O le Soifuaga o Iesu ma Lana Faiva

O le Tama o le Folafolaga

NAI LO le toe foi i Nasareta, sa nonofo ai pea Iosefa ma Maria i Peteleema. Ma ina ua valu aso le matua o Iesu sa peritomeina loa o ia, e tusa ai ma le Tulafono a le Atua ia Mose. E foliga mai o le aganuu e tatau ona faaigoaina foi le tama meamea i lona valu o aso. O le mea lea, na la faaigoaina ai la la tama o Iesu, e pei ona sa muai faailoa i ai e le agelu o Kaperielu.

E sili atu le masina ua mavae, ma ua 40 foi aso le matua o Iesu. O fea na ave nei o ia i ai e ona matua? I le malumalu i Ierusalema, o i ina e na o ni nai maila mai le mea sa latou nonofo ai. E tusa ai ma le Tulafono a le Atua ia Mose, e 40 aso talu ona fanau mai se tama, e manaomia le tinā ina ia tuuina atu se taulaga mo le faamamaina e faatino i le malumalu.

Sa faapena ona faia e Maria. Peitai sa ia aumaia ni tamai manu se lua e fai ma ana taulaga. Ua faaalia mai ai i lea mea se uiga i le tulaga tamaoaiga o Iosefa ma Maria. O le tulafono a Mose o loo taʻuina mai ai o se tamai mamoe poʻa, e sili atu lona taua na i lo manu, e tatau ona ofoina atu. Ui i lea, afai e le gafatia e le tina lea mea, o ni uluga manutagi se lua, po o tamai lupe foi e lua ua lava lea.

I le malumalu sa siʻiina ai e se toeaina matua Iesu i ona lima. O Simeona lona suafa. Sa taʻuina atu i ai e le Atua o le a ia lē oti sei vagana ua ia vaai i le Keriso folafolaina a Ieova, po o le Mesia. Ina ua sau Simeona i le malumalu i lea aso, sa taitaiina atu o ia e le agaga paia i le tamaitiiti o loo siiina e Iosefa ma Maria.

A o sapaia i lima o Simeona Iesu sa ia faafetai atu i le Atua ua faapea atu: ‘Ua e faataunuuina  lau folafolaga, aua ua iloa e oʻu mata le faaolataga ua e saunia.’ Ua ofo Iosefa ma Maria ina ua la faalogo i lenei mea. Sa faamanuia atu Simeona ia i laua, ua fai atu foi ia Maria lona tinā “ua tuu le tama nei e pauu ai ma toe tutu ai tagata e toatele o i Isaraelu’ ma o le faanoanoa, e pei o se pelu maai, e tuʻia ai o ia.

Sa i ai le perofeta fafine e 84 tausaga lona matua e igoa ia Ana. O le mea moni, e le toesea lava ia mai le malumalu. I lena lava taimi sa ia faalatalata atu ma amata ona avatu le viiga faafetai i le Atua ma ia tautalatala e uiga ia Iesu ia te i latou uma o e na fia faalogo.

Maeu le fiafiaga o Iosefa ma Maria i nei mea sa tutupu i le malumalu! E mautinoa lava, ua atili mausali ai ia te i laua faapea o le tamaitiiti lenei o Lē na Folafolaina a le Atua. Luka 2:21-38; Levitiko 12:1-8.

◆ O a fea i le tu a Isaraelu e tuuina atu ai i se tama meamea lona igoa?

◆ O le ā sa manaomia ona faia e se tinā Isaraelu pe a 40 aso le matua o lana pepe o se tama, ma sa faapefea i le faataunuuina o lea manaoga ona faaalia le tulaga tamaoaiga o Maria?

◆ O ai sa iloaina le faailoga vaaia o Iesu i lea mea, ma sa faapefea?