PO O e mātauina o le toʻatele o tagata i aso nei, e manatu e tatau ona feutagaʻi isi ma i latou i se auala faapitoa, pe e sili atu foʻi la latou aiā nai lo o isi? E tusa foʻi pe feutagaʻi ma i latou i se auala faapitoa, ae e iai lava le manatu e tatau ona fai atu nisi mea mo i latou. O na ituaiga o mafaufauga, e māfua mai i uiga manatu faapito ma le lē lotofaafetai, lea na valoia o le a iai i aso e gata ai.—2 Timo. 3:2.

O le mea moni, ua leva ona iai le uiga o le manatu faapito. Na filifili e Atamu ma Eva le mea e lelei ma le mea e leaga mo i laʻua lava, ma ua iʻu atu ai i ni āuga mataʻutia. I senituri mulimuli ane, na manatu ai le tupu o Usia e iai lana aiā e faamū ai mea manogi, ae na matuā sesē a lona manatu. (2 No. 26:​18, 19) I se tulaga talitutusa, na manatu le ʻau Faresaio ma le ʻau Satukaio e iai la latou aiā e maua ai le finagalo malie o le Atua, ona na latou tupuga mai iā Aperaamo.—Mata. 3:9.

Ua siʻomia i tatou e tagata e manatu faapito ma mimitavale, ma e mafai ona taaʻina ai i tatou. (Kala. 5:26) Atonu e amata ona tatou manatu e tatau ona tatou mauaina se faaeaga patino, pe feutagaʻi foʻi isi ma i tatou i se auala faapitoa. E faapefea ona tatou ʻalofia na ituaiga o mafaufauga? E ala i lo tatou malamalama lelei i le silafaga a Ieova e faatatau i lenei mataupu. E lua ni mataupu silisili o le Tusi Paia e mafai ona fesoasoani iā i tatou.

O Ieova e filifiliina po o ā mea e tatau ona tatou faatalitalia mai i isi. Mātau nisi o faaaʻoaʻoga.

•   I totonu o le aiga, e faatalitalia e le tane lana avā e faaalia atu le faaaloalo iā te ia, ae e faatalitalia e le avā lana tane e faaalia atu le alofa. (Efe. 5:33) E iai i paaga faaipoipo le aiā e faatalitalia ai le isi o le paaga e faaalia atu le alofa fetosinaaʻi. (1 Kori. 7:3) E iai foʻi i mātua le aiā e faatalitalia ai a latou fanau, ia usiusitaʻi iā i latou. Ae i le isi itu, e tatau ona maua e fanau le tausiga alofa ma le lagolagosua mai i o latou mātua.—2 Kori. 12:14; Efe. 6:2.

• I le faapotopotoga, e tatau ma onomea ona tatou faaalia le faaaloalo i toeaina galulue mamafa. (1 Tesa. 5:12) Peitaʻi, e leai sa latou aiā e pulepuletutū ai i o latou uso ma tuafāfine.—1 Pete. 5:​2, 3.

• Ua tuuina mai e Ieova i faigāmalo faaletagata le aiā e tāpā ai lafoga ma faaaloalogia ai i latou e o latou tagatānuu.—Roma 13:​1, 6, 7.

Ua foaʻi mai ma le alofa e Ieova mea e sili atu nai lo o mea e tatau ona tatou maua. Talu ai ua tuufaasolo mai iā i tatou le tulaga agasala, e pau la le mea e tatau iā i tatou, o le oti. (Roma 6:23) Peitaʻi, o le alofa faamaoni o Ieova ua tatou maua ai le tele o faamanuiaga. (Sala. 103:​10, 11) Ua mafai ona tatou maua faamanuiaga ma faaeaga uma mai iā te ia, ona o lona agalelei faifua.—Roma 12:​6-8; Efe. 2:8.

Ia faaeteete ina neʻi aafia i manatu o le lalolagi. E aunoa ma lo tatou iloa, ae e iai taimi e tatou te ono faatalitalia ai e tatau ona tatou maua se mea nai lo o isi. Na faaaogā e Iesu le talafaatusa i tagata faigaluega na totogiina i le tenari, e faailoa mai ai le faigofie ona tatou aafia i na ituaiga o manatu. O isi tagata na galulue i le aso atoa i le vevela o le lā, a o isi e na o le tasi le itula na galulue ai. O i latou sa galulue i le aso atoa, na latou faatalitalia e tatau ona telē atu lo latou totogi nai lo o le isi vaega. (Mata. 20:​1-16) Na faailoa mai e Iesu i lenei talafaatusa, e tatau i ona soo ona lotomalilie i mea ua saunia mai e le Atua mo i latou.

Ia lotofaafetai ae aua le tagisā. (1 Tesa. 5:18) Ia faaaʻoaʻo i le aposetolo o Paulo, o lē e leʻi faatalitalia e saunia e ona uso i Korinito le fesoasoani faaletino mo ia, e ui na iai lana aiā e faia ai faapea. (1 Kori. 9:​11-14) E tatau ona tatou talisapaia  faamanuiaga uma e tatou te maua, ae aua le tagisā.

Ia atiaʻe le lotomaulalo. Pe a faamaualuga se tasi, e masani ona ia faatalitalia e tatau ona tele atu mea e na te maua po o mea e faia atu iā te ia. Peitaʻi o le lotomaulalo, e fesoasoani iā i tatou e liaʻiese ai na mafaufauga sesē.

Na faataatia e le perofeta o Tanielu se faaaʻoaʻoga lelei i le faaalia o le lotomaulalo. Na ono manatu Tanielu na māfua ona ia mauaina ni faaeaga ma feutagaʻi isi ma ia i se auala faapitoa, ona o le talaaga o lona aiga, o lona aulelei, ma o ia o sē e atamai ma e tele ona tomai. (Tani. 1:​3, 4, 19, 20) Peitaʻi, na lotomaulalo pea Tanielu, ma o le māfuaaga lenā na pele ai o ia iā Ieova.—Tani. 2:30; 10:​11, 12.

Seʻi o tatou maumauaʻi e teena le uiga manatu faapito ma le mimitavale o loo taatele i le lalolagi i aso nei. Nai lo o lea, ia faaauau ona faamalieina i tatou i faamanuiaga taʻitasi o loo foaʻi mai e Ieova ona o lona agalelei faifua.