1, 2. Pe a filifili ou sini i le olaga, aiseā e atamai ai ona faalogo i Lē na foafoaina i tatou? (Tagaʻi i ata i luga aʻe o le matua.)

PE AFAI o oe o se talavou, e mautinoa ua e maua le tele o fautuaga e faatatau i lou lumana‘i. Atonu e faalaeiauina oe e faia‘oga, o tagata faufautua i a‘oga ma isi ina ia sa‘ilia a‘oa‘oga maualuluga ma se galuega e telē le totogi. Peita‘i, e ese le ala e faalaeiauina oe e Ieova e uia. Ae i le taimi e tasi, e finagalo o ia ina ia e to‘aga i le a‘oga ina ia mafai ona e tausia oe lava pe a uma lau a‘oga. (Kolo. 3:23) O lea, pe a e filifili po o le ā e faamuamua i lou olaga, e faalaeiauina oe e Ieova ina ia ta‘ita‘ia oe e ana ta‘iala lea e ōgatusa ma lona finagalo, i lenei taimi o le i‘uga.​—Mata. 24:14.

² Ia e manatua e silafia e Ieova mea uma. E na te silafia le lumana‘i ma le matuā lalata mai o le i‘uga. (Isa. 46:10; Mata. 24:3, 36) E silafia fo‘i e Ieova i tatou ma mea e tatou te maua ai le fiafia ma le faamalieina moni, faapea mea e tatou te aafia ai i mafatiaga. O lea, po o le ā lava le logolelei o fautuaga a tagata, ae pe afai e lē ōgatusa ma le Afioga a le Atua, e lē o iai la se atamai.​—Faata. 19:21.

3, 4. Na faapefea i le faalogo i fautuaga leaga ona aafia ai Atamu ma Eva ma a la fanau?

³ Ua leva ona iai fautuaga leaga. O Satani na muamua lava aumaia fautuaga leaga i tagata, e ala i lona fai iā Eva e sili atu lo la fiafia ma Atamu pe a pule lava i la‘ua i mea e fai i o la olaga. (Kene. 3:1-6) Peita‘i, sa manatu faapito Satani. Na naunau o ia ina ia gaua‘i ma tapua‘i atu Atamu ma Eva ma a la fanau iā te ia nai lo o Ieova. Ae o ā ni mea na fai e Satani mo i la‘ua? O Ieova na foafoaina i la‘ua, o le faato‘aga matagofie na la nonofo ai, faapea o la tino lelei atoatoa lea na mafai ona la ola ai e faavavau.

⁴ E faanoanoa ona e le‘i usiusita‘i Atamu ma Eva iā Ieova, ma vavaeese mai iā te ia. E mata‘utia i‘uga ua oo i ai. E tai pei lava o ni fugālaau ua faasolo ina magumagu pe a tipiese mai i se laau, na faapena fo‘i ona faasolosolo ina matutua ma feoti Atamu ma Eva. E oo fo‘i i a la fanau ua mafatia i āuga o le agasala. (Roma 5:12) E ui i lea, o loo filifili lava le to‘atele e lē gaua‘i i le Atua, ma manana‘o e pule lava i latou i le mea e fai i o latou olaga. (Efe. 2:1-3) O le i‘uga, ua iloa ai e le to‘atele ‘e leai se atamai e tetee atu iā Ieova.’​—Faata. 21:30.

5. O le ā na mautinoa ai pea Ieova e faatatau i tagata, ma pe na sesē lona manatu?

⁵ Peita‘i, na mautinoa e Ieova e iai lava tagata e aofia ai ma le to‘atele o talavou o loo sa‘ili ma auauna iā te ia. (Sala. 103:17, 18; 110:3) E matuā tautele i latou iā te ia. Po o oe o se tasi o i latou na? Pe afai o lea, e tele “mea lelei” mai i le Atua e atili ai ona e olioli. (Faitau le Salamo 103:5; Faata. 10:22) E fā nisi o nei “mea lelei” o le a tatou iloiloina: o mea‘ai faaleagaga, uō lelei, sini aogā, ma le sa‘olotoga moni.

6. Aiseā e tatau ai ona e naunau i ou mana‘oga faaleagaga, ma ua faapefea ona tausia e Ieova lenā mana‘oga?

⁶ E leai ni mana‘oga faaleagaga o manu, peita‘i e iai o tatou mana‘oga faaleagaga, ma e na o Ieova e mafai ona faamalieina lenā mana‘oga. (Mata. 4:4) Pe a e faalogo i le Atua, o le a e maua ai le malamalama, atamai, ma le fiafia. Na fetalai Iesu: “E fiafia o ē e naunau i mea faaleagaga.” (Mata. 5:3) E faamalie e le Atua ou mana‘oga faaleagaga e ala mai i lana Afioga, faapea le anoanoa‘i o mea‘ai faaleagaga ua saunia mai e le “pologa faamaoni ma le faautauta.” (Mata. 24:45) E matuā fau ma soloi ma susua na mea‘ai faaleagaga!​—Isa. 65:13, 14.

7. O ā nisi o aogā o le faaaogā tatau o mea‘ai faaleagaga ua saunia mai e le Atua?

⁷ O mea‘ai faaleagaga ua saunia mai e Ieova e te maua ai le atamai ma le mafaufau lelei, lea e mafai ona puipuia ai oe. (Faitau le Faataoto 2:10-14.) O se faaa‘oa‘oga, o nei uiga ua mafai ai ona e iloa a‘oa‘oga pepelo e pei o le manatu e leai Sē na foafoaina mea. E puipuia ai fo‘i oe mai i le manatu sesē e faapea, o tupe ma meafaitino e maua ai le fiafia moni. E mafai ai fo‘i ona e iloa ma teena tu‘inanauga sesē ma gaoioiga e te tigā ai. O lea, ia sa‘ili pea mo le atamai mai i le Atua ma le mafaufau lelei. Pe a e mauaina na uiga, o le a e faamaonia ai e oe lava ia, e alofa Ieova iā te oe ma e naunau i le mea e sili ona lelei mo oe.​—Sala. 34:8; Isa. 48:17, 18.

8. Aiseā e tatau ai ona e mafuta vavalalata iā Ieova i le taimi lenei, ma e faapefea ona e maua ai aogā i le lumana‘i?

⁸ E lē o toe umi ona faaumatia lea o vaega uma o le lalolagi a Satani, ma e na  o Ieova o le a tatou maua ai le puipuiga. Ua lata mai le taimi o le a tatou matuā faalagolago ai iā Ieova, atonu e oo lava i a tatou mea‘ai i aso ta‘itasi. (Sapa. 3:2, 12-19) O lea, o le taimi lenei e te mafuta vavalalata ai i lou Tamā i le lagi, ma faamalosia lou maufaatuatuaina o ia. (2 Pete. 2:9) Pe a e faia faapea, e tusa po o le ā e tupu ae o le a pei ou faalogona o le faisalamo o Tavita o lē na tusi: “Ua ou tuu Ieova i o‘u luma e lē aunoa. Ou te lē tautevateva fo‘i auā o loo iai o ia i lo‘u itu taumatau.”​—Sala. 16:8.

9. (a) E pei ona ta‘ua i le Ioane 6:44, o le ā le gaoioiga e faia e Ieova? (e) O le ā se mea e mata‘ina ai pe a e feiloa‘i i se isi Molimau?

⁹ E tosina mai ma le agalelei e Ieova tagata lotofaamaoni i le tapua‘iga moni, ma avea ai i latou ma sui o lona aiga faaleagaga. (Faitau le Ioane 6:44.) I le taimi muamua e te feiloa‘i ai i se tagata e lē upu moni, o ā ni mea e te iloa e faatatau i lenā tagata? Atonu e na o lona igoa, o ona foliga ma nai faamatalaga lāiti e faatatau iā te ia. Peita‘i, e lē faapena le taimi muamua e te feiloa‘i ai i sē e auauna iā Ieova. E tusa pe e ese lona talaaga, atunuu, ituaiga, po o lana aganuu, ae e tele mea e iloa e le isi e faatatau i le isi.

10, 11. O ā ni mea e tutusa ai tagata o Ieova, ma ua faapefea ona tatou maua ai aogā?

¹⁰ O se faaa‘oa‘oga, e vave ona oulua mātauina e tutusa le gagana o loo lua faaaogāina, o le “gagana mamā” lea. (Sefa. 3:9) O lona uiga e te lua talitonu i le Atua, ola e tusa ai ma ana tapulaa tauamio, ma e tutusa lua faamoemoe i le lumana‘i. O mea na e sili ona tāua e te iloa ai se tagata, ma atia‘e ai le maufaatuatuaina e le tasi o le isi. O le faavae fo‘i lenā o ni faauōga māfana ma tumau.

¹¹ Pe a e tapua‘i iā Ieova, o le a mafai la ona e maua ni uō e sili ona lelei i le lalolagi aoao. E pau le mea e mana‘omia ona fai, o lou feiloa‘i iā i latou. E na o tagata lava o Ieova o loo olioli i lenei meaalofa tautele.

12. O ā ni sini faaleagaga e mafai ona e faataatitia?

¹² Faitau le Failauga 11:9–12:1. Po o iai nisi sini faaleagaga o loo e taumafai e ausia? Atonu o loo e taumafai e faitau se vaega o le Tusi Paia i aso ta‘itasi. Pe atonu fo‘i o loo e taumafai e faaleleia le auala e te tautala ma a‘oa‘o atu ai. O ā ni ou faalogona pe a e vaaia i‘uga lelei o au taumafaiga pe e faamalō atu fo‘i se isi iā te oe? E mautinoa e te lagona le olioli ma le faamalieina. Aiseā? Talu ai o loo e faia le finagalo o Ieova e pei ona sa faia e Iesu.​—Sala. 40:8; Faata. 27:11.

13. Aiseā e sili atu ai le auaunaga iā Ieova pe a faatusatusa i galuega a le lalolagi?

¹³ O le taula‘i atu i le auaunaga iā Ieova, o le a e maua ai le faamalieina i le iloaina e lē i‘uvale au taumafaiga. Na tusi le aposetolo o Paulo: “Ia outou tutumau, ia mausalī, ma ia tele pea mea e fai i le galuega a le Alii, ma le iloa e lē i‘uvale a outou galuega fitā i le Alii.” (1 Kori. 15:58) Ae i le isi itu, o le taula‘i atu i sini ma galuega a le lalolagi, e ui e foliga mai e taulau manuia, ae e i‘uvale. (Luka 9:25) E tatou te iloa le sa‘o o lenā manatu i le faaa‘oa‘oga a le tupu o Solomona.​—Roma 15:4.

14. O le ā e te a‘oa‘oina mai i le faaa‘oa‘oga a Solomona?

¹⁴ Sa matuā tele le tamaoaiga ma le pule sa iā Solomona, ma na ia tofotofo i mea eseese ina ia vaai po o le ā e sili. Na ia faapea ifo iā te ia lava: “Inā sau ia, se‘i o‘u tofotofo iā te a‘u i le olioli. Ia vaai fo‘i i mea lelei.” (Fai. 2:1-10) Na ia fausia fale matagofie, fai togālaau tetele, ma fai so o se mea na ia faananau i ai. Pe na ia maua le fiafia ma le faamalieina? E mautinoa e leai, auā na ia faapea ifo iā te ia lava: ‘Sa ou liliu atu i a‘u galuega uma na faia e o‘u lima. E faatauvaa mea uma, ma e leai se mea e aogā.’ (Fai. 2:11) Ma‘eu se lesona malosi mo i tatou! Po o le a e teuloto lenā fautuaga atamai?

15. Aiseā e tāua ai le faatuatua, ma o ā aogā e maua mai ai e pei ona taʻua i le Salamo 32:8?

¹⁵ O nisi tagata e faato‘ā latou a‘oa‘oina se lesona pe a mafatia i āuga leaga o a latou mea sesē. Peita‘i, e lē finagalo Ieova e tupu lenā mea iā te oe. E te mana‘omia le faatuatua ina ia mafai ai ona e usiusita‘i i le Atua ma faamuamua lona finagalo i lou olaga. E tāua tele le faatuatua, ma e te lē salamō i ni filifiliga e te faia i lou olaga ona o lou faatuatua. Ioe, e lē faagalogalo e Ieova “le alofa ua outou faaali mai i lona suafa.” (Epe. 6:10) O lea, ia galue mamafa e faamalosia lou faatuatua, ona e tofo ai lea i le moni o lenei manatu, o loo naunau lou Tamā i le lagi i mea e sili ona lelei mo oe.​—Faitau le Salamo 32:8.

16. Aiseā e tatau ai ona tatou faatāuaina ma faaaogā tatau lo tatou sa‘olotoga?

¹⁶ Na tusi Paulo: “O le mea e iai le agaga o Ieova, e iai le sa‘olotoga.” (2 Kori. 3:17) E fiafia Ieova i le sa‘olotoga, ma na ia foafoaina i tatou ina ia fiafia fo‘i i le sa‘olotoga. Peita‘i, e finagalo o ia ina ia tatou faaaogā tatau lenā sa‘olotoga, ona avea lea ma puipuiga mo i tatou. Atonu e te iloa se talavou o loo matamata i ata matagā tau feusuaʻiga pe aafia fo‘i i amioga lē mamā, taaloga e lamatia ai le ola, po o le faaaogāina o fualaau faasāina ma le inu tele i le ‘ava malosi. I le taimi muamua, e foliga mai o le faia o na mea e maua ai le fiafia. Peita‘i, e masani ona i‘u atu ai i āuga leaga e pei o faama‘i, faapologaina i  tu‘inanauga, po o le oti fo‘i. (Kala. 6:7, 8) Ua manatu talavou o loo faia nei mea o loo latou sa‘oloto, peita‘i ua faasesēina i latou.​—Tito 3:3.

17, 18. (a) E faapefea ona tatou sa‘oloto pe a usita‘i i le Atua? (e) O le ā le eseesega o le sa‘olotoga na maua e Atamu ma Eva ma tagata i aso nei?

¹⁷ Ae i le isi itu, e to‘afia nisi ua e iloa ua mama‘i ona o lo latou tausia o tapulaa a le Tusi Paia? Ioe, o le usita‘i iā Ieova e maua ai le soifua mālōlōina ma le sa‘olotoga. (Sala. 19:7-11) E lē gata i lea, o le faaaogā tatau o lou sa‘olotoga e tusa ai ma tulafono ma ta‘iala lelei atoatoa a le Atua, o le a atili ai ona maufaatuatuaina oe e le Atua ma ou mātua. O le mea moni, e finagalo Ieova e tuuina mai i ana auauna faamaoni le sa‘olotoga lelei atoatoa, lea e faamatalaina i le Tusi Paia o “le sa‘olotoga mamalu o le fanau a le Atua.”​—Roma 8:21.

¹⁸ Na tofo Atamu ma Eva i lenā sa‘olotoga. I le faato‘aga o Etena, e fia poloa‘iga na tuu atu e le Atua iā i la‘ua? E na o le tasi. E tasi le laau e lē tatau ona la aai ai. (Kene. 2:9, 17) Pe e te manatu i ai e faasāsā na‘uā lenā poloa‘iga? E leai! Ma‘eu le telē o le eseesega ma le tele o tulafono a tagata, lea e faamalosia i tatou e a‘oa‘oina ma usita‘ia!

19. O ā auala ua a‘oa‘oina ai i tatou ina ia avea o ni ē sa‘oloto?

¹⁹ E ese le atamai o le auala e feutaga‘i ai Ieova ma ana auauna. Nai lo o le tuuina mai o se lisi umī o tulafono, ae ua ia a‘oa‘oina ma le onosa‘i i tatou ina ia mulimuli i le tulafono o le alofa. E finagalo o ia ina ia tatou ola e tusa ma ana tapulaa ma ‘ino‘ino i le leaga. (Roma 12:9) Na faamatilatila mai lenā manatu i le Lauga a Iesu i le mauga, ina ua ia faailoa mai le māfuaaga o lo tatou faia o mea leaga. (Mata. 5:27, 28) I le avea ai o Keriso ma Tupu o le Malo o le Atua, o le a faaauau ona ia a‘oa‘oina i tatou i le lalolagi fou ina ia tutusa la tatou vaai ma lana vaai i le mea sa‘o ma le mea sesē. (Epe. 1:9) O le a ia aumaia fo‘i le tino ma le mafaufau lelei atoatoa. Se‘i faaāta i lou mafaufau le taimi o le a e lē toe tauivi ai ma tu‘inanauga agasala, ma mafatia i āuga o le tulaga lē lelei atoatoa. O le i‘uga, o le a e maua “le saʻolotoga mamalu” lea na folafola mai e Ieova.

20. (a) E faapefea ona faaaogā e Ieova lona sa‘olotoga? (e) E faapefea ona e faaa‘oa‘o iā te ia?

²⁰ I le lalolagi fou, e iai lava le mea e gata ai lo tatou sa‘olotoga, ona e mana‘omia ona ta‘ita‘ia ma pulea i tatou e le alofa mo le Atua ma isi. O le mea moni, o loo talosaga mai Ieova ina ia tatou faaa‘oa‘o iā te ia. E leai se mea e gata mai ai lona sa‘olotoga, ae e ta‘ita‘ia e le alofa ana feutaga‘iga ma ana foafoaga atamamai. (1 Ioa. 4:7, 8) O lea, e mafai ona faapea atu e faato‘ā mafai ona tatou maua le sa‘olotoga lelei atoatoa, pe a tatou faaa‘oa‘o i le Atua.

21. (a) O ā faalogona o Tavita e faatatau iā Ieova? (e) O le ā o le a tatou iloiloina i le mataupu o loo sosoo mai?

²¹ Pe e te talisapaia le anoanoa‘i o “mea lelei” ua foa‘i mai e Ieova iā te oe, e aofia ai le tele o mea‘ai faaleagaga, uō lelei, sini aogā, ma le mauaina o le sa‘olotoga lelei atoatoa? (Sala. 103:5) Pe afai o lea, atonu e tutusa ou faalogona ma Tavita ina ua ia tatalo: “E te faailoa mai iā te a‘u le ala i le ola. O loo i ou luma fo‘i le olioli e malie ai; o loo i lou itu taumatau le olioli e oo i le faavavau.” (Sala. 16:11) I le mataupu o loo sosoo mai, o le a iloiloina ai isi ‘oa faaleagaga o loo i le Salamo 16. O nei ‘oa o le a faailoa mai ai auala e tatou te maua ai se olaga e sili ona faamalieina.