Sailiili Loloto I Le Afioga A Le Atua
Sailiili Loloto I Le Afioga A Le Atua
‘Afai e te sailiili ia te ia, e pei ona e sailiili i le oloa lilo, ona e maua ai lea o le poto i le Atua.’—FAATAOTO 2:4, 5.
1. O le ā le pogai moni o le fiafia, ma ai se ā?
“Amuia le tagata na te maua le poto, ma le tagata na te maua le mafaufau; auā e sili ona lelei o lona faatau i lo le faatau o le ario; ma mea e maua ai e sili lea i le auro. E sili ona lelei o ia i penina; ma aumea faafiafia uma lava e lē tusa ma ia. O loo i lona lima taumatau le ola tuluʻi . . . o ia o le laau o le ola i e tago atu ia te ia; amuia foi i latou o e taofi atu ia te ia.”—Faataoto 3:13-18.
2. Ai se ā ua fiafia ai Molimau a Ieova, ae peitai o le ā le lapataiga ua tuuina atu i le taimi o lo latou papatisoga?
2 O Kerisiano moni e matuā fiafia, ina ua maua le poto. O lona uiga o le agavaa i le faaaogaina o lo latou poto i le Afioga a le Atua i la latou tapuaiga tiotio, i le foia o ō latou faafitauli mai lea aso i lea aso, ma le faia o iuga filifiliga e faatatau i o latou sini i le olaga. A o lei talia mo le papatisoga e Molimau a Ieova, o tagata taitoatasi e faavae i lo latou poto i le Tusi Paia e matuā tofotofoina e ala i le faasologa o fesili tuu saʻo. O se tasi o fesili faaiu e faapea: “Ai se ā o le a taua tele ai le tumau pea ona e faia se faasologa lelei mo au lava suesuega totino ma le auai e lē aunoa i le faiva pe a mavae lou papatisoga i le vai?” I lea o le a mafai ona oomi i le mafaufau o lena tagata papatiso, le manaoga ia faaauau pea ona suesue i tala fatu o mea na aʻoaʻoina ma “faaoo atu i le faaatoatoaga.” (Eperu 6:1) Ae peitai pe o utagia ea e tagata uma lenei lapataiga?
3, 4. (a) O le ā le faamatalaga a Paulo e uiga i nisi Kerisiano i Korinito ma Iutaia? (e) O le ā ua tino mai o le tulaga foi lea i nisi Kerisiano o aso nei?
3 I lana uluai tusi i Kerisiano i Korinito, sa faitio ai le aposetolo o Paulo na ia le mafai ona tautala atu ia i latou “faapei o ē faaleagaga.” peitai e “pei o tamameamea ia Keriso.” (1 Korinito 3:1) E faapena foi, ona ia tusi atu, atonu i Kerisiano o nonofo i Iutaia: “Ua ia i matou upu e tele ia te ia, e faigata foi ona faamatalaina, ina ua avea outou ma tagata aʻoaʻogatā. Aua foi ana fai outou ma aʻoaʻo pe ua tatau ai ina ua leva, a e ao ina toe aʻoaʻoina outou e se tasi i mataupu muamua o le afioga a le Atua; ua avea foi outou ma e o tusa i ai le suāsusu, a e le o mea aano. Aua o i latou uma ua faasusuina i le suāsusu, e le atamamai i latou i le upu o le amiotonu; auā o tama meamea i latou.”—Eperu 5:11-13.
4 E faapena foi i aso nei, e aliali mai o nisi, ua lava lo latou iloa e tuuina atu ai i latou ia Ieova, ma le faamoemoe e ola e faavavau i Parataiso i le lalolagi, latou te lē matuā atiae ma le uigā se taimi umi e faia ai ma masani le suesue. Atonu ua latou lagona ua lava lo latou iloa e “mafai ai”, ona tautala faaleagaga i se faaupuga. Latou te le laasia e sili atu i lo o le tulaga o le “suāsusu”. Sa faatulaga tonu mai e Paulo i latou na “e lē atamamai i latou i le upu o le amiotonu,” o lona uiga, e le fai ma masani le faaaogaina o le “upu o le amiotonu” e tofotofoina ai taualumaga. Ua faaopoopo mai Paulo: “A o mea aano, ma e matutua ia, o i latou ua masani ona lagona ina ua aʻoaʻosooina e iloa ai le lelei ma le leaga.”—Eperu 5:14.
“Mea Aano” e Manaomia mo le Tuputupu Aʻe
5, 6. (a) O le ā le mea ua tonu e uiga i nisi ua tele tausaga o i ai i le upu moni, ma ai se a ua le talafeagai ai lenei mea? (e) O le ā fa a Paulo ia i latou na, ma o le a e ao ona latou faia?
5 Ua fia ni tausaga talu ona avea oe o se auauna tuuina atu a Ieova? Sei manatunatu i lou tuputupu aʻe faaleagaga i na tausaga. E mafai ona e faamatala mai i le Tusi Paia tau o upu moni faavae, “o mataupu muamua o le afioga a le Atua”? E i ai tagata o ē na i ala faa-Kerisiano mo le 10 po o le 20 tausaga o loo tumau pea ona i le tulaga o le “suāsusu”. O le a se manatu o tagata i se tamaitiiti ua 10 tausaga le matua, po o se tama po o se teine talavou ua 20 tausaga le matua o loo tumau pea ona faasusu i le fagu? Pe e le o se mea faalemanuia ea lea? E le avea ea le fafaga na o le susu ma mea e tagitoia ai le tupu a se tagata? Atonu e faasaoina lea tagata, peitai o le a le mafai ona avea lea tagata ma tagata malosi maloloina lelei. E faapena foi ona moni le tulaga faaleagaga.
6 Ai se ā ua le malolosi lelei ai faaleagaga i latou ua loa tausaga talu ona avea ma Kerisiano i le faia o se gaoioiga tiotio e fesoasoani atu ai i “pepe” ua tatau ai, i latou faatoa faia so latou tulaga mo Ieova? O i latou e le o agai i luma ua tele nauā tausaga o latou maua taimi atoa ma le uaʻi atu a toeaina Kerisiano ma isi taʻumatuaina. E tumau pea, e pei o la Paulo, auā “ana fai outou ma aʻoaʻo po ua tatau ai ina ua leva.” Ina ia avea o ni faiaʻoga, e tatau ona agaigai i luma i tala atu o le “suāsusu” ma faamasani “i mea ʻai aano.” E faapefea ona latou faia o lena mea?—Eperu 5:12.
7. E tusa ai ma le Eperu 5:14, o ai ua tatau i ai “mea ʻai aano”, ma e faapefea ona avea se tasi ma Kerisiano faapena?
7 Fai mai Paulo o “mea aano ma e matutua ia,” ma ua ia taʻua “i latou ua masani ona lagona ina ua aʻoaʻosooina e iloa ai le lelei ma le leaga.” I se isi faaupuga, i latou ia ua fai ma masani le faaaogaina o le poto mai le Afioga a le Atua ua latou maua e vaevaeina ai le mea ua saʻo ma le mea sesē o le a aʻoaʻoina mālie ai lo latou loto fuatia ifo lelei e maua ai le taʻumatuaina faa-Kerisiano. O le a fai ma a latou tu le faaaogaina o le “upu o le amiotonu’ e tofotofoina ai ma vaevaeina ai mea ua atoatoa ma mea e tigā ai i amioga, faaleagaga, atoa ma le faaletino. O le faatatauina o mea ua latou aʻoaʻoina, ua le toe avea ai i latou ma ē “e le atamamai i le upu o le amiotonu.” O le a latou oo atu ai i le faaatoatoaga o i latou ia ua tatau i ai “mea aano.”—Eperu 5:13, 14.
Atiaʻe “Uiga Lelei Tau Mea E ʻAi”
8. E mafai faapefea e se Kerisiano ona faatapulaaina o ia i le manao i le “suasusu,” ma e faapefea ona ia suia lana masani mo “mea ʻai” faaleagaga?
8 O tagata mamaʻi ua uma ona tuu mose taimi e fafagaina pea i le suasusu e tatau ona toe faamasani o latou tino i le toe taumafaina o mea ʻai aano. E faapena foʻi, i latou ua atiaʻe se masani e na ona “samusamu” i mea ʻai faaleagaga ua laulauina mai e le “auauna faamaoni ma le mafaufau,” i le tuu lea i autafa o a latou ipu, e pei ona masani ai, na mea ʻai lelei e manaomia ona “faamaluina (mafaufau ma toe suesue), o le a manaomia ona faia se taumafaiga ina ia atiaʻe se manaoga lelei faaleagaga mo “mea ʻai.” O le a latou manaomia ona faamanatu atu i o latou loto faamaoni’ ma ia ‘outou finafinau.’—Mataio 24:45; 2 Peteru 3:1, 2; Luka 12:24.
9. O le ā e mafai ona fesoasoani i se tasi ua motusia lona manaoga mo mea ʻai?
9 E tolu mea e mafai ona fesoasoani i se tagata sa maʻi ina ia toe maua lona manaoga mo mea ʻai aano susua : (1) gaoioiga saʻo, o lona uiga o le faanaunauga ia toe maua le malosi maloloina, (2) mea ʻai manaomia lelei ona saunia e laulauina mai i taimi uma, ma le (3) ia lava le ʻea fou e manavaina ma ia toaga e toleni. E faapefea ona fesoasoani nei manatu i se tasi ua motusia lona naunau mo mea loloto o le Afioga a le Atua?
10. O le ā le faanaunauga saʻo e ao ona aumaia i tatou ia faateleina lo tatou malamalama i le Afioga a le Atua?
10 Soo se tagata ua tuuina atu lona ola ia Ieova e ao ona i ai se faalogona malosi mo le faateleina o lona poto i le Afioga a le Atua. O lo tatou alofa mo Ieova o le a uunaia ai i tatou ia faamasani lelei i ona uiga ofoofogia, lona finagalo, ma ana fuafuaga. O lenei mea e manaomia ai le matua suesue ma mafaufau loloto. (Salamo 1:1, 2; 119:97) E le gata i lea, o lo tatou faamoemoe ia ola e faavavau i Paratasio a le Atua i le lalolagi e faalagolago i lo tatou ‘aveina pea i totonu o le poto e uiga i le Atua moni e toatasi ma lona Alo, o Iesu Keriso.’ (Ioane 17:3) Ae peitai e le tatau ona avea lo tatou manaoga i le ola e faavavau ma mafuaaga autu o le suesueina o le Tusi Paia. O le mea sesē lenā na faia e isi tagata Siu lē faatuatua. O lo tatou “suesue i Tusi” e tatau ona faia ona o lo tatou alofa moni i le Atua ma le naunau ia faia lona finagalo.—Ioane 5:39-42; Salamo 143:10.
11. O faapefea ona laulauina mea e ʻai faaoso fia ʻai faaleagaga mo i tatou i le taimi tatau?
11 O le anoanoaʻi o mea ʻai e faamataʻaia ai faaleagaga ua laulauina mai pea mai “ona itu aso” e le “auauna faamaoni ma le mafaufau’ e ao ona uunaia i tatou uma lava ia faaalia lo tatou talisapaia, i le faaaogaina atoatoa lea o mea lelei ua tuuina mai. (Mataio 24:45) E tatau ona tatou atiaʻe se faanaunauga lelei mo “mea ʻai” faaleagaga i le faataatia ese lea o se taimi ia lava e faitau ai ma suesue ai mataupu lelei uma o loo lomia i totonu o tusi ma mekasini a le Watch Tower Society. O mea ʻai faaleagaga o lo laulauina mai pea i taimi tatau i sauniga e lima faalevaiaso ua faamaopoopoina i faapotopotoga a Molimau a Ieova i le lalolagi atoa. O ē auai i ia sauniga ma nofo sauni e faamalūina ia mea ʻai ua laulauina mai?
12. O le ā se tasi auala e mafai ai e se Kerisiano ona atiaʻe lona fia ʻai faaleagaga? (e) O lea la, o ā fesili e ao ona tatou fesili ai?
12 O le alofa i le Atua ma le alofa i tuaoi e ao ona uunaia i tatou e suesue Lana Afioga. (Luka 10:27) O se tagata ua motusia lona naunau i mea ʻai faaletino e mafai ona maua aogā mai le ʻea fou ma le toaga e toleni. E faapena foi, i Kerisiano, o e mananaʻo ia atiaʻe se naunau mo “mea ʻai aano” e mafai ona maua le fesoasoani pe a alu i le galuega talai ma faaaoga lona poto e faalauiloa ai “lenei tala lelei o le malo’ ma “ia fai tagata o nuu uma ma soo.” (Mataio 24:14; 28:19, 20) Manatua, sa fai atu Paulo ia i latou ua avea ma “e o tusa i ai le suāsusu,” po o pepe faaleagaga, e manaomia ona “fai outou ma aʻoaʻo po ua tatau ai ina ua leva.” (Eperu 5:12) O fea e te tu ai, e tusa ai ma le taimi na avea ai oe o se Kerisiano faamaoni? Afai o oe o se uso, ua e agai atu ea i luma i le tulaga e aogā tele ai oe o se faiaoga i le fanua, ma atonu foi i le avea o oe o se toeaina i le faapotopotoga? Afai o oe o se tuafafine Kerisiano, ua mafai ea ona faia o ni suesuega faale-Tusi Paia e atiaʻe ai i aiga o tagata o faaalia lo latou fiafia i le upu moni a le Atua po o lou fesoasoani atu foi i ou uso Kerisiano i le galuega o le molimau atu?
Faia le Suesuega ma Fiafiaga
13. O le ā le eseesega i le suesue ma le faitau?
13 O le alagāupu e faapea o le faitau tusi e faamalie ai a o e suesue o se galuega e fai. E i ai se mea moni i lena. E mafai ona faia le tele o le faitauina o tusi e atiaʻe ai ma o se fiafiaga e toafilemu ai. O le ā se mea e sili atu ona fiafia ai na i lo le faaaluina o se itula pe lua foi i se tulaga sologa lelei e faitauina ai se lipoti mai le Yearbook of Jehovah’s Witnesses po o se lomiga o le mekasini o le Awake? Peitai, o le suesue, o se galuega. Ua faatulaga mai e le lomifefiloi: “O le suesue ua aumaia ai se uaʻi atu e tumu i fuafuaga e mafai ona faaauauina ma le tinoū faaeteete i le auiliiliina o mea atonu o le a faaalia mai e mea moni i le faatatauina, auala eseese, po o fesootaiga o le mea o loo suesueina.” Ioe, o le suesue e manaomia ai se taumafaiga. Ae peitai e pei o soo se galuega lelei ona faia e mafai ona faamalieina ai ma tauia, e mafai foi ona fai ma fiafiaga le suesue ma e tauia faaleagaga. O loo i ai lo tatou manuia i le faia faapea. E faapefea?
14. O le ā atonu e manaomia ona e fai ina ia avea ai au suesuega totino ia sili ona faafiafiaina ai ma maua ai ni aogā?
14 Ina ia avea le suesue ma mea e faafiafiaina ai, ma ia maua moni mai ai ni aogā, e tatau ona tuuina atu i ai ia lava se taimi. Talu ai o le suesue e aumaia ai se “uaʻi atu e tumu i fuafuaga e mafai ona faʻaauauina” ma se “tinoū faaeteete i le auiliiliina,” o le ā le tele e te faapea mai ai ma le faamoni ua e suesueina lau Olomatamata po o le tusi o faaaogaina mo le Suesuega o Tusi a le Faapotopotoga? E sili atu ea ona saʻo le fai atu faapea o le tele o taimi na ona faatopelau lava ona e faitau i le mataupu o le a suesueina ma faatopetope ona vase tali i fesili e aunoa ma lou matuā auiliiliina o manatu autu ma le mafuaaga o le faamatalaga ua avatu? Afai o lea le tulaga o ia te oe, atonu o le uluai laasaga e ao ona e fai ina ia faaleleia ai lou faanaunau mo “mea ʻai” faaleagaga, ‘o le faaaogaina lea o aso o lenei olaga’ mo le suesue. (Efeso 5:15-17) O le uiga o lenei mea o le faia lea o ni fesuiaiga malolosi o taimi mai isi gaoioiga e lē tele sona aoga. Peitai atonu o le a e ofo i le fiafiaga o le a maua i le suesue pe a lava lou taimi e suesue ai mataupu autu, nai lo o le na ona faatopelau ona e faitauina.
15. O le ā le isi mea e manaomia tele mo le suesue ina ia sili ai ona faafiafiaina ma aogā faaleagaga?
15 O le mea moni e i ai le sootaga i le va o le taimi ma le tatalo. O faamanuiaga a Ieova e manaomia mo le suesue ina ia maua ai aogā faaleagaga. E manaomia ona tatou tatalo ia te ia e ala i le suafa o Iesu, tagi atu ia te ia ina ia tatala o tatou mafaufau ma loto ma ia galueina ia matua talia upu moni o le a suesueina. O le ā le tele sa masani ai ona e nofo i lalo ma sauni faatopetope mo le sauniga, ae faatoʻa e iloa mulimuli ane ua galo ona e tatalo atu mo le faamanuiaga a Ieova ma lona atamai e mafai ai ona faatatauina i lou olaga i aso fai soo mea ua aʻoaʻoina? Ai se ā ua e tapui ai le fesoasoani a Ieova semanu o loo avanoa mo le faatagi atu i ai?—Iakopo 1:5-7.
Sailiili Loloto
16. Ina ia tusa ai ma le mau autu o lenei suesuega, o le ā e tatau ona tatou fai ina ia maua ai le poto, faautauta ma le malamalama?
16 Fai mai le Faataoto 2:4, 5: ‘Afai e te sailiili ia te ia e pei ona sailiili i le oloa lilo, ona e maua ai lea o le poto o le Atua.’ O le ta aofaiga o lena mataupu o loo tautala i le manaoga e saili ai i “afioga” a Ieova, “poloaiga,” “poto,” “faautauta” ma le “malamalama.” O le sailiili o le oloa e manaomia ai taumafaiga ma le maumauaʻi. Ua manaomia ai se sailiiliga loloto. E leai se eseesega pe a sailiili mo le “poto o le “malamalama.” O nei foi mea e manaomia ai se sailiiliga tele, po o le eli i lalo ifo o mea ua i luga. Aua lava nei manatu ua lava le tau a ina faaemo i le papau o le Afioga a le Atua.
17. O le a fa a le Tusi Paia e uiga i manatu o Ieova, ma i lea o le ā e ao ona tatou faafetai ai?
17 Ua faapea mai le faisalamo: “Ieova e, e matuā sili lava mea ua e faia; e loloto lava ou manatu.” (Salamo 92:5) Sa tusi faavivii le aposetolo o Paulo: “Aue! le loloto o le tamaoaiga o le poto atoa ma le silafaga a le Atua.” (Roma 11:33) I le isi ana tusi sa ia taʻua ai “mea loloto a le Atua.” (1 Korinito 2:10) E moni, e pei ona faamatala mai e Paulo, e faaalia e le Atua ia “mea loloto” e “ala i lona agaga paia,” o lena mana galue ua gaoioi ma le malosi i luga o Kerisiano faauuina na tofia e Iesu Keriso ina ia maua mai ai mea ʻai faaleagaga. E ao ona tatou matuā faafetai ma le tonu mo le sailiili faaleagaga ua fai e le vasega o le “auauna” ina ia faapupulaina atili mai ai ia i tatou “mea lilo loloto o fuafuaga a le Atua.”—1 Korinito 2:10, Today’s English Version.
18. E faapefea ona sailiili loloto se Kerisiano i le Afioga a le Atua, ma o ā mea faigaluega faapitoa mo sailiiliga ua saunia?
18 Ae peitai e le tuusaunoaina ai Kerisiano taitoatasi i le tiute tauave o le sailiili loloto i le Afioga a le Atua, mo le fuafuaga ia maua le iʻo atoa manatu ua faamatalaina. E aofia i lenei mea le suʻeina o mau o loo taʻua ai. O lona uiga ia faitau faamatalaga faaopoopo i le Olomatamata, o nisi o loo faasino ai lē faitau i se isi lomiga tuai o loo aumaia ai le atoaga o vaega patino po o valoaga. E manaomia le sailiili loloto, fai ni taumafaiga ina ia maua lena lomiga tuai ma suesue itulau ua faasino i ai. O loo aofia ai e faaaoga atoa o fesoasoani faapitoa mo le suesueina o le Tusi Paia ua aumaia e le vasega o le “auauna” i le tele o tausaga, e pei o faasino-mataupu, faasinoupu, Aid to Bible Understanding, ma le “All Scripture is Inspired of God Beneficial.” Ioe, ua maua e Kerisiano mea faigaluega sili mo le sailiili loloto, o le tasi e aupito lata mai o le Tusi Paia fou i le gagana Peretania le Reference Bible, lea, e le o toe umi se taimi, ae maua i isi gagana. Sei tatou faaaoga nei mea faigaluega mo sailiiliga loloto ina ia taulau le faamoemoe.
Suesue ma se Fuafuaga
19. O le ā se upu lapatai e taua ona faatatau i le poto?
19 O le fuafuaga mo lo tatou suesue loloto i le Afioga a le Atua e le ina ia avea ai i tatou ma e sili i o tatou uso po o le fia faaalialia o lo tatou poto. O le tulaga masani lea i tagata o le lalolagi. I mataupu silisili, ua moni le mea na tusia e Paulo: “E faafefete le poto, a o le alofa e faamafanafana lea.” (1 Korinito 8:1) O le a uunaia i tatou ma le agamalu e le alofa e faaaogaina lo tatou poto i le talaiga ma le galuega o le faia o soo ma i le saosaolaumea faamoni i le aoga faaleagaga o sauniga faa-Kerisiano.
20. O ā ni apoapoaiga ua aumaia e Paulo e tusa ai ma lea?
20 Seia tatou “fai ma tagata matua’ ia “oo i le fua o le ua matua, e tatau ma le tumu o Keriso.” (Efeso 4:13-15) Sei “tatou faaoo atu i le faaatoatoaga.” (Eperu 6:1) Ia avea i tatou ma tagata taumatuaina, o e mafai ona faamaluina “mea ʻai aano” e mafai ona faamalosia ai i tatou faaleagaga ma ia aoga i le faapotopotoga Kerisiano. Ae peitai, e aafia i lenei mea le sili atu i lo o le na ona aveina i totonu o le poto e ala i le suesue. E manaomia le fafaga pea i afioga a Ieova po tuleiga ma le talisapaia, lea o le a tatou talanoaina i le mataupu mulimuli mai. —Salamo 110:1; Isaia 56:8; 66:2.
Na o Sina Faamanatu itiiti
□ Ai se a ua tumau ai pea ona “pepe” faaleagaga nisi?
□ O le a e mafai ona fesoasoani i se tagata ia oo i le taʻumatuaina?
□ E faapefea ona tatou atiae le faamasani mo mea e “ai” faaleagaga?
□ O le a e mafai ai ona avea ma fiafiaga a tatou suesuega totino?
□ Ai se a e tatau ai ona sailiili loloto i le Afioga a le Atua?
[Fesili mo le Suʻesuʻega]
[Pusa i le itulau 13]
O mea moni e mafai ona fesoasoani ai i se tagata ia maloloina faaleagaga
1. Faanaunauga Saʻo: Atiae se manaoga malosi ina ia faamasani lelei ma Ieova
2. Mea ʻai tatau: Faaaoga mea ʻai faaleagaga ua laulauina mai pea e le “auauna faamaoni ma le mafaufau”
3. Toleni: Faaaoga le poto e fesoasoani ai i isi, e pei o le auai i le galuega talai.