E TOʻATELE uso ma tuafāfine na tuua o latou atunuu ae faimalaga atu i isi atunuu ina ia maua le tele o tupe, ae i le taimi nei ua toe foʻi i o latou atunuu. O lo latou alofa mo Ieova ma tagata ua uunaʻia ai i latou e siitia atu i le mea o loo tele ai le manaʻoga mo tagata talaʻi. (Mata. 22:37-39) O ā faataulaga na latou faia, ma o ā faamanuiaga ua latou selesele i ai? Ina ia iloa, seʻi o tatou uaʻi atu i le atunuu o Cameroon i le itu i sisifo o Aferika.

I le 1998 na tuua ai e Onésime Cameroon ma e 14 tausaga talu ona ia tuua lona atunuu. I se tasi aso i le sauniga, na ia faalogo ai i se talafaatusa e faatatau i le galuega talaʻi. Na faapea atu le failauga, “Pe afai o loo fagogota ni tagata se toʻalua i ni ogāsami eseese, ma e tele iʻa o loo maua e le tasi nai lo o le isi, pe e lē uunaʻia ea le tagata e itiiti ana iʻa e alu e fagota i le ogāsami o loo fagota ai le tagata o loo tele ana iʻa?”

O lenā talafaatusa na mafaufau ai loa Onésime e toe foʻi i Cameroon i le nofoaga o loo tele ai iʻa faaleagaga ina ia fesoasoani i le ʻautalaʻi i inā. Ae na iai ona popolega. Pe e mafai ona ia toe faamasani i le olaga i Cameroon ona o le tele o tausaga na alu ese ai? Ina ia iloa, na alu Onésime i Cameroon ma nofo ai mo le ono masina. Ae i le 2012, na toe foʻi ai Onésime i Cameroon ma nofomau ai i inā.

Na faapea mai Onésime, “Na tatau ona ou toe faamasani i le vevela o le tau ma le olaga i inā. Na tatau foʻi ona ou faamasani e nofo i nofoa e leai ni momi i le Maota mo Sauniga.” Na ʻataʻata o ia ma faapea mai, “O le tele ou te uaʻi atu ai i le sauniga, o le tele foʻi lenā e galo ai iā te aʻu nofoa faamalū.”

I le 2013, na faaipoipo ai Onésime iā Géraldine, o se tuafafine na toe foʻi i Cameroon ina ua mavae le iva tausaga o nofo i Falani. O ā faamanuiaga na maua e lenei ulugalii ona o lo la faamuamuaina o le faia o le finagalo o Ieova? Na faapea mai Onésime, “Na ma auai i le Aʻoga mo Tagata Talaʻi o le Malo ma auauna i le Peteli. I le tausaga ua teʻa, e toʻa 20 tagata aʻoga o le Tusi Paia i la matou faapotopotoga na papatiso. Ua ou lagonaina ua ou iai tonu lava i le nofoaga e ʻfaifaiva’” ai. (Mare. 1:17, 18) Na faapea mai Géraldine: “E tele atu faamanuiaga ua ou maua nai lo o mea na ou mafaufau i ai.”

Na siitia atu Judith i le Iunaite Setete, ae na ia manaʻo lava e faalautele lana faiva. Na ia faapea mai, “Pe a matou asiasi i Cameroon o se aiga, o taimi uma lava e matou te sauni ai e toe foʻi ou te tagi ona o le a ou tuua i latou na ou faia a latou suʻesuʻega faale-Tusi Paia.” Peitaʻi, na faatalatū Judith e toe foʻi i Cameroon. Na lelei lana  galuega totogi, lea na mafai ai ona ia totogiina togafitiga faafomaʻi na manaʻomia e lona tamā i Cameroon. Peitaʻi, o lona maufaatuatuaina o Ieova na mafai ai ona ia toe foʻi i Cameroon. Na ia taʻutino mai e iai mea e na te misia i le olaga sologa lelei na ia fiafia ai i Amerika. Na ia tatalo iā Ieova mo le fesoasoani e sui ai lana vaai, ma na fesoasoani foʻi iā te ia faalaeiauga na ia maua mai i le ovasia matagaluega ma lana avā.

Na faapea mai Judith, “I le tolu tausaga talu ona ou toe foʻi mai, na ou olioli i loʻu mauaina o se fanau faaleagaga e toʻafā.” Na amata ona auauna Judith o se paeonia faapito, ma o loo auauna faatasi nei ma lana tane o Sam-Castel o se ovasia matagaluega. Ae o le ā na tupu i le tamā o Judith? Na maua e Judith ma lona aiga se falemaʻi i se isi atunuu na lotomalilie e fai ma totogi le taotoga o lona tamā. O le mea e fiafia ai ona na manuia le taotoga.

Na siitia le uso o Victor i Kanata. Ina ua uma ona ia faitau i se mataupu o le Olomatamata e faatatau i aʻoga maualuluga, na ia mafaufau loa e lē toe alu i le iunivesite ae ave ana mataupu mo tomai faapitoa. Na ia faapea mai, “O le faia faapea na vave ai ona maua saʻu galuega, ma mafai ai ona fai le mea ua leva ona ou manaʻo i ai, o le paeonia.” Mulimuli ane, na faaipoipo Victor iā Caroline, ma na la asiasi atu i Cameroon. Ina ua la asiasi i le ofisa o le lālā i inā, na faalaeiauina ai i laʻua e toe iloilo pe e mafai ona la auauna i Cameroon. Na faapea mai Victor, “E leai se māfuaaga e ma te mumusu ai, ma ona ua faafaigofie o ma olaga e mafai la ona ma talia le valaaulia.” E ui lava e iai faafitauli tau soifua mālōlōina o Caroline, ae na la filifili lava e siitia atu.

Na auauna Victor ma Caroline o ni paeonia sauatoa i Cameroon ma na la fesoasoani iā i latou na faaalia le fiafia i le Tusi Paia. Na mafai ona la tausia o la manaʻoga o ni paeonia i se taimi, mai i tupe na la teuina. Mulimuli ane, na la toe ō i Kanata e faigaluega ai mo ni nai masina ina ia mafai ai ona la toe foʻi i Cameroon e faaauau le la paeonia. O ā faamanuiaga na la maua? Na la auai i le Aʻoga mo Tagata Talaʻi o le Malo, auauna o ni paeonia faapito, ma o loo galulue nei o ni auauna mo faugāfale. Na faapea mai Victor, “O le tuua o ma olaga sologa lelei, na mafai ai ona ma tofo i le lagolagosua a Ieova.”

I le 2002, na faitau ai e Alain o se tagata aʻoga i le iunivesite i Siamani le sāvali Talavou e, O le a Faapefea Ona Faaaogā o Outou Olaga? O faamatalaga na ia faitau i ai na uunaʻia ai o ia e faatutū ni sini fou. I le 2006, na auai ai Alain i le Aʻoga mo Toleniga i le Faiva ma na tofia o ia e auauna i Cameroon le atunuu na fanau ai.

I Cameroon na maua e Alain se galuega faavaitaimi. Mulimuli ane, na ia maua se galuega e lelei le totogi ae na ia popole ina neʻi faaitiitia ai lona taimi i le talaʻiga. O lea, ina ua valaaulia o ia e auauna o se paeonia faapito na ia talia loa e aunoa ma le faatalatū. Na toe ofo i ai e lana pule se totogi e telē atu, ae e leʻi suia ai lana faaiʻuga. Mulimuli ane, na faaipoipo Alain iā Stéphanie, o se tuafafine na nofo i Falani mo le tele o tausaga. O ā faafitauli na fesagaʻia e Stéphanie ina ua ia toe foʻi i Cameroon?

Na faapea mai Stéphanie: “Na iai ni nai faafitauli tau soifua mālōlōina na ou aafia ai, ae na mafai lava ona togafitia ma ou maua ai se mapusaga.” Na tauia lenei ulugalii ona o le la onosaʻi. Na faapea mai Alain, “Ina ua matou talaʻi i se nuu maotua e taʻua o Katé, na matou maua  ai ni tagata na mananaʻo e suʻesuʻe le Tusi Paia. Mulimuli ane, na mafai ona matou suʻesuʻeina le Tusi Paia ma i latou e faaaogā ai le telefoni. E toʻalua tagata aʻoga na papatiso, ma na faavae ai se vaega o le ʻautalaʻi i inā.” Na toe fai mai Stéphanie, “E leai se olioli e sili atu nai lo o le fesoasoani i tagata ina ia agavaa e tuuina atu i latou lava iā Ieova. Ua ma tofo i lenā olioli i le tele o taimi ona ua ma galulue i inei.” Ua auauna nei Alain ma Stéphanie i le galuega femalagaaʻi.

Na papatiso Gisèle a o aʻoga faafomaʻi i Italia. Na fiafia o ia i le faigofie o le olaga na ola ai se ulugalii paeonia na aʻoaʻoina o ia i le Tusi Paia, ma na manaʻo ai Gisèle e faalautele atu lana auaunaga. O lea, na amata ai ona ia auauna o se paeonia sauatoa a o faauma ana aʻoga.

Na faanaunau Gisèle e toe foʻi i Cameroon e faalautele ai lana auaunaga iā Ieova, ae na iai ona popolega. Na ia faapea mai: “O lona uiga o le a lē maua laʻu nofomau i Italia, ma o le a matou valavala ai ma uō ma aiga ia e nonofo i Italia.” E ui i na popolega, ae iā Me 2016, na toe foʻi ai Gisèle i Cameroon. I se taimi mulimuli ane, na faaipoipo ai Gisèle iā Léonce, ma na fautuaina e le ofisa o le lālā i Cameroon i laʻua e siitia i Ayos, o se taulaga e tele ai le manaʻoga mo tagata talaʻi o le Malo.

E faapeʻī le olaga i Ayos? Na faapea mai Gisèle: “E masani ona lē ola le eletise mo ni vaiaso, ma na lē mafai ai ona fafaga a ma telefoni. O le tele o taimi e lē ola ai a ma telefoni. Na ou faamasani i le kukaina o meaʻai e tafu i le afi, ma pe a oo i le pō ona ma ō lea ma a ma uilipaelo ma molī uila e asu mai a ma vai i le vaipuna. O le taimi lenā e tau leai ai ni tagata i le vai.” Na faapefea ona fesagaʻia e lenei ulugalii lenā tulaga? Na faapea mai Gisèle, “Na fesoasoani tele iā i maʻua le agaga o Ieova, le lagolagosua a le tasi i le isi, ma faalaeiauga mai i o ma aiga ma uō, ma o nisi taimi e latou te fesoasoani mai foʻi i le itu tautupe.”

Pe na fiafia Gisèle ina ua toe foʻi i lona atunuu? Na ia faapea mai: “Ioe! O le mea moni lenā. I le amataga, na iai faafitauli ma faalogona o le lotovaivai. Ae ina ua ma foʻia na tulaga, na ma lagona ma laʻu tane o le mea tonu lava lenei na manaʻomia ona ma faia. Na ma maufaatuatuaina Ieova ma vavalalata atu iā te ia.” Na auai Léonce ma Gisèle i le Aʻoga mo Tagata Talaʻi o le Malo, ma ua la auauna nei o ni paeonia faapito lē tumau.

E pei o faifaiva lototetele e latou te onosaia tulaga faigatā ina ia maua ai le tele o iʻa, e faapena foʻi i latou e lotomalilie e toe foʻi i o latou atunuu, ua latou faia faataulaga e fesoasoani ai iā i latou e lotofaamaoni ua tali mai i le feʻau o le Malo. E lē taumatea o le a tauia e Ieova nei tagata talaʻi galulue mamafa, o ē ua faaalia le alofa mo lona suafa. (Nee. 5:19; Epe. 6:10) Pe afai o loo e aumau i se isi atunuu, ae o loo tele le manaʻoga mo tagata talaʻi o le Malo i lou atunuu, pe e mafai ona e toe foʻi? Pe a e toe foʻi, e tele faamanuiaga o loo faatali mai mo oe.​—Faata. 10:22