1. O ā faafitauli o loo tatou fesagaʻia, ae aiseā e fiafia ai le finagalo o Ieova i ana auauna faamaoni? (Tagaʻi i ata i luga aʻe o le matua.)

E PEI ona e silafia, e tele faafitauli i le olaga i lenei faiga o mea. O le toʻatele o o tatou uso ma tuafāfine pele o loo feagai ma maʻi tugā. O isi e ui ua matutua ae o loo tausia pea o latou tauaiga ua afu le soifua. O nisi o loo tauivi e saunia mea o loo manaʻomia moni e o latou aiga, ae e lē faapea o ni mea taugatā. E toʻatele o loo feagai ma nei faafitauli uma i le taimi e tasi! O nei tulaga e manaʻomia ona faaalu ai le tele o le taimi, malosi ma tupe. E ui i lea, e lē o maluelue ai lo tatou mautinoa i folafolaga a le Atua ma le faatuatua i se lumanaʻi e sili ona lelei. O se mea lea e matuā faafiafiaina ai le finagalo o Ieova!

2. O le ā le faalaeiauga e tatou te maua mai i le Isaia 40:29, ae o le ā le mea sesē matuiā e tatou te ono faia?

² Ae pe e iai se taimi e te lagona ai ua tauau ina lē mafai ona e tatalia le tele o omiga i le olaga? Pe afai o lea, e lē na o oe o loo tauivi ma na lagona. O loo taʻua foʻi i le Tusi Paia nisi o auauna faamaoni na manatu ua leai so latou malosi e faaauau ai. (1 Tu. 19:4; Iopu 7:7) Peitaʻi, e latou te leʻi faavaivai ae na ōle atu iā Ieova mo le malosi. Na tali mai Ieova ma “avatu le malosi i lē ua vaivai.” (Isa. 40:29) E faanoanoa ona o nisi o tagata o le Atua i  aso nei, ua latou manatu o le auala sili e feagai ai ma faafitauli o le olaga, o le taofia lea o a latou faasologa faaleagaga. Ua peiseaʻī o se avega mamafa iā i latou a tatou gaoioiga faa-Kerisiano nai lo o se faamanuiaga. O lea, ua latou lē toe faitauina ai le Tusi Paia, auai i sauniga a le faapotopotoga, ma le faiva i le fanua. O le mea tonu lenā o loo manaʻo i ai Satani.

3. (a) E faapefea ona tatou tetee atu i taumafaiga a Satani e faavaivaia i tatou? (e) O le ā o le a tatou talanoaina i lenei mataupu?

³ E iloa lelei e le Tiapolo o le maelega i gaoioiga faa-Kerisiano e faamalosia ai i tatou, ma e lē manaʻo ia tatou malolosi. Pe a e lagona le matuā vaivai i le tino ma faalogona, aua lava neʻi e tuua Ieova. Ia atili ai ona e mafuta vavalalata atu iā te ia auā ʻe na te faamausalīina ma faamalosia oe.’ (1 Pete. 5:10; Iako. 4:8) I lenei mataupu, o le a tatou tilofaʻia ai ni tulaga se lua e tatou te ono faifailemū ai i le auaunaga i le Atua. O le a tatou talanoaina foʻi pe faapefea i le faatatauina o mataupu silisili o le Tusi Paia, ona fesoasoani iā i tatou e fesagaʻia ai na tulaga. Ae seʻi o tatou uaʻi muamua atu i le mana o Ieova e faamalosia ai i tatou, e pei ona taʻua i le Isaia 40:26-31.

4. O le ā le lesona e tatou te aʻoaʻoina mai i le Isaia 40:26?

⁴ Faitau le Isaia 40:26. E leai se isi ua mafai ona ia faitaulia le aofaʻi o fetu uma i le vateatea. E talitonu saienitisi e pe tusa ma le 400 piliona fetu o loo iai i lo tatou aniva o le Milky Way. E ui i lea, e faaigoa e Ieova na fetu taʻitasi. O le ā le lesona mo i tatou? Pe afai e matuā naunau Ieova i nei foafoaga e leai ni ola, seʻi mafaufau la i ona faalogona e faatatau iā te oe o sē e auauna iā te ia ona o lou alofa iā te ia, ae e lē ona ua ia faapolokalameina oe e faia faapea! (Sala. 19:1, 3, 14) E silafia lelei oe e lo tatou Tamā pele. “E oo foʻi i o outou lauulu, ua faitaulia uma” e Ieova. (Mata. 10:30) Ua faamautinoa mai e le faisalamo: “Ua silafia e Ieova aso o ē ua lē ponā.” (Sala. 37:18) Ioe, e na te silafia faafitauli uma o loo e fesagaʻia, ma e mafai ona ia foaʻi mai le malosi e te onosaia ai na faafitauli taʻitasi.

5. E faapefea ona tatou mautinoa e mafai e Ieova ona faamalosia i tatou?

⁵ Faitau le Isaia 40:28. O Ieova o ia o le Puna o le malosi uma. O se faaaʻoaʻoga, seʻi manatu i le tele o le malosiaga ua ia tuuina i lo tatou lā. Na taʻua e David Bodanis o se tusitala i mataupu faasaienisi: “Ua faamatuu mai e lo tatou Lā i sekone taʻitasi se malosiaga e tutusa ma le faitau piliona o pomu atomika.” Na maua i suʻesuʻega a se isi tagata suʻesuʻe e faapea, ua “faamatuu mai e le lā i le sekone e tasi se malosiaga e tausia ai manaʻoga o tagata mo le 200,000 tausaga”! Pe e tatau la ona masalosalo se tasi pe e mafai e Lē o loo tuuina atu le malosiaga i le lā, ona tuuina mai le malosi e tatou te fesagaʻia ai so o se faafitauli?

6. I le ā le itu e avegofie ai le amo a Iesu, ma e faapefea ona aafia ai i tatou?

⁶ Faitau le Isaia 40:29. O le auauna iā Ieova e maua ai le tele o le olioli. Na fetalai Iesu i ona soo: “Ia outou amoina laʻu amo.” Na ia taʻua atili: “Ona faafouina ai lea o outou. Auā e avegofie laʻu amo, ma e māmā foʻi laʻu avega.” (Mata. 11:28-30) Maʻeu le moni o lenei faamatalaga! O nisi taimi e tatou te lagona le vaivai a o tuua le fale ae agaʻi atu i le sauniga po o le talaʻiga. Ae o ā o tatou faalogona pe a toe foʻi i le fale? E faafouina i tatou ma lava saunia ai e fesagaʻia faafitauli o le olaga. E moni, e avegofie le amo a Iesu!

7. Faamatala mai se mea na tupu e faamaonia ai le moni o le Mataio 11:28-30.

⁷ Na tauivi se tuafafine o le a tatou faaigoa iā Lusia ma se maʻi faaumiumi o le matuā  vaivai o le tino, lotomafatia, ma le maʻi ulu. O lea la, sa faigatā ai mo ia i nisi taimi ona auai i sauniga. Peitaʻi, ina ua faia ana taumafaiga e auai i se lauga mo le lautele, na tusi o ia: “Na faatatau atu le lauga i le lotovaivai. O manatu na taʻua i le lauga, o mea tonu na sa oo iā te aʻu, ma na matuā faalaeiauina ai aʻu ma iʻu ina maligi oʻu loimata. Na faamanatu mai ai iā te aʻu le tāua o le auai i sauniga.” Na matuā faafiafiaina o ia ona na fai ana taumafaiga e auai i le sauniga!

8, 9. O le ā na uiga i ai Paulo ina ua tusi: “Pe a ou vaivai, ona ou malosi ai lea”?

⁸ Faitau le Isaia 40:30. E tusa lava po o le ā lo tatou agavaa, e tapulaa lava mea e mafai ona tatou faataunuuina i lo tatou lava malosi. O se lesona lenā e tatau ona tatou iloaina. E ui lava o le aposetolo o Paulo o se tane tomai, ae na iai mea na gata mai ai lona malosi ma lē mafai ai ona ia faia mea uma na manaʻo e fai. Ina ua ia faaleo atu i le Atua ona popolega, na fetalai mai o ia: “Ua faaatoaina loʻu mana i le mea e vaivai ai.” Na malamalama Paulo i le uiga o lenā fetalaiga ma na ia faapea mai: “Pe a ou vaivai, ona ou malosi ai lea.” (2 Kori. 12:7-10) O le ā na ia uiga atu i ai?

⁹ Na iloa e Paulo e faatapulaa mea e mafai ona ia faia pe a aunoa ma le fesoasoani a le Atua. Na mafai ona foaʻi atu e le agaga paia o le Atua le malosi na manaʻomia e Paulo. E lē gata i lea, na mafai e le agaga o le Atua ona faamalosia Paulo e faia ni galuega e lē mafai ona ia faataunuuina i sona lava malosi. E faapena foʻi i tatou. Pe afai o lo tatou malosi e mai iā Ieova, o le a tele la lo tatou malosi!

10. Na faapefea ona fesoasoani Ieova iā Tavita ina ia fesagaʻia faafitauli na oo iā te ia?

¹⁰ Na masani ona maua e le faisalamo o Tavita le malosi mai i le agaga paia o le Atua. Na pese o ia e faapea: “O lau fesoasoani ua mafai ai ona ou tetee i le ʻau e faoa mea; o loʻu Atua foʻi ua mafai ai ona ou aʻea le pā.” (Sala. 18:29) E iai faafitauli e pei o ni pā e lē mafai ona tatou aʻea i so tatou lava malosi, ma e tatou te manaʻomia ai le malosi mai iā Ieova.

11. Faamatala le matafaioi a le agaga paia i le fesoasoani iā i tatou e fesagaʻia o tatou faafitauli.

¹¹ Faitau le Isaia 40:31. E lē faalagolago le aeto i lona lava malosi ina ia lele ma faaopeopea ai i le ʻea mo se taimi umi. E uunaʻi i luga e faaputuga o ʻea māfanafana le aeto ma mafai ai ona faaopeopea ae sefe lona malosi. O lea, pe a e feagai ma se faafitauli faigatā, ia mafaufau i le aeto. Ia ōle atu iā Ieova mo le “fesoasoani, o le agaga paia lea” ina ia faamalosia ai oe. (Ioa. 14:26) O le mea e fiafia ai, ona e mafai ona tatou mauaina lenā fesoasoani i so o se taimi lava e tatou te manaʻomia ai. Atonu e sili atu ona tatou manaʻomia lenā fesoasoani mai i le Atua, pe a tatou feeseeseaʻi ma se sui o le faapotopotoga. Ae aiseā e tutupu ai na feeseeseaʻiga?

12, 13. (a) Aiseā e tutupu ai feeseeseaʻiga i le va o Kerisiano? (e) O le ā e tatou te aʻoaʻoina mai i le tala iā Iosefa e faatatau iā Ieova?

¹² E tulaʻi mai feeseeseaʻiga i lo tatou va ma isi ona o i tatou uma e lē lelei atoatoa. O lea la, e iai taimi e faia ai e o tatou uso talitonu ni faamatalaga po o ni gaoioiga e faatigā mai ai iā i tatou, pe tatou te faatigā atu foʻi iā i latou. E mafai ona avea lenei tulaga ma tofotofoga faigatā. Peitaʻi, e pei foʻi o isi tofotofoga, e tuu mai e Ieova le avanoa e faamaonia atu ai lo tatou faamaoni e ala i le taumafai e galulue ma le autasi ma uso ma tuafāfine, o ē e alofa i ai Ieova e ui lava i o latou tulaga lē lelei atoatoa.

¹³ E tatou te iloa mai i le tala iā Iosefa, e lē taofia e Ieova tofotofoga e oo i ana auauna. A o talavou Iosefa, na faatau ese o ia e ona ʻafa uso ona o lo latou lotoleaga ma auina atu ai i Aikupito. (Kene. 37:28) Na silafia e Ieova le mea na tupu ma e lē taumatea na  faanoanoa o ia a o silasila mai i le faileagaina o lana uō amiotonu o Iosefa. Peitaʻi, e leʻi faalaa ane Ieova e taofi. Mulimuli ane ina ua tuuaʻia Iosefa i le taumafai e faamalosi le avā a Potifara ma faafalepuipui ai, e leʻi faalaa ane lava Ieova e taofi. Pe na tuulafoaʻia e le Atua Iosefa? E lē o le tulaga lenā, auā na ʻtaulau manuia mea uma na faia e Iosefa ona o Ieova.’​—Kene. 39:21-23.

14. O ā aogā i le itu faaleagaga ma le itu faaletino pe a “tuu” lo tatou ita?

¹⁴ O se isi faaaʻoaʻoga lenei. E lē toʻatele nisi na matuā faileagaina e pei o Tavita. Peitaʻi, e leʻi faatagaina e lenei uō a le Atua le ita e tuputupu aʻe i lona loto. Nai lo o lea na tusi o ia: “Inā tuu ia le ita ma soia le lotoa; aua e te ita! E na o le oo ai ina e faia o se mea leaga!” (Sala. 37:8) O le māfuaaga e sili ona tāua e “tuu” ai lo tatou ita, ina ia tatou faaaʻoaʻo iā Ieova o lē e na te ʻleʻi faia iā i tatou e tusa ma a tatou agasala.’ (Sala. 103:10) E tele foʻi isi aogā o le “tuu” o lo tatou ita. O le ita e mafai ona faapogaia ai maʻi o le tino e pei o le toto maualuga ma le faalētonu o le ālā ʻea. E mafai foʻi ona aafia ai le ate, o le atealii, ma faigatā ai i le tino ona faamalū meaʻai. E lē mafai foʻi ona tatou mafaufau lelei pe a tatou feita. O le pasae aʻe o le ita e ono iʻu ai i le lotomafatia mo se taimi umi. Ae i le isi itu, ua faapea mai le Tusi Paia “o le loto e toʻafilemu o le ola lea o le tino o le tagata.” (Faata. 14:30) E faapefea la ona tatou feagai ma faalogona tigā ma faalelei ma so tatou uso? E ala lea i le faatatauina o fautuaga atamai mai i le Tusi Paia.

15, 16. O le ā le auala e tatau ona tatou talanoa atu ai i se isi na faatigā mai?

¹⁵ Faitau le Efeso 4:26. E lē faateʻia i tatou pe a manaʻomia ona tatou onosaia mea leaga e fai mai e tagata o le lalolagi. Peitaʻi, pe a faia e so tatou uso talitonu po o se isi o lo tatou aiga se tala po o se gaoioiga e matuā faatigā mai iā i tatou, e tatou te lagona le matuā lē fiafia. Seʻi faapea ua lē mafai ona tatou tau ina faagalo le mea na tupu. Po o le a tatou faataga le ita e tuputupu aʻe pea i o tatou loto mo le tele o tausaga? Po o le a tatou mulimuli i le fautuaga atamai i le Tusi Paia ina ia vave ona foʻia se feeseeseaʻiga? O le umi lava e tuu ai se feeseeseaʻiga e lē foʻiaina, o le faigatā foʻi lenā iā i tatou ona faalelei ma lo tatou uso.

¹⁶ Seʻi faapea ua faia e se uso se mea e te tigā ai, ma ua lē mafai ona e faagaloina. O ā ni laasaga e mafai ona e uia ina ia tausia ai le filemu? Muamua, ia tatalo faatauanau iā Ieova. Ia talosaga atu iā te ia mo le fesoasoani ina ia maua sa oulua talanoaga faalaeiau ma lou uso. Ia manatua, o ia foʻi o se uō a Ieova. (Sala. 25:14) E alofa le Atua iā te ia. E feutagaʻi Ieova ma ana uō i se auala agalelei,  ma e na te faatalitalia i tatou ina ia faia foʻi faapea. (Faata. 15:23; Mata. 7:12; Kolo. 4:6) Lua, ia mafaufau i au tala o le a fai atu i lou uso. Aua neʻi e manatu e faapea na fuafua lou uso e faatigā iā te oe, ma aua foʻi neʻi e vave faia se faaiʻuga e tusa ai ma lana gaoioiga na fai. Ia e manatu atonu na iai foʻi sau vaega na fai i la oulua feeseeseaʻiga. E ono mafai ona amata le talanoaga e ala i le faapea atu, “Atonu ua ou soona faamamafa naʻuā lau tala na fai ananafi, ae ou te lagona . . . ” Pe afai e lē iʻu lelei la oulua talanoaga, ia saʻili se isi avanoa e toe faalelei ai. I le taimi e tasi, ia tatalo mo lou uso ma talosaga iā Ieova e faamanuia iā te ia. Ia tatalo foʻi i le Atua e fesoasoani iā te oe ina ia e taulaʻi atu i uiga lelei o lou uso. Po o le ā lava le iʻuga, e mafai ona e mautinoa o le a fiafia le finagalo o Ieova i au taumafaiga malolosi ina ia faalelei ma lou uso, auā o ia o se uō a le Atua.

17. O le ā le faatulagaga a Ieova e fesoasoani ai ina ia toe malosi sē na agasala matuiā, ma aiseā e tatau ai ona tatou faaaogā lelei lea faatulagaga?

¹⁷ O nisi ua manatu e lē aogā ona toe auauna iā Ieova, ona na latou faia se agasala matuiā i le taimi ua teʻa. O na faalogona nofosala e mafai ona avea ma pule sauā. Na faamatala e le tupu o Tavita o lē na tauivi ma lagona nofosala e faapea: “Pe a ou lē taʻu atu aʻu agasala, ona tigā ai lea o oʻu ivi ona o loʻu ōi i le aso atoa. Auā ua mamafa lou aao i oʻu luga i le pō ma le ao.” O le mea e fiafia ai, ona na taulima ma le saʻo e Tavita, o se tane faaleagaga, lenā faafitauli. Na tusi o ia: “Ona ou taʻutino atu lea iā te oe o laʻu agasala . . . ma ua e faamagaloina le leaga o aʻu agasala.” (Sala. 32:3-5) Pe afai na e faia se agasala matuiā, ua nofosauni Ieova e fesoasoani iā te oe ina ia e toe maua le malosi. Peitaʻi, e tatau ona e talia lana fesoasoani e ala mai i le faapotopotoga. (Faata. 24:16; Iako. 5:13-15) Aua neʻi e faatuai e faia faapea ona e faalagolago i ai lou lumanaʻi e faavavau! Ae e faapefea pe afai ua mavae se taimi umi talu ona faamagaloina se mea sesē na e faia, ae o loo faaauau ona ōia lou lotofuatiaifo?

18. E faapefea ona fesoasoani le faaaʻoaʻoga a Paulo i ē o loo tauivi ma faalogona o le lotovaivai?

¹⁸ E iai taimi na lotovaivai ai le aposetolo o Paulo ona o mea sesē na ia faia i le taimi ua teʻa. Na ia taʻutino mai: “O aʻu o lē e aupito faatauvaa o le ʻauaposetolo, ma e lē tatau ona taʻua aʻu o se aposetolo, auā na ou sauā i le faapotopotoga a le Atua.” E ui i lea, na toe faapea mai o ia: “Ae ona o le agalelei faifua o le Atua, ua ou faapenei ai.” (1 Kori. 15:9, 10) Na talia e Ieova Paulo e ui i mea sesē na ia faia i le taimi ua teʻa, ma na finagalo Ieova ia iloa e Paulo lenā mea. Pe afai ua e salamō moni mai i au agasala i le taimi ua teʻa ma ua uma ona e taʻutino atu i toeaina pe afai o ni agasala matuiā, ia e mautinoa la o le a faasafua mai e Ieova lona alofa mutimutivale. O lea, ia e talitonu i fetalaiga a Ieova ma talia lana faamagaloga!​—Isa. 55:6, 7.

19. O le ā le mau o le tausaga mo le 2018, ma aiseā ua talafeagai lelei ai lenei mau?

¹⁹ A o lalata mai le iʻuga o lenei faiga o mea, e tatou te faatalitalia foʻi o le a faateteleina omiga o le olaga. E ui i lea, ia tatou mautinoa e mafai e Ieova ona saunia mea uma e tatou te manaʻomia ina ia tatou tutumau ai, auā e na te “avatu le malosi i lē ua vaivai; ma o lē ua leai sona malosi e na te faaatoatoaina lona malosi.” (Isa. 40:29; Sala. 55:22; 68:19) A o faagasolo le 2018, o le a faamanatu mai pea iā i tatou lenei upu moni tāua i taimi uma e tatou te auai i sauniga i le Maota mo Sauniga. O lenei upu moni tāua o loo tusia i la tatou mau o le tausaga: “O ē e faamoemoe iā Ieova e toe malolosi i latou.”​—Isa. 40:31.