O le Soifuaga o Iesu ma Lana Faiva

Tatalo Faaiʻu i le Potu i Luga

I LE uunaia e le alofa loloto mo ona aposetolo, ua sauniunia ai i latou e Iesu ona o le a vave ona alu ese. O lenei, ina ua uma ona apoapoai ma faamafanafana ia i latou i se taimi umi, ona tepa aʻe lea o ona fofoga i le lagi ma ole atu i lona Tamā: “Tuu mai ia le viiga i lou Atalii, ina ia tuu atu foi e lou Atalii le viiga ia te oe. Auā ua e foai mai ia te ia le pule i tagata uma lava, ina ia avatu e ia le ola e faavavau ia te i latou uma lava na e foaiina mai ia te ia.”

Maeu se matua e uunaia ai ua faailoa atu e Iesu—o le ola e faavavau! I le tuuina atu ia te ia o le “pule i tagata uma lava,” ua mafai ai e Iesu ona tuuina atu aogā o lana taulaga togiola i le fanau uma lava a tagata ua maliliu. Peitai, ua ia tuuina atu le “ola e faavavau” i na o i latou o ē ua faamaonia e le Tamā. I le fausiaina aʻe i lenei matua o le ola e faavavau, ua faaauau ai e Iesu lana tatalo:

“O le ola e faavavau foi lenei, ia latou iloa oe le Atua moni e toatasi, atoa ma le ua e auina mai, o Iesu Keriso lea.” Ioe, e faalagolago le faaolataga i luga o lo tatou aveina i fale o le poto e uiga i le Atua ma lona Alo. Ae e sili atu mea e manaomia na i lo o le na o le poto i le mafaufau.

E tatau i se tagata ona oo ina iloa loloto i laua, i le atiina aʻe o se faauoga malamalama ma i laua. E tatau i se tasi ona iai se faalogona e pei ona la lagona ai e uiga i mea ma vaai e tusa o le silasila a o la fofoga. Ma i lo mea uma lava, e tatau i se tagata ona tauivi ina ia faataʻitaʻi i o la uiga lē mafaatusatusaina i feutagaiga ma isi.

Na sosoo ai ma le tatalo a Iesu: “Ua ou tuu atu le viiga ia te oe i le lalolagi; ua ou faaumaina le galuega na e tuuina mai ia te au, ou te faia.” I lea, o le faataunuuina o lona tofiga seia oo atu i lenei tulaga ma i le mautinoa e uiga i lona lumanai manuia, ua ia ole atu: “Loʻu Tamā e, ia e tuu mai ia te au le manuia faatasi ma oe, o le manuia lava sa ia te i taua ma oe, a o lei faia le lalolagi.” Ioe, ua ia talosaga atu nei ina ia toe faafoisia o ia i lona mamalu faalelagi sa iai muamua e ala i se toetu.

I le aoteleina o lana galuega sili i le lalolagi, ua fetalai ai Iesu: “Ua ou faaali atu lou suafa i tagata na e foai mai ia te au ai le lalolagi; sa fai i latou mou, ua e foaiina mai foi i latou ia te au, ua latou tausia foi lau afioga.” Sa faaaogā e Iesu le suafa o le Atua, o Ieova, i lana faiva ma faatinoina ai le faaleoga saʻo o lea suafa, ae na ia faia mea e sili atu na i lo o lena ina ia faailoa atu ai le suafa o le Atua i ona aposetolo. Sa ia faalauteleina foi lo latou poto ma le talisapaia o Ieova, lona peresona, ma e uiga i ana fuafuaga.

I le ioe faapea o Ieova e Sili ia te ia, o Lē o loo ia auauna i ai, ua faailoa atu ai ma le loto maulalo e Iesu: “O upu foi na e tuu mai ia te au, ua ou tuuina atu ia te i latou; ua latou talia foi, ma ua latou iloa, e moni ua ou sau mai ia te oe; ua talitonu foi i latou ua e auina mai aʻu.”

I le faia o se faaeseesega i le va o ona soʻo ma le isi vaega uma o le fanau a tagata, ua toe tatalo ai Iesu: “Ou te tatalo mo i latou; ou te le tatalo mo le lalolagi, a o i latou na e foaiina mai ia te au . . . Ua ou tausia i latou i lou suafa, ina ua ou ia te i latou i le lalolagi . . . , ua ou leoleo i e na e foai mai ia te au, e leai foi so latou ua fano, na o le tagata o le malaia,” o lona igoa, o Iuta le Sekara. I lenei lava itula faapitoa, o loo faia ai e Iuta lana galuega matuā leaga ina ia faalata Iesu. I lea, ua faataunuuina ai ma le lē iloa e Iuta le Mau.

“Ua ʻinoʻino foi le lalolagi ia te i latou,” ua faaauau ai le tatalo a Iesu. “Ou te le ole atu ina ia e ave ese ia te i latou i le  lalolagi, a ia e tausi ia te i latou ina neʻi leaga. E le ni o le lalolagi i latou, faapei o aʻu foi, ou te le so le lalolagi aʻu.” O loo iai i le lalolagi soʻo o Iesu, i lenei sosaiete faaletagata ua faamaopoopoina o loo pulea e Satani, ae o loo iai i latou ma e tatau ona tumau pea ona vavaeese mai ai i le lalolagi ma ana amioga leaga.

“Ia e faapaiaina i latou i lau upu moni,” ua faaauau ai Iesu, “o lau afioga o le upu moni lea.” I inei ua taʻua ai e Iesu le Tusi Paia Eperu faagaeeina, lea na faaauau pea ona ia siitia mai ai, “le upu moni.” Ae o le mea na ia aʻoaʻoina ai ona soʻo ma na mulimuli ane latou tusia i lalo o faagaeega e avea o Tusitusiga Kerisiano Eleni ua faapena foi ona avea “o le upu moni.” O lenei upu moni e mafai ona faapaiaina ai se tagata, suia ai atoatoa lona olaga, ma faia ai o ia o se tagata e vavaeese mai le lalolagi.

Ua tatalo nei Iesu “e le faapito . . . mo i latou nei, a o i latou foi e faatuatua ia te [ia] ona o la latou upu.” O lea ua tatalo ai Iesu mo i latou o ē o le a avea ma ona soʻo faauuina ma isi soʻo i le lumanai o ē o le a aoaoina mai i se ‘lafu mamoe e tasi.’ O le ā ua ia talosaga atu ai mo i latou uma nei? “Ina ia tasi i latou uma, faapei o oe le Tamā o i totonu ia te au, o aʻu foi o i totonu ia te oe, . . . ina ia tasi o i latou, faapei o i taua ua tasi.”

E lē o tasi moni Iesu ma lona Tamā i le tino e tasi, ae o loo tasi lo la finagalo i mea uma lava. Ua tatalo Iesu ina ia olioli ona soʻo i lenei lava autasi tutusa, ina ia “iloa ai foi e le lalolagi, na e auina mai aʻu, ma e alofa mai ia te i latou, faapei ona e alofa mai ia te au.”

I le fai ma sui o i latou o ē o le a avea ma ona soʻo faauuina, ua faia ai nei e Iesu se olega i lona Tamā faalelagi. Mo le ā? “Ina ia latou faatasi ma aʻu i le mea ou te i ai, ina ia latou vaaia loʻu manuia na e foai mai ia te au; auā ua e alofa mai ia te au a o lei faavaeina le lalolagi,” o lona uiga, ina ua afuafuaina e Atamu ma Eva la la uluai tama. I tuā lava a o leʻi oo i le taimi lena, na alofa ai le Atua i lona Alo pele e toatasi, o lē na avea o Iesu Keriso.

I le faaiʻuina o lana tatalo, ua toe faamamafa ai e Iesu: “Ua ou faailoa atu foi lou suafa ia te i latou, ou te faailoa atu ai foi; ina ia i totonu ia te i latou le alofa ua e alofa mai ai ia te au, o aʻu foi i totonu ia te i latou.” Mo le au aposetolo, o le aʻoaʻoina o le suafa o le Atua ua aafia totino ai le oo ina latou iloa le alofa o le Atua. Ioane 17:1-26; 10:16; Faataoto 8:22, 30.

▪ I le ā le uiga ua tuuina atu ai ia Iesu “le pule i tagata uma lava”?

▪ O le ā le uiga o le mauaina o le poto i le Atua ma lona Alo?

▪ I ā auala na faaalia ai e Iesu le suafa o le Atua?

▪ O le ā “le upu moni,” ma e mafai faapefea ona “faapaiaina” ai se Kerisiano?

▪ Ua faapefea ona tasi le Atua, lona Alo, ma tagata tapuai moni uma?

▪ O anafea na “faavaeina [ai] le lalolagi”?