1, 2. (a) O le ā le tofiga tāua na maua e Solomona? (e) O le ā le popolega o Tavita e faatatau iā Solomona?

NA FAATONUINA Solomona e vaavaaia se galuega e sili ona tāua, o le fausiaina lea o le malumalu i Ierusalema. O lenā fale na “matuā sili ma matagofie, e ese mai i nuu uma.” Ae o le itu e sili ona tāua, “o le fale lenei o Ieova le Atua moni.” Na tofia e Ieova Solomona e na te vaavaaia lenei galuega.​—1 No. 22:1, 5, 9-11.

² Na mautinoa e le tupu o Tavita o le a lagolagoina e le Atua Solomona. Peitaʻi, o Solomona “e laʻitiiti ma e lē lava lona poto masani.” Po o le a lototele Solomona e faatino lenei galuega telē o le fausia o le malumalu? Po o le a faatalatū o ia ona e talavou ma e leai sona poto masani? Ina ia taulau manuia Solomona, na manaʻomia ona ia lototele ma fai le galuega.

3. O le ā na aʻoaʻoina e Solomona mai i lona tamā?

³ E lē taumatea e tele mea na aʻoaʻoina e Solomona mai i lona tamā e faatatau i le lototele. A o talavou Tavita, na tau o ia ma manufeʻai na osofaʻia mamoe a lona tamā. (1 Samu. 17:34, 35) Na matuā lototele Tavita ina ua tau ma se sauʻai malosi. Ioe, o le  fesoasoani a le Atua na faatoʻilalo ai e Tavita Koliata i se maa lamolemole.​—1 Samu. 17:45, 49, 50.

4. Aiseā na tatau ai ona lototele Solomona?

⁴ Mulimuli ane, na matuā talafeagai ona faalaeiau e Tavita Solomona ina ia lototele e fausia le malumalu! (Faitau le 1 Nofoaiga a Tupu 28:20.) Pe ana faapea e lē lototele Solomona, semanū e faavaivaia o ia ona o le fefe ma lē amataina ai le galuega, lea e sili atu ona leaga nai lo o le lē uma o le galuega.

5. Aiseā e manaʻomia ai ona tatou lototetele?

⁵ I le pei o Solomona, e tatou te manaʻomia le fesoasoani a Ieova ina ia lototetele ai ma faamāeʻa le galuega. Seʻi o tatou iloiloina ni faaaʻoaʻoga o ē na lototetele i aso anamua, ona tilofaʻia lea o ni auala e tatou te faaalia ai le lototele, ma faataunuu la tatou galuega.

6. Aiseā e mataʻina ai le lototele o Iosefa?

⁶ Seʻi mafaufau i le lototele o Iosefa ina ua faaosooso e le avā a Potifara e la te momoe. E lē taumatea na iloa e Iosefa o le a iai ni iʻuga mataʻutia pe a ia teena le manaʻo o le fafine. E ui i lea, na lototele Iosefa ma sola ese nai lo o le lolo atu i le fafine.​—Kene. 39:10, 12.

7. Na faapefea ona faaalia e Raava le lototele? (Tagaʻi i le ata i luga aʻe o le matua.)

⁷ O le isi faaaʻoaʻoga o le lototele, o Raava. Ina ua ō atu sipai Isaraelu i lona fale i Ieriko, na ono faigofie ona ia teena i laʻua ona o le fefe. Ae o lona maufaatuatuaina o Ieova, na ia faaalia ai le lototele i le faalalafi o sipai e toʻalua ma faasosola ese i laʻua ma le saogalemu. (Iosua 2:4, 5, 9, 12-16) Na talitonu Raava o Ieova o le Atua moni, ma ia mautinoa ai o le a foaʻi atu lava e Ieova le laueleele i tagata Isaraelu. E leʻi faavaivaia o ia ona o le fefe i isi, e aofia ai le tupu o Ieriko ma ona tagata. Nai lo o lea, na gaoioi ma le lototele Raava ma faasaoina ai o ia ma lona aiga.​—Iosua 6:22, 23.

8. O le ā se aafiaga i le ʻauaposetolo ona o le lototele o Iesu?

⁸ O se isi faaaʻoaʻoga lelei o le lototele, o aposetolo faamaoni o Iesu. Na latou vāaitino i le lototele o Iesu. (Mata. 8:28-32; Ioa. 2:13-17; 18:3-5) Na fesoasoani lenā faaaʻoaʻoga ina ia faatupu ai lo latou lototetele. E leʻi taofia le ʻauaposetolo mai i le aʻoaʻo atu i le suafa o Iesu e ui i teteega a le ʻau Satukaio.​—Galu. 5:17, 18, 27-29.

9. O ai le puna autū o le lototele o loo taʻua i le 2 Timoteo 1:7?

⁹ O le lototetele o Iosefa, Raava, Iesu, ma le ʻauaposetolo, na uunaʻia ai i latou e faia galuega lelei. Ae o lo latou lototetele, e lē faapea ai na latou mautinoa naʻuā. Na māfua ona latou lototetele ona o le faalagolago iā Ieova. E tatou te feagai foʻi ma tulaga e manaʻomia ai le lototele. E tatau ona tatou faalagolago iā Ieova nai lo o i tatou lava. (Faitau le 2 Timoteo 1:7.) O le a tatou iloiloina ni vala se lua o le olaga e manaʻomia ai le lototele: o o tatou aiga ma le faapotopotoga.

10. Aiseā e manaʻomia ai e talavou Kerisiano le lototele?

¹⁰ O loo feagai talavou Kerisiano ma le tele o tulaga e manaʻomia ai le lototele a o latou auauna iā Ieova. E mafai ona latou aʻoaʻoina ni lesona mai i le faaaʻoaʻoga a Solomona, ma faataʻitaʻi i lona lototele e faia ni filifiliga atamai e faamāeʻa ai le fausiaina o le malumalu. E iai foʻi filifiliga tāua e tatau ona faia e talavou, e ui lava e mafai ma e tatau ona latou maua le taʻitaʻiga mai i o latou mātua. (Faata. 27:11) E manaʻomia  le lototele ina ia latou faia ai ni filifiliga atamai e faatatau i aumea lelei, faafiafiaga lelei, amioga mamā, ma le papatisoga. E tāua le lototele ona o loo latou faasagatau iā Satani, o lē o loo taufaifai i le Atua.

11, 12. (a) O le ā se faaaʻoaʻoga lelei na faia e Mose i le faaalia o le lototele? (e) E faapefea ona mulimuli talavou i le faaaʻoaʻoga a Mose?

¹¹ O se tasi o filifiliga tāua e tatau ona faia e talavou, o le faatutū lea o ni sini. I nisi atunuu, e tele omiga e feagai ma talavou ina ia auai i aʻoaʻoga maualuluga, ma maua ni galuega e tetelē totogi. A o isi atunuu, ona o le lē lelei o le tulaga tau tamaoaiga, ua tele ai ina taulaʻi atu talavou i le tausiga faaletino o o latou aiga. Afai o loo e iai i se tulaga faapea, ia mafaufau i le faaaʻoaʻoga a Mose. Na ono faigofie ona taulaʻi atu Mose ina ia maua se tulaga aloaʻia ma le tamaoaiga, ona na tausia aʻe o ia e le afafine o Farao. E lē taumatea e tele omiga na feagai ma Mose mai i lona aiga Aikupito, o faiaʻoga, ma faufautua. Ae nai lo o le lolo atu i na faatosinaga, na lagolagoina ma le lototele e Mose le tapuaʻiga moni. Na maufaatuatuaina e Mose Ieova ina ua ia lafoaʻia ʻoa a Aikupito. (Epe. 11:24-26) O le iʻuga, na matuā faamanuiaina o ia e Ieova. E lē taumatea o le a tele foʻi isi faamanuiaga o le a maua e Mose i le lumanaʻi.

¹² O le a faamanuia foʻi e Ieova talavou e lototetele e faatutū ni sini faaleagaga, ma faamuamua manaʻoga o le Malo i o latou olaga. O le a fesoasoani Ieova iā i latou e tausia manaʻoga o o latou aiga. I le uluaʻi senituri, na taulaʻi atu le talavou o Timoteo i sini faaleagaga, ma e mafai foʻi ona e faia faapea. *​—Faitau le Filipi 2:19-22.

13. Na faapefea ona fesoasoani le lototele i se tuafafine talavou e ausia ai ona sini?

¹³ Sa tatau i se tuafafine i Alabama i le Iunaite Setete, ona ia atiaʻe le lototele e faatutū ai ni sini faaleagaga. Na tusi mai o ia: “E ese loʻu matamuli a o oʻu laʻitiiti. Na matuā faigatā ona ou talanoa i isi i le Maota mo Sauniga, aemaise loʻu talaʻi atu i ni tagata ese.” O le fesoasoani a ona mātua ma isi i le faapotopotoga, na mafai ai e lenei talavou Kerisiano ona ausia lona sini o le paeonia sauatoa. Na faapea mai o ia: “Ua faaauiluma e le lalolagi a Satani sini e pei o aʻoaʻoga maualuluga, tulaga taʻutaʻua, tupe, ma le tele o meafaitino. E masani lava e lē mafai ona ausia na sini, ma e iʻu ai i popolega ma le lototigā. Ae o le auauna iā Ieova, ua matuā faafiafiaina ai aʻu ma ou maua le lotomalie.”

14. O ā ni tulaga e manaʻomia ai e mātua Kerisiano le lototele?

¹⁴ E manaʻomia foʻi e mātua Kerisiano le lototele. O se faaaʻoaʻoga, atonu e talosaga atu e lē aunoa lou pule ina ia e faigaluega ovataimi i afiafi ma faaiʻuga o vaiaso, ia ua e faatulaga mo tapuaʻiga a le aiga, talaʻiga, ma sauniga a le faapotopotoga. E manaʻomia le lototele ina ia e teena ai na talosaga, ma faia se faaaʻoaʻoga lelei mo lau fanau. Pe atonu foʻi e faataga e nisi o mātua i le faapotopotoga a latou fanau e faia ni fuafuaga, ae e te lē manaʻo e auai ai lau fanau. E ono fesiligia oe e na mātua pe aiseā e lē auai ai lou alo. Po o le a e lototele e faamatala atu ma le agalelei le māfuaaga?

15. E faapefea ona fesoasoani le Salamo 37:25 ma le Eperu 13:5 i mātua?

¹⁵ E manaʻomia foʻi le lototele e fesoasoani ai i a tatou fanau e faatutū ma ausia sini faaleagaga. O se faaaʻoaʻoga, e faatalatū nisi mātua e faalaeiau le fanau ina ia paeonia, auauna i se oganuu o loo telē ai le manaʻoga, auauna i le Peteli, po o faugāfale. E  popole nei mātua ina neʻi lē mafai e le fanau ona tausia i latou pe a matutua. Peitaʻi, o mātua atamamai e latou te lototetele ma faatuatua i folafolaga a Ieova. (Faitau le Salamo 37:25; Eperu 13:5.) O mātua e faaalia lenā lototele ma faalagolago iā Ieova, e fesoasoani foʻi i le fanau e latou te faia faapea.​—1 Samu. 1:27, 28; 2 Timo. 3:14, 15.

16. Ua faapefea ona fesoasoani nisi mātua i a latou fanau ina ia faatutū ni sini faaleagaga, ma ua faapefea ona aogā i le fanau?

¹⁶ Na fesoasoani se ulugalii i le Iunaite Setete i la laʻua fanau ina ia faatutū sini faaleagaga. Na faamatala e le tane: “Ina ua faatoʻā fananau mai la ma fanau, na ma talanoa i ai e faatatau i le fiafia o le olaga paeonia, ma le auauna i le faapotopotoga. O mea na ua fai ma o la sini. O le faatutū ma le ausia o sini faaleagaga, ua mafai ai e la ma fanau ona manumalo i faatosinaga a le lalolagi a Satani, ma taulaʻi atu ai iā Ieova.” Na tusi mai se uso e toʻalua lana fanau: “E tele taumafaiga ma tupe e faaalu e le toʻatele o mātua ina ia fesoasoani ai i a latou fanau e ausia sini i taaloga, faafiafiaga, ma aʻoga. E sili atu ona faaaogā lo ma malosi ma tupe e fesoasoani ai i la ma fanau e ausia sini faaleagaga e vavalalata ai iā Ieova. O se fiafiaga sili iā i maʻua le vaai atu ua ausia e le fanau o la sini faaleagaga, aemaise o le galulue faatasi ma i laʻua.” E mautinoa o le a faamanuia e le Atua mātua o loo fesoasoani i a latou fanau e faatutū ma ausia sini faaleagaga.

17. O ā ni faaaʻoaʻoga o le lototele i totonu o le faapotopotoga?

¹⁷ E manaʻomia foʻi ona faaalia le lototele i totonu o le faapotopotoga. O se faataʻitaʻiga, e manaʻomia e toeaina le lototele e taulima ai mataupu faafaamasinoga, pe fesoasoani i ē ua manaʻomia faafuaseʻi ni togafitiga faafomaʻi. O isi toeaina e asiasi i falepuipui ina ia tausia manaʻoga faaleagaga o pagota. Ae faapefea nai o tatou tuafāfine nofofua? E tele avanoa ua latou maua e faalautele ai la latou faiva e ala i le paeonia, siitia atu i oganuu o loo telē ai le manaʻoga, auai i se polokalame mo tagata tauofo mai i le vaipanoa mo Faugāfale, ma  talosaga e auai i le Aʻoga mo Tagata Talaʻi o le Malo. Ua mafai foʻi ona auai nisi tuafāfine i le Aʻoga o Kiliata.

18. E faapefea ona faaalia e tuafāfine matutua le lototele?

¹⁸ O se faamanuiaga i le faapotopotoga le iai o tuafāfine matutua. E tatou te matuā alolofa i nei tuafāfine peleina! O nisi o i latou ua itiiti mea e latou te faia i le auaunaga i le Atua pe a fua i le taimi ua teʻa, ae e mafai lava ona latou faaalia le lototele ma fai le galuega. (Faitau le Tito 2:3-5.) O se faataʻitaʻiga, e manaʻomia e se tuafafine matua le lototele pe afai ua talosagaina o ia e talanoa atu i se tuafafine talavou e faatatau i laʻei e onomea. E na te lē otegiaina le tuafafine talavou, ae e mafai ona ia faalaeiau le talavou ia mafaufau i aafiaga o ona laʻei i isi. (1 Timo. 2:9, 10) O le faaalia e nei tuafāfine matutua o le alofa, e iai ni aafiaga lelei i le faapotopotoga.

19. (a) E faapefea ona faaalia e uso papatiso le lototele? (e) E faapefea ona fesoasoani le Filipi 2:13 ma le Filipi 4:13 i uso ina ia lototetele?

¹⁹ E manaʻomia foʻi e uso papatiso le lototele ma fai le galuega. O se faamanuiaga i se faapotopotoga le iai o ni tane lototetele e naunau e taulima le tele o tiute tauave. (1 Timo. 3:1) Ae atonu e faatalatū nisi uso e aapa atu mo faaeaga. Atonu na faia e se uso ni mea sesē i le taimi ua teʻa, ma manatu ai e lē agavaa o ia e avea ma se auauna o le faiva po o se toeaina. E ono manatu foʻi se uso e leai ni ona tomai e faatino ai se tofiga. Afai o ou faalogona na, e mafai ona fesoasoani Ieova iā te oe e atiaʻe le lototele. (Faitau le Filipi 2:13; 4:13.) Ia manatua, na iai le taimi na manatu ai Mose e lē agavaa e taulima lona tofiga. (Eso. 3:11) E ui i lea, na fesoasoani Ieova iā te ia ma na mulimuli ane atiaʻe e Mose le lototele e faataunuu ai le galuega. E mafai foʻi e se uso papatiso ona atiaʻe lenā lava lototele, e ala i le saʻili mo le fesoasoani a le Atua i le tatalo faatauanau ma faitau e lē aunoa le Tusi Paia. O le a fesoasoani foʻi le manatunatu i faaaʻoaʻoga o le lototele. E mafai ona ia talosaga atu ma le lotomaulalo i toeaina mo se toleniga, ma tauofo atu e faatino so o se galuega e manaʻomia ai le fesoasoani. O lea, e matou te talosaga atu i uso papatiso uma ina ia lototetele ma galulue malolosi i le faapotopotoga!

20, 21. (a) O le ā na faamanatu atu e Tavita iā Solomona? (e) O le ā e mafai ona tatou mautinoa i ai?

²⁰ Na faamanatu atu e le tupu o Tavita iā Solomona o le a faatasi Ieova iā te ia seʻia oo ina māeʻa le fausiaina o le malumalu. (1 No. 28:20) Na teuloto e Solomona upu a lona tamā, ma e leʻi faavaivaia o ia ona o lona tulaga talavou ma le leai o sona poto masani. Na matuā lototele Solomona ma fai le galuega, ma o le fesoasoani a Ieova na māeʻa ai lenei malumalu matagofie i le fitu ma le ʻafa tausaga.

²¹ E pei ona fesoasoani Ieova iā Solomona, e mafai foʻi ona fesoasoani mai Ieova ina ia tatou lototetele ma faataunuu la tatou galuega i totonu o aiga ma faapotopotoga. (Isa. 41:10, 13) Ia mautinoa o le a faamanuia i tatou e Ieova i le taimi nei ma le lumanaʻi, pe a tatou lototetele i le tapuaʻiga iā te ia. O lea, ʻia e lototele ma fai le galuega.’