1. O ā manatu e lua ua tatou mautinoa i ai?

E MATUĀ alofa Ieova le Atua i ona tagata tapuaʻi. E fiafia foʻi o ia i le faamasinogatonu. (Sala. 33:5) O lea, e lua manatu ua tatou mautinoa i ai: (1) E tigā le finagalo o Ieova pe a feagai ana auauna ma faiga lē tonu. (2) E na te faamautinoa o le a maua e ona tagata le faamasinotonu. I le mataupu muamua o lenei faasologa o mataupu, * na tatou aʻoaʻoina ai o le Tulafono na tuuina atu e le Atua i le nuu o Isaraelu e ala iā Mose, na faavae i le alofa. Na faaauiluma ai le faamasinotonu mo tagata uma, e oo lava i ē e lē mafai ona puipuia i latou lava. (Teu. 10:18) O lenā Tulafono ua faaalia mai ai le matuā manatu mamafa o Ieova i ana auauna.

2. O ā fesili o le a taliina i lenei mataupu?

² Na muta le Tulafono faa-Mose i le 33 T.A., ina ua faavae le faapotopotoga Kerisiano. Po o lona uiga la o le a ola Kerisiano e aunoa ma se tulafono e faavae i le alofa, ma faaauiluma ai le faamasinotonu? E leai. O lea ua iai se tulafono fou. O le a talanoaina i lenei mataupu po o le ā lenā tulafono, ona taliina lea o fesili nei: Aiseā e mafai ai ona faapea atu o lenei tulafono e faavae i le alofa? Aiseā e talafeagai ai ona faapea atu, o lenei tulafono e faaauiluma ai le faamasinotonu? E tusa ai ma lenei tulafono, o le ā le auala e tatau ona feutagaʻi ai i latou e iai le tulaga pule ma isi tagata?

3. E tusa ai ma le Kalatia 6:2, o le ā e aofia ai i “le tulafono a le Keriso”?

³ Faitau le Kalatia 6:2. O loo ola Kerisiano i “le tulafono a le Keriso.” E leʻi tusia e Iesu se lisi o tulafono mo ona soo. Peitaʻi, na ia tuuina atu iā i latou taʻiala, faatonuga, ma mataupu silisili e taʻitaʻia ai o latou olaga. O “le tulafono a le Keriso,” e aofia ai aʻoaʻoga uma a Iesu. Ina ia malamalama atili e faatatau i lea tulafono, seʻi o tatou iloiloina nisi o vala e aofia ai.

4-5. O ā auala na aʻoaʻo atu ai Iesu, ma o ā taimi na ia aʻoaʻo atu ai?

⁴ O ā auala na aʻoaʻo atu ai Iesu? Muamua, na ia aʻoaʻo atu e ala i ana faamatalaga. E telē se aafiaga o ana faamatalaga ona na faailoa atu ai le upu moni e faatatau i le Atua, iloa ai le fuafuaga moni o le olaga, ma faaalia ai e na o le Malo o le Atua e mafai ona aumaia le vaifofō mo mafatiaga uma o tagata. (Luka 24:19) Lua, na aʻoaʻo atu Iesu e ala i lana faaaʻoaʻoga. Na ia faataatia se faaaʻoaʻoga mo ona soo i le auala e tatau ona ola ai.​—Ioa. 13:15.

⁵ O ā taimi na aʻoaʻo atu ai Iesu? Na aʻoaʻo atu o ia a o faia lana faiva i le lalolagi. (Mata. 4:23) Na ia aʻoaʻoina foʻi ona soo ina ua toe faatūina mai o ia. O se faaaʻoaʻoga, na ia faaali atu i ona soo atonu e silia ma le toʻa 500, ma faatonu i latou ina ia ō e ʻfai tagata ma soo.’ (Mata. 28:19, 20; 1 Kori. 15:6) I le avea ai o Iesu ma ulu o le faapotopotoga, na faaauau ona ia aumaia faatonuga i ona soo ina ua ia toe afio i le lagi. O se faataʻitaʻiga, pe tusa o le 96 T.A. na faatonuina ai e Keriso le aposetolo o Ioane, ina ia avatu faalaeiauga ma fautuaga i Kerisiano faauuina.​—Kolo. 1:18; Faaa. 1:1.

6-7. (a) O fea o loo faamauina ai aʻoaʻoga a Iesu? (e) E faapefea ona tatou usitaʻia le tulafono a le Keriso?

⁶ O fea o loo faamauina ai aʻoaʻoga a Iesu? O le tele o faamatalaga ma gaoioiga a Iesu a o soifua i le lalolagi, o loo faamauina i Evagelia e fā. Ua fesoasoani mai foʻi isi tusi o Tusitusiga Paia Eleni ina ia tatou malamalama ai i le silafaga a Iesu i se mataupu, talu ai o ē na tusia na tusi, na faagaeeina e le agaga paia ma na latou “iloa le finagalo o Keriso.”​—1 Kori. 2:16.

⁷ Lesona: E aogā aʻoaʻoga a Iesu i so o se vala o le olaga. O lea, o le tulafono a le Keriso e aafia ai so o se mea e tatou te faia i le aiga,  galuega, aʻoga, ma le faapotopotoga. E tatou te aʻoaʻoina lenei tulafono, e ala i le faitau i Tusitusiga Paia Eleni ma manatunatu loloto i ai. E tatou te usitaʻia lenei tulafono, e ala i le mulimuli i taʻiala, faatonuga, ma mataupu silisili o loo i Tusitusiga Paia Eleni. Pe a tatou usiusitaʻi i le tulafono a le Keriso, e tusa lenā ua tatou usiusitaʻi i lo tatou Atua alofa o Ieova, le Puna o aʻoaʻoga uma a Iesu.​—Ioa. 8:28.

8. O le ā e faavae ai le tulafono a le Keriso?

⁸ O se fale e malosi lona faavae, e lagona e i latou o loo nonofo ai le saogalemu ma le malupuipuia. I se tulaga talitutusa, o se tulafono e malosi lona faavae, e lagona ai e i latou e usitaʻia le saogalemu ma le malupuipuia. O le alofa e faavae ai le tulafono a le Keriso, ma o se faavae e sili ona malosi. E faapefea ona faamaonia lenā manatu?

9-10. O ā faaaʻoaʻoga e iloa ai o le alofa na uunaʻia ai so o se mea na faia e Iesu, ma e faapefea ona tatou faaaʻoaʻo iā te ia?

⁹ Muamua, o le alofa na uunaʻia ai so o se mea na faia e Iesu. O le tigā alofa po o le alofa mutimutivale, o se faaaliga lea o le alofa. O le tigā alofa na uunaʻia ai Iesu e aʻoaʻoina le motu o tagata, faamālōlō ē e mamaʻi, fafaga i ē fia aai, ma toe faatutū mai ē na maliliu. (Mata. 14:14; 15:32-38; Mare. 6:34; Luka 7:11-15) Na faaalu e Iesu le tele o lona taimi ma le malosi i le faia o na mea, ma na lotomalie e faamuamua manaʻoga o isi nai lo o ona lava manaʻoga. E sili atu i lenā, na ia faaalia le alofa moni i tagata e ala i le foaʻi atu o lona ola mo i latou.​—Ioa. 15:13.

¹⁰ Lesona: E tatou te faaaʻoaʻo iā Iesu e ala i le faamuamua o manaʻoga o isi nai lo o o tatou lava manaʻoga. E lē gata i lea, e tatou te faaalia foʻi le alofa mutimutivale mo tagata i le oganuu. Pe a uunaʻia i tatou e le alofa mutimutivale e talaʻi ma aʻoaʻo atu le tala lelei, e tusa lenā ua tatou usiusitaʻi i le tulafono a le Keriso.

11-12. (a) E faapefea ona iloa le matuā manatu mamafa mai o Ieova iā i tatou? (e) E faapefea ona tatou faaaʻoaʻo i le alofa o Ieova?

¹¹ Lua, na faaatagia mai e Iesu le alofa o lona Tamā. Na faaalia e Iesu i lana faiva, le matuā manatu mamafa mai o Ieova i ona tagata tapuaʻi. O nisi nei o manatu na aʻoaʻoina e Iesu: E tāua ma tautele i tatou uma i lo tatou Tamā i le lagi. (Mata. 10:31) E nofosauni Ieova e talia se mamoe na leiloa ua faaalia le salamō, ma toe foʻi mai i le faapotopotoga. (Luka 15:7, 10) Na faamaonia e Ieova lona alofa mo i tatou, e ala i le foaʻi mai o lona Alo e fai ma togiola mo i tatou.​—Ioa. 3:16.

¹² Lesona: E faapefea ona tatou faaaʻoaʻo i le alofa o Ieova? (Efe. 5:1, 2) E tatou te vāai i o tatou uso ma tuafāfine uma o ni ē e tāua ma tautele, ma e tatou te talia ma le fiafia “se mamoe ua leiloa” ua toe foʻi mai iā Ieova. (Sala. 119:176) E faamaonia lo tatou alolofa mo o tatou uso ma tuafāfine, e ala i le faaaogā o lo tatou taimi ma le malosi e fesoasoani atu ai iā i latou aemaise i taimi faigatā. (1 Ioa. 3:17) Pe a tatou feutagaʻi ma isi i se auala alofa, e tusa lenā ua tatou usiusitaʻi i le tulafono a le Keriso.

13-14. (a) E pei ona taʻua i le Ioane 13:34, 35, o le ā na poloaʻia e Iesu ona soo e fai, ma aiseā e fou ai lea poloaʻiga? (e) E faapefea ona tatou usiusitaʻi i le poloaʻiga fou?

¹³ Tolu, na poloaʻia e Iesu ona soo ina ia faaalia le alofa faataulaga. (Faitau le Ioane 13:34, 35.) E fou le poloaʻiga a Iesu, talu ai o lenei alofa e ese mai i le alofa lea na manaʻomia ona faaalia i le Tulafono faa-Mose. O le poloaʻiga lenei a Iesu: Ia alofa i o tatou uso talitonu e pei ona alofa mai Iesu iā i tatou, ma e manaʻomia ai le alofa faataulaga. * E tatau ona sili atu lo  tatou alolofa i o tatou uso ma tuafāfine, nai lo o lo tatou alolofa iā i tatou lava. O lenā alofa e tatou te lotomalilie ai e feoti mo i latou, e pei ona sa faia e Iesu mo i tatou.

¹⁴ Lesona: E faapefea ona tatou usiusitaʻi i le poloaʻiga fou? E ala i le faia o faataulaga mo o tatou uso ma tuafāfine. E lē gata e tatou te lotomalilie e faia faataulaga tetele, o le feoti lea mo i latou, ae e tatou te faia foʻi faataulaga lāiti. O se faataʻitaʻiga, e tatou te faia e lē aunoa taumafaiga ina ia fesoasoani atu ai i se uso po o se tuafafine matua o loo manaʻomia se auala mo le sauniga, pe faataulaga foʻi mea e tatou te fiafia i ai ina ia faafiafia ai sē e pele iā i tatou, pe faaaogā foʻi o tatou aso mālōlō mai i galuega e fesoasoani ai i taimi o mala. O le faia faapea, ua tatou usiusitaʻi ai i le tulafono a le Keriso. Ua tatou saosaolaumea ai foʻi i le avea o a tatou faapotopotoga, ma nofoaga e lagona ai e tagata uma le saogalemu ma le malupuipuia.

15-17. (a) Na faapefea ona atagia mai le faamasinotonu i gaoioiga a Iesu? (e) E faapefea ona tatou faaaʻoaʻo iā Iesu?

¹⁵ I le Tusi Paia, o loo faasino atu le “faamasinotonu” i le faia o le mea e tonu i le silafaga a le Atua, ma ia faia e aunoa ma le faaituʻau. Aiseā e tatou te faapea atu ai o le tulafono a le Keriso e faaauiluma ai le faamasinotonu?

¹⁶ Muamua, seʻi mātau le auala na atagia mai ai le faamasinotonu i gaoioiga a Iesu. I taimi o Iesu, na feita taʻitaʻi lotu Iutaia i tagata e lē o ni Iutaia, ʻinoʻino i tagata lautele o Iutaia, ma lē faaaloalo i fafine. Peitaʻi, na tonu ma e leʻi faaituʻau le auala na feutagaʻi ai Iesu ma tagata uma. Na ia taliaina tagata e lē o ni Iutaia o ē na faatuatua iā te ia. (Mata. 8:5-10, 13) Na ia talaʻi atu i so o se tagata, e tusa pe mauʻoa pe matitiva. (Mata. 11:5; Luka 19:2, 9) E leʻi inainā pe sauā o ia i fafine. Nai lo o lea, na ia faaalia le faaaloalo ma agalelei iā i latou, e aofia ai i latou sa tauemua e tagata.​—Luka 7:37-39, 44-50.

¹⁷ Lesona: E tatou te faaaʻoaʻo iā Iesu e ala i le lē faaituʻau pe a feutagaʻi ma isi, ma talaʻi atu i so o se tasi e fia faalogo i le tala lelei, e tusa po o ā o latou tulaga tau tamaoaiga po o tapuaʻiga. E faaaʻoaʻo tane Kerisiano iā Iesu, e ala i le faaaloalo i fafine. O le faia o nei mea, ua tatou usiusitaʻi ai i le tulafono a le Keriso.

18-19. O ā mea na aʻoaʻoina e Iesu e faatatau i le faamasinotonu, ma o ā lesona e tatou te aʻoaʻoina mai ai?

¹⁸ Lua, ia mātau aʻoaʻoga a Iesu e faatatau i le faamasinotonu. Na ia aʻoaʻoina ona soo i mataupu silisili e fesoasoani iā i latou ina ia feutagaʻi ai ma isi i se auala tonu. O se faaaʻoaʻoga, o le Tulafono Faaauro. (Mata. 7:12) E tatou te mananaʻo uma lava e feutagaʻi isi ma i tatou i se auala tonu. O le auala foʻi lea e tatau ona tatou feutagaʻi ai ma i latou. Pe a tatou faia faapea, atonu o le a uunaʻia ai i latou e feutagaʻi ma i tatou i se auala tonu. Ae e faapefea pe a latou lē faia faapea? Na aʻoaʻoina foʻi e Iesu ona soo ina ia maufaatuatuaina Ieova, o le a ia ʻfaia le faamasinogatonu mo ē o loo alalaga atu iā te ia i le ao ma le pō.’ (Luka 18:6, 7) Maʻeu le matagofie o lenā folafolaga! Ua faamautinoa mai ai, o loo silafia e le Atua tulaga faigatā o loo tatou fesagaʻia i nei aso e gata ai, ma o le a ia faia le faamasinotonu mo ana auauna i lana taimi atofaina.​—2 Tesa. 1:6.

¹⁹ Lesona: Pe a tatou usitaʻia mataupu silisili na aʻoaʻoina e Iesu, o le a tatou feutagaʻi ai ma isi i se auala tonu. Pe afai na tatou aafia i ni faiga lē tonu ona o lenei lalolagi a Satani, e faamāfanafanaina i tatou i le iloaina, o le a faia e Ieova le faamasinotonu mo i tatou.

20-21. (a) O le ā le auala e tatau ona feutagaʻi ai i latou e iai le tulaga pule ma isi? (e) E faapefea ona faaalia e se tane le alofa faataulaga, ma o le ā le auala e tatau ona feutagaʻi ai se tamā ma lana fanau?

²⁰ E tusa ai ma le tulafono a le Keriso, o le ā le auala e tatau ona feutagaʻi ai i latou e iai le tulaga pule ma isi? Talu ai e faavae lenā tulafono i le alofa, e tatau la i ē e iai le tulaga pule ona faatāua ē o loo latou vaavaaia ma tausia i se auala alofa. E tatau ona latou manatua, o ala o Keriso e faavae i le alofa.

²¹ I le aiga. E tatau i se tane ona alofa i lana avā “e pei foʻi ona faia e Keriso i le faapotopotoga.” (Efe. 5:25, 28, 29) E tatau ona ia faaaʻoaʻo i le alofa faataulaga o Keriso, e ala i le faamuamua o manaʻoga ma mea e fiafia i ai lana avā, nai lo o ona lava manaʻoga. Atonu e faigatā i nisi tane ona faia lea tulaga, ona o le siʻomaga na latou ola aʻe ai, lea e lē faatāuaina ai le feutagaʻi ma isi i se auala tonu ma alofa. E ono faigatā mo i latou ona suia nei masaniga, ae e tatau ona latou faia na suiga, ina ia mafai ai ona latou usiusitaʻi i le tulafono a le Keriso. O se tane e faaalia le alofa faataulaga, e faaaloalogia o ia e lana avā. O se tamā e alofa moni i lana fanau, e na te lē faia se faamatalaga po o se gaoioiga e faatigā ai iā i latou. (Efe. 4:31) Nai lo o lea, e faaali lona alofa ma lona fiafia i lana fanau, ma e latou te lagona ai le saogalemu ma le malupuipuia. O lona faia faapea, o le a alofagia ma maufaatuatuaina ai o ia e lana fanau.

22. E tusa ai ma le 1 Peteru 5:1-3, o ai e ana “mamoe,” ma o le ā le auala e tatau ona tausia ai i latou?

²² I le faapotopotoga. E tatau i toeaina ona manatua, e lē o i latou e ana “mamoe.” (Ioa. 10:16; faitau le 1 Peteru 5:1-3.) O faaupuga “le lafu mamoe a le Atua” ma “tagata o le Atua,” e faamanatu atu ai i toeaina o Ieova e ana mamoe. E finagalo o ia ina ia tausia  ana mamoe i se auala alofa ma faapelepele. (1 Tesa. 2:7, 8) O toeaina e faatinoina o latou tiute tauave faaleoleo mamoe i se auala alofa, e latou te mauaina le finagalo malie o Ieova. E alofagia ma faaaloalogia foʻi i latou e uso ma tuafāfine.

23-24. (a) O le ā le matafaioi a toeaina pe a faia e se tasi se mea sesē matuiā? (e) O le ā e ao ona manatua e toeaina pe a taulima na mataupu?

²³ O le ā le matafaioi a toeaina pe a faia e se tasi se mea sesē matuiā? E ese la latou matafaioi mai i le matafaioi a faamasino ma toeaina i le taimi o le Tulafono faa-Mose. I lenā taimi, e lē gata sa taulima e tane tofia mataupu faaleagaga, ae na latou taulimaina foʻi mataupu eseese ma soligatulafono. Ae i le tulafono a le Keriso, e taulima e toeaina na o mea sesē e fesootaʻi atu i le tapuaʻiga iā Ieova. E latou te malamalama, ua tuuina mai e le Atua i faipule silisili le matafaioi e taulima ai isi mataupu eseese ma soligatulafono. E aofia ai le pule e faia ai ni faasalaga, e pei o le totogiina o ni salatupe pe faafalepuipuiina foʻi.​—Roma 13:1-4.

²⁴ E faapefea ona taulima e toeaina se mea sesē matuiā e faia e se tasi? E latou te faaaogā le Tusi Paia e iloilo ai le mea na tupu, ma faavae mai ai la latou faaiʻuga. E latou te manatua, e faavae le tulafono a le Keriso i le alofa. O le alofa e uunaʻia ai i latou ina ia iloilo, pe e faapefea ona fesoasoani i ē na faamanuʻalia i se gaoioiga sesē na fai e se isi. O le alofa e uunaʻia ai foʻi toeaina e mātau vala nei e faatatau i lē na faia le mea sesē: Po ua ia salamō? Pe e mafai ona matou fesoasoani iā te ia ina ia toe faaleleia lana faiā ma Ieova?

25. O le ā o le a talanoaina i le mataupu o loo sosoo mai?

²⁵ Maʻeu lo tatou lotofaafetai ona o loo tatou ola i le tulafono a le Keriso! Pe a tatou taumafai malosi e usitaʻia lenā tulafono, o le a avea a tatou faapotopotoga ma nofoaga e lagona ai e tagata uma le malupuipuia, alofagia, ma le faatāuaina o i latou. Peitaʻi, o loo tatou ola i se lalolagi ua ʻfaateteleina pea le leaga o tagata amioleaga.’ (2 Timo. 3:13) E tatau ona tatou mataala. E faapefea la ona faaatagia atu e le faapotopotoga Kerisiano le faamasinotonu o le Atua, pe a taulima faigaaiga faamalosi i tamaiti? O le a taliina lenā fesili i le mataupu o loo sosoo mai.