A O LEʻI toe afio Iesu i le lagi, sa ia faapea atu i ona soo: ʻE fai outou ma molimau iā te aʻu i tuluʻiga uma o le lalolagi.’ (Galu. 1:8) E mafai faapefea ona latou talaʻi atu i le lalolagi aoao?

Ua faapea mai Martin Goodman o se polofesa i le Iunivesite o Oxford, “o le galuega talaʻi, ua faaesea mai ai Kerisiano mai i isi vaega faalotu, e aofia ai tagata Iutaia i le emepaea o Roma anamua.” Sa malaga Iesu mai lea nofoaga i lea nofoaga ina ia talaʻi. Na tatau foʻi i Kerisiano moni ona mulimuli i lana faaaʻoaʻoga, ma talaʻi atu le “tala lelei o le Malo o le Atua” i so o se nofoaga. Na tatau ona latou saʻili mo tagata o loo fia iloa le upu moni. (Luka 4:43) O le māfuaaga lenā o le iai i le uluaʻi senituri o “aposetolo,” o se upu na faasino atu i ē sa auina atu e talaʻi. (Mare. 3:14) Na faatonuina e Iesu ona soo: “O le mea lea, ia outou ō atu e fai tagata o nuu uma lava ma soo.”—Mata. 28:18-20.

E lē o toe iai aposetolo e toʻa 12 o Iesu i le lalolagi, ae o loo mulimuli le toʻatele o auauna a Ieova i la latou faaaʻoaʻoga i le faiva. Pe a valaaulia i latou e talaʻi i vaipanoa o loo telē ai le manaʻoga, e latou te tali atu: “O aʻu lenei! Inā auina atu ia aʻu.” (Isa. 6:8) Ua siitia nisi i atunuu mamao, e aofia ai le faitau afe o i latou e faauu mai i le Aʻoga o Kiliata. O nisi ua siitia atu i isi vaipanoa i o latou lava atunuu. Ua aʻoaʻoina e le toʻatele se gagana fou ina ia fesoasoani ai i se faapotopotoga po o se vaega. E leʻi faigofie i taimi uma, ae sa lotomalilie nei uso ma tuafāfine e faia faataulaga ina ia faaalia ai lo latou alolofa mo Ieova ma tagata. O lea, sa latou fuafua lelei ma faaaogā o latou taimi, malosi, ma tupe ina ia talaʻi ai i vaipanoa o loo telē ai le manaʻoga.  (Luka 14:28-30) E matuā tautele le galuega o loo faia e nei uso ma tuafāfine.

E lē mafai e i tatou uma ona siitia i se vaipanoa o loo telē ai le manaʻoga pe aʻoaʻoina se gagana fou, ona e eseese uma o tatou tulaga. Ae e mafai ona avea i tatou uma, e pei o ni misionare i a tatou lava faapotopotoga.

I le uluaʻi senituri, sa maelega Kerisiano i le galuega talaʻi, e ui o le toʻatele o i latou sa nonofo i o latou lava nuu ma e lē o ni misionare. Na faapea atu Paulo iā Timoteo: “Ia fai le galuega a le faievagelia, ia faia ma le māeʻaeʻa lau faiva.” (2 Timo. 4:5) Sa faatatau atu na upu i uluaʻi Kerisiano, ma e faatatau foʻi iā i tatou i aso nei. E tatau i Kerisiano uma ona usitaʻia le poloaʻiga ina ia talaʻi le feʻau o le Malo ma fai isi ma soo. E oo foʻi i totonu o a tatou lava faapotopotoga, e tele auala e mafai ona avea ai i tatou e pei o ni misionare.

O se faaaʻoaʻoga, pe a siitia misionare i isi atunuu, e matuā ese lava le tulaga o mea, ma e manaʻomia ona latou saʻili auala e fetuunaʻi ai i na tulaga fou. E tusa pe e lē mafai ona tatou siitia atu i se vaipanoa o loo telē ai le manaʻoga, ae pe e mafai ona tatou saʻilia auala fou e talaʻi ai i tagata? O se faaaʻoaʻoga, i le 1940 sa faalaeiauina o tatou uso ina ia talaʻi i auala tetele i se aso se tasi o le vaiaso. Po ua e taumafai e molimau atu i ala tetele? Po ua e faataʻitaʻi ona faaaogāina fata e faaali ai lomiga? O le manatu tāua lenei, Pe e te lotomalie e faataʻitaʻi auala fou e talaʻia ai le tala lelei?

Pe afai e iā te oe le uiga mautinoa, o le a e maelega ma naunau i le faiva. O i latou e siitia atu i vaipanoa o loo telē ai le manaʻoga, po o ē o loo aʻoaʻoina se gagana fou, e masani lava o ni tagata talaʻi agavaa ma e mafai ona avea ma fesoasoani tele i le faapotopotoga. O se faaaʻoaʻoga, e latou te taʻimua i le galuega talaʻi. E masani foʻi ona taʻimua misionare i le faapotopotoga, seʻia oo ina agavaa se uso i le faapotopotoga. Pe afai o oe o se uso papatiso po o e “aapa atu,” o lona uiga, po o e lotomalie e auauna i uso ma tuafāfine i lau faapotopotoga e ala i le avea ma auauna o le faiva po o se toeaina?—1 Timo. 3:1.

E mafai foʻi ona tatou fesoasoani i a tatou faapotopotoga i isi auala. E mafai e ē talavou ma matutua, faapea uso ma tuafāfine ona avea ma “faamalosiau” i uso talitonu o loo manaʻomia le fesoasoani.—Kolo. 4:11.

Pe a tatou mananaʻo e fesoasoani i o tatou uso ma tuafāfine, e manaʻomia ona tatou iloa lelei i latou. Ua faalaeiauina i tatou e le Tusi Paia, ina ia ʻmanatunatu le tasi i le isi,’ po o le mafaufau i manaʻoga o o tatou uso ma tuafāfine pe a tatou potopoto faatasi. (Epe. 10:24) E lē uiga atu i lo tatou isuisu pe taumafai e iloa mea uma e faatatau i olaga o isi. Ae e uiga atu i lo tatou taumafai e malamalama i o tatou uso ma tuafāfine, ma mea o loo latou manaʻomia. Atonu e latou te manaʻomia le fesoasoani faaletino, fesoasoani i le itu tau faalogona, po o ni faalaeiauga mai i le Tusi Paia. E moni e iai nisi tulaga, e na o toeaina ma auauna o le faiva e mafai ona fesoasoani iā i latou. (Kala. 6:1) Peitaʻi, e mafai e i tatou uma ona fesoasoani i uso ma tuafāfine matutua, po o aiga o loo fetaiaʻi ma faafitauli.

Na maua e Salvatore le ituaiga fesoasoani lenā. O se tulaga faigatā tau tamaoaiga, na māfua ai ona ia faatauina ese lana pisinisi, o lona fale, ma le tele o meafaitino a lona aiga. Sa ia matuā popole e faatatau i lona aiga. Ae sa iloa e se aiga o le faapotopotoga, o loo manaʻomia e lona aiga le fesoasoani. Sa latou avatu iā Salvatore se tupe, ma fesoasoani iā te ia ma lana avā ina ia maua ni a la galuega. Sa latou faaalu le tele o afiafi ma le aiga o Salvatore e faalogologo ma faalaeiau ai iā i latou. Sa lelei la latou faauōga. O loo manatua e nei aiga taimi fiafia na latou olioli ai, a o latou fesagaʻia faatasi lenā taimi e sili ona faigatā.

E lē faatalatū Kerisiano moni e faailoa atu o latou talitonuga i isi. E tatau ona tatou faaaʻoaʻo iā Iesu, ma faailoa atu i tagata uma folafolaga matagofie a le Atua. E iai nisi e mafai ona siitia i vaipanoa o loo telē ai le manaʻoga, ae e lē mafai ona faia faapea e isi. Peitaʻi, e mafai ona tatou faia uma le mea sili e fesoasoani ai i a tatou faapotopotoga. (Kala. 6:10) Pe a tatou foaʻi atu i isi, o le a tatou maua le fiafia, ma ʻfaaauau ona fua mai galuega lelei uma.’—Kolo. 1:10; Galu. 20:35.