Na aʻoaʻoina e Iesu uiga na mafai ona avea ai o ia ma faaaʻoaʻoga e sili ona lelei, o sē na galulue faatasi ma ona soo a o i ai i le lalolagi. E faapefea ona aogā iā i tatou le faaaʻoaʻoga a Iesu? E ala i le iloilo totoʻa o lana faaaʻoaʻoga, o le a tatou iloa ai mataupu silisili e tolu e fesoasoani iā i tatou ina ia galulue faatasi ma isi. E fesoasoani nei mataupu silisili e atiaʻe ai le agaga o le autasi ma le galulue felagolagomaʻi.

O se tagata e mafai ona tatou galulue faatasi, e lotomaulalo ma e tāua iā te ia tagata o loo latou galulue ma e lē faalialiavale foʻi i ona tomai. Na aʻoaʻo mai e Iesu i lona Tamā le lotomaulalo. E ui e na o Ieova e tatau ona taʻua o Lē na foafoaina mea, ae na ia amanaʻia le matafaioi a lona Alo o lē na la galulue faatasi. Ua tatou iloa lenei mea ina ua fetalai atu le Atua: “Seʻi o ta faia le tagata i lo taʻua faatusa.” (Kene. 1:26) E mautinoa na matuā talisapaia e Iesu le lotomaulalo o Ieova.​—Sala. 18:35.

Na faaalia e Iesu lenā lotomaulalo a o iai i le lalolagi. Ina ua viiviia Iesu ona o ana galuega, na ia avatu le viiga uma i lona Tamā o Lē ua tatau i ai. (Mare. 10:17, 18; Ioa. 7:15, 16) Na galue Iesu e faatumauina se siʻomaga filemu ma ona soo, ma na ia vaai iā i latou o ni uō ae lē o ni pologa. (Ioa. 15:15) Na ia mulumuluina foʻi o latou vae, ina ia aʻoaʻoina i latou e faatatau i le lotomaulalo. (Ioa. 13:5, 12-14) E tatou te faatāuaina foʻi i  latou e tatou te galulue faatasi, e ala i le faamuamua o latou manaʻoga nai lo tatou lava manaʻoga. Pe a tausolomua ona “faaaloalo le tasi i le isi” ma lē popole po o ai e viiviia, o le a tele ai mea e mafai ona tatou faia.​—Roma 12:10.

O le tagata lotomaulalo, e na te iloa “o le toʻatele o le ʻaufaufautua e taunuu ai mea.” (Faata. 15:22) E tusa lava po o le ā le tele o lo tatou poto masani po o tomai, e tatau ona tatou manatua e leai se tagata e na te iloa mea uma. E oo lava iā Iesu na ia taʻutino mai e iai mea e na te leʻi iloa. (Mata. 24:36) Na fia iloa foʻi e Iesu manatu o ona soo lē lelei atoatoa, po o mea na latou iloa. (Mata. 16:13-16) E lētioa a fiafia ona soo e latou te galulue faatasi! Pe a tatou lotomaulalo foʻi e faailoa atu e faatapulaa mea e tatou te iloa, ma talosaga mo le fesoasoani a isi, o le a tatou maua ai ni faauōga māfana ma faataunuu ai mea e tele.

A o galulue faatasi toeaina, e matuā tāua ona latou faaaʻoaʻo i le faaaloalo o Iesu. E tatau ona latou manatua, e mafai e le agaga paia ona taaʻina so o se tasi o le ʻautoeaina. Pe a taumafai toeaina e tausia se siʻomaga filemu i a latou fono, o le a faigofie ai i toeaina uma ona faia se sao ma faia faatasi ni faaiʻuga e aogā mo le faapotopotoga.

O se tagata e mafai ona tatou galulue faatasi, e feutagaʻi ma isi i se auala magafagafa. E fetuutuunaʻi ma gauaʻigofie. E tele avanoa mataʻina na mātauina ai e Iesu le magafagafa o lona Tamā. Mo se faataʻitaʻiga, na auina mai e Ieova o ia ina ia laveaʻiina tagata mai i le faasalaga oti, lea e tatau i tagata.​—Ioa. 3:16.

Na gauaʻi Iesu pe a manaʻomia ma talafeagai. Manatua le auala na fesoasoani ai o ia i se fafine Foinie, e ui na auina atu o ia i le aiga o Isaraelu. (Mata. 15:22-28) Na magafagafa Iesu i mea e gafatia e ona soo. Ina ua uma ona faafitia e lana uō vavalalata o Peteru o ia, na nofosauni Iesu e faamagalo iā te ia. Mulimuli ane, na ia tuuina atu iā te ia ni tiute tauave tāua. (Luka 22:32; Ioa. 21:17; Galu. 2:14; 8:14-17; 10:44, 45) O le faaaʻoaʻoga a Iesu ua faailoa manino mai ai, e tatau ona ʻiloa e tagata uma lo tatou magafagafa’ e ala i lo tatou gauaʻigofie.​—Fili. 4:5.

O le magafagafa e uunaʻia ai i tatou e fetuutuunaʻi, ina ia mafai ai ona tatou galulue faatasi ma tagata uma. Na matuā lelei le auala na feutagaʻi ai Iesu ma ē na latou galulue faatasi. O lea, na lotoleagaina o ia e ona fili ma tuuaʻia o ia “o le uō a le ʻauaolafoga ma ē e agasala,” o  tagata na tali atu i lana feʻau. (Mata. 11:19) Pe mafai ona tatou faaaʻoaʻo iā Iesu i le auala e galulue faatasi ai ma isi? Seʻi manatu i le uso o Louis, na galulue faatasi o ia ma i latou e eseese talaaga i le galuega femalagaaʻi ma Peteli. Na ia faapea mai: “Na ou taumafai e faatusatusa vaega taʻitasi na matou galulue, i se pa e ati i maa e eseese uma le lapopoʻa ma le lāiti. O le taumafai e fetuutuunaʻi le auala e fatufatu ai nisi o maa, o le a maua ai se pa e saʻo lelei. Ou te taumafai foʻi e fai ni aʻu lava fetuutuunaʻiga ina ia saosaolaumea ai i le galulue faatasi.” Maʻeu se faaaʻoaʻoga lelei!

Pe e tatou te lotomalilie e galulue faatasi ma isi i la tatou faapotopotoga? E tatou te maua avanoa e faia ai faapea, pe a tatou auai i vaega mo le talaʻiga. Atonu e mafai ona tatou galulue faatasi ma tagata talaʻi e eseese o latou tiute tauave i le aiga mai iā i tatou, pe eseese foʻi o latou matutua. Pe mafai ona fetuutuunaʻi le vave o lau savali ma fai ma mālōlō, po o le fetuutuunaʻi o le auala e talaʻi ai, ina ia faateleina ai lo latou fiafia i le talaʻiga?

O se tagata e mafai ona tatou galulue faatasi, e “nofosauni e tufa atu.” (1 Timo. 6:18) A o galulue faatasi Iesu ma lona Tamā, atonu na ia mātauina e leʻi natia e Ieova se mea mai iā te ia. Na iai Iesu ina ua “saunia le lagi” e Ieova, ma na mafai ona ia aʻoaʻoina mai ai le tele o mea. (Faata. 8:27) Mulimuli ane, na fiafia Iesu e faailoa atu i ona soo ʻmea na ia faalogo ai’ i lona Tamā. (Ioa. 15:15) E mafai ona tatou faaaʻoaʻo iā Ieova, e ala i le faasoa atu o lo tatou poto masani ma le tomai, i o tatou uso ma tuafāfine o loo tatou galulue faatasi. O se tagata e mafai ona tatou galulue faatasi, e na te lē taofia faamatalaga aogā ma manaʻomia, ona e manaʻo e faaauau pea ona pulea isi. E fiafia e taʻu atu i isi mea lelei na ia aʻoaʻoina.

E mafai foʻi ona tatou faailoa atu faalaeiauga i ē tatou te galulue faatasi. Pe e tatou te lē lagona le fiafia pe a mātauina e se tasi a tatou taumafaiga ma le lototalisapaia? Na faaalu e Iesu se taimi e taʻu atu ai i ē na latou galulue faatasi se mea lelei na ia mātauina mai iā i latou. (Faatusatusa i le Mataio 25:19-23; Luka 10:17-20.) Na ia taʻu atu foʻi iā i latou o le a latou “faia foʻi galuega e sili atu” nai lo ia. (Ioa. 14:12) I le pō a o leʻi maliu, na ia faamālō atu ai i ona aposetolo faamaoni e faapea: “O outou foʻi, ua outou tumau iā te aʻu i taimi o oʻu puapuaga.” (Luka 22:28) Seʻi manatu i le pāʻia o latou loto i ana upu, ma uunaʻia ai i latou e gaoioi! Pe a tatou faaalu se taimi e faamālō ai i ē tatou te galulue faatasi, e mautinoa e latou te matuā fiafia ai ma faataunuu ai le tele o mea.

Ua faapea mai se uso e igoa iā Kayode: “E lē manaʻomia ona lelei atoatoa se tagata e tatou te galulue faatasi. Ae e mafai ona ia faafiafiaina isi ma faafaigofie le auala e galulue faatasi ai.” Po oe o se tagata faapena? Atonu e mafai ona e fesili i nisi uso ma tuafāfine o loo tou galulue faatasi, po o le ā so latou manatu e faatatau iā te oe. Pe latou te fiafia e galulue faatasi ma oe, e pei foʻi ona fiafia soo o Iesu e galulue faatasi ma ia? Afai o lea, e mafai ona e faapea atu e pei o le aposetolo o Paulo: “O i matou o le ʻaufaigaluega faatasi ma outou mo lo outou olioli.”​—2 Kori. 1:24.