O Lē Fea Atua E te Tapuaia?

I LE lalolagi atoa, e tele auala eseese o le a tali mai ai e tagata lenei fesili. Sa matauina e le aposetolo o Paulo: “Ua i ai atua e toatele, ma alii e toatele,” ma e faitau miliona atua ua tapuaia i aso nei. (1 Korinito 8:5) Ae peitai, pe e te iloa faapea e toatele tagata e tapuai i se atua e ese mai lo le atua lea o loo latou manatu o loo tapuai i ai? Ma sa e iloa e toatele tagata e lē talitonu i le iai o se atua e sili atu ona malolosi o latou talitonuga na i lo i latou o ē talitonu i se atua? I le ā le auala?

Ia, o le tasi uiga o le tapuai, “o le manatu i ai ma le matuā sili atu ona faaaloalo, e mamalu, po o le tuutoina.” I uluai gagana na lomia ai le Tusi Paia, o upu mo le tapuaiga o lona uiga o le auaunaga po o le ifo i luma o se tasi. Faatasi ai ma le mafaufau i lenei mea, seʻi o tatou vaai pe ua mafai faapefea ona sese manatu o tagata e faatatau i le po o ai ma po o le ā le mea o loo latou tapuai moni i ai.

Tapuaiga Palu Faatasi

Seʻi manatu mo se faaaʻoaʻoga i tagata Samaria anamua. O le toatele o nei tagata sa amata mai o ni tagata ese na avatu i Palesitina e tagata Asuria e sui ai ituaiga e sefulu i matu o Isaraelu ia na faatāfea. I le taimi muamua, sa latou mulimuli atu i atua faapaupau, ae i le taimi nei, ua latou faia se taumafaiga e aʻoaʻo ai e uiga ia Ieova, le Atua o Isaraelu. Pe sa latou lafoaia ai la a latou lotu muamua? E leai. Ua lipoti mai e le Tusi Paia: “Ua latou faia lava faapei o a latou tu tuai. O lea na matatau ai ia nuu ia Ieova, a e auauna foi i a latou tupua ua ta.” (2 Tupu 17:40, 41) O lea, a o faapea mai tagata Samaria o loo latou auauna ia Ieova, ae i le taimi lava e tasi sa auauna pea i o  latou atua anamua, ma faapea ona faia ai se ituaiga o lotu ua palu faatasi.

Sa tupu se mea faapena ina ua uluai aumaia e misionare le lotu Katoliko Roma i Amerika i Saute. Sa latou faaliliuina le toatele o tagata, ae i le pei o tagata Samaria anamua, sa leʻi galo lava i tagata o latou atua muamua. I lea, i Pasili, o loo faia ai pea e “Kerisiano,” faiga faaagaga, e pei o le faamanatuina o le faamamaluina o atua anamua, e pei o le atua fafine o Iemanjá. E iai foi mea faapena o loo faia i isi nuu o Amerika i Saute.

E lē gata i lea, o le lotu na uluai avatua e na misionare i Amerika i Saute, sa avea o se lotu ua palu faatasi. O le tele o ana aʻoaʻoga, e pei o le Tolutasi, afi i hele, ma le lē mafai ona oti o le solu, sa aumaia mai lotu ma filosofia faapaupau anamua. E mautinoa lava sa lē maua na mea i le Tusi Paia. Faapena foi i ana faigaʻai—e aofia ai le Kirisimasi ma le Eseta—sa iai ni amataga e lē faa-Kerisiano. * Pe o se mea tatau ona faamanatu na faigaʻai faapaupau ma talitonu i na aʻoaʻoga e lē faa-Kerisiano ma tumau pea ona tapuai i le Atua o le Tusi Paia, o lē na fetalai: “Aua neʻi e fai mo oe ni atua ese i oʻu luma”? (Esoto 20:3) E mautinoa lava e leai!

‘Ia Leoleo Outou ia te Outou i Tupua’

Seʻi manatu i se isi auala ua faaseseina ai tagata i le mataupu tau tapuaiga. Na tusi le aposetolo o Ioane: “Le fanau e, ia leoleo outou ia te outou ia taumamao i tupua.” (1 Ioane 5:21) E tusa ma le afe miliona tagata ua taʻua o loo auai atu i Kerisinetoma, ma o nei tagata atonu o loo latou faapea mai e tapuai i le Atua lava lea sa tapuai i ai Ioane. Peitai e faitau selau miliona i latou o loo ifo i faatusa o “tagata paia,” faatusa o Iesu, ma faatusa o le taupou o Maria.

O loo iai foi isi ituaiga o ifoga i tupua e lē o tuusaʻo i ni faatusa. I le tausaga e 44 T.A., na lauga atu ai le Tupu o Herota Akeripa, ma sa oo ina matuā fiafia tagata, o lea na latou alalaga ai: “O le siufofoga o se atua, a e le se leo o se tagata.” (Galuega 12:21, 22) Ioe, na latou faia Herota ma tupua, i le faia o ia ma atua. E faapena foi mea o loo tutupu i aso nei. I aso a o pulea e faiga faa-Nasi Europa, o le alaga “Heil Hitler” sa avea o se alaga moni o le naunautai. O le toatele sa latou loto malilie e tau ma maliliu mo le Führer e peiseaī o ia o se atua, le faaola o le atunuu. Peitai o le toatele o i latou sa tuuina atu lena faamamaluga, o sui o lotu i Kerisinetoma!

A o leʻi iai ma ina ua mavae Hitila, sa faapena foi ona siitia e isi taʻitaʻi faapolotiki i latou lava, e faafoliga o ni faaola, ma tapā le tuutoina atoatoa atu o tagata. O i latou na lolo atu, sa latou faia nei tagata pei ni atua, e tusa lava po o le ā le lotu tumau sa auai atu i ai ia “tagata tapuai” pe tusa lava foi pe sa latou faapea mai e lē talitonu i le iai o se atua. O le mamalu o loo maua e tagata lauiloa i taaloga, tagata autū i ata tifaga, ma isi tagata faafiafia, mai tagata o loo fiafia ia i latou, o se tasi foi lea ituaiga o tapuaiga.

Tapuai i Tupe

Seʻi mafaufau atili i uiga loloto o upu a Iesu ina ua ia fetalai: “E leai se na te mafaia ona auauna i alii e toalua; auā e ʻinoʻino o ia i le tasi, a e alofa atu i le tasi; a le o lea, e faapipii atu ia i le tasi, a e faaleaoga i le tasi. Tou te le mafaia ona auauna i le Atua atoa ma [Oa].” (Mataio 6:24) Pe e te iloa se tasi e auai atu i se lotu, ae o lona faanaunauga sili i le olaga o le sailia o tupe? O ai moni la o loo auauna i ai lea tagata, o le Atua po o oa? E te iloa ea e toafia ni tagata lē talitonu ua matuā aafia i le tuliloaina po o le matuā sailia o tupe? E mautinoa lava, o i latou foi o ni tagata tapuai i tupe, atonu e sili atu ona maelega na i lo o le toatele o tagata talitonu.

Na faamatala e le aposetolo o Paulo se mataupu silisili faapena ina ua ia tusi: “O lenei, ia outou fasiotia o outou itu tino o i le lalolagi, o le faitaaga, o le amio leaga, o le faamatāitu, o le tuʻinanau leaga, ma le matapeapea, (o le ifo i tupua lava lea).” (Kolose  3:5) Afai tatou te matuā matapeapea i se mea ua faaalu uma ai a tatou taumafaiga ina ia maua, atonu pe oo lava ina solia ai le tulafono, ia i tatou la, o lena mea o se tupua, o se atua. (Efeso 5:5) I se tasi tusi, na tusi ai Paulo e uiga i nisi tagata fai mea sese: “O le manava, o lo latou atua lea.” (Filipi 3:19) Afai o a tatou fuafuaga atoa i le olaga o le faamalieina o i tatou lava, faatumuina o tatou manava e pei ona iai, o lona uiga o i tatou o lo tatou lava atua. Pe o e iloa e toafia o loo tapuai i lenei ituaiga o atua?

Ioe, e pei ona tusi le aposetolo o Paulo: “Ua i ai atua e toatele, ma alii e toatele.” Ma i le tele o itu, o o latou tagata tapuai e pei o tagata Samaria anamua, e auauna i le tasi atua i a latou upu ma le isi atua e ala i a latou gaoioiga. Peitai ane, o le mea moni, e na o le toatasi lava le Atua o lē ua ono ma tatau ona tatou tapuai i ai. E te iloa o ai o ia? E lē gata i lea, e tasi foi le mea o loo ona autasia le tapuaiga i isi atua uma lava e ese mai ia te ia. O le ā lena mea? O le a seʻi o tatou iloa i le mataupu o loo sosoo mai ai.

[Faaopoopoga i lalo]