Amioga e Viia ai le Aʻoaʻoga a le Atua

Talu ai nei, na tusi atu ai e le pule o se kamupani i Caracas i Venezuela se tusi i toeaina ma auauna o le faiva o le faapotopotoga a Molimau a Ieova e latalata ane ia i latou. I lea tusi na latou tusi atu ai e faapea: “Ua matou maua ni tala e matuā lelei lava e uiga i tagata o la outou lotu e faatatau i o latou manatu e uiga i tiute tauave ma le faamaoni. Ona o lenei mafuaaga o lea ua matou talosaga atu ai. Ona o le lē lava o a matou tagata faigaluega i le taimi nei, ua ia i matou se manaoga faanatinati mo ni tagata se toalua e faatutumuina avanoa ia o loo mulimuli mai: o le tasi o se avetaavale ma o le isi o se pule i le fale teuoloa. Matou te matuā talisapaia so o se faamatalaga e mafai ona outou saunia e faatatau i se tasi i la outou faapotopotoga po o se isi foi faapotopotoga o latalata mai. O le mea moni, matou te lē o mananao e faafaigaluega ni tagata e lē ni Molimau. Faamolemole, faailoa mai ia te i matou e tusa lava pe afai e leai se tasi e avanoa, talu ai o le a matou faatali mo sa outou tali a o leʻi faia so o sa matou faaiʻuga.”

Ina ua maua le tusi i lalo o le faitotoa o le Maota o le Malo, ona asiasi atu lea o se tasi o toeaina o le faapotopotoga i le pule o lena kamupani. O le pule sa feutagai muamua ma ni Molimau a Ieova mo le 15 tausaga ma na manatua ai le leai o ni faafitauli matuiā ma ana tagata faigaluega Molimau. Sa ia faasino atu ia i latou o ni tagata faigaluega e uigā, faatuatuaina, faamaoni, ma e filiga i galuega. Ona ia faaopoopo mai lea: “Ou te iloa tou te lē talia ni tagata fai mea leaga, ma tou te faateaeseina i latou. Ua faaalia i lena mea e lē mananao la outou faapotopotoga e faifai mea faatasi ma tagata faapena.”

O amioga faapena ua viia ai le aʻoaʻoga a le Atua. (Tito 2:10) O le iʻuga lea o le naunau faamaoni e matuā pipii atu i mataupu silisili tauamio o loo faaauivi mai i le Tusi Paia.