O Lē Fea Atua e Ao ona E Tapuaia?

MUAMUA lava, o ai le Atua e toatasi faapea e na o ia e ao ona tapuaia? Ua tali mai le Tusi Paia i se tali tuusaʻo. I le tusi o Faaaliga ua faalauiloa mai ai: “Le Alii e [o Ieova], e tatau lava oe ina ia tuu atu ia te oe le viiga, ma le faaneeneega, ma le mana; auā na e faia mea uma lava, ona o lou finagalo foi e i ai i latou ma ua faia.” (Faaaliga 4:11) Ioe, o Ieova, Lē na Foafoaina mea, ua na o lea le Atua e ono ma tatau i ai la tatou tapuaiga. Aiseā? O le a seʻi o tatou toe foi atu i lena fesili i sina taimi puupuu. Ae muamua, seʻi o tatou talanoa e uiga i isi atua o loo tapuaia e le fanau a tagata.

O Lē o loo i Tua o Atua Sese Uma

E ui lava o loo auauna tagata i atua e toatele, ae o le upu moni, o tapuaiga uma lava o loo tuuina atu i atua uma i atunuu uma—e ese mai le tapuaiga o loo tuuina atu ia Ieova, Lē na foafoaina mea—ua faatatau i ai le na o le atua e toatasi. I le ā le auala? Faitau upu a le aposetolo o Paulo i Kerisiano i Korinito. E toatele atua na tapuaia i lena aai, mai ia Aphrodite e faia amioga lē mamā e oo atu ia Aesculapius, lo latou atua o faamalōlōga. Ae peitai, sa faaalia e Paulo faapea e na o le tasi moni lava le mana leaga o loo i tua o na atua. Na ia tusi: “O mea ua fāsia e nuu ese, ua fāsia e i latou mo temoni, a e le o le Atua.” (1 Korinito 10:20) Ioe, sa tapuai tagata faapaupau o Korinito i temoni.

Ona o le iʻuga o le fouvalega, na amata ai ona iai temoni. O le uluai temoni ma o le aupito sili o i latou sa avea o se meafaiola agelu na ia faasese Eva i le solia o le tulafono a le Atua i tuā i le faatoaga o Etena. (Kenese 3:1-6; Ioane 8:44) I lona faia faapea, na fouvale ai lenei meafaiola faasaga i le pule silisili ese a Lē na Foafoaina mea. Mulimuli ane, sa oo ai ina taʻua o ia o Satani, o lona uiga o “Lē Tetee.” Mulimuli ane, ona aufaatasi atu lea o isi meafaiola agaga i lana fouvalega. Sa oo foi ina avea i latou ma temoni, ma ua faailoa ai Satani o “le alii o temoni.” (Mataio 12:24, 26) I le tusi o Faaaliga, ua taʻua ai nei temoni o “agelu” a Satani. (Faaaliga 12:7) O lea o le tapuaiga i temoni e tusa pau lava ma le tapuai ia Satani.

E matuā tele lava taaʻiga a Satani. Na faapea mai le aposetolo o Ioane, o “le lalolagi uma” o loo i lalo o lana pule, ma na taʻua ai o  ia e Paulo o “le atua o le lalolagi nei.” (1 Ioane 5:19; 2 Korinito 4:4) O le mea lea, o le tapuai atu i so o se isi lava atua e ese mai ia Ieova, o le mea moni, ua tapuai ia Satani. E tusa lava pe latou te lē o tapuai atoatoa atu ia te ia i nisi o auala, ae o loo auauna lava mo fuafuaga a Satani auā o lona sini o le faaseseina o le fanau a Atamu ma Eva ina ia fouvale faasaga ia Ieova. Talu ai ona o Satani o loo “faasese i le lalolagi uma,” e manino lava la ua manuia o ia i le faaseseina o le toatele o tagata. (Faaaliga 12:9) Ae e lē na o le pau lena. O loo iai pea le isi faitau miliona o ē o loo tauivi ina ia tapuai ia Ieova. Aiseā?

Fua o Tapuaiga Sese

Mo le tasi o mea, ua latou iloa faapea o le tapuaiga i atua e ese ai na i lo Ieova, e sili atu lona tau na i lo le mea o latou mananao e totogi atu. O ni eliga a tagata suesue o le eleele i le aai anamua o Carthage i Aferika i Matu, na maua ai se fanua tanu o tamaiti. I totonu o lea fanua tanu sa iai auivi o tamaiti laiti o ē na osia ai taulaga ia Paala, le atua o tagata Foinie. O le faia o taulaga i tamaiti, sa avea o se tau mataʻutia sa totogia e tagata Carthage mo le tapuaiga ia Paala. Mai lona lima e oo atu i lona sefulu lima o senituri, sa totogia ai foi e tagata Katoliko se tau i lona faapogaia o tulaga matuā puapuagatia e lē mafaatusaina i Taua faalotu faamasaatoto mo Eleele Paia ma Suesuega sauā faalotu. O le tapuaiga i le atua o Inca a tagata Amerika a o leʻi oo atu i ai Kolomepia, sa aafia ai le fasiotia o le faitau afe o tagata ona o faiga faalotu.

I aso nei, o loo aafia ai foi ituaiga eseese o tapuaiga i le fasiotia o se vaega tele o tagata i Initia, ma ua latou saosaolaumea ai i le aumaia o faafitauli matuiā faapolotiki i Sasae Tutotonu ma Aialani i Matu. O le laitiiti o le malamalama, o faiga faataulāitu, ma le mataʻu, e tatau ona lisiina foi faapea o se vaega o le tau e totogia e le tagata ona o le tele o ona atua e tapuai i ai.

Aiseā e Ao ai ona E Tapuai ia Ieova le Atua?

I le isi itu, o le tapuai ia Ieova e aumaia ai na o aogā po o manuia. O se tasi o mafuaaga, ona o ia o “Le o soifua e faavavau faavavau lava, o le na faia le lagi ma mea o i ai, ma le fanua ma mea o i ai, ma le sami ma mea o i ai.” (Faaaliga 10:6) I lea, e tatau ai ona tatou tapuai ia te ia, auā o ia o Lē na Foafoaina i tatou.

E lē gata i lea, e ao ona tatou tapuai ia Ieova le Atua auā ona o ona uiga, ua tatou mananao ai e tapuai ia te ia. Na faapea mai le aposetolo o Ioane “o le Atua, o le alofa lava ia.” (1 Ioane 4:8) Na faapea mai le tagata faamaoni o Iopu “e poto lona finagalo [le Atua], e malosi foi lona mana.” (Iopu 9:4) Na pese Mose e uiga ia te ia: “O le Papa, e sao lava lana galuega; auā e tonu ona ala uma lava; o le Atua faamaoni, e le o ia te ia se amioletonu, o le amiotonu ma le amio saʻo lava ia.” (Teuteronome 32:4) O ai sē o le a faatalatu e auauna i se Atua faapea?

I le faaopoopo atu i ai, ua faapea mai le Tusi Paia: “O le [tuutoina i le Atua] e aoga lea i mea uma lava, o loo i ai le mea ua folafolaina mai i la le olaga nei atoa ma lē atali.” (1 Timoteo 4:8) Maeu le moni o lenei mea! E finagalo Ieova i le mea lelei mo le fanau a tagata. Na ia saunia le lalolagi e avea o se aiga matagofie mo lana foafoaga, ma sa ia faia le anoanoai o sauniuniga ina ia mafai ai ona olioli i le ola. E ui lava i le fouvale o le tagata, ae ua faaauau pea e le Atua ona aumaia le ola i luga o lenei lalolagi, i le aumaia o mea uma lava e manaomia e le fanau a tagata a o ia “faaoso i lona la i e ua amio leaga atoa ma e ua amio lelei; ua ia faatotō ifo foi le ua i e ua amiotonu, atoa ma e ua amioletonu.”—Mataio 5:45.

Ae o le “mea ua folafolaina mai i la le olaga nei” e sili atu na i lo  lena. O le auauna i le Atua e maua ai le lotomalie ma le fiafia i le faataunuuina o se mea. O le mea lena na fuafuaina ai i tatou ina ia faia. Ma e fesoasoani le Atua ia i latou o ē auauna ia te ia ma le faamaoni ina ia manuia o latou olaga. E ala i le Tusi Paia, ua ia aumaia ai taʻiala i tagata nofofua, ulugalii faaipoipo, fanau—tagata i tulaga uma lava o le olaga. Ua ia tuuina mai le atamai maufaatuatuaina ma e aogā e fesoasoani ai i tulaga uma lava ina ia mafai e i tatou ona foia faafitauli o le ola i le avea o ni tagata lē lelei atoatoa i se lalolagi o loo i lalo o taaʻiga a Satani. Afai tatou te tapuai i le Atua i se auala e faafiafia ai o ia, e mafai ona tatou olioli ai i “le manuia foi mai le Atua, o loo silisili lava i mea uma e manatu i ai.”—Filipi 4:7.

E lelei foi ona matauina le “mea ua folafolaina mai . . . atoa ma lē atali.” Na taʻu atu e Iesu i le Faresaio o Nikotemo: “Ua faapea lava ona alofa mai o le Atua i le lalolagi, ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola e faavavau.” (Ioane 3:16) Ola e faavavau! O ai se isi atua e ese ai mai ia Ieova e mafai ona folafolaina mai sea mea ma faataunuuina lana folafolaga? O le iʻuga mulimuli o i latou o ē e maua lena meaalofa ofoofogia o loo faamatalaina i le Faaaliga: “E sōloiesea foi e le Atua loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga; auā ua mavae atu mea muamua.” (Faaaliga 21:4, 5) E moni, o faamoemoega e uiga i le ola o le a oo mai e ao ona faia ai i tatou ia mananao e auauna ia Ieova!

O lē fea la le Atua e ao ona tatou tapuai i ai? E na o Ieova lava, Lē na Foafoaina mea. Mai atua uma lava, e na o ia ua faatatauina i ai nei upu: “Le Alii e [o Ieova], le Atua e ou le malosi uma lava, ua tetele au galuega e ofo ai; e tonu ma faamaoni ou ala, le Tupu o le [faavavau] e. Le Alii e [o Ieova], o ai se le mataʻu ia te oe, ma vivii atu i lou suafa? auā ua na o oe e lelei; auā e o mai nuu uma lava, ma latou ifo i ou luma; auā ua faaalia au faamasinoga tonu.” (Faaaliga 15:3, 4) Maeu le atamai o i latou o ē tali atu i le apoapoaiga a le faisalamo: “O mai ia, ia tatou ifo, ma ia tatou punonou; ia tatou tootuli i luma o Ieova o le na faia i tatou”!—Salamo 95:6.

[Ata i le itulau 6]

O nisi o atua ua faaseseina ai e Satani le fanau a tagata ia tapuai i ai

[Ata i le itulau 7]

O faamoemoega o le ola o loo sau e ao ona faia ai i tatou ia mananao e auauna ia Ieova