Fesili Mai le Au Faitau

▪ Talu ai ua faaliliuina le Salamo 37:29 faapenei, “E fai lava le nuu mo tagata amiotonu, e nonofo ai pea i latou,” pe ua na ona faatatauina ea i le nonofo mau ai o tagata Isaraelu i le Nuu o le Folafolaga?

Leai, o lena faaliliuga o se iuga le faavaea lea o le folafolaga faagaeeina. Ua taofia e le Salamo 37 le faamoemoe o le ola e faavavau i lo tatou lalolagi mo e amiotonu.

O le Salamo 37:29 na sii mai lea i le King James Version. E pei lava ona moni i le tele o isi faaliliuga, ua aumaia la e faa-Eperu ʻeʹrets o le “nuu”. E mafai ona faasino ʻeʹrets i se vaega maoti po o ogafanua o se nuu, e pei o “le nuu o Senara” po o “e nuu o Aikupito.”—Kenese 10:10, 11; 21:21; Salamo 78:12; Ieremia 25:20.

O lea e mafai e le Salamo 37:11, 29 ona faaalia faapea sa ono mafai ma sa tatau ona avea tagata Isaraelu ma e nonofo mau i le Nuu o le Folafolaga. E tusa ai ma le feagaiga a le Atua ma Aperaamo, e mafai ona latou nonofo mau ai i le oganuu lena na foai atu e le Atua i a i latou, mo tupulaga ma tupulaga ma olioli ai i ana faamanuiaga. Peitai e lei taulau, aua sa lei faamaoni tagata Isaraelu i le Atua.—Kenese 15:18-21; 17:8; Teuteronome 7:12-16, 22; 28:7-14; 31:7; Iosua 21:43-45.

E ui i lea, e leai se mafuaaga faale-Tusi Paia e faagata mai ai ʻeʻrets o le Salamo 37:11, 29 i le na o le nuu na tuuina atu i tagata Isaraelu.

E tusa ai ma le A Hebrew and English Lexicon of the Old Testament (Gesenius, Brown, Driver, and Briggs; 1951) ʻeʹrets o lona uiga: “1a. lalolagi, lalolagi atoa ([tuufaafeagai] i se vaega) . . . e. lalolagi, [tuufaafeagai i] lagi, vateatea . . . i. lalolagi = o e nonofo i le lalolagi . . . 2. nuu a. atunuu, oganuu . . . e. itumalo, se vaega . . . 3. a. laueleele, luga o le laueleele . . . e. eleele, e fua mai.” O le Old Testment Word Studies tusia e Willam Wilson ua faapea mai e uiga ia ʻeʹrets: “O le lalolagi i lona uiga pito i tele, o vaega aina ma vaega le aina; faatasi ma se upu e faagata ai; ua faaaoga o sina vaega i luga o le lalolagi, o se nuu po o se atunuu.” O lea, o le uluai uiga o le upu Eperu o lo tatou paneta, po o le kelope, le lalolagi.

Ina ua faaliliuina faafaatusa le Salamo 37:11, 29 i le gagana Eleni i le Septuagint, o le upu Eleni ʻeʹrets sa aumaia i le faa-Eleni o le ge “o lona uiga laueleele o se fanua po o se palapala lauusiusi.” O le ge o se upu na faaaogaina le valoaga faafaatusa a Iesu i le Mataio 5:5: “Amuia e agamalu; auā e fai mo latou tofi le nuu.”

O le mea moni, o le siiina mai o le folafolaga i le Salamo 37:11, sa lei faatatauina na o le Nuu o le Folafolaga. O ona soo faauuina le a avea ma tupu-ositaulaga faalelagi faatasi ma ia e auai i se pulega i luga o le laueleele faale-Kelope atoa. (Faaaliga 5:10) E faapena foi i e loto maulalo e ola e faavavau o ni tagata o le a fesoasoani e toe faafoisia tulaga faaparataiso i luga o le lalolagi atoa. (Faaaliga 21:4; Kenese 1:28) O lea, o i tatou uma e tatau ona vaai i le faataunuuina matagofie o le folafolaga lenei i le lumanai: “E fai lava le lalolagi mo tagata amiotonu, ma nonofo ai pea e faavavau.”—Salamo 37:​29, Fenton.