Ia Savavali Pea i le Malamalama ma le Alofa

Mea Tāua mai le Ioane Muamua

O IEOVA o le Puna o le malamalama ma le alofa. E tatau ona tatou taulaʻi atu i le Atua mo le malamalama faaleagaga. (Salamo 43:3) Ma o le alofa e aofia ai i fua o lona agaga paia.—Kalatia 5:22, 23.

O le malamalama, alofa, ma isi mataupu ua talanoaina i le uluai tusi faagaeeina a le aposetolo o Ioane, lea e foliga mai na tusia i Efeso po o le latalata atu foi i Efeso pe tusa o le 98 T.A. O se pogai autū mo le tusiaina o lea tusi ina ia leoleomaluina ai Kerisiano mai le aposetasi ma fesoasoani ia i latou ia faaauau pea ona savavali i le malamalama. Talu ai lo tatou fesagaʻi ma luʻi o lo tatou alofa, faatuatua, ma le faamaoni i le upu moni, o le talanoaina la o lenei tusi e mautinoa lava o le a aogā mo i tatou.

‘Ia Savavali i le Malamalama’

Sa faamanino mai e Ioane faapea e tatau i Kerisiano faamaoni ona savavali i le malamalama faaleagaga. (1 Ioane 1:1–2:29) Na faapea mai o ia: “O le malamalama lava le Atua, a e leai lava se pouliuli [leai se leaga, lē mamā, lē moni, po o le lē paia] o ia te ia.” Ona o le ‘savavali i le malamalama’ o Kerisiano fanauagagaina, ua latou “mafuta” ai ma le Atua, Keriso, ma le tasi i le isi. Ua faamamāina foi i latou mai agasala e ala i le toto o Iesu.

E tusa lava pe o i tatou o ni Kerisiano faauuina e iai se faamoemoe faalelagi pe o tatou vaavaai atu i luma i le ola e faavavau i le lalolagi, o le a faaauau pea ona tatou maua aogā mai i le na o le taulaga lava a Iesu pe afai tatou te alolofa i o tatou uso ae lē o le lalolagi. E tatau foi ona ʻalofia taaʻiga mai aposetate, e pei o le “anetikeriso,” o lē ua teena uma le Tamā ma le Alo. Ma aua lava neʻi galo ia i tatou faapea o le ola e faavavau o le a olioli ai na o i latou o ē pipii mau atu i le upu moni ma faia le amiotonu.

Faaalia e Fanau a le Atua le Alofa

Na sosoo ai ma le faailoa mai e Ioane o le fanau a le Atua. (3:1–4:21) Mo le mea e tasi, latou te faia le mea e tonu. Latou te usiusitai foi i le poloaiga a Ieova le Atua faapea ia ‘latou faatuatua i le suafa o lona Alo, o Iesu Keriso, ma ia latou fealofani.’

O sē ua ‘iloa le Atua’ na te iloaina fuafuaga a Ieova ma le auala o faaalia ai Lona alofa. O lenei mea e ao ona fesoasoani i le tagata e faaalia le alofa. O le mea moni, “o se le alofa ua le iloa e ia le Atua; auā o le Atua, o le alofa lava ia.” Na faaalia mai le alofa ina ua “auina mai foi [e le Atua] lona Alo o le togiola mo a tatou agasala.” Afai e faapena ona tele o le alofa o Ieova ia i tatou, ua ia i tatou la se avega tauave ina ia tatou fealofani ai. Ioe so o se tasi e faapea mai e alofa i le Atua e tatau foi ona alofa i lona uso faaleagaga.

O le Faatuatua ua ‘Manumalo i le Lalolagi’

O le alofa ua uunaia ai le fanau a le Atua e usiusitai i ana poloaiga, ae o le faatuatua latou te ‘manumalo ai i le lalolagi.’ (5:1-21) O lo tatou faatuatua, lana Afioga, ma lona Alo ua mafai ai e i tatou ona ‘manumalo i le lalolagi’ e ala i le teena o ona mafaufauga ma auala sese ma e ala i le tausia pea o poloaiga a Ieova. Ua tuuina atu e le Atua i ‘ē manumalo i le lalolagi’ le faamoemoe o le ola e faavavau ma faafofogaina a latou tatalo e ōgatasi ma lona finagalo. Talu ai e so o se tasi e ‘fanau mai le Atua’ na te lē faia le agasala, e lē uumauina ai la e Satani lena tagata. Ae o ē faauuina uma ma auauna a Ieova e iai le faamoemoe faalelalolagi e ao ona manatua faapea ‘o le lalolagi uma o loo nofo toilalo i le pulega a lē o leaga.’

[Pusa/Ata i le itulau 21]

Se Taulaga Togiola: O Iesu “o le togiola foi o ia mo a tatou agasala [i latou o ona soʻo faauuina], e le gata foi i a tatou, a e atoa foi ma agasala a le lalolagi uma,” le vaega o totoe o le fanau a tagata. (1 Ioane 2:2) O lona maliu sa o le “finagalo malie” (Eleni, hi·la·smosʹ, o loo faaalia ai se “auala o le faia o se leleiga,” o se “togisala”) ae lē i se uiga o le faamālūina o ni faalogona tiga i le vaega a le Atua. Na i lo lea, o le taulaga a Iesu ua na faaleleia, pe faamalieina, manaoga o le faamasinoga tonu tauatua. Faapefea? E ala i le saunia o le faavae amiotonu ma le faamasinotonu mo le faamagaloina ai o agasala, ina ia “iloa ai o ia [le Atua] o lē amiotonu, ma ua taʻuamiotonuina e ia le [fanau agasala a tagata] ua faatuatua ia Iesu.” (Roma 3:23-26; 5:12) E ala i le saunia o le auala e faaiʻuina atoatoa ai le agasala a le tagata, na faaleleia ai, pe na mafai ai ona o le taulaga a Iesu ona faia le tagata ina ia saili ma maua le toe faafoisia i faiā saʻo ma Ieova. (Efeso 1:7; Eperu 2:17) Maeu le loto faafetai e ao ona ia i tatou uma mo lenei mea!