1. Aiseā ua tatou mautinoa ai o loo tatou ola i “aso e gata ai”?

PE NA e fanau ina ua mavae le tausaga e 1914? Afai o lea, ua e ola i lou olaga atoa i “aso e gata ai” o lenei faiga o mea. (2 Timo. 3:1) O i tatou uma na faalogo i mea na valoia e Iesu, e tutupu i lenei taimi. E aofia ai taua, oge, mafuiʻe, faamaʻi ma le sauāina o tagata o Ieova. (Mata. 24:3, 7-9, 12; Luka 21:10-12) Ua tatou vaaia foʻi tagata o amioaʻi e pei ona valoia e le aposetolo o Paulo. (Tagaʻi i le pusa “ O Uiga o Tagata i Aso Nei.”) Talu ai o i tatou o auauna a Ieova, ua tatou mautinoa la o loo tatou ola i “aso e gata ai.”​—Mika 4:1.

2. O ā fesili e manaʻomia ona tatou taliina?

² Talu ai ua tele tausaga talu ona mavae le 1914, ua talafeagai la ona faapea atu ua tatou ola i le faaiʻuga o “aso e gata ai.” Ona ua matuā lata mai le iʻuga, e manaʻomia la ona tatou iloa tali i nisi o fesili e sili ona tāua: O ā mea o le a tutupu i le iʻuga o “aso e gata ai?” O le ā e faatalitalia e Ieova mai iā i tatou a o tatou faatalitali i na mea o le a tutupu?

3. E tusa ai ma le valoaga o loo i le 1 Tesalonia 5:1-3, o le ā le alaga o le a faia e malo?

³ Faitau le 1 Tesalonia 5:1-3. O loo taʻua e Paulo le “aso o Ieova.” O loo faasino atu lenei mau i le vaitaimi e  amata ai le faaumatiaga o “Papelonia le Aai Tele,” le emepaea o lotu sesē, ae faaiʻu iā Amaketo. (Faaa. 16:14, 16; 17:5) O le a alaga e malo le “filemu ma le saogalemu!” a o toeitiiti lava amata lenā “aso.” E faaaogā e taʻitaʻi o malo i nisi taimi faaupuga talitutusa, pe a latou talanoaina le faaleleia o faiā a malo. * Peitaʻi, o le a ese mai ai le faalauiloaga o le “filemu ma le saogalemu” o loo taʻua i le Tusi Paia. Aiseā? Pe a tupu lenei mea, atonu e manatu tagata ua taulau taʻitaʻi o malo i le puipuia o le lalolagi, ma ua avea ma nofoaga e sili ona saogalemu. Peitaʻi o le mea moni, e ʻoo faafuaseʻi mai le faaumatiaga’ pe a amata le “puapuaga tele.”​—Mata. 24:21.

4. (a) O ā mea e tatou te lē iloa e faatatau i le faalauiloaga o le “filemu ma le saogalemu”? (e) O ā mea ua tatou iloa e faatatau i lenā faalauiloaga?

⁴ Ua tatou iloa nisi mea e faatatau i le faalauiloaga o le “filemu ma le saogalemu.” Ae e tatou te lē iloa isi mea. E tatou te lē iloa le māfuaaga ma le auala o le a faia ai lenei faalauiloaga. E tatou te lē iloa foʻi pe o le a tele ni faalauiloaga, pe e na o le tasi se faalauiloaga mataʻina. Po o le ā lava e tupu ae ua tatou iloa le mea lenei: E lē tatau ona faasesēina i tatou i le manatu, e mafai e taʻitaʻi o malo ona ausia le filemu i le lalolagi. Nai lo o lea, ua fautuaina i tatou e le Tusi Paia ina ia mataala i lenā faalauiloaga, o le faailoga o le a amata le “aso o Ieova.”

5. Ua faapefea ona fesoasoani le 1 Tesalonia 5:4-6 e tatou te nofosauni ai mo le “aso o Ieova”?

⁵ Faitau le 1 Tesalonia 5:4-6. Ua fautua mai Paulo i le auala e tatou te faamautinoa ai, ua tatou nofosauni mo le “aso o Ieova.” E lē tatau ona tatou “momoe pea e faapei o isi.” E tatau ona tatou “mataala.” O se faaaʻoaʻoga, e tatau ona mataala i le mataʻutia o le lē tausia o lo tatou tulaga solitū, e ala i lo tatou aafia i mataupu faapolotiki a le lalolagi. Afai tatou te aafia ai, ua avea la tatou ma “tagata o le lalolagi.” (Ioa. 15:19) Ua tatou iloa e na o le Malo o le Atua le faamoemoe o le filemu mo le lalolagi.

6. O le ā e tatou te mananaʻo e fesoasoani i isi e fai, ma aiseā?

⁶ E lē gata e tatau ona tatou mataala, ae e tatou te mananaʻo foʻi e fesoasoani i isi ia mataala, i mea o loo valoia i le Tusi Paia o le a tutupu i le lalolagi. E ao ona tatou manatua, pe a gapā le puapuaga tele, ua leai se avanoa mo tagata e liliu ai iā Ieova. O le māfuaaga lenā ua faanatinati ai la tatou galuega talaʻi! *

7. O le ā e faatalitalia i tatou e Ieova e fai i le taimi nei?

⁷ I lenei taimi puupuu o totoe a o leʻi amata le “aso” o Ieova, e na te faatalitalia i  tatou ia pisi pea i le galuega talaʻi. E ao ona tatou faamautinoa o loo “tele pea mea e fai i le galuega a le Alii.” (1 Kori. 15:58) Na valoia e Iesu le mea e tatou te faia. Ina ua talanoa o ia e faatatau i mea mataʻina uma o le a tutupu i aso e gata ai, na ia toe faapea mai: “E ao foʻi ona muaʻi talaʻiina atu le tala lelei i atunuu uma lava.” (Mare. 13:4, 8, 10; Mata. 24:14) Seʻi mafaufau: O taimi uma e te auai ai i le galuega talaʻi, o lenā ua fai lou sao i le faataunuuina o lenā valoaga a le Tusi Paia.

8. Ua faapefea ona agaʻigaʻi pea i luma le galuega talaʻi o le Malo?

⁸ O le ā ua tatou iloa e faatatau i le faateleina o le galuega talaʻi o le Malo? O loo agaʻigaʻi i luma i tausaga taʻitasi lenei galuega. O se faaaʻoaʻoga, seʻi mafaufau i le faatupulaʻia o tagata talaʻi o le Malo i le lalolagi aoao i nei aso e gata ai. I le 1914, e na o le 5,155 le ʻautalaʻi i atunuu e 43. Ae i aso nei, pe ā ma le 8.5 miliona tagata talaʻi i atunuu e 240. Peitaʻi, e lē o muta ai i inā la tatou galuega. E tatau ona faailoa atu pea le Malo o le Atua, ua na o le pau lea o le vaifofō i faafitauli uma o tagata.​—Sala. 145:11-13.

9. Aiseā e tatau ai ona tatou talaʻia pea le feʻau o le Malo?

⁹ E lē muta la tatou galuega talaʻi o le Malo seʻi vaganā ua faamuta e Ieova. O le ā le tele o le taimi o totoe mo tagata, e latou te aʻoaʻo ai e faatatau iā Ieova le Atua ma Iesu Keriso? (Ioa. 17:3) E tatou te lē iloa. Ae ua tatou iloa, e mai i lenei taimi seʻia oo i le amataga o le puapuaga tele, o le a tali mai pea i le tala lelei tagata uma “ua saunia o latou loto mo le ola e faavavau.” (Galu. 13:48) E faapefea ona tatou fesoasoani i nei tagata a o leʻi tuai?

10. O ā fesoasoani ua saunia mai e Ieova e aʻoaʻo ai le upu moni i tagata?

¹⁰ Ua saunia e Ieova e ala mai i lana faalapotopotoga mea uma e tatou te manaʻomia, ina ia aʻoaʻo ai tagata i le upu moni. O se faaaʻoaʻoga, ua tatou maua toleniga i vaiaso taʻitasi mai i sauniga amata o le vaiaso. Ua fesoasoani iā i tatou lenei sauniga, e iloa ai taulimaga e fai i uluaʻi asiasiga ma toe asiga. O loo aʻoaʻo ai foʻi i tatou i le auala e faia ai suʻesuʻega faale-Tusi Paia. Ua saunia foʻi e le faalapotopotoga lomiga ma vitiō i la tatou Meafaigaluega mo le Aʻoaʻo Atu. Ua fesoasoani nei mea iā i tatou e . . .

•   amata ai talanoaga,

• faaoso naunau,

• uunaʻia ai tagata ia fia iloa atili,

• aʻoaʻo ai le upu moni i suʻesuʻega faale-Tusi Paia, ma

• valaaulia tagata fiafia ia asiasi i la tatou upega tafaʻilagi, po o tatou Maota mo Sauniga.

E moni e lē lava le tau ina i ai o nei meafaigaluega. E tatau ona tatou faaaogāina. * Mo se faaaʻoaʻoga, pe a uma se talanoaga ma se tagata fiafia, ona e tuua lea i ai o se sāvali po o se mekasini, o le a mafai ona ia faitau i ai seʻia oo i le taimi e mafai ona e toe fesootaʻi iai. O lo tatou tiute tauave, ia pisi pea i le galuega talaʻi o le Malo i masina taʻitasi.

11. O le ā le fuafuaga o le Online Bible Study Lessons?

¹¹ O se tasi faaaʻoaʻoga o le auala o loo fesoasoani ai Ieova i tagata ia latou iloa le upu moni, o le iloilo lea o le vaega Online Bible Study Lessons i le jw.org. (Tagaʻi i le BIBLE TEACHINGS > ONLINE LESSONS.) O le ā le fuafuaga o nei lesona? I masina taʻitasi, e faitau afe tagata i le lalolagi aoao, ua saʻili mo lesona faale-Tusi Paia i le initaneti. O lesona mai i la tatou upega tafaʻilagi, ua mafai ai ona faailoa atu i nei tagata le upu moni o le Afioga a le Atua. O nisi tagata e tatou te talanoa i ai, atonu e faatalatū e talia se suʻesuʻega faale-Tusi Paia. Afai o lea, faaali iā i latou le vaega o la tatou upega tafaʻilagi, pe lafo foʻi i ai le link o nei lesona. *

12. O le ā e mafai e tagata ona aʻoaʻoina mai i le Online Bible Study Lessons?

¹² O loo talanoaina i la tatou Online Bible Study Lessons nei mataupu: “The Bible and Its Author,” “The Bible’s Main Characters,” ma le “The Bible’s Message of Hope.” E aʻoaʻoina i nei mataupu:

• Le auala e fesoasoani ai le Tusi Paia i se tasi

• Po o ai Ieova, Iesu ma le ʻauagelu

• Le māfuaaga na foafoaina ai e le Atua tagata

• Le māfuaaga ua tutupu ai mafatiaga ma mea leaga

E iloiloina ai foʻi le auala a Ieova o le a . . .

• faamuta ai mafatiaga ma le oti,

• toe faatūina mai ai tagata mai i le oti, ma

• suia ai e le Malo o le Atua ia malo lē taulau a tagata

13. Po ua suia e online lessons le faatulagaga o suʻesuʻega faale-Tusi Paia? Ia faamatala.

¹³ E lē o suia e le online lessons le faatulagaga o suʻesuʻega faale-Tusi Paia. Ua tuu mai e Iesu iā i tatou le faaeaga o le faia o isi ma soo. E tatou te faamoemoe o le a iloilo e i latou e faaalia le naunau ia lesona i luga o la tatou upega tafaʻilagi, talisapaia mea ua latou aʻoaʻoina, ma naunau ia fia iloa atili. Afai o lea, atonu o le a latou talia se suʻesuʻega faale-Tusi Paia. I le faaiʻuga o lesona taʻitasi, e valaaulia le tagata faitau e talosaga mo se tasi e na te faia lana suʻesuʻega faale-Tusi Paia. I la tatou upega tafaʻilagi, o le fua faatatau o i latou e talosaga mai mo ni suʻesuʻega faale-Tusi Paia i le lalolagi aoao, e silia ma le 230 i aso taʻitasi. E tāua le faia o sau suʻesuʻega faale-Tusi Paia ma se tasi o Molimau a Ieova!

14. E tusa ai ma le faatonuga a Iesu o loo i le Mataio 28:19, 20, o le ā le mea e sili e tatou te faia, ma aiseā?

¹⁴ Faitau le Mataio 28:19, 20. A o tatou faia suʻesuʻega faale-Tusi Paia, e tatou te faia le mea e sili ina ʻia fai isi ma soo ma ia aʻoaʻoina i latou ia tausi i mea uma na poloaʻi mai ai Iesu.’ E manaʻomia ona tatou fesoasoani i  isi ia latou malamalama i le tāua o lo latou lagolagoina o Ieova ma lona Malo. E tatou te taumafai e uunaʻia tagata ia talisapaia le upu moni, e ala i le faatatau o mea ua latou aʻoaʻoina, tuuina atu o latou ola mo Ieova ma papatisoina. O le faia faapea o le a faaolaina ai i latou i le aso o Ieova.​—1 Pete. 3:21.

15. O le ā e lē tatau ona tatou faia ma aiseā?

¹⁵ E pei ona taʻua muamua, i le taimi lenei seʻia oo i le iʻuga o lenei faiga o mea, ua matuā itiiti le taimi o totoe. O lea, e lē tatau ona faaauau pea ona tatou suʻesuʻe le Tusi Paia ma i latou e leai se faanaunauga e fia avea ma soo o Keriso. (1 Kori. 9:26) Ua faanatinati la tatou galuega! E toʻatele isi e leʻi faalogo muamua i le feʻau o le Malo a o leʻi tuai.

16. I le Faaaliga 18:2, 4, 5, 8, o le ā e tatau iā i tatou uma ona fai? (Tagaʻi i le faaopoopoga i le pito i lalo.)

¹⁶ Faitau le Faaaliga 18:2, 4, 5, 8. O nei fuaiupu o loo faailoa mai ai se isi mea e faatalitalia e Ieova mai i ona tagata tapuaʻi. E tatau i Kerisiano uma ona faamautinoa e lē o aafia ma e leai ni fesootaʻiga ma Papelonia le Aai Tele. A o leʻi aʻoaʻoina e se tagata le upu moni, atonu na avea o ia ma sui o se lotu sesē. Atonu na ia auai i sauniga faalelotu ma mea e fai a lotu. Pe atonu foʻi na ia foaʻi ni tupe i lenā faalapotopotoga. Ina ia agavaa se tagata aʻoga e avea ma tagata talaʻi e leʻi papatiso, e lē tatau ona iai sana vaega i so o se mea e fai a lotu sesē. E tatau ona ia faia se tusi faamavae, po o le vavaeese atoatoa foʻi mai i lenā lotu, po o so o se faalapotopotoga e faifaimea faatasi ma Papelonia le Aai Tele. *

17. O ā ituaiga galuega totogi e tatau ona teena e Kerisiano, ma aiseā?

¹⁷ E tatau i Kerisiano moni ona faamautinoa, e leai se fesootaʻiga a lana galuega totogi ma Papelonia le Aai Tele. (2 Kori. 6:14-17) O se faaaʻoaʻoga, e lē tatau ona faigaluega mo se lotu. E lē gata i lea, e lē manaʻo se Kerisiano o loo faigaluega i se isi pisinisi, e faia ni galuega tetele i se fale o loo faaauiluma ai tapuaʻiga sesē. Afai foʻi e i ai sana ia lava pisinisi, e lē tatau ona aafia i tauofoga po o konekarate e faia galuega i so o se vaega a Papelonia le Aai Tele. Aiseā ua tatou maumauaʻi ai e teena nei tulaga? Talu ai e tatou te lē mananaʻo e tofusia i galuega ma agasala a faalapotopotoga faalotu, ia e lē mamā i le silafaga a Ieova.​—Isa. 52:11. *

18. Na faapefea ona pipii pea se uso i mataupu silisili o le Tusi Paia, e faatatau i lana galuega totogi?

 ¹⁸ I tausaga ua mavae, na talosagaina ai e se tamāloa e i ai sana pisinisi faufale se toeaina e fai sana pisinisi kamuta, e na te faia se galuega laʻitiiti o le falesā, i le taulaga lea na nofo ai le uso. Na iloa e le tamāloa, e lē talia e le uso galuega i falesā. Ae i lenā taimi na matuā manaʻomia lava e le tamāloa se tasi e faia le galuega. Peitaʻi, na pipii pea le uso i mataupu silisili o le Tusi Paia ma ia teena ai le galuega. I le vaiaso na sosoo ai, na faalauiloa ai i se nusipepa se ata o se isi kamuta, o loo ia faapipiiina se koluse i le falesā. Pe ana lolo atu le uso, semanū o lona ata lea o loo faaali i le nusipepa. Seʻi mafaufau i le faaleagaina o lona talaaga i ona uso Kerisiano. Ae seʻi mafaufau foʻi i le aafia o faalogona o Ieova.

19-20. (a) O ā mea ua tatou iloaina? (e) O ā nisi o mea e manaʻomia ona tatou iloa?

¹⁹ E tusa ai ma valoaga a le Tusi Paia, o le isi mea mataʻina ua toeitiiti faataunuu i le lalolagi, o le alagaina lea e atunuu o le “filemu ma le saogalemu.” E tatou te lotofaafetai iā Ieova, ona ua ia aʻoaʻoina i tatou e iloa e lē mafai ona ausia e atunuu se filemu moni e tumau. O le ā e tatau ona tatou faia a o leʻi tupu lenei mea, ma le oo faafuaseʻi mai o le faaumatiaga? E faatalitalia e Ieova i tatou ia pisi pea i le talaʻia o le feʻau o le Malo, ma taumafai ia faia le toʻatele ma soo. Ae i le taimi e tasi, e manaʻomia ona tatou vavaeese mai i lotu sesē uma. E aofia ai le faamavae mai o ni sui o lotu, ma teena le faia o galuega e fesootaʻi atu iā Papelonia le Aai Tele.

²⁰ E iai nisi mea o le a tutupu a o faagasolo le faaiʻuga o “aso e gata ai.” O lea, e iai foʻi nisi mea e faatalitalia e Ieova e tatou te faia. O ā nei mea, ma e faapefea ona tatou sauniuni mo mea uma ua latalata ona tutupu i le lumanaʻi? O le a tatou iloa i le mataupu o le a sosoo mai.