Le Matafaioi a Faipule Silisili

“O le auauna ia a le Atua ia te oe, ia lelei ai; a e afai e te amio leaga, ia e fefe ai.”—ROMA 13:4.

1, 2. Ua faapefea e le toatele o i Kerisinetoma ona aafia i gaoioiga fouvale?

I LE lua tausaga ua mavae, na saveu ai e se faatasiga a epikopo i Lonetona se tala na tusia ma le ita tele e le faatonu o le nusipepa o le New York Post. O le faatasiga sa taʻua o le Lambeth Conference, na auai e sili atu i le 500 epikopo o le lotu Egelani. Na mafua lea ita tele ona o se lafo na pasia e le koneferenisi ua faaalia ai le malamalamaga mo tagata “o ē, ina ua uma ona talanoaina maeʻaeʻa isi auala uma lava, ua filifilia le auala o le tauiviga o meatau ua na o le pau lea o le auala i le faamasinoga tonu.”

² Na faapea mai le Post i le iʻuga, o lenei mea sa o se faamaoniga o faiga taufaamataʻu. Ae peitai, sa na ona mulimuli atu epikopo i se faanaunauga o loo tuputupu aʻe. O lo latou uiga sa leai se eseesega ma le uiga o le patele Katoliko i Kana o lē na fautuaina le faiga taua a fitafita lalafi solo e avea o se auala e sili ona vave, e sili ona mautinoa, ma le auala e sili ona saogalemu e faasaʻoloto ai Aferika; pe e pei o le epikopo Metotisi i Aferika o lē na tauto e fai pea “le taua o le saʻolotoga seia oo i le iʻuga ogoogo”; pe e pei o le toatele o misionare a Kerisinetoma o ē na tau ma tagata tetee faasaga i le faavaeina o pulega malo i Asia ma Amerika i Saute.

O Kerisiano Moni e Lē ‘Tetee i Faipule Silisili’

3, 4. (a) O ā mataupu silisili ua solia e i latou ua taʻua o Kerisiano o ē ua siitia fouvalega? (e) O le ā na ona iloa e se tasi tagata e uiga i Molimau a Ieova?

³ I le uluai senituri, na fetalai ai Iesu i ona soʻo: “E le ni o le lalolagi i latou, faapei o aʻu, ou te le so le lalolagi aʻu.” (Ioane 17:14) So o se tasi lava e taʻua o se Kerisiano o lē e siitia fouvalega o ia lava o se vaega moni o le lalolagi. E lē o ia o se soʻo o Iesu; e lē o ia foi o sē e “usiusitai . . . i faipule silisili.” (Roma 13:1) E sili ona lelei mo ia ona utagia le lapataiga a le aposetolo o Paulo faapea “o le na te tetee i le pule, ua tetee e ia i le sauniga a le Atua; o e tetee foi e sala lava i latou.”—Roma 13:2.

⁴ I le faaeseesega ma le toatele i Kerisinetoma, o Molimau a Ieova e leai ni a latou feutagaiga ma faiga sauā faaauupegaina. Na iloa e se tamaloa i Europa lenei mea. Ua ia tusi mai faapea: “I le vaai atu i mea ua fuaina mai e lotu ma faiga polotiki, sa oo ina tuuina atu atoa ai loʻu loto i le faatoilaloina o faiga lautele ua faavaeina. Sa ou auai i se vaega o tagata taufaamataʻu ma aʻoaʻoina ai aʻu i le taulimaina o ituaiga uma o auupega; sa ou auai i le tele o faiga gaoi e faaaogā ai auupega. Sa matuā mataʻutia lava loʻu olaga. A o faagasolo taimi, sa oo ina foliga mai ia te aʻu faapea o loo matou tauina se taua e lē manumalo. O aʻu o se tagata ita, ma sa ufitia e le matuā leai o se faamoemoe i le olaga. Ona tuʻituʻi mai lea o se Molimau i lo matou fale. Na ia taʻu mai ia te aʻu e uiga i le Malo o le Atua. Sa ou maumauai faapea e maimau loʻu taimi i lenei mea, sa ou fai atu ai i loʻu toalua ina ia faalogologo o ia. Sa ia faalogo, ma na amata ai loa se suesuega faale-Tusi Paia. I le iʻuga, sa ou lotomalie e auai i le suesuega. E lē mafaia e upu ona faamatala le mapusaga na ou lagona ina ua ou malamalama i le mana malosi o loo uunaia le fanau a tagata agaʻi i le leaga. O le folafolaga ofoofogia a le Malo ua aumaia ai ia te aʻu se faamoemoe ola ma se fuafuaga i le olaga.”

5. Aiseā e tumau ai ona gauai atu ma le fifilemu Kerisiano i faipule silisili, ma o lenei tulaga o le a faaauau seia oo afea?

⁵ O Kerisiano o amepasa po o sui o le Atua ma Keriso. (Isaia 61:1, 2; 2 Korinito 5:20; Efeso 6:19, 20) I le avea o na ituaiga o tagata,  latou te tumau pea ona solitu i feteenaiga a lenei lalolagi. E ui lava o nisi o faiga faapolotiki e foliga mai e sili atu ona manuia i le tulaga tau tamaoaiga na i lo o isi, ma o nisi ua faatagaina le saʻolotoga e sili atu na i lo o isi, ae o Kerisiano latou te lē siitia pe faatulaga maualuga le isi i lo o le isi. Latou te iloa faapea o faiga uma lava e lē lelei atoatoa. O “le sauniga [faatulagaga] a le Atua” faapea o nei faiga e faaauau pea ona iai seia oo ina pule lona Malo. (Tanielu 2:44) I lea, e tumau ai ona gauai fifilemu Kerisiano i faipule silisili a o siitia le lelei e faavavau o isi e ala i le talaʻiina atu o le tala lelei o le Malo.—Mataio 24:14; 1 Peteru 3:11, 12.

Usiusitai i le Tulafono

6. Aiseā ua lelei ai le tele o tulafono faaletagata e ui lava “o le lalolagi uma o loo nofo toilalo i loo leaga”?

⁶ Ua faataatia e pulega faalemalo ni faiga o tulafono, ma o le tele o nei tulafono e lelei. Pe o se mea lea tatou te ofo ai, i le vaai atu i le mea moni faapea “o le lalolagi uma o loo nofo toilalo i loo leaga”? (1 Ioane 5:19) E leai. Na avatu e Ieova i lo tatou uluai tamā, o Atamu, se loto fuatiaifo, ma o lenei lagona na o le saʻo ma le sese na faananau mai ma i tatou, ua atagia mai i le tele o auala i tulafono faaletagata. (Roma 2:13-16) O Hammurabi, o se tagata faitulafono anamua o Papelonia, sa faavaeina lana faiga faaletulafono e faapenei: “I lena taimi [na latou] tofia ai aʻu ina ia siitia le lelei o tagata, o aʻu, o Hammurabi, o le perenise tuutoina ma le mataʻu i le Atua, e tatau ona faia le faamasinoga tonu ia salalau atu i le nuu, ina ia faaumatia o ē amio leaga ma le leaga, ina ia lē sauā atu lē malosi i lē vaivai.”

7. Afai e solia e se tasi le tulafono, o ai e iai le āiā e faasalaina ai o ia, ma aiseā?

⁷ O le tele o pulega o le a faapea mai o le fuafuaga o a latou tulafono e faapena: ia siitia le lelei o tagatanuu ma le maopoopo lelei i le sosaiete. I lea, latou te faasalaina ai gaoioiga e tetee i faiga lautele, e pei o le fasioti tagata ma le gaoi, ma faataatia tulafono, e pei o le faatapulaaina o le saoasaoa o taavale ma tulafono i le pākaina. So o se tasi lava na te solia ma le loto i ai a latou tulafono ua tu faasagatau o ia i faipule silisili ma “e sala lava [o ia].” Faasalaga mai ia te ai? E lē tatau ona mai le Atua. O le upu Eleni i inei ua faaliliuina i le faasalaga e mafai ona faasino atu i taualumaga a le atunuu na i lo o le faasalaga a Ieova. (Faatusatusa 1 Korinito 6:7.) So o se tasi e faia faiga solitulafono, e iai i faipule silisili le aiā e faasalaina ai o ia.

8. O le a faapefea ona tali atu le faapotopotoga pe afai e faia e se tasi o ona sui se solitulafono matuiā?

⁸ Ua iai se talaaga lelei o Molimau a Ieova mo le lē tetee i faipule faaletagata. Afai e tulai mai ma solia e se tasi i le faapotopotoga le tulafono, o le a lē fesoasoani ia te ia le faapotopotoga ina ia ʻaloese mai le faasalaga o le solitulafono. Afai e gaoi se tasi, fasioti tagata, faia faamatalaga taufaasese, faaʻoleʻole i ana lafoga, toso teine, faia faiga taufaasese, faaaogā ma le lē faatulafonoina vailaau oona, pe aafia i nisi lava auala e tetee atu ai i pulega a faipule, o le a fesagaʻi o ia ma se aʻoaʻiga ogoogo mai i le faapotopotoga—ma e lē tatau ona oo ia te ia se lagona faapea ua sauāina pe afai e faasalaina o ia e faipule masani.—1 Korinito 5:12, 13; 1 Peteru 2:13-17, 20.

O Sē e Faamataʻu

9. O le ā se puna o fesoasoani e tonu ona maua e Kerisiano pe afai e faamataʻuina e tagata solitulafono?

⁹ Ua faaauau e Paulo lana talanoaga e uiga i faipule silisili, i lona faapea mai: “Auā o alii, e le se faamatau i latou i e amio lelei, na o e amio leaga. O lou manao ea, ia e le fefe i le pule? ia e amio lelei, ona taʻuleleia mai lea o oe e ia.” (Roma 13:3) E lē o Kerisiano faamaoni i latou o ē e ao ona fefefe i le faasalaga mai i le faipule ae o ē amio leaga, o i latou o ē faia ‘amioga leaga’ o gaoioiga solitulafono. Pe a faamataʻuina e na tagata solitulafono, e mafai e Molimau a Ieova ona talia ma le saʻo mai i faipule se puipuiga mai leoleo po o vaegaʻau.—Galuega 23:12-22.

10. Ua faapefea ona ‘maua le viiga’ e Molimau a Ieova mai i faipule?

¹⁰ I le Kerisiano o lē tausia le tulafono a le faipule silisili, ua faapea mai Paulo: “Ona taʻuleleia mai lea o oe e ia.” Seʻi manatunatu i se faaaʻoaʻoga o lenei mea i nisi o tusi na maua e Molimau a Ieova i Pasili ina ua uma a latou tauaofiaga itumalo. E mai i se taʻitaʻi o le matagaluega o taaloga i le atunuu: “Ua ono ma  tatau le viiga aupito sili ona maualuga mo a outou amio filemu. O se faamafanafanaga i aso nei i se lalolagi ua tumu i faalavelave le iloa faapea e matuā toatele lava o loo talitonu pea i le Atua ma tapuai i ai.” Mai le faatonu o le malae taalo i le atunuu: “E ui lava i le matuā toatele o tagata na auai, ae e leai se mea na faamauina faapea na tupu e faaleagaina ai le tauaofiaga, faafetai tele i le faalapotopotoga leai ma se sese.” Mai i le ofisa o se pulenuu: “Matou te mananao e faaaogā lenei avanoa e faamālō atu ai ia te outou ona o lo outou maopoopo ma le ofoofogia o aʻoaʻiga tuusaʻo, ma matou te moomoo ai ina ia outou taulau uma i a outou taumafaiga i le lumanai.”

11. Aiseā ua matuā lē mafai ai ona faapea atu o le talaʻiina o le tala lelei o se galuega leaga?

¹¹ O le faaupuga “[galuega] lelei” e faasino atu i galuega e faia i le usiusitai i tulafono a faipule silisili. E faaopoopo atu i ai, o la tatou galuega talaʻi, lea ua poloaiina e le Atua, ae lē o tagata, e lē o se galuega leaga—o se galuega autū e ao i faipule faapolotiki ona iloa. O se auaunaga i le lautele e siitia ai le uiga o amioga a i latou o ē tali mai. O le mea lea, o lo tatou faamoemoe faapea o le a puipuia e faipule silisili a tatou aiā e talaʻi ai i isi. Na talosaga Paulo i faipule ina ia faavae faaletulafono le talaʻiina o le tala lelei. (Galuega 16:35-40; 25:8-12; Filipi 1:7) Talu ai nei lava, na faapena foi ona sailia e Molimau a Ieova ma maua ai se faamaoniga faaletulafono o la latou galuega i Siamani i Sasae, Hanakeri, Polani, Romania, Benin, ma Myanmar (Burma).

“O le Auauna Ia a le Atua”

12-14. Ua faapefea ona gaoioi faipule silisili e avea o auauna a le Atua (a) i taimi o le Tusi Paia? (e) i taimi nei?

¹² I le tautala e uiga i faipule faaletagata, ua faaauau mai pea Paulo: “O le auauna ia a le Atua ia te oe, ia lelei ai; a e afai e te amio leaga, ia e fefe ai, auā e le fai fua e ia lana pelu; auā o le auauna o ia a le Atua, o le na te taui atu le toasa i lē amio leaga.”—Roma 13:4.

¹³ O faipule faalemalo i nisi taimi e gaoioi e avea o auauna a le Atua i ni auala patino. Sa faia faapea e Kuresa ina ua ia valaaulia tagata Iutaia e toe foi atu mai Papelonia ma toe fausia le fale o le Atua. (Esera 1:1-4; Isaia 44:28) O Aretaseta sa avea o se auauna a le Atua ina ua ia auina atu Esera faatasi ma ni meaalofa mo le toe fausia o lena fale ma mulimuli ane ina ua ia tofia Neemia e toe fausia pa o Ierusalema. (Esera 7:11-26; 8:25-30; Neemia 2:1-8) Sa faapena foi ona auauna le faipule silisili o Roma ina ua ia faasaoina Paulo mai se motu o tagata faatupu faalavelave i Ierusalema, puipuia o ia i le taimi na āfatia ai le vaa, ma fuafuaina mo ia ia iai sona lava fale i Roma.—Galuega 21:31, 32; 28:7-10, 30, 31.

¹⁴ Ua faapena foi ona auauna faipule faalemalo e avea o ni auauna a le Atua i ona po nei. I le 1959, mo se faaaʻoaʻoga, na pulea ai e le Faamasinoga Maualuga i Kanata e faapea o se tasi o Molimau a Ieova sa tuuaʻia sese i Quebec i le faasalalauina o ni faamatalaga faaʻoleʻole taufaaleaga sa leʻi nofosala ai—lea ua faaleaogāina ai filifiliga a le palemia o Quebec sa iai i lena taimi, o Maurice Duplessis.

15. I le ā le auala taatele ua gaoioi ai faipule e avea o auauna a le Atua, ma o le ā le āiā ua tuuina e lenei mea ia i latou?

¹⁵ Ae lē gata i lea, i se auala lautele, ua gaoioi ai pulega faalemalo e avea o auauna a le Atua e ala i le faasaoina o le maopoopoga o tulaga lautele seia oo ina tauave atoatoa e le Malo o le Atua lena tiute tauave. E tusa ai o upu a Paulo, i lenei itu, o le faipule na te “[sii atu] lana pelu,” e faaatagia ai lana āiā e tuuina atu ai le faasalaga. E masani lava, o lenei mea ua aafia ai le faafalepuipuiina po o le faasalaina i se tupe. I nisi atunuu atonu e aofia ai foi le faasalaga oti. * I le isi itu, e tele atunuu ua latou filifilia ina ia lē faia ni faasalaga i le oti, ma o la latou lava āiā foi lea.

16. (a) Talu ai o le faipule o le auauna a le Atua, o le ā la ua manatu nisi o auauna a le Atua o se mea e tatau ona faia? (e) O le ā le ituaiga o galuega e ono lē talia e se Kerisiano, ma aiseā e leai ai?

¹⁶ O le mea moni faapea o faipule silisili o auauna a le Atua ua faamatalaina ai le pogai na mafai ai e Tanielu, o Eperu e toatolu, Neemia, ma Moretekai ona talia tulaga talafeagai i pulega faalemalo a Papelonia ma Peresia. Sa mafai ai i lea ona latou talosaga atu i faipule o le Setete mo le lelei o tagata o le Atua. (Neemia  1:11; Eseta 10:3; Tanielu 2:48, 49; 6:1, 2) I aso nei o nisi o Kerisiano e galulue foi i auaunaga faalemalo. Ae talu ai e vavaeese i latou mai le lalolagi, latou te lē auai i faiga vaega faapolotiki, saili ni tulaga faapolotiki, pe talia aiaiga i le faia o tulaga i faalapotopotoga faapolotiki.

Le Manaoga mo le Faatuatua

17. O ā tulaga e ono faapogaia ai nisi tagata lē Kerisiano e tetee i le pule?

¹⁷ Ae faapefea la pe afai e talia e faipule faiga iʻuvale pe oo lava i teteega? Pe e ao i Kerisiano ona taumafai e suia se pulega i se tasi lena e foliga mai e sili ona lelei? Ia, o le lē faamasino tonu o pulega faalemalo ma le iʻuvale e lē o ni mea fou. I le uluai senituri, na talia ai lava e le Emepaea o Roma faamasinoga lē tonu e pei o faiga faapologa. Sa ia tuu ai pea lava foi tagata faigaluega iʻuvale. Ua taʻua e le Tusi Paia ni au ao lafoga o ē sa faaimamago, o se faamasino amioletonu, ma se kovana faaitumalo o lē sa saili mo ni faiga faatogafalea.—Luka 3:12, 13; 18:2-5; Galuega 24:26, 27.

18, 19. (a) E faapefea ona tali atu Kerisiano pe afai e iai ni tuuaʻiga sese po o ni faiga iʻuvale i le vaega a ofisa faalemalo? (e) Ua faapefea i Kerisiano ona faaleleia olaga o tagata taitoatasi, e pei ona faaalia e se tusitala o talafaasolopito ma i le pusa o loo i lalo?

¹⁸ Sa ono mafai e Kerisiano ona taumafai e faaiʻu ai na faiga sese i tuā i inā, ae latou te leʻi  faia faapea. Mo se faaaʻoaʻoga, sa leʻi talaʻia e Paulo se faaiʻuga i faiga faapologa, ma na te leʻi taʻuina atu foi i matai o pologa Kerisiano ina ia faasaʻoloto a latou pologa. Na i lo o lea, sa ia fautuaina pologa ma ē e ana ia pologa ina ia faaalia le alofa faa-Kerisiano i le feagai ai o le tasi ma le isi. (1 Korinito 7:20-24; Efeso 6:1-9; Filemoni 10-16; tagai foi 1 Peteru 2:18.) Sa faapena foi ona leʻi aafia Kerisiano i gaoioiga fouvale. Sa pisi nauā i latou i le talaʻiina o “le tala lelei o le [filemu].” (Galuega 10:36) I le 66 T.A., na vagaia ai e ʻau a Roma Ierusalema ma toe tuumuli. Na i lo o le nonofo ai faatasi ma tagata tetee fouvale o le aai, na ‘sosola i mauga’ Kerisiano Eperu i le usiusitai i le faatonuga a Iesu.—Luka 21:20, 21.

¹⁹ Sa ola uluai Kerisiano faatasi ma na mea e pei ona sa iai a o latou taumafai e faaleleia olaga o tagata taitoatasi e ala i le fesoasoani atu ia i latou ia mulimuli i mataupu silisili a le Tusi Paia. Na tusi le tusitala o talafaasolopito o John Lord, i lana tusi The Old Roman World, e faapea: “O manumalo moni o le Faa-Kerisiano sa vaaia i le faia o i latou o ē na taʻutino i ana aʻoaʻoga o ni tagata lelei, na i lo o le suia o uiga masani tau amio i fafo, po o pulega, po o tulafono.” Pe e ao i Kerisiano i aso nei ona faia se gaoioiga e ese mai ai?

Pe a Lē Fesoasoani le Setete

20, 21. (a) Na faapefea i se tasi faipule masani ona lē taulau e gaoioi o se auauna a le Atua mo le lelei? (e) E ao faapefea i Molimau a Ieova ona tali atu pe a sauāina faatasi ai ma le lagolagosua a le Setete?

²⁰ Ia Setema i le 1972, na pa mai ai sauaga matuitui faasaga i Molimau a Ieova i se atunuu i Aferika tutotonu. E faitau afe ē na gaoia a latou mea totino uma lava ma tuuina atu i isi faiga sauā, e aofia ai le sasaina, faasatauroina, ma fasiotia. Pe sa faataunuuina e faipule silisili lona tiute e puipuia Molimau? E leai! Na i lo o lea, na ia faamalosia faiga sauā, faamalosia nei Kerisiano toʻafilemu e sosola ese atu i atunuu tuaoi mo le saogalemu.

²¹ Pe e lē tatau ea i Molimau a Ieova ona tutū aʻe ma le feita faasaga i tagata faaoosala faapena? E leai. E ao i Kerisiano ona tumau ma le onosai i na faiga lē faaaloalo, i le gaoioi ma le loto maulalo e faataʻitaʻi ia Iesu: “Na faatigaina o ia, a e lei faamatau atu, a ua tuuina atu o ia e ia i le na te faamasino tonu.” (1 Peteru 2:23) Sa latou manatua faapea ina ua pueina Iesu i le faatoaga i Ketesemane, sa ia aʻoaʻia mamafa se soʻo o lē na alu atu e puipuia o ia i se pelu, ma mulimuli ane, na ia taʻu ia Ponotio Pilato: “E le mai le lalolagi nei loʻu malo; afai ana mai le lalolagi nei loʻu malo, po ua tau aʻu auauna, ina neʻi tuuina atu aʻu ia Iutaia; a o lenei, e le mai iinei loʻu malo.”—Ioane 18:36; Mataio 26:52; Luka 22:50, 51.

22. O le ā se faaaʻoaʻoga lelei na faataatia e nisi Molimau i Aferika ina ua latou pagatia i sauaga ogoogo?

²² I le manatua o le faaaʻoaʻoga a Iesu, sa iai i na Molimau i Aferika le lototele e mulimuli ai i le fautuaga a Paulo: “Aua le taui atu le leaga i le leaga i se tasi; ia sauniuni mea e tusa i luma o tagata uma lava. Afai e mafaia ia te outou, ia outou nofo lelei ma tagata uma lava. Le au pele e, aua le taui atu ma sui, a ia outou tuu atu i le toasa; auā ua tusia, Ua faapea mai le Alii [o Ieova], O ia te au le taui ma sui, ou te taui atu.” (Roma 12:17-19; faatusatusa Eperu 10:32-34.) Maeu se faaaʻoaʻoga e faagaeetia ai a o tatou uso Aferika uma lava mo i tatou i aso nei! E tusa lava pe musu le faipule e gaoioi i se tulaga mamalu, ae lē tuulafoaia ai lava e Kerisiano moni mataupu silisili faale-Tusi Paia.

23. O ā fesili o loo tumau pea ona talanoaina?

²³ O le ā la, e mafai e faipule silisili ona faatalitalia mai Kerisiano? Ma pe iai ni tapulaa i manaoga latou te faia ma le tonu? O nei mea o le a talanoaina i le isi mataupu o sosoo mai.

[Faaopoopoga i lalo]

E Mafai ona E Faamatala?

□ O ā nisi o auala e mafai ai e se tagata ona ‘tu e tetee atu’ i faipule silisili?

□ O le ā “le sauniga [faatulagaga] a le Atua” e tusa ai o pulega faalemalo?

□ I le ā le auala o “se faamatau” ai faipule?

□ Ua faapefea ona galulue pulega faaletagata e avea o “auauna a le Atua”?

[Fesili mo le Suʻesuʻega]

[Pusa i le itulau 19]

O se Tusi mai i se Taʻitaʻi Leoleo

O SE TUSI o loo iai le faaulutala “Auaunaga Lautele mo le Setete o Minas Gerais” na oo mai i le ofisa o le lala o le Sosaiete o le Olo Matamata i Pasili. O le tusi sa aumai mai i le taʻitaʻi leoleo o le aai o Conquista. Pe sa iai se mea na sese? Seʻi tuu atu i le tusi e faamatala. Ua ia taʻua faapea:

“Susuga e:

“O se fiafiaga le faailoa atu o aʻu ia te outou e ala i lenei tusi. Sa avea aʻu o se taʻitaʻi leoleo i le aai o Conquista, i Misas Cerais, mo le pe ā ma le tolu tausaga. I le galuega, ou te taumafai ai pea ia matuā faaeteete, ae e masani lava ona iai oʻu faafitauli i le tausia o le filemu i le falepuipui. O pagota, e ui lava ina tuuina atu i ai ni toleniga i ni galuega patino, ae sa lē toʻafilemu.

“I ni masina ua mavae, na sau ai le Susuga a O—i lo matou aai ma faailoa mai o ia o se tasi o Molimau a Ieova. Sa amata ona ia talaʻi le Tusi Paia i nisi o pagota, aʻoaʻo i latou ina ia faitau ma tusitusi ma faaali ia i latou faavae autū o le soifua malōlōina ma tomai lautele faapea foi ma le taʻuina atu ia i latou e uiga i le Tusi Paia. O le auala sa galue ai lenei tagata talaʻi na faaalia ai le tuutoina, alofa, ma le faataulagaina totino. Sa leʻi pine lava ae matilatila le matauina o le suia o amioga a pagota mo le sili atu ona lelei, o se mea na matuā ofo ai ma talisapaia e i latou na matauina.

“I le vaai atu i le mea na tupu i lo matou falepuipui, ua ou manao ai e faailoa aloaia atu i le Sosaiete o le Tusi Paia ma Savali o le Olo Matamata lo matou talisapaia o le galuega lelei na faia i lo matou atunuu e le tagata talaʻi taʻuaogāina.”

E tusa ai ma faipule faalemalo, na faapea mai le aposetolo o Paulo: “Ia e amio lelei, ona taʻuleleia mai lea o oe e ia.” (Roma 13:3) E mautinoa lava le moni o lenei mea e tusa ai o le mea na tupu o loo i luga. Maeu se faamaoniga o le mana e faaliliuina ai o le Afioga a le Atua lena ua mafai e le tala lelei ona faataunuuina i ni nai masina, o le mea sa lē mafaia e se faiga faafaasalaga ona faia i ni tausaga!—Salamo 19:7-9.