Auauna ia Ieova ma le Olioli

“Ia outou auauna atu ia Ieova ma le fiafia; o mai ia outou i ona luma ma le alaga [olioli].”—SALAMO 100:2.

1, 2. (a) Na faapefea ona aumaia i lumāmea i Perelini i Siamani faiga faailogalanu, ae na manuia faapefea le taumafaiga mo le “Pulega i le Afe Tausaga”? (e) O le ā le eseesega ma le 1936 sa matauina i le Malae Taalo i Olimepeka ia Iulai 1990, ma o le ā sa taula ai le olioli o le vaega faavaomalo sa tauaofia ai i inā?

O LE vaaiga, o le Olympia Stadium [Malae Taaalo o le Olimepeka] i Perelini. I le limasefulufa tausaga muamua atu, sa avea ai lenei malae taalo matagofie o se ogatotonu o fefinauaiga ina ua lipotia mai le lē amanaia e le pule tautalatasi a Nasi o Adolf Hitler se tagata taalo uliuli o Amerika o lē na manumalo i le tuuga tamoe i pine auro e fa. O le mea moni o se ta, i faiga faailogalanu a Hitila faapea “e silisili lava ituaiga o tagata papae e eena o latou lauulu ma mata lanumoana”! * Ae i  le taimi nei, ia Iulai 26, 1990, ua avea tagata uli, papae, samasama—mai vaega faavaomalo e 64 o tagata e 44,532 mai nei atunuu uma o se nuu e tasi—ua tauaofia uma i inei mo le Tauaofiaga Itumalo a Molimau a Ieova o le “Gagana Mamā.” Maeu le olioli na taumasuasua i lena afiafi o le Aso Tofi! I le mulimuli mai ai i le lauga o le papatisoga, e 1,018 sui auai na alalaga mai, “Ja!” ma toe faapea mai foi, “Ja!” i le faamautinoaina o lo latou tuuina atu ia Ieova le Atua, e faia lona finagalo.

² Na faaalu e nei Molimau fou 19 minute e laina atu ai i fafo o le malae taalo e ō atu i le vaitaele e faia ai le papatisoga. Ma i nei minute uma lava, sa lagonaina i lena malae taalo tele le leo o le pati fiafia. E leʻi faapena ona tofo i ai i latou na manumalo i Taaloga a le Olimepeka i se pati matuā leotele e pei o lea ua faafeiloaia fiafia ai lenei faitau selau, mai vaega faavaomalo e tele, o ē o loo faaalia le faatuatua ua manumalo i le lalolagi. (1 Ioane 5:3, 4) O lo latou olioli o loo mausalī ona taula i le mautinoa faapea o le a aumaia lava e le Malo o le Atua o loo pulea e Keriso se afe tausaga o faamanuiaga mamalu i le fanau a tagata.—Eperu 6:17, 18; Faaaliga 20:6; 21:4, 5.

3. O le ā le upu moni ua faamamafaina e ala i le mautinoa o le au usufono, ma na faapefea?

³ E leai ni faiga faailogalanu po o se feitagai faavaomalo i inei, auā o tagata uma lava o loo tautala i le gagana mamā o le Afioga a le Atua, i lea ua faamamafaina ai le moni o upu a Peteru: “E moni, ua ou iloa e le faailogaina tagata e le Atua; a e peitai o le mataʻu ia te ia i nuu uma lava, ma fai le amiotonu ua talia i latou e ia.”—Galuega 10:34, 35; Sefanaia 3:9.

4. I lalo o ā tulaga na oo ai ina avea le toatele o le au usufono ma tagata talitonu, ma ua faapefea ona taliina a latou tatalo?

⁴ O se vaega tele o lenei au usufono i Perelini ua avea ma tagata talitonu talu mai tausaga e tele o mafatiaga, e aofia ai le vaitaimi o pulega faa-Nasi mai i le (1933-1945) ma le vaitaimi o pulega a se vaega o tagata e toatele (Socialistic) lea na mulimuli mai i Siamani i Sasae, o inā na seʻi faatoʻā aveesea ai faaletulafono ia Mati 14, 1990 le faasa sa tuuina atu i Molimau a Ieova. I lea, o le toatele o i latou ua “talia le upu i le puapuaga tele, ma le olioli mai le Agaga Paia.” (1 Tesalonia 1:6) Ua latou maua nei se saolotoga sili e auauna ai ia Ieova, ma ua leai se tuaoi o lo latou olioli.—Faatusatusa Isaia 51:11.

Pogai mo le Olioli

5. Na faapefea ona faamanatuina e Isaraelu le laveaiga a Ieova i le Sami Ulaula?

⁵ O le tatalaina o o tatou uso i Europa i Sasae, ma i ni vaega o Aferika ma Asia lata mai nei, ua faamanatu mai ai ia i tatou laveaiga na faia e Ieova i taimi ua mavae. Ua tatou manatua ai galuega mamana a Ieova i le Sami Ulaula, ma le faapefea i le pese o le faafetai a Isaraelu ona ausia lona malosi i upu: “Ieova e, o ai ea se ua tusa ma oe i le vao atua? O ai se ua tusa ma oe, o lē silisili ona paia, o lē matautia i viiga, o lē fai vavega?” (Esoto 15:11) I aso nei, pe lē faaauau pea ea ona tatou olioli i mea ofoofogia o loo faia e Ieova mo ona tagata? E mautinoa lava lo tatou faia faapea!

6. O le ā e mafai ona tatou aʻoaʻoina mai le alaga olioli a Isaraelu i le 537 T.L.M.?

⁶ Sa taumasuasua le olioli i le 537 T.L.M. ina ua toe faafoisia Isaraelu i lona laueleele i le mavae o le faaaunuuaina i Papelonia. Ona mafai ai lea e le nuu o Ieova ona faalauiloa atu, e pei ona valoia e Isaia: “Faauta, o le Atua, o loʻu faaolataga ia; ou te faatuatua, ou te le fefe; auā o Ioa, Ieova, o loʻu malosi ia ma laʻu pese; ua avea foi o ia moʻu faaolataga.” Maeu le olioli! Ma o le a faapefea ona faaalia e le nuu lena olioli? Ua faaauau mai Isaia: “O lea aso foi tou te faapea atu ai, Ia outou vivii atu ia Ieova, ina valaau atu ia i lona suafa; ia outou faailoa atu i nuu o ana galuega; ia outou taʻutaʻu atu ua viia lona suafa. Pepese atu ia ia Ieova, auā ua faia e ia mea silisili ese.” Ua mafai nei ona latou “leo tele [atu] ma le fiafia” i le “faailoa atu . . . i le lalolagi uma,” o ana galuega mamana, e pei lava ona fai e auauna saoloto a Ieova i aso nei.—Isaia 12:1-6.

Olioli i le Galuega a Ieova

7. O ā laveaiga na manaomia ai se alaga fiafia manumalo i le 1919?

⁷ I aso nei na amata ai ona alalaga auauna a Ieova ona o le olioli ina ua ia tuuina atu ia  i latou se laveaiga ofoofogia i le 1919. Ia Mati 26 o le tausaga lava lena, na tatalaina mai ai sui o le Vaega Pule mai le falepuipui i le Iunaite Setete i le mea na taofiofia ai i latou mo le iva masina i lalo o tuuaʻiga sese faapea ua latou taumafai e foua le malo. Maeu se faamanatuga tele na faia e toe faafeiloaia ai i latou i le aiga Peteli i Brooklyn! E lē gata i lea, ua mafai nei e i latou uma o le vaega totoe faauuina ona olioli ina ua tatalaina faaleagaga mai Papelonia le Aai Tele, le faiga o mea faalotu lea ua solia ai e Satani le lalolagi uma.—Faaaliga 17:3-6; 18:2-5.

8. O le ā le lomiga sa faasaolotoina e ofo ai sa folafolaina atu i le Tauaofiaga i Cedar Point i le 1919, ma o le ā le valaau mo le faia o se gaoioiga na tuuina mai?

⁸ O atinaʻe faatalafaasolopito i le 1919 sa faapaleina e ala i le tauaofiaga a tagata o le Atua sa faia i Cedar Point, Ohio, i le Iunaite Setete, ia Setema 1-8. I le aso lona lima o lena tauaofiaga, le “Aso o Tagata Faigaluega Felagolagomai,” na faia ai e le peresitene o le Sosaiete o le Olo Matamata, o J. F. Rutherford, se lauga lea na faagaee ai le 6,000 tagata, o lona matua “Faalauiloa le Malo.” Ina ua uma ona talanoaina le Faaaliga 15:2 ma le Isaia 52:7, ona ia taʻu atu lea i lana au faalogologo faapea o le a lomia se mekasini fou, o le The Golden Age (lea ua iloa i aso nei o le Awake!), i le taʻilua vaiaso uma, ae maise mo le tufatufaina atu i le fanua. I le faaiʻuga na ia faapea mai ai: “O i latou ua tuuina atu atoatoa i le Alii; o i latou e lē fefefe, o ē e mamā o latou loto, o ē alolofa i le Atua ma le Alii o Iesu ma o latou mafaufau atoa, malosi, solu ma le tagata atoa, o le a olioli e fai sona sao i lenei galuega a o iai le avanoa. Ia ole atu i le Alii mo lana taʻitaʻiga ma lana faatonutonuga ina ia faia ai oe e ia o se amepasa moni, faamaoni, ma fai mea maeʻa. Ona e alu atu loa lea ma le pese olioli i lou loto, e auauna ia te ia.”

9, 10. Ua faapefea ona faaolaolaina e Ieova lomiga o mekasini o Le Olomatamata ma le Awake!?

⁹ O lena “pese olioli” ua lagonaina i le lalolagi atoa! O le toatele o la tatou aufaitau, e leai se masalosalo, ua saosaolaumea i le siitia o le faasalalauina atu faataamilo o le mekasini o le Awake! i le aofaiga ua iai nei e 12,980,000 kopi o lomiga taitasi i gagana e 64. I le avea o se mea faigaluega sili ona malosi i le taʻitaʻiina mai o tagata naunau i le upu moni, ua galue ai le Awake! e avea o se soa i Le Olomatamata. I se atunuu i Sasae, sa maofa ai se tuafafine paeonia e galue e lē aunoa i ana ala mekasini i le iloa faapea o taimi uma e alu ai e tiliva atu mekasini fou, e foai ane ai e lē ona le fale se meaalofa e tusa ma le $7 (U.S.) i le galuega a Molimau a Ieova i le lalolagi aoao—e mautinoa lava le faaalia ai o le talisapaia lelei mo le galuega o le Malo!

¹⁰ I le taimi nei i lona 112 tausaga talu ona lomia, ua tufaina atu ai i se tulaga faataamilo le mekasini o Le Olomatamata i kopi e 15,290,000 i gagana e 111, o le 59 o nei lomiga e faia faatasi i le taimi lava e tasi i le lalolagi aoao ma e tutusapau foi mataupu uma o iai. I le avea o se auauna tausimea faamaoni, o loo faaauau ai pea e le vaega totoe faauuina ona avatu i le au faitau loto talisapaia “le fua o a latou meaʻai [faaleagaga] i le taimi tatau.” (Luka 12:42, NW) I le tausaga e 1990, na lipotia mai ai e Molimau a Ieova le tuuina atu o tusiga fou e 2,968,309 i mekasini uma e lua, e tusa ma le 22.7-pasene le faatelega ua sili atu ai i lo le tausaga e 1989.

Ua Tele le Olioli

11. (a) O le ā le valaau na faalauteleina atu i tagata o le Atua i Cedar Point i le 1922? (e) Ua faapefea ona faalauteleina atu lenei valaau olioli?

¹¹ Sa tele foi le olioli a o tauaofia tagata o le Atua, ua oo atu nei lona faitau aofai i le 10,000 mo le tauaofiaga lona lua i Cedar Point, ia Setema 1922, faatasi ai ma le 361 na papatisoina. I lana lauga “Ua Latalata mai le Malo o le Lagi,” sa faavae mai i le Mataio 4:17, sa taʻitaʻiina atu ai e le Uso o Rutherford i se tumutumuga na faagaee ai le aofia: “E tatau ona iloa e le lalolagi faapea o Ieova o le Atua ma faapea o Iesu Keriso o le Tupu o tupu ma le Alii o alii. E sili lenei aso na i lo aso uma. Faauta, ua pule le Tupu! O outou o ona sui i le lautele. O le mea lea, ia faalauiloa, faalauiloa, faalauiloa, le Tupu ma lona Malo.”  O i latou na pa mai ai le alaga olioli lea na maoga aʻe i lena tauaofiaga ua faateleina lona fuainumera seia oo mai i le 1989 e sili atu i le 6,600,000 na faapotopoto faatasi i tauaofiaga e 1,210 a Molimau a Ieova i le lalolagi aoao, o inā na papatiso ai le 123,688.

12. (a) O le ā le olioli lē mafuafuaina o loo fai i ai sao o tagata o le Atua i aso nei? (e) E faapefea ona tatou faapaleniina la tatou auaunaga ia Ieova faatasi ma le usiusitai atu i “faipule silisili”?

¹² E faapelepele Molimau a Ieova i lo latou saolotoga. I lo mea uma lava, ua latou olioli i le faataunuuga faaonaponei o upu a Iesu: “E iloa foi e outou le mea moni, e tuu saʻoloto foi outou e le upu moni.” Maeu se olioli i le tuu saoloto mai i misiterio lilo ma faiga faaagaga a lotu sese! Maeu se olioli lē mafuafuaina i le iloa o Ieova ma lona Alo ma i le avea ma ni ē galulue faatasi ma i laua, faatasi ai ma le faamoemoe o le ola e faavavau! (Ioane 8:32; 17:3; 1 Korinito 3:9-11) E talisapaia foi e auauna a le Atua pe afai e faaalia e “faipule silisili,” o lenei lalolagi lea o loo latou nonofo ai i lalo o a latou pule, le faaaloalo i lo latou saolotoga e faalauiloa atu ai le faamoemoe mamalu o le Malo o Ieova i aao o Keriso. Latou te totogi atu ma le loto fiafia “mea a Kaisara ia Kaisara,” ae i le taimi lava e tasi e avatu ai “mea a le Atua . . . i le Atua.”—Roma 13:1-7; Luka 20:25.

13. Ua faapefea ona faailoa atu e Molimau a Ieova lo latou olioli ina ua tatalaina mai teteega?

¹³ Ae peitai, afai e taumafai pulega faaletagata e taofiofia lenei tiute tauave i le Atua, e tali atu Molimau a Ieova e pei ona sa faia e le au aposetolo: “E tusa ona sili o lo matou anaana i le Atua i lo matou anaana i tagata.” I lena mea, ina ua uma ona tatala e alii sili le au aposetolo, ona “ō lea o i latou . . . ua olioli.” Na faapefea ona latou faaalia lena olioli? “Ua le mapu foi i latou i aso uma ona aʻoaʻo atu, ma talaʻi atu i le malumalu, ma lea fale ma lea fale le tala lelei ia Iesu Keriso.” (Galuega 5:27-32, 41, 42) E faapena foi i Molimau a Ieova i aso nei ona olioli ina ua latou maua le saolotoga sili e tuliloa ai la latou faiva. I le tele o atunuu ua tatalaina ai e Ieova le auala, ua latou faaalia le matuā olioli e ala i le avatua o se molimau maeʻaeʻa i le suafa o Ieova ma le Malo o loo sau e ala ia Keriso Iesu.—Faatusatusa Galuega 20:20, 21, 24; 23:11; 28:16, 23.

Tumau ma le Olioli

14. Ua faapefea i lenei olioli o le fua o le agaga ona ausilia le mea ua faamatalaina e se lomifefiloi?

¹⁴ O le ā lenei olioli sili ua tofo i ai Kerisiano moni? O se olioli e matuā sili atu ona loloto ma e sili atu ona tumau na i lo le olioli e mavae o se tagata manumalo i Taaloga a le Olimepeka. O se fua o le agaga paia o le Atua, lea e avatu e le Atua ia i latou o “e anaana ia te ia.” (Galuega 5:32) Ua faamatalaina e le lomifefiloi a Webster le upu olioli faapea ‘e sili atu ona loloto le mauaa na i lo le upu fiafia, e sili atu ona pupula malosi pe sili atu foi ona faatinoina na i lo le faafiafiaina.’ I le Kerisiano, o le olioli e iai sona uiga e sili atu ona maotua. I le taulaina e lo tatou faatuatua, ua avea ai o se uiga matuā malosi, e faamalosia ai. “O le olioli ia Ieova o lo outou malosi lea.” (Neemia 8:10) O le olioli ia Ieova, lea o loo atiina aʻe e tagata o le Atua, e sili mamao atu na i lo le fiafia uigaese lea e maua e tagata mai faafiafiaga faaletino, faalelalolagi.—Kalatia 5:19-23.

15. (a) I le mea na oo i Kerisiano faamaoni, ua faapefea ona faaopoopo le onosai i le olioli? (e) Ia taʻu mai ni mau o loo aumaia ai se faamautinoaga e faamalosia ai e tusa ma le tausia pea o le olioli.

¹⁵ Seʻi manatu i o tatou uso i Ukraine. Ina ua faaaunuuaina e ‘faipule silisili’ le faitau afe o nei tagata e ō atu i Siberia i le amataga o le 1950 ma agaʻi mai ai, sa latou matuā puapuagatia i le tele o faigata. Mulimuli ane, ina ua tuuina atu e faipule ia i latou se faatagaga, sa latou loto faafetai, ae e lē o i latou uma na foi atu i lo latou nuu moni. Aiseā? O a latou galuega i le itu i Sasae na faamanatu atu ai ia i latou e uiga i le Iakopo 1:2-4: “Oʻu uso e, ia outou manatu, o le mea e olioli tele ai pe a maua outou i tofotofoga eseese; ina ua outou iloa o le tofotofoina o lo outou faatuatua e tupu ai le onosai.” Sa latou mananao ina ia saga tumau pea i lena seleselega olioli, ma maeu le olioli sa iai i tauaofiaga a Molimau a Ieova sa faia talu ai nei i Polani e talia ai Molimau mai mea mamao e oo atu lava i sasae mamao o atunuu i le talafātai o le Pasefika. Sa ō faatasi le tumau ma le olioli i le fuaina  mai o lenei fua. E moni, o i tatou uma lava o ē tumau ma le olioli i le auaunaga a Ieova ua mafai ona faapea atu: “A e peitai aʻu, ou te olioli lava ia Ieova, ou te fiafia lava i le Atua o loʻu faaolataga. O Ieova le Alii, o loʻu malosi ia.”—Sapakuka 3:18, 19; Mataio 5:11, 12.

16. E ao faapefea i faaaʻoaʻoga lelei a Iopu ma Ieremia ona faalototeleina ai i tatou i la tatou galuega i le fanua?

¹⁶ Ae faapefea la ona tatou tausisia lo tatou olioli pe a molimau atu i tagata tetee ua maaa? Ia manatua sa tausia e perofeta a le Atua se vaaiga olioli i tulaga faapena. Sa taʻua e Ieremia a o iai i lalo o tofotofoga: “Na maua au afioga, ona ou ʻai ai lea; sa ia te au lau afioga e fai ma mea e olioli ai ma fiafia ai loʻu loto auā ua taʻua aʻu i lou suafa, Ieova e, le Atua o ʻau.” (Ieremia 15:16) Maeu se faaeaga i le taʻua ai o le suafa o Ieova ma molimau atu ai i lena suafa! O a tatou suesuega totino ma le filiga ma le faia atoatoa o se sao i sauniga faa-Kerisiano ua atiina aʻe ai i tatou ia faaauau ona olioli i le upu moni. O lo tatou olioli o le a faaalia e ala i a tatou amioga i le fanua ma i la tatou ʻataʻata ona o le Malo. E oo lava i tofotofoga ogoogo, sa mafai ona faapea mai Iopu e uiga i ona mafatiaga: “A ou ʻataʻata ia te i latou, latou te lei taofi i ai; latou te lei faateaina foi oʻu mata fiafia.” (Iopu 29:24) I le pei o Iopu faamaoni, e lē manaomia ona tatou faanoanoa pe a tauemua i tatou e tagata tetee. Ia ʻataʻata pea! O lo tatou lagolagosua e mafai ona faaatagia ai lo tatou olioli ma i lea ua maua ai ni taliga e fia faalogo.

17. E mafai faapefea e le onosai ma le olioli ona fua mai?

¹⁷ A o galueaiina soo pea e i tatou le oganuu atoa, o lo tatou onosai ma le olioli e mafai ona maofa ma le fiafia ai tagata o loo saʻo faanaunauga o o latou loto ma faalaeiauina ai i latou e iloiloina le faamoemoe mamalu o loo tatou taofia. Maeu se olioli i le faia o suesuega faale-Tusi Paia ma i latou i se faavae faifai pea! Ma a o latou ave i fale i o latou loto upu moni tautele o le Afioga a le Atua, maeu se olioli ua tatou lagonaina a o avea mulimuli ane i latou ma a tatou aumea i le auaunaga a Ieova! Ona mafai ai lea ona tatou fai atu, e pei ona taʻu atu e le aposetolo o Paulo i tagata talitonu fou i ona aso: “Auā se a ea so matou faamoemoe, ma se fiafia, ma se pale e mitamita ai? E le o outou ea i luma o lo tatou Alii o Iesu Keriso, i lona afio mai? Auā o outou lava o lo matou viiga ma lo matou olioli.” (1 Tesalonia 2:19, 20) E moni, o le olioli e malie ai le loto e mafai ona maua i le taʻitaʻiina mai o tagata fou i le upu moni o le Afioga a le Atua ma i le fesoasoani ia i latou e oo ina avea ma Molimau tuuina atu ma papatisoina.

Le Olioli e Ola Ai

18. O le ā o le a fesoasoani ia i tatou e faafetaiaia tofotofoga eseese i aso nei?

¹⁸ I o tatou olaga i aso taitasi, e tele tulaga atonu e manaomia ai ona onosai. O maʻi faaletino, mafatiaga o le mafaufau, ma tulaga faigata tau tamaoaiga ua na o ni nai mea na e taʻua. E mafai faapefea e le Kerisiano ona tausia lona olioli ina ia mafai ai ona faafetaiaia na tofotofoga? E mafai ona faia lenei mea e ala i le ō atu i le Afioga a le Atua mo ni faamafanafanaga ma se taʻitaʻiga. O le faitauina po o le faalogologo i le faitauina o salamo e mafai ona saunia ai le tele o faafouina i taimi o tofotofoga. Ma ia utagia le fautuaga poto a Tavita: “Ia e tuuina atu ia Ieova o mea e te popole vale ai; o ia lava na te tausia oe; na te le tuuna e faavavau le amiotonu ia [tautevateva].” (Salamo 55:22) E moni o Ieova o “Le faafofoga tatalo.”—Salamo 65:2.

19. I le pei o Paulo ma Tavita, o le ā le mautinoa e mafai ona ia i tatou?

 ¹⁹ O loo nofo sauni pea le faalapotopotoga a Ieova, e ala i ana lomiga ma ona toeaina i le faapotopotoga, e fesoasoani ia i tatou, o tagata vaivai lava i tatou, ina ia tauivi ma o tatou faafitauli. Ua fautua mai ma le mafana lava Tavita: “Ia e tuuina atu lou ala ia Ieova, ma faatuatua ia te ia, ona faia lava lea e ia.” Sa mafai foi ona ia faapea mai: “Ua ou toeaina aʻu nei, sa aʻu taulealea; a ou te lei iloa se tagata amiotonu na lafoaiina, po o ana fanau ua ʻaiisi i latou.” I le ōgatasi ai ma le faapotopotoga Kerisiano, o le a tatou iloa lelei ai lava faapea “o loo mai ia Ieova le faaolataga o e amiotonu; o ia lava lo latou malosi i ona po o le puapuaga.” (Salamo 37:5, 25, 39) Seʻi o tatou mulimuli atu pea i le fautuaga a Paulo: “O le mea lea matou te le faavaivai ai; . . . o loo matou le manatunatu i mea ua vaaia, a o mea e le vaaia; auā o mea ua vaaia e gata mai ia, a o mea e le vaaia e faavavau ia.”—2 Korinito 4:16-18.

20. O le ā ua mafai ona tatou vaaia i mata o le faatuatua?

²⁰ I o tatou mata o le faatuatua, ua mafai ai ona tatou vaaia le faiga fou a Ieova ua i luma atu lava. Maeu se olioli lē mafaatusaina o le a iai i inā! (Salamo 37:34; 72:1, 7; 145:16) I le sauniuni atu mo lena vaitaimi mamalu, seʻi o tatou utagia upu o le Salamo 100:2: “Ia outou auauna atu ia Ieova ma le fiafia; o mai ia outou i ona luma ma le alaga fiafia.”

[Faaopoopoga i lalo]

I le Autaluga:

□ O le ā le manumalo e olioli ai ua vaaia i aso nei e uiga i le faailogalanu?

□ O le a na faapogaia tagata anamua o le Atua e vivii ma alalaga olioli?

□ Ua faapefea ona faateleina le olioli moni i aso nei?

□ Ua faapefea ona ō faatasi le onosai ma le olioli?

□ E ala i le ā e mafai ai ona tumau lo tatou olioli?

[Fesili mo le Suʻesuʻega]