1, 2. (a) Aiseā e faalaeiauina ai i tatou i faaaʻoaʻoga a ē o loo talaʻi ma le faamaoni i oganuu e lē talilelei mai tagata? (Tagaʻi i le ata i luga aʻe o le matua.) (e) O le ā na taʻua e Iesu e faatatau i le talaʻi atu i lona lava “nuu”? (Tagaʻi i le faaopoopoga i le pito i lalo.)

O SERGIO MA OLINDA o se ulugalii paeonia ua silia i le taʻi 80 o la tausaga e nonofo i le Iunaite Setete. O o la tulaga matutua ua faafaigatā ai mo i laʻua ona feoaʻi. E ui i lea, e pei lava ona la faia mo le faitau sefulu o tausaga, e la te savavali i le taeao i se vaega pisi o le taulaga ma e taunuu i inā i le tā o le fitu. E la te ofo atu a tatou lomiga faale-Tusi Paia i tagata feoaʻi e latalata i se nofoaga faatalipasi. O le toʻatele e lē ano ane iā i laʻua, peitaʻi, e faaauau pea ona iai lenei ulugalii i lea nofoaga ma faaalia atu laufofoga fiafia i ē e vāai ane. Pe a oo i le aoauli, e toe savalivali i laʻua i lo la fale. E tā ane le fitu i le taeao e sosoo ai, ua taunuu i laʻua i le la nofoaga masani. O le mea moni, o loo pisi lenei ulugalii faamaoni e talaʻi atu le feʻau o le Malo i aso e ono o vaiaso taʻitasi i le tausaga atoa.

² I le pei o Sergio ma Olinda, e toʻatele uso ma tuafāfine faamaoni i le lalolagi aoao ua talaʻi atu mo le faitau sefulu tausaga, i oganuu i o latou lava vaipanoa e lē talilelei mai tagata. Pe afai e  faapena o outou tulaga, e matou te matuā faamālō atu i lo outou tumau. * O lo outou tumau faamaoni i le auaunaga iā Ieova, o se puna lea o faalaeiauga mo le toʻatele e aofia ai ma uso ma tuafāfine taʻumatuaina. Seʻi mātau faamatalaga a nisi o ovasia matagaluega: “Pe a matou galulue faatasi ma na uso ma tuafāfine faamaoni i le faiva, e faamalosia aʻu i a latou faaaʻoaʻoga.” “O lo latou faamaoni e faalaeiauina ai aʻu e faamalosi pea ma ia lototele i laʻu faiva.” “E pāʻia loʻu loto i a latou faaaʻoaʻoga.”

3. O ā fesili e tolu o le a tatou iloiloina, ma aiseā?

³ Ina ia faamalosia lo tatou faanaunauga e faamāeʻa le galuega talaʻi lea na tofia ai i tatou e Iesu, seʻi o tatou iloiloina fesili nei e tolu: Aiseā e tatou te ono lotovaivai ai i nisi o taimi? E faapefea ona tatou fua tele mai? O le ā e fesoasoani iā i tatou ina ia faaauau ai ona fua mai ma le tumau?

4. (a) O le ā le aafiaga na oo iā Paulo ona o le tetee o le toʻatele o tagata Iutaia? (e) Aiseā na oo ai na lagona iā Paulo?

⁴ Pe afai na e lagona le lotovaivai ina ua e talaʻi i se oganuu e lē talilelei mai tagata, o le a e malamalama la i faalogona o le aposetolo o Paulo. I le faiva a Paulo lea e pe tusa ma le 30 tausaga le umi, na fesoasoani ai o ia i le toʻatele o tagata ina ia avea ma soo o Keriso. (Galu. 14:21; 2 Kori. 3:2, 3) Peitaʻi, e leʻi taulau o ia e suia le toʻatele o tagata Iutaia ina ia avea ma tagata tapuaʻi moni. Nai lo o lea, na tetee le toʻatele iā Paulo ma na sauāina o ia e nisi. (Galu. 14:19; 17:1, 4, 5, 13) O le ā le aafiaga na oo iā Paulo ona o le tetee o tagata Iutaia? Na taʻutino mai e Paulo e faapea: ʻO aʻu o se soo o Keriso, ou te taʻu atu le upu moni, ua matuā mafatia ma tigā tele loʻu loto.’ (Roma 9:1-3) Aiseā na oo ai na lagona iā Paulo? Talu ai na uaʻi atu lona loto i le galuega talaʻi. Na talaʻi atu o ia i tagata Iutaia ona o lona manatu mamafa mo i latou. O lea, na tigā le loto o Paulo i le vaai atu ua latou teena le alofa mutimutivale o le Atua.

5. (a) O le ā e uunaʻia ai i tatou e talaʻi atu i o tatou tuaoi? (e) Aiseā e tatou te lagona ai i nisi taimi le lotovaivai?

⁵ I le pei o Paulo, e tatou te talaʻi i tagata ona o lo tatou manatu mamafa iā i latou. (Mata. 22:39; 1 Kori. 11:1) Aiseā? Ua tatou iloa mai i mea ua tatou tofo i ai le anoanoaʻi o faamanuiaga e maua e se tasi e filifili e auauna iā Ieova. Pe a tatou mafaufau i tagata i le oganuu, e tatou te faapea ifo: ʻMaʻimau pe ana mafai ona tatou fesoasoani iā i latou ina ia iloa le tele o faamanuiaga e latou te lē o mauaina!’ O le māfuaaga lea e faaauau ai ona tatou faalaeiau i latou e aʻoaʻo le upu moni e faatatau iā Ieova ma lona finagalo mo tagata. E peiseaʻī o lea e tatou te faapea atu: ʻE iai le matou meaalofa matagofie e fia avatu mo oe. O lau meaalofa lea.’ O lea, pe a teena e tagata le meaalofa, e lē taumatea e ʻtigā tele o tatou loto.’ O le iai iā i tatou o na lagona e lē faapea ai ua vaivai lo tatou faatuatua, ae e faaalia ai o loo uaʻi atu o tatou loto i le galuega talaʻi. E ui lava la e iai taimi e tatou te lotovaivai ai, ae e tatou te tutumau pea. E tutusa o tatou faalogona ma Elena, o sē ua paeonia mo le silia i le 25 tausaga. Ua faapea mai o ia: “Ua ou iloa e lē faigofie le galuega talaʻi. Ae e leai lava se isi galuega e tutusa ma lenei galuega.”

6. O le ā le fesili o le a tatou iloiloina, ma e faapefea ona tali lenā fesili?

⁶ Aiseā e tatou te mautinoa ai e tusa lava po o fea e tatou te talaʻi ai, e mafai lava ona fua mai la tatou faiva? Ina ia tali lenei fesili tāua, seʻi o tatou iloiloina talafaatusa e lua a Iesu lea na ia faamatilatila ai le tāua o le “fua  mai.” (Mata. 13:23) O le talafaatusa muamua e faatatau i se vine.

7. (a) O ai e faasino i ai “le galue vine,” “le vine moni,” ma “lālā”? (e) O le ā le fesili o loo tatou fia mauaina le tali?

⁷ Faitau le Ioane 15:1-5, 8. Na fetalai atu Iesu i ona aposetolo: “Ua faamamaluina loʻu Tamā ona o lenei mea, i lo outou saga fua tele mai ma iloa ai o outou o oʻu soo.” Na faamatala e Iesu o Ieova o “le galue vine,” o ia o “le vine moni,” ma o ona soo o “lālā.” * Ae o le ā la le fua lea e tatau i soo o Keriso ona fua mai? I lenei talafaatusa, e lē o taʻua patino mai e Iesu po o le ā e faasino i ai le fua, ae na ia taʻua se manatu tāua e fesoasoani iā i tatou e maua ai le tali.

8. (a) I lenei talafaatusa, aiseā e lē mafai ai ona faasino atu le fua e tatou te fuaina mai i soo fou? (e) O le ā ua tatou iloa e faatatau i mea e faafinagaloina e Ieova mai iā i tatou?

⁸ Na fetalai Iesu e faatatau i lona Tamā: “O lālā uma ua iā te aʻu e lē fua mai, e na te aveeseina.” I se isi faaupuga, e faatoʻā silasila mai Ieova iā i tatou o ni ana auauna pe a tatou fua mai. (Mata. 13:23; 21:43) O lea, o le fua lea e tatau i Kerisiano taʻitoʻatasi ona fua mai e tusa ai ma lenei talafaatusa, e lē mafai ona faasino atu i soo fou e tatou te mauaina. (Mata. 28:19) Pe anafai o lea, o lona uiga o Molimau faamaoni uma e lē o taulau i le mauaina o ni soo fou ona o loo talaʻi i oganuu e lē talilelei mai, o le a pei i latou o lālā e lē fua mai i le talafaatusa a Iesu. Ae e matuā lē talafeagai lenā manatu! Aiseā? Talu ai e lē mafai ona tatou faamalosia tagata ina ia avea ma soo. E feteenaʻi ma uiga alofa o Ieova le faasala o ana auauna pe a lē taulau ona latou faia se mea e lē oo i ai lo latou malosi. O so o se mea e faafinagaloina e Ieova mai iā i tatou, e mafai lava ona tatou ausia.​—Teu. 30:11-14.

9. (a) E faapefea ona tatou fua mai? (e) O le ā le talafaatusa o le a tatou iloiloina, ma aiseā?

⁹ O le ā la le fua lea e tatau ona tatou fuaina mai? E manino mai, o lenei fua e tatau ona faasino atu i se galuega lea e mafai e i tatou uma ona faia ai se sao. O le ā la le galuega e tele ina faatatau i ai le “fua mai”? O le talaʻia lea o le tala lelei o le Malo o le Atua. * (Mata. 24:14) E faamaonia lenei manatu i le talafaatusa a Iesu i le tagata lūlū fatu. Seʻi o tatou iloiloina lenā talafaatusa lona lua.

10. (a) I lenei talafaatusa, o le ā e faasino i ai le fatu ma le eleele? (e) O le ā e maua mai i se lālā saito?

¹⁰ Faitau le Luka 8:5-8, 11-15. I le talafaatusa i le tagata lūlū fatu, o le fatu o le “upu lea a le Atua” po o le feʻau o le Malo. O le eleele e faasino atu i le loto o le tagata. O le fatu na paʻū i le eleele lelei, na mauaa ma tuputupu aʻe e avea ma lālā saito, “ona fua mai ai lea e taʻiselau.” O ā la fua e fuaina mai e se lālā saito? Pe e maua mai ai ni tamaʻi lālā saito? E leai. O le a maua mai ai ni fatu fou lea e tutupu aʻe ma avea mulimuli ane ma lālā. I lenei la talafaatusa, o se fatu e tasi e maua ai isi fatu e selau. E faapefea i lenei vala o le talafaatusa ona faatatau mai i la tatou faiva?

11. (a) E faapefea ona faatatau mai le talafaatusa i le tagata lūlū fatu i la tatou faiva? (e) E faapefea ona tatou fuaina mai ni fatu fou o le Malo?

¹¹ O se faataʻitaʻiga, seʻi faapea i ni tausaga ua mavae na faasoa mai ai e ni Molimau po o o tatou mātua Kerisiano le feʻau o le Malo. Na faafiafiaina i latou ina ua latou mātauina ua talia e o tatou loto le feʻau o le Malo lea e pei o se fatu. E pei o le eleele lelei i le talafaatusa a Iesu lea na paʻū ai le fatu, na  tatou talia le feʻau ma taofimau i ai. O le iʻuga, na mauaa le feʻau o le Malo lea e pei o se fatu, ma ola aʻe e avea o se lālā saito o le a maua mai ai ni fua. E pei lava ona fuaina mai e se lālā saito ni fatu fou ae e lē o ni lālā fou, e tatou te fuaina mai foʻi ni fatu fou o le Malo, ae e lē o ni soo fou. * E faapefea la ona tatou fuaina mai ni fatu fou o le Malo? O taimi uma lava e tatou te faalauiloa atu ai le feʻau o le Malo i so o se auala, o lenā ua tatou faateleina ma faasalalau atu le fatu lea na totō i o tatou loto. (Luka 6:45; 8:1) O lea la, ua tatou aʻoaʻoina mai i lenei talafaatusa le manatu e faapea, pe a faaauau ona tatou faalauiloa atu le feʻau o le Malo, o lenā o loo tatou ʻfua mai ma le tumau.’

12. (a) O le ā le lesona e tatou te aʻoaʻoina mai i talafaatusa a Iesu i le vine ma le tagata lūlū fatu? (e) E faapefea i lenā lesona ona aafia ai oe?

¹² O le ā le lesona e tatou te aʻoaʻoina mai i talafaatusa a Iesu i le vine ma le tagata lūlū fatu? O lo tatou fuaina mai o fua, e lē faalagolago i le tali mai a tagata i la tatou oganuu. Nai lo o lea, e faalagolago i lo tatou tutumau faamaoni i le galuega talaʻi. O le manatu foʻi lenā na taʻua e Paulo ina ua ia faapea mai: “E maua e tagata taʻitoʻatasi lona lava taui e tusa ma ana galuega.” (1 Kori. 3:8) E faalagolago le taui i galuega na faia, ae e lē o iʻuga o na galuega. Ua faapea mai Matilda o se paeonia mo le 20 tausaga: “Ua ou maua le olioli i loʻu iloaina e tauia i tatou e Ieova e tusa ai ma a tatou taumafaiga.”

13, 14. E tusa ai ma le Roma 10:1, 2, o ā māfuaaga e leʻi faavaivai ai Paulo e talaʻi atu i ē e leʻi talilelei ane i le feʻau o le Malo?

¹³ E faapefea ona faaauau ona tatou fua mai ma le tumau? E pei ona sa tatou talanoaina, na lagona e Paulo le lotovaivai ona o le lē talilelei mai o tagata Iutaia i le feʻau o le Malo. E ui i lea, e leʻi faavaivai ai Paulo e talaʻi atu iā i latou. Seʻi mātau lana faamatalaga atili i lana tusi i Kerisiano i Roma e faatatau i ona faalogona i tagata Iutaia: “O le manaʻo lenei o loʻu loto ma laʻu talosaga i le  Atua mo Isaraelu, ina ia faaolaina i latou. Ua ou molimau iā i latou, ua latou maelega i le Atua; ae e lē tusa ai ma le poto saʻo.” (Roma 10:1, 2) O ā māfuaaga na faamatilatila mai e Paulo na faaauau ai pea i lana faiva?

¹⁴ Muamua, na taʻua e Paulo na uunaʻia o ia e talaʻi atu i tagata Iutaia ona ʻo le manaʻo lenā o lona loto.’ O le faanaunauga o lona loto ia iai ni tagata Iutaia e maua le faaolataga. (Roma 11:13, 14) Lua, na taʻua e Paulo lana ʻtalosaga i le Atua mo i latou.’ Na talosaga atu o ia i le Atua ina ia fesoasoani i tagata Iutaia e talia le feʻau o le Malo. Tolu, na taʻua atili e Paulo e faapea “ua latou maelega i le Atua.” Na mātau e Paulo se uiga lelei na latou faaalia. Na iloa lelei e Paulo pe afai e saʻo le ituaiga maelega e faaalia e se tagata lotofaamaoni, e mafai ona suia lenā tagata e avea ma soo maelega o Keriso.

15. E faapefea ona tatou faaaʻoaʻo iā Paulo? Ia aumai ni faaaʻoaʻoga.

¹⁵ E faapefea ona tatou faaaʻoaʻo iā Paulo? Muamua, ia tatou taumafai e faatumau se faanaunauga moni ina ia maua so o se tasi “ua saunia o latou loto mo le ola e faavavau.” Lua, ia tatou talosaga atu iā Ieova ina ia tatala loto o tagata e naunau moni. (Galu. 13:48; 16:14) Ua faapea mai Silvana o se paeonia mo le toetoe 30 tausaga, “A o oʻu leʻi alu atu i se fale i le oganuu, ou te tatalo iā Ieova ina ia ou maua se vaaiga saʻo.” E tatou te tatalo foʻi i le Atua ina ia taʻitaʻi i tatou e agelu i tagata lotofaamaoni. (Mata. 10:11-13; Faaa. 14:6) Ua taʻua e Robert o se paeonia mo le silia i le 30 tausaga, “O se mea mataʻina le galulue faatasi ma agelu o ē e latou te iloa mea o loo tutupu i olaga o aiga.” Tolu, e tatou te taumafai e mātau ni uiga lelei e faaalia e tagata. Ua faapea mai Carl o se toeaina ua silia i le 50 tausaga talu ona papatiso, “Ou te vaai i so o se faailoga laʻitiiti e iloa ai le fiafia o le tagata, atonu o sina ʻataʻata mai, o foliga faaleuō, po o se fesili e fai mai ona o le fia malamalama moni.” Ioe, i le pei o Paulo, e mafai ona tumau ona tatou fua mai.

16, 17. (a) O le ā le lesona e tatou te aʻoaʻoina mai i le faatonuga o loo i le Failauga 11:6? (e) E faapefea i la tatou galuega o le lūlūina o fatu ona iai se aafiaga i ē o loo mātauina i tatou?

¹⁶ E tusa lava foʻi pe e foliga mai e lē o pāʻia loto o tagata i le feʻau o le Malo o loo tatou talaʻia, ae e lē tatau ai ona tatou manatu māmā i aafiaga o la tatou galuega o le lūlūina o fatu. (Faitau le Failauga 11:6.) E moni o le toʻatele o tagata e lē faalogo mai, ae o loo latou mātauina pea i tatou. E latou te mātauina o tatou laʻei mamā, amioga faaaloalo, ma foliga fiafia. O a tatou amioga lelei, atonu o le a iloa ai e nisi mulimuli ane le sesē o o latou manatu lē lelei e faatatau iā i tatou. Na mātauina e Sergio ma Olinda lea na taʻua i le amataga se suiga faapea.

¹⁷ Ua faapea mai Sergio: “Na iai le taimi e ma te leʻi ō ai i le nofoaga masani lea e faatū ai le ma fatatusi, ona na ma mamaʻi. Ina ua ma toe foʻi atu, na fesili mai tagata feoaʻi, ʻO le ā le mea na tupu? Na matou misia atu oulua.’” Na ʻata Olinda ma faapea mai: “Na talotalo mai avepasi iā i maʻua ma valaau mai, ʻMālō le galulue!’ Na latou talosaga mai foʻi mo ni a latou mekasini.” Na faateʻia foʻi lenei ulugalii ina ua alu atu se tamāloa i le la fatatusi, avatu se teu fugālaau, ma faafetai atu mo le galuega o loo la faia.

18. Aiseā ua e maumauaʻi ai ina ia ʻfua mai ma le tumau’?

¹⁸ O le mea moni, o loo faia so tatou sao tāua i le avatuina o le “molimau i atunuu uma,” pe afai e lē “mālōlō [o tatou] lima” i le lūlūina o fatu o le Malo. (Mata. 24:14) E sili atu i lenā, o le a tatou maua le olioli moni ona o loo tatou faafiafiaina le finagalo o Ieova, auā e alofa o ia iā i latou uma e ʻfua mai ma le tumau’!