele o le saʻolotoga e filifili ai. O le filifili e faia le finagalo o Ieova ma galue mamafa e faia faapea, e faaalia ai le loloto o lo tatou alofa mo Ieova ma lo tatou faanaunauga e faafiafia o ia. E tatou te faaalia ai foʻi le lagolagosua i lana pule silisili ese. Na luʻia e Satani le tonu o le pule silisili ese a Ieova. O lea, o a tatou galuega tauofo ma taumafaiga malolosi e lagolago lana pule, e mautinoa e matuā tāua i lo tatou Tamā agalelei ma lototalisapaia. (Iopu 2:3-5; Faata. 27:11) Peitaʻi, pe afai e fesoasoani mai Ieova i taimi uma e pulea o tatou faanaunauga lē lelei atoatoa, ma lē manaʻomia ai ona tatou finafinau e faafiafia o ia, o lona uiga e leai la se aogā o lo tatou faapea atu o loo tatou faamaoni ma lagolagoina lana pule silisili ese.

¹³ Ua fetalai mai Ieova ina ia faia a tatou “taumafaiga filigā” e atiaʻe ona uiga. (Faitau le 2 Peteru 1:5-7; Kolo. 3:12) E na te  faatalitalia i tatou e galulue mamafa e pulea o tatou mafaufau ma faalogona. (Roma 8:5; 12:9) O le taumafai malosi i lenei vala, e faafiafiaina ai i tatou ona o loo faaauau ona suia e le Tusi Paia o tatou olaga.

14, 15. O le ā e mafai ona tatou faia ina ia atiaʻe ai uiga e fiafia i ai Ieova? (Tagaʻi i le pusa “ Suia e le Tusi Paia ma le Tatalo o Latou Olaga.”)

¹⁴ O le ā atonu e tatou te faia e atiaʻe ai uiga o le Atua ma faafiafiaina ai o ia? E tele atu mea e manaʻomia ona tatou faia nai lo o le tau ina iai o se polokalame faaleleia ai o tatou uiga. E manaʻomia ona tatou finafinau pea ma mulimuli i faatonuga a le Atua, auā ua taʻua i le Roma 12:2: “Aua tou te mulimuli i lenei faiga o mea a le lalolagi, ae peitaʻi ia liliu e ala i le suia o o outou mafaufau, ina ia faamaonia e outou lava po o le ā le finagalo o le Atua, lea e lelei, e mālie, ma lelei atoatoa.” E ala i lana Afioga ma lona agaga paia, ua fesoasoani mai ai Ieova iā i tatou e malamalama ma faia lona finagalo, ma suia o tatou olaga ina ia ōgatusa ma ana tapulaa. E tatau ona aofia i a tatou taumafaiga le faitauina i aso taʻitasi o le Tusi Paia, manatunatu loloto i ai, ma tatalo mo le agaga paia. (Luka 11:13; Kala. 5:22, 23) A o tatou gauaʻi atu i le taʻitaʻiga a le agaga paia o le Atua, ma faaōgatusa o tatou manatu ma le silafaga a Ieova o loo i lana Afioga, o le a tatou faataʻitaʻi ai iā te ia i o tatou manatu, faamatalaga ma gaoioiga. E ui i lea, e manaʻomia pea ona tatou mataala ina ia aua neʻi toe lolo atu i o tatou vaivaiga.—Faata. 4:23.

¹⁵ E faaopoopo atu i la tatou faitauga Tusi Paia, e manaʻomia ona tatou suʻesuʻeina le Afioga a le Atua faatasi ma a tatou lomiga faa-Kerisiano, ina ia faaaʻoaʻo ai i uiga matagofie o Ieova. Ua iloa e nisi le aogā o le aoaoina ma autalu nisi o mau ma Olomatamata ma Ala Mai!, e taulaʻi atu i le atiaʻe o uiga faa-Kerisiano po o le foʻia o se vaivaiga patino.

16. Aiseā e lē tatau ai ona tatou lotovaivai pe a lē vave ona tatou faia ni suiga?

¹⁶ Pe a foliga mai e tuai ona e agaʻigaʻi i luma faaleagaga, ia manatua e umi se taimi e faia ai faapea. O le atiaʻe o uiga faaleagaga o se gaoioiga e faifai pea. E tatau ona tatou onosaʻi a o faaauau ona suia e le Tusi Paia o tatou olaga. I le taimi muamua, e tatau ona pulea i tatou lava ina ia faia le mea saʻo e pei ona taʻua i le Tusi Paia. Ae a o faagasolo taimi, o le a faigofie ona tatou mafaufau ma gaoioi e tusa ma le silafaga a le Atua, a o faasolosolo ina ōgatusa o tatou manatu ma gaoioiga ma ala o Ieova.—Sala. 37:31; Faata. 23:12; Kala. 5:16, 17.

17. O le ā le taui matagofie e tatou te tulimataʻia, pe a tatou faamaoni iā Ieova?

¹⁷ O le a maua e tagata tapuaʻi faamaoni o Ieova le faaeaga o le auauna iā te ia e faavavau i le tulaga lelei atoatoa. O le a lē toe faigatā i lenā taimi ona faaalia uiga o le Atua, ma o le a maua ai pea le fiafia. Ae e tatou te lotofaafetai i lenei taimi mo le togiola, ona ua mafai ai ona tatou tapuaʻi i lo tatou Atua alofa. Ua mafai ona tatou faia faapea e ui i lo tatou lē lelei atoatoa, pe a faaauau ona tatou gauaʻi i le mana o lana Afioga lea e suia ai olaga.

18, 19. E faapefea ona tatou mautinoa e iai i le Tusi Paia le mana e faaauau ona suia ai o tatou olaga?

¹⁸ Sa galue mamafa Kevin lea na taʻua muamua ina ia pulea lona ita. Na ia manatunatu loloto ma faatatau taʻiala o le Tusi Paia, ma taliaina le fesoasoani ma fautuaga a uso Kerisiano. A o faagasolo tausaga, na faia ai e Kevin ni suiga mataʻina. Mulimuli ane, na agavaa o ia e avea ma auauna o le faiva, ma ua 20 nei tausaga talu ona avea o ia ma toeaina i le faapotopotoga. Peitaʻi, ua ia iloa le manaʻomia ona mataala ina neʻi toe lolo atu i lona vaivaiga.

¹⁹ Ua faaalia i le mea na tupu iā Kevin, ua fesoasoani le Tusi Paia i tagata o le Atua e faaauau ona faia suiga lelei i o latou olaga. O lea la, seʻi faaauau pea ona suia e le Afioga a le Atua o tatou olaga ma tatou maua ai se faiā vavalalata ma Ieova. (Sala. 25:14) A o tatou vaaia le faamanuia a Ieova i a tatou taumafaiga, e tatou te mautinoa ai e mafai ona faaauau ona suia e le Tusi Paia o tatou olaga.—Sala. 34:8.