E Faapea ona Faia Lau Faitau Tusi Paia ia Fua Tele Mai

“AMUIA e loto maulalo.” O upu tomua ia o le Lauga lauiloa a Iesu i luga o le Mauga, e tusa ai ma le tele o Tusi Paia i le gagana faa-Peretania. (Mataio 5:3, Revised Standard Version, Lomiga mo Porotesano ma lomiga mo Katoliko) E mafai ea ona e malamalama po o le a tonu le uiga o upu a Iesu “Amuia e matitiva i la le agaga? Sa ia faatatauina ea ia te i latou o e ua faavaivaia? Pe sa ia faauigaina ea ia i latou e vaivai i le mafaufau? Atonu pe foliga mai o lona lua e le fetaui, ae peitai ma le mautinoa lava e taua tele ona iloa.

O Molimau a Ieova, o e ua lauiloa e oo lava i e faitioina i latou, o ni tagata aoga sonasona o le Tusi Paia, ua latou iloa o New World Translation of the Holy Sciptures ua matua faamalieina manaoga o le manino ma le saʻo ona faaliliuina. Ua ia faaliliuina le fuaitau mai le Lauga i luga o le Mauga: “Amuia i latou e manatunatu i o latou manaʻoga faaleagaga.” O nisi o e faamatalaina le Tusi Paia ua taofi faapea o le uiga lea o le fuaitau “loto maulalo.” Ai se a la, i le tele o lomiga o loo faaaoga nei e pei o le Catholic Jerusalem Bible ma le New International Version, o loo tausisia pea le faaaogaina o le faaupuga “loto maulalo”?

Ua faaalia i lenei faaaʻoaʻoga e faapea ina ia avea le faitau Tusi Paia a se tasi ia fua tele mai, e manaomia ona filifilia o se faaliliuga e faamaoni, manino, ma e malamalama gofie.

Manatu Saʻo

E manaʻomia e le faitau Tusi Paia e fua tele mai lea manatu saʻo. O upu lava na o le Lauga i le Mauga ua ta aofaia ai ma le tonu le manatu saʻo e tatau ona ia i tatou, e faapea: “Amuia i latou e manatunatu i o latou manaoga faaleagaga.” Pe ua le o i ai ea se atoaga faaleagaga moni mo lou olaga? O e talisapaia ea le mea moni faapea e manaomia ona e fafagaina lou mafaufau ma le fatu i mea ʻai faaleagaga? E mafai e le Tusi Paia ona fesoasoani ia te oe e faamalieina lena manaoga.

Ae ui i lea, o le a lē maua mai mea ʻai mo lou mafaufau ma le fatu i le Tusi Paia pe afai e te faitau i ai e pei ona e faia i isi lomiga. E tatau ona e vaai totoʻa i ai, e lē o “upu a tagata, a e peitai, o le upu a le Atua, (e moni lava lea).” (1 Tesalonia 2:13) O le a e faitau i ai, e lē o le poto faafilosofia o tagata po o talafaasolopito lotonuu, a e peitai o manatu o le Atua ma talaʻaga o lona feagai ai ma ana auauna i le lalolagi. O loo aofia ai foi valoaga ofoofogia, o nisi o ia valoaga ua uma ona faataunuuina, a o nisi foi o loo tatou vaaia ō latou faataunuuga po ua toeitiiti foi ona faataunuuina mo le lelei silisili o le fanau a tagata.

Talu ai na o le Tusi Paia o le Afioga a le Atua, ina ia fua tele mai le faitau i ai e tatau ona sailia Lana fesoasoani. O le mea lea, o le tatalo i le Atua, o se amataga tatau lea pe a faitauina le Tusi Paia. I ni upu faigofie, ia sau mai lou fatu, tatalo atu ia te ia ina ia fesoasoani mai ia te oe e faamalamalamaina mea ua e faitauina ma pe faapefea ona faatatauina i lou lava olaga. O nisi o taimi e asa ai lo tatou tomai agavaa i le faaaogaina o le poto ua tatou maua, ma o lea agavaa o le atamai. Ua faatonuina e le Tusi Paia lava ia: “Ae afai ua leai se poto i sō  outou, ina ole atu ia i le Atua, o le foai tele mai i tagata uma ma le le toe taʻutaʻua; ona foaiina mai ai lea ia te ia. A ia ole atu ma le faatuatua, aua lava neʻi masalosalo.”—Iakopo 1:5, 6.

Faitau ma le Faatuatua

Atonu pe e te faapea mai: ‘E faapefea ona ou tatalo ma le faatuatua, pe faitau ma le faatuatua peitai e aunoa aʻu ma le faatuatua? Ia, afai e te vaai totoʻa i le faitauina o le Tusi paia, a le ‘manatunatu i ou manaoga faaleagaga’ o le a faateleina lou faatuatua a o e mauaina le poto ia Ieova le Atua ma ana fuafuaga ofoofogia e ala ia Keriso. O se faatuatua moni e le tatau ona tuʻu faatasia ma le talitonu e alu tautoai. Ua faamatalaina e le Tusi Paia le faatuatua o “le faalagolago lea i mea ua faamoemoe i ai, o le mautinoa lea o mea e le o vaaia.”—Eperu 11:1.

E manaomia e le faatuatua moni se faavae mautu o le poto ma o lea poto na te faamautinoaina mea ua folafolaina mai e le Atua e pei lava ua vaaia. O le mea lea, o le faatuatua o se mea mafai ona maua. E mulimuli mai i le faitauina ma le aoga o mea e uiga i le Atua ma ana fuafuaga matagofie mo le fanau a tagata. E pei ona faaupu e le aposetolo o Paulo, “E tupu le faatuatua mai le mea ua faalogo i ai. O le mea foi na faalogo i ai e ala i le upu ia Keriso.”—Roma 10:17. *

A o faateleina lou faatuatua, o le a faateleina foi le fua tele mai o lau faitau Tusi Paia. Ai se a? Talu ai ona “o le faalagolago lea i mea ua faamoemoe i ai” o le a avea ma mea “ua mautinoa.” Atonu e mafai ona faatusatusaina lenei mea i se mafutaga fou faaleuo i le va o oe ma se tasi tagata. A o faagasolo pea le taimi ma agaigai ina e masani lelei i lea tagata, o le a faatupuina foi lou mautinoa o ia. Mulimuli ane, ina ua lua āsa faatasi le tele o tulaga sa le mafai ona faafitia oe e lau uo, o le a tuuina atoatoa loa ia te ia lou faatuatuaga. Afai a e moni o loo faatatau i ai. E tusa lava pe le manino se faaupuga, ua e matua iloa lelei le tagata ma e leai se faigata o lou iloa o le mea o loo i lona manatu. E te faitauina le tusi a lena uo i se auala faatuatuaina, e aunoa ma le masalosalo.

E faapena foi, o le tele o lou iloa o le Tusi Paia ma Lē na Tusia, o le Ieova le Atua, o le tele foi lea o lou talitonu i le Atua ma lana Afioga. E tusa lava pe o ni nai vaega i talaaga o le Tusi Paia atonu e foliga e faigata ona malamalama i ai e lē maluelue ai lou faatuatua. Mo se faaaoaoga, tusa lava pe o le mafuaaga mo gaoioiga mataʻutia a le Atua faasaga i ni tagata po o se malo e lē o matua manino i lenei taimi, e i ai lava lou talitonuga faapea o le mea tatau. E tali tutusa lava ma le auala e te faapea ane ai e faatatau i lau uo faamoemoeina: ‘Ia, afai na ia faia faapena, e i ai le mafuaaga tatau:

E mautinoa, o lou faatuatua i le Atua o le a faamalosia pe afai e mafai ona e maua le mafuaaga na ala ai ona ia gaoioi i se auala faapea ma pe ai se ā e foliga mai ai i nisi taimi ua tolopoina lana gaoioi faasaga i ē amioleaga. Peitai, atonu e te manaomia se fesoasoani. O lena mea ua aumaia i tatou i se tasi foi vala taua o le fuatele mai o le faitau Tusi Paia.

O le Manaoga mo se Fesoasoani

O se mea e sili ona lelei le faitauina o le Tusi Paia atoa. I le faitauina o le mataupu e tasi i le aso, o lona uiga pe tusa ma le tolu tausaga e faitauina ai le Tusi Paia atoa. Afai e te faitauina mataupu e tolu pe fa i le aso, atonu pe uma le tausaga e te faitauina ai. Ui i lea, ina ia e maua le ta aofaiga o le Tusi Paia, atonu e lelei ona e amata i le Salamo ma Faataoto. Ona e toe foi lea i le Kenese, Esoto, ma le Samuelu Muamua ao e leʻi taliu atu i le vaitaimi o le faa-Kerisiano, o le Mataio, Galuega ma nisi o tusi sa tusia e ului Kerisiano, e pei o le Filipi, Iakopo ma tusi Muamua ma le Lua a Peteru.

I le faia faapea, o le a e iloaina ai faapea ina ia e maua ni aoga e mafai ona faatatauina faaletino ma le faaleagaga mai le Tusi Paia, e lelei ona iloa pe o le ā o fai mai ai le Tusi Paia e faatatau i le mataupu. O faamatalaga e faatatau i se mataupu. O faamatalaga e faatatau i se mataupu e tasi atonu e le o maua i le mea e tasi. O le a oo ane le lagona e manaomia ni tusi e fesoasoani i le suesueina o le Tusi Paia, aemaise lava i mataupu faasolosolo.  A e le gata i lea, talu ai ona o tusi o le Tusi Paia e le o faatulagaina i se faasologa o taimi na tutupu ai mea, o tusi faapena o le a fesoasoani ia te oe ia manino i le faagasologa tonu o taimi. O tala o le lalolagi i ona vaipanoa ma talaaga o mea tutupu i tala faasolopito e aogā foi lena mo se malamalamaga i le Tusi Paia.

O fea la e maua mai ai nei fesoasoani mo le suesueina o le Tusi Paia? I ni nai tausaga talu ai nei sa faasalalauina ai e tusitala Katoliko tusi i le agaga peiseai e fesoasoani atu ai i Katoliko i le faitauina o le Tusi Paia. A e peitai, ua tuuina atu e nei tusitala i latou lava i se tulaga lē mautonu. Afai la o nei tusitala o loo fesoasoani moni ina ia malamalama Katoliko i le Tusi Paia, ua iloa vave lava e i latou faapea o le tele o aʻoaʻoga faa-Katoliko e lē o maua i totonu o le Tusi Paia. I le isi itu, afai e taʻuamiotonuina e tusitala aʻoaʻoga faa-Katoliko, ua latou faavaivaia la le talitonuga o lē faitau i le Tusi Paia auā ua latou tuu i lalo le Tusi Paia ona o tu ma aga faalotu.—Faatusatusa le Mareko 7:13.

Ua faateleina Katoliko faamaoni ua talia le fesoasoani a Molimau a Ieova. I le tele o atunuu, o le faitau afe o tagata Katoliko o loo taumafai malosi e faitau le Tusi Paia ma malamalama i ai ae peitai e itiiti pe leai foi se fesoasoani mai o latou lava faifeau. Ua latou foliga mai e pei o le Aitiope mau tofi i le malo, lea sa ia faitauina le Tusi a Isaia. Ina ua fesiligia o ia e le faievagelia o Filipo pe o ia malamalama moni i mea o ia faitauina, sa tali atu ma le loto maulalo le Aitiope: “E faapefea ona ou mafaia, pe a leai se tasi e fai ma ou taiala?” (Galuega 8:31, RS, Catholic edition) Sa fesoasoani Filipo ia te ia, ma i sina taimi puupuu mulimuli ane ai sa avea lenei tamaloa faamaoni ma Kerisiano papatisoina. E faapena foi, a o o atu Molimau a Ieova mai lea fale i lea fale ua latou fetaiai ma Katoliko, ma afai latou te fai ane faapea o loo i ai le Tusi Paia i o latou aiga, o le a fesiligia loa i latou e Molimau pe faamata latou te manaomia se fesoasoani ina ia fuatele lo latou faitauina o le Tusi Paia.

O Le Faitau E Oo Ina E Fua Mai

I la latou galuega o le aʻoaʻoina o le Tusi Paia, ua faaaogaina ai e Molimau a Ieova se vaega tele o tusi fesoasoani mo le suesueina o le Tusi Paia, e pei o le tusi Laʻu Tusi o Tala o le Tusi Paia e (116 tala le Tusi Paia o loo aumaia ai i le gagana faigofie ma le faasologa lelei o mea na tutupu), Is the Bible Really the Word of God? mo le poto maoaʻe ma faamatalaga o tala faasolopito o faamaoniga o le Tusi Paia), “All Scripture Is Inspired of God and Beneficial)” (o se tusi o loo aotele ai talaaga o le Tusi Paia, faatasi ai ma faamatalaga o le lalolagi i ona vaipanoa ma talafaasolopito), ma le E Mafai ona E Ola e Faavavau i Parataiso i Le Lalolagi (o loo aoaoina faatasi mau mo mataupu faitaulia e 30, e aofia ai le faamoemoe matagofie ua faataatia e le Afioga a le Atua mo ē faamaoni o loo faitauina le Tusi Paia i aso nei).

O nei fesoasoani mo le suesuega o le Tusi Paia, faatasi ai ma le fesoasoani totino o le a fiafia Molimau a Ieova e ofoina atu e aunoa ma se totogi, o le a avea ai lau faitauina o le Tusi Paia o se fiafiaga sili ma le fua tele mai. O le a e maua se taiala mo le olaga i aso fai soo ma se faamoemoe matagofie mo le ola i le Faiga Fou a le Atua ua folafolaina mai, ma o i ina, o le a faia ai le finagalo o le Atua “i le lalolagi, e pei ona faia i le lagi.”—Mataio 6:10, JB.

[Faaopoopoga i lalo]

[Ata i le itulau 7]

Sa iloa e le Aitiope le mea sa manaomia ina ia malamalama ai i le Tusi Paia.