O le Misiterio o Tagata Tietie Solofanua o Le Apokalipise

O LOO e vaaia ma le maofa a o feleleai le ua ma le siusiu o le solofanua atoa ma le isu tiotio, a o alu ifo ma le saosaoa mai luga o le aega maa. E foliga mai ua kelū le o tietie i le nofoa e pei o ai o se vaega o le tino o lenei solofanua tafitifiti.

Po o lou asiasi atu i se nofoaga matie i nuu tua o Ausetalia i le ma e i ai lafu manu, po o lou asiasi atu i le isi itu lalolagi, i le fanua laugatasi o lafu manu i Amerika, o le vaaiga o se tagata tietie solofanua na te matua iloa lana manu o se tulaga faamanatitino. E faapena foi le mataina o se solo matagofie a ni solofanua ua lava ona aʻoaʻoina atoa ma e o tietie ai.

O na ituaiga o tagata tietie solofanua ma a latou manu latou te faaofoina i tatou. E ui i lea, o solofanua ma e o tietie ai na molimauina e le tusitala o le tusi o Faaaliga (le Apokalipise) o ni mea mataʻutia i le vaai! E le gata ina avea ma mea lilo ae uiga ese. O nei tagata tietie solofanua ua lauiloa o Tagata Tietie Solofanua o le Apokalipise.

Sei manatu mai, o loo sau le taufetuliga agai i a te oe, a ni tagata o le faiva tietie e toafa, ma o le tasi o loo faalala mai le pelu! Matau le lanu o a latou solofanua. E eseese i latou. O le tasi solofanua e paepae, o le isi e mumu, le isi foi e uliuli, ma o le isi e pei e faamaia faalanulauvao samasama. O i latou o se vaaiga ese, ma le faalilolilo.

E mulimuli mai i lenei mea se tala faanatinati e pei ona vaaia e le tusitala o le Tusi Paia, le aposetolo o Ioane. Ua ia faapea mai: “Ona ou vaai ai lea, faauta foi, o le solofanua sinasina, ua i ai le aufana i loo tietie ai; ua avatu foi ia te ia le palealii; ona alu atu lea o ia, o loo manumalo, o le a manumalo pea ia . . . Ona alu atu lea o le isi solofanua mūmū; ua avatu foi le pule i loo tietie ai na te aveeseina le filemu i le lalolagi, a e latou te fefasiai ai; ua avatu foi ia te ia le pelu tele . . . Ona ou vaai lea, faauta foi, o le solofanua uliuli; ua i le lima o loo tietie ai le fua faatautau. Na ou faalogo foi i le leo . . . ua faapea mai, ‘o le tau o le koini o le saito o le tenari lea, [totogi mo le aso] o le tau o le koini e tolu o le karite o le tenari foi lea [totogi mo le aso]’ . . . Ona ou vaai lea, faauta, o le solofanua samasama, ma lē tietie ai, o lona igoa o le Oti, ua mulimuli atu foi Seoli ia te ia; ua avatu foi ia te i laua le pule e fasioti i lona fa o vaega o le lalolagi i le pelu, ma le oge, ma le oti, atoa ma manu feai o le vao.”—Faaaliga 6:2-8, An American Translation.

 Talu ona tusia lenei faaaliga, ua iso ai le toatele e le mafaitaulia o le au faitau. O le a ua faaataata mai e nei solofanua faamisiterio ma e o tietie ai? O anafea na amata ai ona latou tietie? E i ai ea se uiga o lo latou tietie mo le olaga i aso nei? E tele ituaiga o faamatalaga eseese ua ofoina mai i le po o le a ua fai ma sui o solofanua ma e o tietie ai, ma po o afea foi e amata moni ai ona latou tietie.

O le eseesega sili ona e faasino lea i le faaliliuga o le solofanua paepae ma le o tietie ai. Mo se faataʻitaʻiga, o le faamatalaga a le New Catholic Encyclopedia faapea o le solofanua paepae e fai ma sui ‘o le manumalo o le tala lelei po o le pule malosi.’

I le tusi Daniel and the Revelation, ua aumaia ai e Uriah Smith lenei faaliliuga: “O le solofanua paepae . . . o se faatusa fetaui o le manumalo o le tala lelei i le uluai senituri . . . O le paepae o le solofanua e taʻu mai ai le mama o le faatuatuaga i na tausaga.” Fai mai le The Expositor’s Bible: “I lalo o le tagata tietie muamua o le gaoioiga a e le o le peresona o Keriso ua na faataimua mai i a i latou, i uluai laasaga o lona agai i luma i le manumalo i le lumanai . . . Ua tatou aʻoaʻoina o lenei gaoioiga ua i le lalolagi, o lenei malo ua i le lotolotoi o i latou, ma o i latou o e tetee ai o le a le tuvae i le faiaina.” A e ui i lea, o Woodrow Kroll o le The Christian Jew Foundation, ua ia lagona o le tietie solofanua paepae o le Anetikeriso.

O nisi ua latou fautua mai e toalima solofanua ma e o tietie ai, a e le na o le toafa. O lea e faapefea ona tatou iloa po o le fea o le tele o nei faaliliuga ua sao? E faapefea ona tatou mautinoa e i ai se malamalamaga sao? O ai moni ea nei tagata tietie solofanua o le tusi o Faaaliga, ma o anafea na amata ai ona latou tietie?