Ia Faatumulia i le Olioli
Ia Faatumulia i le Olioli
“Ua tutumu le au soo i le olioli ma le Agaga Paia.”—GALUEGA 13:52.
1. (a) O le ā le ituaiga o fua e iai le olioli? (e) Mo le ā le sauniuniga olioli e ao ai ona faamamaluina le Atua?
OLIOLI! O lenei uiga faa-Kerisiano ua lisiina e lona lua atu i le alofa, i le faamatalaina e Paulo o fua o le agaga. (Kalatia 5:22-25) Ma o le ā ua mafua ai lena olioli? O le tala lelei na faalauiloa atu e le agelu a le Atua i leoleo mamoe loto maulalo i le sili atu i le 1,900 tausaga ua mavae: “Faauta, ou te au mai ia te outou le tala lelei e olioli tele i le nuu uma; auā o le aso nei ua fanau ai i le aai a Tavita, lo outou Faaola, o le Alii ia o Keriso.” Ona aliali mai lea o le ʻau agelu e toatele ma aufaatasi ma le agelu i le viviiina ma le olioli o le Atua ma le faapea atu: “O le viiga i le Atua i mea maualuluga i lugā; ma le manuia i le lalolagi; o tagata o le finagalo lelei.”—Luka 2:10-14, NW.
2, 3. (a) Aiseā ua fetaui ai le auina mai e le Atua o lona Alo ulumatua e avea ma Faaola o le fanau a tagata? (e) O ā isi auala na auauna ai Iesu i fuafuaga a le Atua a o iai i le lalolagi?
2 Ua faailoa mai le finagalo lelei o Ieova i tagata e ala i le saunia o le faaolataga ia Keriso le Alii. O lenei Alo ulumatua o le Atua o le faaperesonaina totino mai lea o le atamai moni ma ua faamatalaina a o ia fetalai e faatatau i lona Tamā i le taimi o le foafoaga: “Na ou iai i ona tafatafa i le taimi lea o se faigaluega mausalī ma le mautinoa, ona faatumuina ai lea o aʻu i le fiafia tele i lea aso ma lea aso, sa ou olioli i ona luma i aso uma lava; sa olioli i le laueleele fua tele mai o lana lalolagi, ioe, o loʻu fiafia atoatoa sa i le fanau a tagata lea.”—Faataoto 8:30, 31, Rotherham.
3 O le mea lea, ua fetaui lelei ai mo Ieova i le aumaia o lona Alo, o lē sa iai lena fiafia tele i le fanau a tagata, i le avea ma Faaola o le fanau a tagata. Ma o le a faapefea e lenei mea ona aumaia ai le faamamaluina o le Atua? O le a tatala e lenei mea le auala mo ia e faataunuuina ai lana fuafuaga sili o le faatumuina o le lalolagi i tagata amiotonu ma alolofa i le filemu. (Kenese 1:28) E lē gata i lea, a o iai i le lalolagi, o lenei Alo, o Iesu, o le a na faaalia i lalo o tofotofoga aupito ogoogo faapea e mafai e se tagata lelei atoatoa ona usiusitai ma le faamaoni ia Ieova o le Alii Pule Silisili, mai i lea ua viia atoatoa ai le pulega tonu a lona Tamā i luga o Lana foafoaga. (Eperu 4:15; 5:8, 9) O le auala tausi faamaoni o Iesu na tuua ai foi se faaaʻoaʻo mo Kerisiano moni uma ina ia mulimulituʻi ai i ona tulagaaao.—1 Peteru 2:21.
4. O le ā le olioli sili na iʻu i ai le onosai o Iesu, ma e ao faapefea ona faalaeiauina ai i tatou i lenei mea?
4 I lea sa maua ai e Iesu se olioli matuā sili mamao atu i le faia o le finagalo o lona Tamā, ma i le aloalo atu i se olioli e sili atu, e pei ona faaalia mai e le aposetolo o Paulo i le Eperu 12:1, 2 (NW): “Ia tatou taufetuli ma le onosai i le tausinioga o i o tatou luma, ma ia vaavaai atu i Le Sui Sili, ma Lē na te faaatoatoaina lo tatou faatuatua o Iesu. Ona o le olioli sa tuu i ona luma sa ia onosai ai i le satauro, ma faatauvaa le ma, ua nofo i le itu taumatau o le nofoālii o le Atua.” O le ā lenei olioli? O le olioli lenei sa ia Iesu, e lē gata i le faapaiaina o le suafa o lona Tamā ma le togiolaina o le fanau a tagata mai le oti ae i le pule foi o se Tupu ma se Faitaulaga Sili a o ia faafoisia le fanau a tagata usiusitai i le ola e lē uma i se lalolagi parataiso.—Mataio 6:9; 20:28; Eperu 7:23-26.
5. O ai “uso” o Iesu, ma i le ā le olioli tutasi ua latou fetufai ai?
5 Ioe, sa maua pea lava e le Alo o le Atua le olioli i le auauna atu i le fanau a tagata. Ma sa avea ma ona olioli le auauna faatasi ma lona Tamā i le filifilia o le vaega o tagata tausi i le faamaoni o ē ua ia taʻua o ona “uso” ma o ē pe a maliliu e toe faatutuina aʻe ai i le lagi. O i latou nei e ulu atu i se olioli tutasi ma Iesu. Ua taʻua i latou e “fiafia ma paia,” (NW) ma o le a “avea i latou ma faitaulaga a le Atua ma Keriso, latou te fai ma tupu foi faatasi ma ia i tausaga e afe.”—Eperu 2:11; Faaaliga 14:1, 4; 20:6.
6. (a) O le ā le valaaulia olioli ua faalautele atu e le Tupu i ana “isi mamoe”? (e) O ā faaeaga o loo olioli ai le toatele o nei mamoe i aso nei?
6 Ae lē gata i lea, o se motu o tagata e toatele o “isi mamoe,” o ē ua vavaeeseina e le Tupu o loo pule i lona itu taumatau o le faamaonia, ua talia lana valaaulia: “O mai ia, o outou ua faamanuiaina e loʻu Tamā, ia fai mo outou tofi le malo ua saunia mo outou a o lei faavaeina le lalolagi.” (Ioane 10:16; Mataio 25:34) Maeu se faaeaga olioli! E uiga ia i latou nei o ē o le a fai ma tofi le nofoaga faalelalolagi o le Malo, e oo mai lava i le taimi nei, e toatele ua talia tofiga tatau faatasi ma le vaega faauuina, e pei lava ona valoia e Ieova: “E tutū tagata ese ma latou leoleo i a outou lafu mamoe, o tagata o nuu ese e fai i latou ma a outou galuefanua ma a outou galuevine. A o outou, e igoa outou, O faitaulaga a Ieova; e taʻua outou, O auauna a lo tatou Atua.” E aufaatasi i latou uma nei ma le perofeta a le Atua i le faapea atu: “Ou te matuā fiafia ia Ieova, e olioli loʻu loto i loʻu Atua; auā ua na faaofuina aʻu i ofu o le olataga.”—Isaia 61:5, 6, 10.
7. Aiseā ua matuā faapitoa ai lenei “aso” talu mai le 1914?
7 Ua tatou ola nei i se aso e matuā faapitoa lava. Talu mai le 1914 ua avea lea ma aso o le pulega a Keriso o le Tupu faalelagi, sa faamatalaina i le Salamo 118:24, 25: “O le aso lenei ua faia e Ieova; ia tatou olioli ma fiafia i ai. Ieova e, ou te aioi atu ia e faaola mai lava; ou te aioi atu, Ieova e, ia e faamanuia mai lava.” O le aso lea o le a ausia ai le tumutumuga pe a faasalaina i le oti e Ieova lotu faa-Papelonia ma aufaatasia le faatoanofotane a Keriso le 144,000 o uso ma lo latou Tupu faalelagi. O le a “fiafia ma olioli” tagata uma o le Atua i lea mea. O le a latou olioli foi a o tau lo latou Tupu faa-Mesia ia Amaketo ina ia faasaoina atu lona nuu faamaoni i lana lalolagi fou amiotonu. (Faaaliga 19:1-7, 11-16) Pe tuuina atu e Ieova le manuia a o folafola atu e ona tagata lenei faamoemoe olioli? O le a faamatala e le lipoti o loo mulimuli mai.
Faatelega Faalekelope
8. (a) Ua faapefea ona faaatagia le olioli faatasi ma le agaga paia i le lipoti i itulau e 18 e oo i le 21 o lenei mekasini? (e) O ā ni mea tāua o le lipoti?
8 O Molimau a Ieova i aso nei, ua “tele lava lo [latou] faamoemoe ona o le mana o le agaga paia.” (Roma 15:13) O loo faaatagia lenei mea i le faafanua o i itulau e 18 e oo i le 21 o lenei mekasini, lea o loo faataatia mai ai i se tulaga auiliili le lipoti faalekelope o le auaunaga o le Malo mo le 1990. Maeu lo tatou olioli e vaaia se tumutumuga fou e 4,017,213 faifeau tiotio i le fanua! O lenei mea ua faailogaina ai se faatelega e 77 pasene i le vaitaimi o le sefulu tausaga ua mavae, a o agaʻi atu le aoaoina o mamoe i se laasaga faanatinati i atunuu e 212 i le lalolagi atoa. Ina ua mavae le 15 tausaga, na toe ausia ai e le papatisoga se tumutumuga aupito sili mo taimi uma lava—301,518! Sa iai foi nisi fuainumera maualuluga o le papatisoga sa leʻi faatalitalia mai le tele o isi tauaofiaga, ae maise lava i tauaofiaga na sa auai Molimau mai Europa i Sasae. Sa faatasi ai ia i latou nei le toatele o tagata talavou, ua faamaonia ai le pepelo o le taofi lautele faapea o le a mate le lotu pe a mavae atu tagata matutua.
9. (a) O le vave toleni e mātua o fanau a o laiti ua aumaia ai le ā le iʻuga olioli? (e) O ā ni mea na tutupu i lo latou lava atunuu po o nisi atunuu ua molimau i lenei mea?
9 O le vao o tagata talavou o loo tali atu i le valaau i le Salamo 32:11: “Ina fiafia ia ia Ieova, ma olioli o outou o e amiotonu; ina alalaga ia ma le fiafia o outou uma o e ua faamaoni o outou loto.” E foliga mai e toatele lava mātua o loo faatatauina le fautuaga ina ia toleni a latou fanau iti ‘mai lava i le tama meamea.’ (2 Timoteo 3:15) O loo faaaogāina lelei lomiga ma lipine kaseti na saunia mo tupulaga laiti. A o ulu atu nei tamaiti laiti i aʻoga, e lē pine lava ae latou avatu se molimau lelei, e pei o se faaaʻoaʻoga a se teine Iapani e valu tausaga o lē na lipoti mai: “Ina ua uma malologa a aʻoga i le taumafanafana, sa ou faalatalata atu i loʻu faiaʻoga ma fesili atu i ai: ‘Sa e asiasi la i le tuugamau o lou tamā i le tuuaga?’ Na tali mai o ia: ‘Ioe, sa agamalu lava loʻu tamā, ma ou te asiasi lava i ai i lona tuugamau i tausaga uma.’ Sa ou fai atu: ‘Afai e te suesue le Tusi Paia ma mulimuli i aʻoaʻoga a le Atua, o le a mafai ona e toe vaai i lou tamā pele i se parataiso faalelalolagi.’ Ona ou ave lea i ai o Laʻu Tusi o Tala o le Tusi Paia. Ua faitau nei la e lo matou faiaʻoga se mataupu e tasi o lenei tusi i le vasega atoa i le taimi o taumafataga o le aoauli i vaiaso taitasi.”
10. O le ā le fuafuaga lelei na faia ai le tusi Young People Ask, ma o ā nisi o faaaʻoaʻoga?
10 Ua faaaogā lelei e tagata talavou ua taʻi sefulutolu ma ona tupu tausaga le tusi Questions Young People Ask—Answers That Work, e lē gata i suesuega totino ae atoa foi ma le molimau atu ai i isi talavou. Ua talisapaia foi e mātua lenei tusi. O se tuafafine i Suiselani, sa tusia lona igoa e avea ma paeonia lagolago, sa filifili e asiasi atu i mātua o aumea aʻoga a lana tamaitiiti. O lenei mea na saunia ai se avanoa e faia ai ni talanoaga matagofie ma le toatele o mātua, ma e 20 tusi (o le tele lava o le tusi Young People Ask) ma mekasini e 27 na tuuina atu ia i latou. Ina ua tuuina atu e se teine aʻoga i Trinidad lenei tusi i lona faiaʻoga i le aʻoga, sa mulimuli ai foi ma lona tinā, i le tufaina atu o kopi e 25 i le aufaigaluega e 36. Sa ia faaauau pea lava e oo atu i le masina na sosoo ai faatasi ai ma le uaʻi faapitoa atu i mātua o ē na te iloa totino, ma tufaina atu ai le isi 92 tusi ma amata ai suesuega fou faale-Tusi Paia i aiga. I Korea sa faaaogā ai e se faiaʻoga tulagalua le tusi Young People Ask i le avatua o ni lauga pupuu i mataupu e pei o le “E Mafai Faapefea ona Ou Faaleleia Oʻu Tulaga?” ma le “E Mafai Faapefea ona Ma Faifaimea Faatasi ma Loʻu Faiaʻoga” ma i lea na ofo atu ai loa le tusi. Ina ua talia e tamaiti aʻoga tusi e 39, sa amata ona faitio nisi o mātua. Ae na iloiloina e le uluaʻoga se kopi, ma na faapea mai e ese le “matagofie” ma ota ai loa se tusi mo lona lava afafine.
Le Aʻoaʻoga Aupito Sili ona Lelei
11, 12. O ā nisi o faamaoniga e molimau i le mea moni faapea o lomiga a le Sosaiete o le Olo Matamata ua saunia ai le aʻoaʻoga aupito sili ona lelei?
11 O le tulaga tāua faaleaʻoaʻoga o a tatou mekasini e talisapaia foi e le toatele, e pei o se faaaʻoaʻoga o se aʻoga i le Iunaite Setete na ia ota le 1,200 kopi o le Awake! o Iulai 22, 1990, (o loo faaalialia ai le matuā puleaina e vailaau faasaina o le crack addiction) mo le faaaogāina i ana vasega. E lē gata i lea, o amioga a tamaiti Molimau a Ieova e fai ma faaaʻoaʻoga lelei i aʻoga ua faaauau ai ona iai se maofa lelei. I se potu aʻoga o se vasega pisa i Taialani, na valaaulia ai e le faiaʻoga Racha e 11 tausaga i luma o le vasega ma faamālō atu ia te ia i lana amio lelei, i le faapea atu: “Aiseā tou te lē manatu ai ia te ia e fai ma faaaʻoaʻo? E filiga o ia i ana suesuega ma amio lelei.” Ona ia faaopoopo atu lea: “Ioe, ou te matea e tatau ona avea outou ma Molimau a Ieova e pei o Racha ina ia faaleleia ai a outou amio.”—Faatusatusa Faataoto 1:8; 23:22, 23.
12 Ua tusi se tuafafine talavou i Dominican Republic e faapea: “Ina o na o le fa oʻu tausaga, a o toeitiiti lava oʻu pasi mai se aʻoga faataʻitaʻi faalotu, o i inā sa ou aʻoaʻoina ai le tusitusi ma le faitautusi. Sa ou avea i le taupousa sa fai ma oʻu faiaʻoga le tusi E Mafai ona E Ola e Faavavau i Parataiso i Le Lalolagi e fai ma meaalofa faatasi ai ma le feau: ‘Ua ou matuā faafetai atu lava ona o lou aʻoaʻoina o aʻu e faitau ma tusitusi. Ou te moomoo foi ina ia e malamalama i loʻu faatuatuaga ma e sau ina ia e maua loʻu faamoemoe o le ola e faavavau i luga o lenei lalolagi pe a faia ma parataiso.’ Sa tuli ai aʻu ma le aʻoga ona o lenei mea. I le valu tausaga mulimuli ane sa ou toe feiloai atu ai i lenei faiaʻoga. Sa ia faamatala ai le pe na faapefea, e ui lava i le matuā tetee mai o le patele, ae sa mafai lava ona ia faitau le tusi. Sa siitia atu o ia i le aai laumua, o i inā sa mafai ai ona ia suesue le Tusi Paia ma se Molimau. Sa ma papatiso faatasi ma ia i le Tauaofiaga Itumalo o le ‘Gagana Mamā.’” E pei lava ona valoia, o le atamai e sau mai, e oo lava i “gutu o tama meamea”!—Mataio 21:16; Salamo 8:1, 2.
13. Ua faapefea ona tali atu le toatele o talavou i le fautuaga a Solomona, ma ua faapefea ona faaatagia lenei mea i le lipoti i le lalolagi aoao?
13 Sa aumaia e Solomona le fautuaga faalaeiau: “Le taulealea e, ina olioli ia i lou tama itiiti, ia fiafia foi lou loto i aso o lou taulealea, ma ia e savali i ala ua e loto i ai.” (Failauga 11:9) O se fiafiaga i aso nei le vaai atu i le matuā toatele o fanau a Molimau a Ieova o faatatauina nei upu, i le faaaogāina o o latou tausaga talavou e sauniuni atu ai mo se olaga o le auaunaga sauatoa ia Ieova ma ulu atu ai i lenei galuega aupito sili i galuega uma a i latou o faauu mai aʻoga. O loo faaauau pea ona vave faateleina muaʻau a paeonia, faatasi ai ma le 821,108 ua lipotia mai i lenei tausaga. Faatasi ai ma le 11,092 o uso ma tuafafine o ē o loo auauna i Peteli, e tusa lea o le 21 pasene o le aofaiga o le au talaʻi!
14. O le ā le saosaolaumea ua faia e o tatou tuafafine, ma o le ā le faamālō ua tatau mo i latou?
14 O se mea e faafiafiaina ai faapea i le tele o atunuu, e pei o le Iunaite Setete, e tusa ma le 75 pasene o paeonia talaʻi uma o tuafafine, ua avatu ai le malosi i upu o le Salamo 68:11, NW: “Na tulei mai Ieova lava ia; o fafine o talaʻi atu le tala lelei o se ʻau tele.” E faamālō atu lava i o tatou tuafafine ona o lo latou faia o le vaega tele i le galuega i le fanua. O lo latou aʻoaʻo ma le tomai i suesuega faale-Tusi Paia i aiga ua taʻitaʻiina atu ai le toatele i le upu moni, ma o tuafafine ua faaipoipo o ē o loo lagolago ma le faamaoni i tane i le tele o tiute i le faapotopotoga e ao foi ona viia ma le mafana.—Faataoto 31:10-12; Efeso 5:21-25, 33.
Ua Tupu Tele le Aʻoaʻoga Faale-Tusi Paia
15. (a) O le ā le tulaga e lē masani ai ua faia e isi atunuu o loo lisiina mai i le lipoti i le lalolagi aoao e uiga i le galuega o le faia o suesuega faale-Tusi Paia i aiga? (e) O ā ni mea na tutupu e mafai ona e faamatala mai, e faaalia ai le maeu o le fuatele mai e mafai ona iai i suesuega faale-Tusi Paia?
15 Ua tupu tele le galuega o le aʻoaʻoina o le Tusi Paia, o suesuega o loo faia i le lalolagi aoao i se fua faatatau e 3,624,091 i nofoaga eseese i masina taitasi. E mafai e le upu moni o le Tusi Paia ona suia uiga totino faaletagata, e pei ona faaalia mai i se lipoti o loo i lalo. I le amataga lava o Ianuari 1987, na toe faafoi faamalosi atu ai i Niu Sila se tamaloa mai Ausetalia ina ua uma ona tuli lona faasalaga e 25 masina i le falepuipui ona o le gaoi ma le faia o ni faiga taufaasese. Sa matuā pulea o ia e vailaau faasaina ma sa ia faatau solo atu ia mea mo le sili atu i le 17 tausaga. I le tausaga na sosoo mai ai sa amata ai e lana avā ona suesue le Tusi Paia ma Molimau a Ieova, ma a o tupu le malamalama o le fafine, sa matauina ai e le tamaloa se suiga mataʻina i lana amio. Sa oo ina avea o ia o se avā ma se tinā e sili ona lelei. I uunaiga a lana avā, sa auai le tamaloa i se fonotaga matagaluega ia Iuni 1989. Ua ia talia nei se suesuega faale-Tusi Paia i le aiga, ma ua amata nei ona vaaia ni suiga tetele i ona foliga ma auala o lona olaga. Sa amata foi e sui uma e toʻafitu o le aiga ona auai i sauniga. Sa papatisoina o ia ia Ianuari 1990 i le avea o se tasi o lē na mulimuli i le fautuaga sili ona lelei a Paulo i le Efeso 4:17-24.
16. (a) Ua faapefea ona avea lipoti o le Faamanatuga o le 1990 o se puna o le olioli? (e) O le ā le faanatinati e ao ona matauina, ma o le ā le taumafaiga e ao ona tatou faia e fesoasoani ai?
16 O le taualumaga mataʻina o le lipoti o le tausaga o se matatiʻa o ē na auai i le faamanatuina o le Faamanatuga, e 9,950,058, lea na faia i le Aso Lua, Aperila 10, 1990. E sili atu i le 70 mai i atunuu e 212 na lipotia mai faapea o ē na auai e faatolu taimi e sili atu ai na i lo le tumutumuga o la latou au talaʻi! Mo se faaaʻoaʻoga, e ui lava i faasasaga, ae fitu atunuu Aferika ma se tumutumuga tuufaatasi e 62,712 le au talaʻi na lipotia mai, o ē na auai i le Faamanatuga e 204,356. E ui lava i le fesaeaiina o Liberia i feainaʻiga ae sa olioli le au talaʻi e 1,914, e maua le 7,811 na auai i le Faamanatuga. I Haiti, faatasi ai ma se tumutumuga i le au tala’i 6,427, na lipotia mai le 36,551 na auai i le Faamanatuga. O le au tala’i e 886 i motu paepae solo o le atu Maikolonesia e 3,958 na auai. O le au talaʻi e 1,298 a Sri Lanka na lipotia mai ai le 4,521, ma i Samepia, e 73,729 le au talaʻi, na latou maua le 326,991 na auai i le Faamanatuga, o se faatatauga faapea e toatasi le tagata talaʻi i tagata e 25 i le faitau aofai o Samepia. Ua toe faaalia ai foi i le lipoti faalekelope faapea e faitau miliona tagata loto faamaoni o loo faatalitali e aoaoina mai i le lotoā mamoe. Ae lē lava le faamaoni. Pe mafai ona tatou faateleina ma faaleleia le uiga o la tatou galuega o le faia o suesuega faale-Tusi Paia i aiga, i le fesoasoani atu i le toatele o tagata na auai i le Faamanatuga ina ia fausia se faatuatua malosi? Tatou te mananao ina ia avea i latou ma a tatou aumea tiotio, e vivii atu ia Ieova. E aogā mo o latou lava ola!—Salamo 148:12, 13; Ioane 17:3; 1 Ioane 2:15-17.
Le Atoaga o le Olioli
17. O ā faaaʻoaʻoga i le uluai senituri e ao ona fesoasoani e faamalosia lo tatou maumauai ina ia taofimau i lo tatou olioli?
17 Po o ā lava tofotofoga o loo fesagaʻi ma i tatou, seʻi o tatou filifili maumauai e taofimau i lo tatou olioli. Atonu lava tatou te lē uia se mea matuā faigata e pei o le mea na oo ia Setefano, peitai o lana faaaʻoaʻoga e mafai ona faamalosia ai i tatou. I lalo o tuuaʻiga sese, sa mafai lava ona ia tausisia lona foliga olioli. O ona fili “ua iloa e i latou ona mata, ua peiseai o fofoga o se agelu.” Sa tu i ona tafatafa le Atua i le taimi o lona tofotofoga tiga. Sa ia molimau atu ma le faamalosi, “ua tumu o ia i le Agaga Paia” e oo lava i lona maliu faamaturo. A o liliu atu Paulo ma Panapa i nuuese i la laua talaʻiga, o i latou nei foi sa amata “ona olioli . . . ma vivii atu i le afioga a le Alii [o Ieova].” Na toe mapuna aʻe foi sauaga. Ae sa leʻi faavaivaia ai le aasa o i latou na talitonu. “Ua tutumu le au soo i le olioli ma le Agaga Paia.” (Galuega 6:15; 7:55; 13:48-52) Po o le ā lava e faia e o tatou fili ia i tatou, po o ā lava o tatou tofotofoga i aso fai soo o le olaga, e lē tatau lava ona tuu atu lo tatou olioli ia faaauaoa. Ua fautua mai Paulo: “Ia olioli i le faamoemoe, ia onosai i le puapuaga, ia finafinau i le tatalo.”—Roma 12:12.
18. (a) O le ā le Ierusalema fou, ma aiseā e ao ai i tagata o le Atua ona olioli faatasi ma ia? (e) O le a faapefea ona faamanuia e le “lagi fou ma le lalolagi fou” le fanau a tagata?
18 Maeu le ofoofogia o lena faamoemoe! Ua folafola mai e Ieova i ona tagata uma lava: “Ou te faia le lagi fou ma le lalolagi fou; e le toe manatua mea na muamua, e le alu ae foi i le loto. A e peitai ia outou olioli ma fiafia e faavavau i le mea ou te faia.” O Keriso le Alii faatasi ma le “Ierusalema Fou” (ua avea nei ma aai laumua o le faalapotopotoga faalelagi a le Atua, “Ierusalema i lugā”) ma le sosaiete o le lalolagi fou i le lalolagi o le a aumaia le anoanoai o le olioli i le fanau a tagata. (Kalatia 4:26) O le toe faatutuina mai o tagata ua maliliu, le siitia o ē usiusitai uma lava i le ola e faavavau i le lelei atoatoa faaletagata, ma i le faaaogāina e faavavau, o le ola olioli i luga o se lalolagi parataiso—maeu se faamoemoe matuā sili ona tele ma se pogai mo le fiafia ua iai i lenei mea! E pei ona maua e Ieova lava ia le ʻolioli ia Ierusalema ma fiafia i ona tagata,’ o lea ua tuuina mai ai e lana perofeta se isi valaau atili i tagata o le Atua: “Ia fiafia faatasi ma Ierusalema, ma ia olioli ia te ia outou uma o e alolofa ia te ia; ia matuā olioli faatasi ma ia.” (Isaia 65:17-19; 66:10; Faaaliga 14:1; 20:12, 13; 21:2-4) Seʻi matuā faatumuina i tatou i le olioli sa leʻi faapea ona iai a o tatou utagia le apoapoaiga a le aposetolo o Paulo: “Ia outou olioli i le Alii aua le aunoa; ou te toe fai atu, ia outou olioli.”—Filipi 4:4.
Toe Autaluina o lo Tatou Olioli:
□ O le ā le faaaʻoaʻoga o le tumau ma le olioli ua tuu e Iesu ia i tatou?
□ O ā mafuaaga ua olioli ai vaega tuuina atu e lua?
□ Ua faapefea ona olioli i le upu moni tagata matutua ma ē iti i aso nei?
□ I le autaluina o le lipoti o le 1990, o le ā le tali ua tuuina mai ai nei i le tatalo, “Ou te aioi atu, Ieova e, ia e faamanuia mai lava”?
□ O afea ma o le a faapefea ona maua le atoatoa o le olioli?
[Fesili mo le Suʻesuʻega]
[Siata i le itulau 18-21]
LIPOTI O LE TAUSAGA FAALEAUAUNAGA O LE 1990 A MOLIMAU A IEOVA I LE LALOLAGI AOAO
(Tagaʻi i le lomiga)
[Ata i le itulau 16]
Sa faalauiloa e le agelu a le Atua le fanau mai o Keriso le Alii e avea o le “tala lelei e olioli tele ai”