1. Aiseā e ono talafeagai ai ona faamamaluina nisi, ma o le ā o le a tatou talanoaina?

O LE faamamaluina o se tasi, e uiga atu i le ua‘i faapitoa atu i ai ma faaalia i ai le faaaloalo. E tatou te faatalitalia o lē e tatau ona tatou ua‘i faapitoa atu i ai ma faaaloalogia, o se tasi e na te faia se gaoioiga ua tatau i ai le mamalu, pe umia fo‘i se tulaga faapitoa. O lea e tatou te ono fesili ai, po o ai e tatau ona tatou faamamaluina, ma aiseā ua tatau ai ona faamamaluina o ia?

2, 3. (a) Aiseā ua matuā alagatatau ai ona faamamaluina Ieova? (Taga‘i i le ata i luga a‘e o le matua.) (e) O ai le Tama‘i Mamoe o loo ta‘ua i le Faaaliga 5:13, ma aiseā ua alagatatau ai ona faamamaluina o ia?

² E mautinoa ua alagatatau ona faamamaluina “Lē e afio i le nofoālii ma le Tama‘i Mamoe,” e pei ona ta‘ua i le Faaaliga 5:13. I le mataupu e 4 o le Faaaliga, o loo ta‘ua ai se tasi o māfuaaga ua alagatatau ai ona faamamaluina Ieova. Ua vivii faatasi foafoaga i le lagi iā Ieova, “o Lē e soifua pea e faavavau, faavavau lava.” Ua latou faalauiloa atu e faapea: “Ieova e, lo matou Atua, ua tatau lava oe ona e mauaina le viiga, ma le mamalu, ma le mana, auā na e foafoaina mea uma lava, ma o lou finagalo fo‘i  ua iai nei mea ma na foafoaina ai.”—Faaa. 4:9-11.

³ O le Tama‘i Mamoe o Iesu Keriso, “o le Tama‘i Mamoe a le Atua, o lē e na te aveeseina le agasala a le lalolagi.” (Ioa. 1:29) Ua ta‘ua i le Tusi Paia e matuā sili atu o ia i tagata uma na avea ma o loo avea ma tupu. O loo ta‘ua ai: “O ia o le Tupu o tupu ma le Alii o alii, e na o ia lava e lē mafai ona oti, o lē e afio i le malamalama e lē mafai ona sao i ai se tasi, o lē e le‘i vaaia e se tagata ma e lē mafai lava ona vaai i ai.” (1 Timo. 6:14-16) O le mea moni, e leai lava se isi tupu na finagalo malie e maliu ina ia togiola ai a tatou agasala. Pe e lē uuna‘ia ai oe e vivii faatasi ma le mano ni mano o foafoaga i le lagi, e faalauiloa atu e faapea: “Ua tatau i le Tama‘i Mamoe na fasia, ona ia maua le mana, le tamaoaiga, le atamai, le malosi, le mamalu, le viiga atoa ma le manuia”?—Faaa. 5:12.

4. Aiseā e faapea atu ai o le faamamaluina o Ieova ma Keriso, e lē o se mataupu e tuu i la tatou faitalia?

⁴ O le faamamaluina o Ieova ma Keriso e lē o se mataupu e tuu i la tatou faitalia, auā e faalagolago i ai lo tatou ola e faavavau. O upu a Iesu o loo i le Ioane 5:22, e fesoasoani iā i tatou e malamalama lelei ai i lenā manatu. Ua faapea mai: “E lē faamasinoina e le Tamā se tasi, ae ua ia tuu mai i lona Atalii e na te faia le faamasinoga uma, ina ia āva tagata uma i le Atalii, e pei ona latou āva i le Tamā. O sē e lē āva i le Atalii, e lē āva fo‘i i le Tamā o lē ua auina mai o ia.”—Faitau le Salamo 2:11, 12.

5. Aiseā ua tatau ai ona tatou faaaloalogia ma faamamaluina tagata i se auala talafeagai?

⁵ Na faia le tagata i le “faatusa o le Atua.” (Kene. 1:27) O lea, e to‘atele tagata e mafai ona faaalia atu nisi o uiga o le Atua. E mafai e tagata ona faaalia atu le alofa, agalelei, ma le alofa mutimutivale. Na faia le tagata ma tuu i ai se lotofuatiaifo, o se lagona e lapata‘ia ai i latou i le mea e sa‘o po o le mea e sesē, faamaoni po o le lē faamaoni, e ui lava o nisi taimi e lē sa‘o ai o latou lotofuatiaifo. (Roma 2:14, 15) O le to‘atele o tagata e fiafia i mea e mamā ma matagofie. E masani lava ona latou manana‘o ia nonofo filemu ma isi. E tusa pe e latou te iloa pe leai, ae o loo latou faaatagia atu le mamalu o Ieova i se auala itiiti. O le māfuaaga lea ua tatau ai ona tatou faaaloalogia ma faamamaluina tagata i se auala talafeagai.—Sala. 8:5.

6, 7. E faapefea ona ese Molimau a Ieova mai i le to‘atele i le auala e faamamaluina ai tagata?

⁶ E tatau ona iai se vaaiga sa‘o i le auala e tatou te faamamaluina ai tagata, ma le tele e ao ona faamamaluina ai. O le to‘atele o tagata lē lelei atoatoa ua matuā taa‘ina i le agaga o le lalolagi a Satani. O le māfuaaga lea ua pei ai ua tapua‘i tagata i nisi o tamāloloa ma fafine, nai lo o le tau ina āva ma faaaloalo i ai. Ua latou matuā faasilisilia ta‘ita‘i lotu, ta‘ita‘i o malo, tagata taaalo, tagata pepese, tagata i ata tifaga, ma isi tagata ta‘uta‘ua, ma manatu iā i latou e pei o ni atua. O lea, ua vāai ē e talavou ma ē matutua i nei tagata o ni ē e faaa‘oa‘o i ai, ma atonu e faaa‘oa‘o i a latou mea e fai, ofu, ma amioga.

⁷ E teena e Kerisiano moni lenei vaaiga sesē o le soona faamamaluina o tagata. E na o Keriso lava le tagata na soifua mai e talafeagai ona manatu i ai o lo tatou faaa‘oa‘o lelei atoatoa. (1 Pete. 2:21) O le a lē fiafia le finagalo o le Atua pe a tatou soona faamamaluina tagata nai lo o le mea e tatau ona iai. Ia tatou manatua le mea moni lenei: “Ua agasala tagata uma lava, ma ua lē ausia le mamalu o le Atua.” (Roma 3:23) Ioe, e leai lava se tagata e  talafeagai ona tatou soona faamamaluina, ma i‘u ai ina aafia i le ifo i tupua.

8, 9. (a) O le ā le vaaiga a Molimau a Ieova i ta‘ita‘i o malo? (e) O le ā le tele e tatau ona tatou lagolagoina ai tagata o le malo?

⁸ E iai tagata o loo umia tulaga pule i le lalolagi. O se faaa‘oa‘oga, e faatalitalia pule o malo e latou te faamalosia tulafono ma le tulaga maopoopo o mea, ma tausia mana‘oga o tagatānuu. O lo latou faia faapea e maua ai e tagata uma aogā. O lea na fautua atu ai le aposetolo o Paulo i Kerisiano ina ia vaai i nei ta‘ita‘i o malo, o ni “faipule silisili” e tatau ona gaua‘i i ai. Na ia faatonuina Kerisiano: “Ia avatu i tagata uma mea e tatau iā i latou, ia totogi atu le lafoga i lē ua tatau i ai le lafoga, . . . ia faaalia le faaaloalo i lē ua tatau i ai le faaaloalo.”—Roma 13:1, 7.

⁹ Ua talafeagai ai la ona lotomalilie Molimau a Ieova e faamamaluina tagata o le malo, ona o se mea e faatalitalia mai iā i tatou e fua i tulaga o atunuu ta‘itasi. E tatou te lagolagosua iā i latou a o faatino o latou tiute. Peita‘i, o lo tatou faamamaluina ma le lagolagoina o i latou, e iai ona tapulaa talafeagai e faavae i le Tusi Paia. E lē tatau ona tatou solia na tapulaa ma i‘u ai ina lē usiusita‘i i le Atua, pe lē tausisia ai lo tatou solitū faa-Kerisiano.—Faitau le 1 Peteru 2:13-17.

10. Na faapefea ona faataatia e auauna a Ieova i aso ua mavae se faaa‘oa‘oga i le auala e feutaga‘i ai ma malo ma pule o malo?

¹⁰ Na faataatia e auauna a Ieova i aso ua mavae se faaa‘oa‘oga i le auala na latou feutaga‘i ai ma malo ma pule o malo. Ina ua poloa‘ia e le Emepaea o Roma se tusigāigoa mo ona tagatānuu, sa usita‘ia e Iosefa ma Maria. Na la malaga atu i Peteleema e ui lava o le taimi lea ua lata ona fanau Maria i lana pepe muamua. (Luka 2:1-5) Ina ua molia fo‘i Paulo i se solitulafono, sa ia tali atu ma le faaaloalo, ma faamamaluina i se auala talafeagai le tupu o Herota Akeripa ma Feso, o le kovana o Iutaia le itumalo o Roma.—Galu. 25:1-12; 26:1-3.

11, 12. (a) Aiseā e tatou te lē faamamaluina ai ta‘ita‘i lotu i se auala faapitoa? (e) O le ā le i‘uga lelei na i‘u i ai ina ua faaalia e se Molimau mai i Austria le faaaloalo i se tagata faipolotiki?

¹¹ Peita‘i, e ‘alofia e Molimau a Ieova le faamamalu o ta‘ita‘i lotu i se auala faapitoa, e ui lava o se mea o loo faatalitalia e ta‘ita‘i lotu. Aiseā? O loo a‘oa‘o e lotu sesē a‘oa‘oga sesē e faatatau i le Atua ma faauigasesē a‘oa‘oga a le Tusi Paia. O lea, e tatou te feutaga‘i ma ta‘ita‘i lotu e pei lava o le auala e tatou te feutaga‘i ai ma tagata lautele, ae e tatou te lē faamamaluina i latou i se auala faapitoa. Ia manatua na ta‘usalaina e Iesu na tane i ona aso o ni tagata faafiaamiotonu ma ta‘ita‘i tauaso. (Mata. 23:23, 24) I se faaeseesega, pe a tatou faaaloalo ma faamamaluina pule o malo i se auala talafeagai, atonu o le a maua ni i‘uga lelei po o ni i‘uga e tatou te le‘i faatalitalia.

¹² O Leopold Engleitner o se Molimau maelega mai Austria, na taofia e le ‘au Nasi ma auina atu i se nofoaafi i le nofoaga o faasalaga i Buchenwald. O se tasi o pagota na iai i lea nofoaafi, o Dr. Heinrich Gleissner. O ia o se tagata faipolotiki mai i Austria, ma na teena o ia e le pulega a Nasi i Siamani. A o aga‘i atu i le nofoaga o faasalaga, na faamatala atu ma le faaaloalo e le uso o Leopold ona talitonuga iā Heinrich, o lē na faalogologo lelei ane. Ina ua mavae le taua lona lua a le lalolagi, sa faaauau ona faaaogā e Heinrich lona tulaga pule ina ia fesoasoani ai i Molimau a Ieova i Austria. Atonu e te manatua ni faaa‘oa‘oga o ni i‘uga lelei na maua, ona o le faaalia e Molimau o le faaaloalo talafeagai i ta‘ita‘i o malo, ma faamamaluina i latou e pei ona faatonuina ai Kerisiano i le Tusi Paia.

13. O ai i latou ua matuā talafeagai ona tatou faaaloalogia ma faamamaluina, ma aiseā?

¹³ E talafeagai ona tatou faamamaluina ma faaaloalogia ē e tatou te aiga i le faatuatua, aemaise lava i toeaina o loo ta‘imua. (Faitau le 1 Timoteo 5:17.) E tatou te faamamaluina nei uso e tusa lava po o ā o latou atunuu, tulaga tau a‘oa‘oga, ma tulaga tau tamaoaiga. O loo ta‘ua i latou i le Tusi Paia o “meaalofa i tagata,” ma o i latou o se vaega autū i le faatulagaga a le Atua i le tausiaina o mana‘oga o ona tagata. (Efe. 4:8) Se‘i manatu i toeaina i faapotopotoga, ovasia o matagaluega, sui o Komiti o Lālā, ma sui o le Vaega Pule. Na faaaloalogia e o tatou uso ma tuafāfine i le ulua‘i senituri i latou na tofia e ta‘imua, ma e faapena fo‘i i tatou i aso nei. E tatou te lē faasilisilia sui iloga o le faapotopotoga Kerisiano, pe gaoioi e peisea‘ī o i latou o ni agelu pe a tatou faatasitasi. Peita‘i, e tatou te faamamaluina ma faaaloalogia na uso ona o a latou galuega mamafa ma le lotomaulalo.—Faitau le 2 Korinito 1:24; Faaaliga 19:10.

14, 15. Faamatala mai le eseesega o leoleo mamoe Kerisiano ma ta‘ita‘i lotu.

¹⁴ O na toeaina ua mātaulia o ni leoleo mamoe faaleagaga e lotomaulalo. E faamaonia lo latou lotomaulalo e ala i le lē manana‘o e feutaga‘i ma i latou e pei o ni tagata ta‘uta‘ua. O le faia faapea ua ese ai i latou mai i ta‘ita‘i lotu i aso nei, ma ta‘ita‘i lotu i le ulua‘i senituri lea na ta‘ua e Iesu: “Ua latou fiafia i nofoaga sili i faiga‘ai, ma nofoa pito i luma i sunako, ma faafeiloa‘iga aloa‘ia i nofoaga faitele.”—Mata. 23:6, 7.

¹⁵ O leoleo mamoe Kerisiano e usiusita‘i ma le lotomaulalo i fetalaiga nei a Iesu: “Aua ne‘i ta‘ua outou o A‘oa‘o, auā e to‘atasi lo outou a‘oa‘o, auā o le ‘auuso uma outou. Aua fo‘i ne‘i ta‘ua se tasi i le lalolagi o lo outou tamā, auā e to‘atasi lo outou Tamā o Lē o i le lagi. Aua fo‘i ne‘i ta‘ua outou o ‘ta‘ita‘i,’ auā e to‘atasi lo outou Ta‘ita‘i o le Keriso lea. A o lē sili iā te outou uma, e ao ona avea ma a outou auauna. O sē na te faaeaina o ia lava, e faamaulaloina lea, ae o sē e faamaulalo iā te ia lava, e faaeaina o ia.” (Mata. 23:8-12) Ua e malamalama la i le māfuaaga e alolofa, faaaloalo, ma faamamaluina ai e uso ma tuafāfine toeaina i faapotopotoga i le lalolagi aoao.

16. Aiseā e tatau ai ona tatou taumafai pea ia iai se vaaiga sa‘o ma faatatauina fautuaga a le Tusi Paia, i le auala e faamamaluina ai isi?

¹⁶ O le mea moni, atonu e tele se taimi e alu ina ia taumafai e maua se vaaiga sa‘o, i le auala e tatau ona faamamaluina ai isi ma  i latou e tatau ona faamamaluina. O le tulaga fo‘i lenā sa fesaga‘ia e ulua‘i Kerisiano. (Galu. 10:22-26; 3 Ioa. 9, 10) Peita‘i, e tauia a tatou taumafaiga pe a faatatau fautuaga a le Tusi Paia i le auala e faamamaluina ai isi. O le mauaina o se vaaiga sa‘o e tele aogā e maua mai ai.

17. O ā nisi o aogā o le faamamaluina o i latou o loo i le tulaga pule?

¹⁷ Pe a tatou faaaloalogia ma faamamaluina i latou o loo i le tulaga pule, e latou te ono puipuia la tatou aiā e tala‘i ai e aunoa ma le faalavelave mai. O le i‘uga, o le tele lava o taimi e ta‘uleleia ai la tatou galuega. I nai tausaga ua te‘a, na auai ai Birgit o se paeonia i Siamani, i le faauuga o lana tama i le a‘oga. Na faapea mai faia‘oga iā Birgit, o se fiafiaga le a‘oa‘oina o fanau Molimau a Ieova a o faagasolo tausaga. Na latou ta‘ua atili, o le a faanoanoa pe a lē toe iai ni fanau Molimau i la latou a‘oga. Na faamatala atu e Birgit, “O a matou fanau e a‘oa‘oina ina ia mulimuli i tapulaa tau amio a le Atua, lea e aofia ai le faaalia o le faaaloalo i faia‘oga ma faamamaluina i latou.” Na faapea mai le isi faia‘oga, “Pe ana pei uma tamaiti i le a‘oga o a outou fanau, o le a matuā faigofie la matou galuega.” I nai vaiaso mulimuli ane, na auai ai se tasi o faia‘oga i se tauaofiaga i Leipzig.

18, 19. O le ā e tatau ona tatou manatua pe a faamamaluina toeaina?

¹⁸ O le faamamaluina o toeaina o le faapotopotoga i se auala talafeagai, e tatau ona ōgatusa ma mataupu silisili lelei atoatoa o le Afioga a le Atua. (Faitau le Eperu 13:7, 17.) E mafai ma e tatau ona tatou faamālō atu iā i latou mo a latou galuega fitā, ma taumafai e lagolagoina ta‘iala o loo latou saunia mai. O le faia faapea, e ono fesoasoani iā i latou ina ia faaauau ai ona faatino o latou tiute ma le olioli. Peita‘i, e lē uiga atu e faapea e tatau ona tatou faata‘ita‘i i se toeaina iloga i le auala tonu lava e fai ai ona la‘ei ma teuga, ana lauga, po o le auala fo‘i e talanoa ai. O lo tatou faia faapea e ono avatu ai se manatu sesē i isi. Ia manatua, o ia fo‘i o se tagata e lē lelei atoatoa. O lē e tatau ona tatou faaa‘oa‘o i ai, o Keriso.

¹⁹ O le a tatou fesoasoani fo‘i i toeaina pe a faamamaluina ma faaaloalogia i latou i se auala talafeagai, nai lo o le feutaga‘i ma i latou e pei o ni tagata ta‘uta‘ua. O le a faigofie ai ona latou ‘alofia le mailei o le faamaualuga, le manatu e sili atu i latou i isi, po o le faafiaamiotonu.

20. O ā aogā e tatou te maua pe a faamamaluina isi?

²⁰ O le faamamaluina o i latou ua tatau i ai le mamalu, e puipuia ai i tatou mai i le manatu faapito. E fesoasoani iā i tatou e tumau ai ona lotomaulalo pe a faamamaluina i tatou e isi. E fesoasoani fo‘i iā i tatou ina ia faaa‘oa‘o ai i le faalapotopotoga a Ieova, lea e lē soona faamamaluina so o se tagata, e tusa pe e talitonu pe e lē talitonu. E lē gata i lea, o se gaoioiga atamai, ona e fesoasoani e tatou te ‘alofia ai le tausuai pe a faia e se tasi na tatou faamamaluina, se mea e tatou te lē fiafia ai.

21. O le ā le aogā sili o lo tatou faamamaluina o ē ua tatau i ai le mamalu?

²¹ O le aogā sili o lo tatou faamamaluina o ē ua tatau i ai le mamalu, ona e faafiafiaina ai le finagalo o le Atua. O le a tatou gaoioi ai e tusa ma lona finagalo ma tumau ai ona faamaoni iā te ia. O le a tatou lagolagoina ai lana tali i so o se tasi o loo taufaifai atu iā te ia. (Faata. 27:11) Ua faatumulia le lalolagi i tagata e sesē la latou vaaiga e faatatau i le faamamaluina o isi. Ma‘eu lo tatou lotofaafetai i le iloaina o le auala e finagalo Ieova e faamamaluina ai isi!