Na faateleina le manaʻoga mo lomiga ona ua faatupulaʻia le fuainumera o tagata talaʻi. E ui lava na saunia e uso i le Peteli i Brooklyn mekasini, ae sa latou faalagolago pea i fale lomitusi e lolomia tusi faavaa malō. Na tele masina e leʻi mafai ai e fale lomitusi ona lomia lomiga e faaaogā i le galuega talaʻi. O lea na talosaga atu ai le uso o Rutherford i le uso o Robert Martin, o lē na vaaia le fale lomitusi, pe e mafai ona latou lomia a latou lava lomiga.

Na faapea mai le uso o Martin, “O se manatu matuā manaia tele, auā o lea o le a tatala se fale lomitusi e mafai ona saunia ai tusi.” O lea, na lisiina ai e uso se fale i le 18 Concord Street i Brooklyn ma faatau meafaigaluega na manaʻomia.

Ae e lē o tagata uma na fiafia o le a lolomi e uso a latou lava tusi. Na asiasi atu i le fale lomitusi fou le peresitene o le kamupani lea na lolomia a tatou tusi. Na ia faapea atu: “Ua outou maua se fale lomitusi e sili ona lelei, ae e leai se tasi e na te iloaina pe faapefea ona faagaoioia. O le a lē toe aogā nei masini pe a uma le ono masina.”

Na taʻua e le uso o Martin, “E foliga mai e saʻo lea manatu peitaʻi o loo galo iā te ia le Alii; e faatasi o ia ma i tatou.” Na saʻo le faamatalaga a le uso o Martin. E leʻi umi ae mafai ona lomia i le fale lomitusi ni tusi e 2,000 i le aso e tasi.

E ese mai i le lomia o a latou lava tusi, ae na faaaogā foʻi e tagata o Ieova se isi auala fou e faalauiloa atu ai le tala lelei, o faasalalauga i le leitiō. I le aoauli o le Aso Sa iā Fepuari 26, i le 1922, na faia ai e le uso o Rutherford mo le uluaʻi taimi i le leitiō se lauga na faamatuaina, “Millions Now Living Will Never Die.” Na faasalalauina lenā  lauga i le alāleo faasalalau o le KOG i Los Angeles i Kalifonia, i le Iunaite Setete o Amerika.

Pe tusa ma le 25,000 i latou na faalogologo i lenā polokalame. Na lafo atu e nisi ni tusi e faailoa atu ai lo latou talisapaia o lenā lauga. O se tasi o na tusi sa aumai mai iā Willard Ashford, e nofo i Santa Ana i Kalifonia. Na ia faafetaia le uso o Rutherford mo le lauga “matagofie ma faaoso naunau.” Na ia toe faapea mai: “E toʻatolu ni tagata o lo matou aiga na mamaʻi ma e lē mafai ona latou tuua le fale. O lea, pe ana lē faia le lauga i le leitiō semanū e lē mafai ona matou faalogologo i ai, e tusa lava pe na e faia le lauga i se nofoaga latalata mai.”

E tele foʻi isi lauga na faia i le leitiō i vaiaso na sosoo ai. I le faaiʻuga o le 1922, na taʻua ai i le Watch Tower: “A itiiti ifo e pe ā ma le 300,000 tagata na mauaina le feʻau o le tala lelei e ala i faasalalauga i le leitiō.”

O na tusi ma faamatalaga faalaeiau, na uunaʻia ai Tagata Aʻoga o le Tusi Paia e faia se alāleo faasalalau i se fanua i Staten Island, lea e lē mamao mai i le Peteli i Brooklyn. I tausaga na sosoo ai, na faaaogā ai e Tagata Aʻoga o le Tusi Paia lenā alāleo faasalalau e taʻua o le WBBR, e faalauiloa atu ai le feʻau o le Malo i le toʻatele e mafai ai.

Na faasilasila mai i le Watch Tower o Iuni 15, 1922, se tauaofiaga o le a faia i Cedar Point i Ohio mai iā Setema 5 e oo iā Setema 13, 1922. Na matuā fiafia Tagata Aʻoga o le Tusi Paia ina ua latou taunuu i Cedar Point.

I lana lauga amata, na faapea atu ai le uso o Rutherford i le aofia: “Ou te matuā mautinoa o le a . . . faamanuia e le Alii lenei tauaofiaga, ma avatu ai se molimau lea e leʻi tupu muamua i le lalolagi.” Na faamamafa e failauga i lenā tauaofiaga le tāua o le galuega talaʻi.

I le Aso Faraile iā Setema 8, e pe ā ma le 8,000 i latou na faapotopoto i se fale telē e faatalitali ai ma le naunau i le lauga a le uso o Rutherford. Na latou faatalitalia o le a ia faamatalaina le uiga o mataʻitusi “ADV,” lea sa lolomiina i luga o a latou valaaulia. Ina ua latou saofafaʻi i o latou nofoa, na mātauina ai e nisi se taʻaiga ʻie telē i luga aʻe o le pulelaa. E iai se uso e igoa iā Arthur Claus, na  malaga atu i le tauaofiaga mai i Tulsa i Oklahoma, i le Iunaite Setete o Amerika. Sa saofaʻi i le pito o le fale lea na manino lelei ai lana faalogo i le lauga, ona e leʻi faaaogāina ni mea faaleotele leo i le tauaofiaga.

Ina ia faamautinoa e leai se tasi e faalavelave a o faagasolo le lauga, na faasilasila atu ai e le taʻitaʻifono e lē toe faatagaina ona ulufale mai se tasi i totonu o le fale a o faia le lauga a le uso o Rutherford. I le 9:30 i le taeao, na amata ai le lauga a le uso o Rutherford i upu a Iesu o loo i le Mataio 4:17: “Ua latalata mai le malo o le lagi.” (Tusi Paia Samoa—Lomiga 1969) Ina ua ia talanoa i le auala o le a faalogo ai tagata e faatatau i le Malo, na ia faapea mai: “Na faailoa mai e Iesu lava ia, i le taimi o lona faatasi mai o le a ia faia ai le seleselega o tagata, lea o le a ia aoaoina ai i latou e faamaoni.”

Na taʻua e le uso o Arthur: “Na matou uaʻi totoʻa i upu uma o le lauga.” Peitaʻi na faafuaseʻi ona ia lagonaina le maʻi, ma ia tuua ai le fale. Na faatalatū o ia e alu ese, ona na ia iloa e lē toe faatagaina ona toe sau se isi i totonu.

E leʻi umi ae ia toe lagona le malosi. Na ia faamatalaina a o ia toe savali atu i le fale, na ia lagona atu le patipati leotele o le aofia ma na matuā faagaeetia ai o ia. O lea, na mafaufau ai loa le uso o Arthur e 23 tausaga, e aʻe i luga o le fale ina ia lagona atu ai le vaega o loo totoe o lea lauga matagofie, ma o le mea lenā na ia faia. Sa iai ni faamalama tetelē na matala i le pito i luga o le fale, ma na mafai ona lagona lelei ai e Arthur le lauga.

Ae e lē na o Arthur sa iai i lea vaega o le fale. Sa iai foʻi ma nisi o ana uō, ma o se tasi o i latou o Frank Johnson. Na ia tamoʻe mai iā Arthur ma fesili i ai, “E iai sau tamaʻi naifi maʻai?”

Na tali atu Arthur, “Lea e iai.”

Na faapea mai Frank, “O oe le tali o a matou tatalo. O e vaai atu i le taʻaiga ʻie telē lea? O se faailoilo o loo faamau i fao. Ia faalogo lelei i  le Faamasino. * O le taimi lava e faapea mai ai, ʻfaalauiloa, faalauiloa,’ ona tipi loa lea o maea ia e fā.”

O lea na faatalitali ai Arthur ma ana uō i le taimi e fai mai ai e le uso o Rutherford na upu, ona tipi loa lea o maea. E leʻi umi ae taʻua loa e le uso o Rutherford le vaega e sili ona tāua o lana lauga. Na matuā faagaeetia le uso o Rutherford ma faia le lauga i se uiga aasa, ma na toetoe ai lava a valaau leotele mai: “Ia avea o ni molimau faamaoni ma le moni mo le Alii. Ia agaʻi i luma i le taua seʻia oo ina matuā faatamaʻia vaega uma o Papelonia. Ia faalauiloa atu le feʻau i le lalolagi aoao. E tatau ona iloa e le lalolagi o Ieova o le Atua, ma o Iesu Keriso o le Tupu o tupu ma le Alii o alii. O le aso lenei ua silisili i aso uma. Faauta, ua pule le Tupu! O outou o ona sui, ma e tatau ona faailoa atu o ia i le lautele. O lea, ia faalauiloa, faalauiloa, faalauiloa, le Tupu ma lona Malo!”

Na faamatala e Arthur ina ua latou tatipiina maea, ona matala mālie ifo lea o le faailoilo. Na tusia i lenā faailoilo le faaupuga “Advertise the King and Kingdom” (Ia Faalauiloa le Tupu ma le Malo). Pe a faapuupuu le upu “Advertise,” ona maua ai lea o mataʻitusi “ADV” lea na lolomiina i luga o valaaulia.

Na fesoasoani le tauaofiaga na faia i Cedar Point i uso e taulaʻi ai i le galuega tāua o le talaʻia o le Malo, ma o i latou na faia ai so latou sao na maua le fiafia. Na tusi se paeonia (lea sa taʻua o le colporteur) mai i Oklahoma i le Iunaite Setete o Amerika e faapea: “Na matou talaʻi i se vaipanoa e eli ai le koale, ma e matuā matitiva tagata e nonofo ai.” Na ia taʻua o taimi uma lava e faalogo ai tagata i le feʻau o loo i le mekasini Golden Age, “e latou te fetagisi.” Na ia taaofaʻi ona lagona i upu nei, “O se matuā faaeaga le faamāfanafana iā i latou.”

Na iloa e Tagata Aʻoga o le Tusi Paia le tāua o upu a Iesu o loo i le Luka 10:2: “E telē le galuega o le seleselega, ae e toʻaitiiti le ʻaufaigaluega.” A o lata ina faaiʻu le tausaga, na atili ai ona latou maumauaʻi nai lo o le taimi muamua e faalauiloa le feʻau o le Malo i so o se vaipanoa.