Ia Āva i le Atalii, le Sui Sili a Ieova
Ia Āva i le Atalii, le Sui Sili a Ieova
“O le le ava i le Atalii, e lē ava lea i le Tamā na auina mai o ia.”—IOANE 5:23
1. Ua faapefea i le talitonuga a Kerisinetoma i le Tolutasi ona avea o se lē āva ia Iesu?
I ASO nei, e toatele tagata i Kerisinetoma ua faapea mai e āva ia Iesu Keriso, ae peitai ua latou faia le mea e matuā tuufaafeagai lava. Faapefea? Ia, e toatele ua faapea mai o Iesu o le Atua e Ona le Malosi uma lava, ma faapea o le Atua, o Lē na Foafoaina mea uma lava, na afio mai i le lalolagi ma soifua ai ma maliu ai e pei o se tagata. O lenei faaupuga po o taofi ua faatinoina i le aʻoaʻoga o le Tolutasi, lea ua avea ma aʻoaʻoga faavae a Kerisinetoma. Ae afai e sese le Tolutasi, o le mea moni, afai e itiiti ma maulalo ifo Iesu i le Atua, pe faamata o le a lē avea ea lenei faamatalaseseina o lana faiā ma le Atua ma mea e lē fiafia ai Iesu? O le mea moni, o le a ono manatu o ia i sea faamatalaga sese o se lē āva ia te ia lava ma mea uma na ia aʻoaʻoina.
2. Ua faapefea ona faaalia manino i le Tusi Paia faapea o Iesu e itiiti ifo i le Atua ma e maulalo i lo ia?
2 O le upu moni e faapea, sa leʻi fai mai lava Iesu o ia o le Atua, ae sa ia fetalai pea lava pea e uiga ia te ia o le “Atalii o le Atua.” E oo lava i ona fili sa latou iloa lelei lenei mea. (Ioane 10:36; 19:7) Sa manatu mamafa pea lava Iesu i le faaeaina o le Tamā ma le faia o ia e maulalo ifo ia te Ia, e pei ona ia taʻutino mai: “E le mafai e le Atalii ona fai o se mea, na o ia lava; a o mea na te vaai atu i le Tamā o faia; o mea foi o faia e ia, o loo faia foi ia lava mea e le Atalii. Ou te le mafaia ona fai o se mea e tasi, na o aʻu; . . . auā ou te le usiusitai i loʻu lava loto, a o le finagalo o le Tamā, o le na auina mai aʻu.” Ona ia toe fetalai atu lea: “Mai ia te ia lava aʻu; o ia foi ua auina mai aʻu.” Na ia toe fetalai foi: “Ua ou sau mai le Atua, ma ou sau iinei.” (Ioane 5:19, 30; 7:28, 29; 8:42) Sa lē taitai lava ona taʻua e Iesu faapea o ia o le Atua pe sa tutusa ma ia. O lea, o le aʻoaʻo o se mea faapea o le lē āva lea ia Iesu.
O Isi Auala ua Lē Āva ai Nisi ia Iesu
3. (a) E ala i le faafitia o le ā e faatatau ia Iesu ua lē āva ai nisi o Kerisinetoma ia te ia? (e) O le ā le molimau na tuuina atu e Iesu e tusa ai ma lona uluai soifuaga a o leʻi avea ma tagata?
3 Ma le matuā ese lava, o loo iai foi nisi i Kerisinetoma i aso nei o ē e lē āva ia Iesu e ala i le faafitia faapea sa uluai soifua o ia a o leʻi avea ma tagata. Ae peitai, i le na ona tatou talisapaia lava faapea na afio moni mai lava Iesu mai le lagi i le lalolagi ua mafai ai ona tatou amata ma le saʻo ona āva ia te ia. Sa taʻua pea lava pea e Iesu ia lava faapea sa iai sona uluai soifuaga a o leʻi avea ma tagata. “E leai foi se tasi na alu ae i le lagi,” na ia fetalai ai, “na o ia na alu ifo mai le lagi, o le Atalii lea o le tagata.” Mulimuli ane ona ia taʻua lea: “O aʻu le areto ola na alu ifo mai le lagi . . . Pe faapefea pe a outou vaai atu i le Atalii o le tagata, o alu ae ia i le mea sa i ai anamua?” Ona toe faapea atu foi lea: “O outou o lalo nei, o aʻu mai lugā; . . . E moni, e moni, ou te fai atu ia te outou, sa aʻu i ai, a o lei leai se Aperaamo.” (Ioane 3:13; 6:51, 62; 8:23, 58) Sa faasino atu foi Iesu i lona uluai soifuaga a o leʻi avea ma tagata i lana tatalo i lona Tamā faalelagi i le po na faalataina ai o ia.—Ioane 17:5.
4. (a) I le ā le auala faaopoopo ua lē āva ai le toatele ia Iesu? (e) O le ā le faamaoniga e ao ona lava ma totoe e faavae ai le manatu faapea na soifua moni lava Iesu, ma aiseā?
4 Ua matuā oo atu lava nisi o Kerisinetoma i se manatu sese o le faafitia faapea o Iesu sa o se peresona moni o le talafaasolopito, ma sa faapea ona soifua o se tagata. Ana faapea sa leʻi iai moni lava o ia, o le a leai la se pogai e talanoaina ai le mafuaaga ma le auala e ao ai ona tatou āva ia te ia. Peitai o le anoanoai o molimau vaaitino na faasaoina i le Tusi Paia e ao ona avea o ni faamaoniga ua lava ma totoe e faamautuina ai ma le matuā leai o se masalosalo faapea sa soifua moni lava Iesu i le lalolagi. (Ioane 21:25) E moni lenei mea ae maise lava ona sa masani ona aʻoaʻo uluai Kerisiano e uiga ia Iesu e ui lava sa o se lamatiaga i o latou ola ma lo latou saolotoga. (Galuega 12:1-4; Faaaliga 1:9) Ae peitai, e ese mai le mea na tusia e ona soʻo faatatau ia te ia, pe mafai ona faamaonia le soifuaga o Iesu?
5, 6. O le ā ua faaalia i mea moni i le talafaasolopito, e ese ai mai le Tusi Paia, e uiga i le iai moni o Iesu Keriso?
5 Ua taʻua e le The New Encyclopædia Britannica (1987) e faapea: “Ua faamaonia i ni faamatalaga a tagata tutoatasi faapea i aso anamua, e oo lava i ē na tetee i le Faa-Kerisiano latou te leʻi masalomia lava le avea o Iesu ma peresona moni o le talafaasolopito.” O ā nisi o nei faamatalaga a tagata tutoatasi? E tusa ai ma le faamatalaga a le tagata poto Iutaia o Joseph Klausner, e iai le molimau faamaonia o uluai tusitusiga faa-Talmud. (Jesus of Nazareth, itulau 20) O loo iai foi le faamaoniga a le tusitala Iutaia o talafaasolopito o le uluai senituri o Josephus. Mo se faaaʻoaʻoga, ua ia faamatalaina le fetogiina o Iakopo i maa, i le faailoaina o ia “o le uso o Iesu o lē na taʻua o le Keriso.”—Jewish Antiquities, XX, [ix, 1].
6 I le faaopoopo atu i ai, ua iai le faamaoniga o tusitala o talafaasolopito o Roma anamua, ae maise lava le faamaoniga e uiga i le tusitala sa manatu maualuga i ai o Tacitus. Sa uluai tusi o ia i le senituri lona lua e uiga “i se vasega sa itagia ona o a latou faifaiga inosia, sa taʻua e tagata o Kerisiano. O Christus [Keriso], lea e amata mai ai le igoa [Kerisiano], sa tigaina i le faasalaga silisili ona leaga i le vaitaimi o le pulega a Tiperio, i lima o se tasi o o tatou pule.” (The Annals, XV, XLIV) I le manatu e uiga i le faamaoniga faapea ua lava ma totoe le avea o Iesu o se tagata o le talafaasolopito, sa molimauina ai e le tagata faafilosofia tau amio o lona 18 o senituri, o Jean-Jacques Rousseau, e faapea: “O le talafaasolopito a Sokalate, lea e lē o masalomia e se tasi, e faalē o manino lelei e pei o le talafaasolopito o Iesu Keriso.”
O Pogai e Āva ai i le Alo
7. (a) O le ā le faamaoniga faale-Tusi Paia ua tuuina mai ai ia i tatou le tiute tauave ina ia āva ia Iesu Keriso? (e) Ua faapefea ona atili āva Ieova i lona Alo?
7 O lea ua tatou oo mai nei i le mataupu e uiga i le āva ia Iesu Keriso. O le avea o le tiute tauave a ona soʻo le āva ia te ia, ua mafai ona vaaia lea mai ana fetalaiga i le Ioane 5:22, 23: “Auā e le faamasino e le Tamā i se tasi, a ua ia tuu mai i le Atalii, le faamasinoga uma lava; ina ia ava tagata uma lava i le Atalii, faapei ona latou ava i le Tamā. O le le ava i le Atalii, e lē ava lea i le Tamā na auina mai o ia.” Talu le toetu o Keriso, ua āva ai Ieova i lona Atalii e oo lava i se tulaga sili, ‘i le faapaleina o ia i le mamalu ma le viiga ona o le tiga o le oti.’ (Eperu 2:9; 1 Peteru 3:22) I le tulaga faavae, ua ia i tatou mafuaaga e āva ai ia Iesu ona e lē gata i le tulaga po o ai o ia ae atoa foi ma mea ua ia faia.
8. Ona o ā mea moni tutasi faatatau ia Iesu Keriso ua tatau ai ona āva ia te ia?
8 Ua ono ma tatau le āva ia Iesu Keriso ona o ia o le Lokou, po o le Upu, o le fofoga fetalai a Ieova e silisili atu ona lelei. Mai le Tusi Paia e foliga mai o le taʻu “le Lokou [Upu, NW]” ua faatatauina ia Iesu a o leʻi afio mai o ia i le lalolagi faapea foi ina ua toe afio atu i le lagi. (Ioane 1:1; Faaaliga 19:13) I le Faaaliga 3:14 o loo ia fetalai ai e uiga ia te ia lava o “le amataga o mea na faia e le Atua.” E lē gata o ia o “le ulumatua o mea uma lava ua faia” ae o le “Atalii e toatasi” ua na o ia lava na foafoaina tuusaʻo e Ieova le Atua. (Kolose 1:15; Ioane 3:16) I le faaopoopo atu i ai, “na ia faia mea uma lava; e leai foi se mea e tasi na faia e lei faia e ia.” (Ioane 1:3) O le mea lea, pe a tatou faitau i le Kenese 1:26, [NW] lea ua fetalai ai le Atua, “Ina ta faia ia o le tagata i lo ta faatusa, ia foliga ia i taʻua,” o lena “taʻua” e aofia ai le Lokou, po o le Upu. E mautinoa lava, ona o le mea moni faapea i le uluai soifuaga o Iesu a o leʻi avea ma tagata sa ia te ia se faaeaga ofoofogia o le auai faatasi ma Ieova le Atua i le foafoaina o mea, ua ono ma tatau ai ia te ia le āva sili.
9. Aiseā ua tatou faia ai se faaiʻuga faapea o Iesu o le agelu sili o Mekaeli, ma na faapefea ona āva Mekaeli ia Ieova e tusa ai o le tino o Mose?
9 Ua atili ona ono ma tatau ia Iesu Keriso le āva auā o ia o le matai o agelu a Ieova po o le agelu sili. I le ā le faavae ua tatou faia ai lena faaiʻuga? Ia, o le fasiupu muamua [prefix] “arch,” o lona uiga “sili” [chief] po o le “autū [principal],” ua faaalia ai faapea e na o le toatasi lava le agelu sili. Ua tautala le Afioga a le Atua e uiga ia te ia i le faasino atu i le Alii o Iesu Keriso toe faatuina. Ua tatou faitau ai: “E afio ifo mai le lagi le Alii lava, ma le alaga, ma le leo o le agelu sili, ma le pu a le Atua; e muamua foi ona toe tutū mai o e ua oti o ia Keriso.” (1 Tesalonia 4:16) O lenei agelu sili e iai sona suafa, e pei ona tatou faitau ai i le Iuta 9: “A o Mekaeli o le agelu silisili, ina ua la finau ma le tiapolo na ia finau i le tino o Mose, ua na le faamalosi ona lafo atu o se upu leaga e faasala ia te ia, a ua na faapea atu, Ia aoai [Ieova] ia te oe.” I le lē fia muamua atu i luma o Ieova i le faamalosi ona ia tuuina atu le faasalaga faasaga i le Tiapolo, i lea ua āva ai Iesu i lona Tamā faalelagi.
10. (a) Ua faapefea ona taʻimua Mekaeli i le taua ona o le Malo o le Atua? (e) O le ā le vaega na faia e Mekaeli i le fesootai ai ma le nuu o Isaraelu?
10 E tau le agelu sili o Mekaeli ona o le Malo o le Atua, i le taʻimua i le faamamāina o le lagi mai ia Satani ma ana au o temoni. (Faaaliga 12:7-10) Ma ua faapea mai le perofeta o Tanielu ‘ua tu o ia e fai ma sui o tagata o le Atua.’ (Tanielu 12:1) O lea la, e foliga mai, o Mekaeli, o ‘le agelu a le Atua moni o lē ua alu atu e muamua atu i le au a Isaraelu’ ma faapea o ia lea na faaaogā e le Atua e aumaia ona tagata i le Nuu Folafolaina. “Ia e faaeteete oe ia te oe i ona luma, ma ia e faalogo i lona leo,” na poloai atu ai le Atua. “Aua le faaonoono ia te ia, . . . auā foi o loo ia te ia loʻu nei igoa.” (Esoto 14:19; 23:20, 21) E aunoa ma se masalosalo le tatau ona iai i le agelu sili a Ieova se matuā naunau i tagata ua faaigoaina faafaatusa i le suafa o le Atua. Ua matuā fetaui ai lava lona oo atu e laveai se isi agelu na auina atu e faamafanafana i le perofeta o Tanielu, ma o lē na taofiofia i le ala e se temoni malosi. (Tanielu 10:13) O le mea lea, atonu o se mea poto ai le faia o se faaiʻuga faapea o le agelu na ia faaumatia le ʻautau e 185,000 a Sanerivi e leai lava se isi na i lo o Mekaeli le agelu sili.—Isaia 37:36.
11. Ona o le tuliloaina o le ā le auala o le soifuaga i le lalolagi ua ono ma tatau ai lo tatou āva ia Iesu?
11 E lē gata ina ono ma tatau le āva ia Iesu Keriso ona po o ai o ia, ae ua tatau ai foi lo tatou āva ia te ia ona o le mea ua ia faia. Mo se faaaʻoaʻoga, e na o ia le tagata sa soifua i se olaga lelei atoatoa. Sa foafoaina Atamu ma Eva e lelei atoatoa, ae sa puupuu lo la lelei atoatoa. Ae peitai, sa tumau Iesu Keriso i le ‘faamaoni, leai se leaga, e vavae ese mai ē agasala,’ e ui i mea uma lava sa mafai ona aumaia e le Tiapolo ia te ia e ala i tofotofoga po o sauaga. I le uia o nei mea uma lava “o le na le agasala lava, na le iloa foi se pepelo i lona fofoga.” Sa mafai ona ia luʻia ma le tonu tagata lotu e tetee ia te ia: “O ai ea so outou na te faailoa mai saʻu agasala?” Sa leai se tasi o i latou na mafaia lea! (Eperu 7:26; 1 Peteru 2:22; Ioane 8:46) Ma ona o le tausisia pea o lona faamaoni leai se agasala, na faamautinoa ai e Iesu lona Tamā faalelagi o Lē Pule Silisili ese faalevateatea ua iai le tonu ma faamaonia ai le Tiapolo e avea o se matuā pepelo leaga lava.—Faataoto 27:11.
12. (a) O le ā le ituaiga o tagata sa iai Iesu, ma o le ā na ia faia ma puapuagatia ai ona o isi tagata? (e) Aiseā o le a e faapea mai ai ua ono ma tatau lo tatou āva ia Iesu ona o le mea na ia faia ma ona o le mea na ia tiga ai?
12 Ua ono ma tatau lo tatou āva ia Iesu Keriso, auā e lē gata sa ola i se olaga lelei atoatoa, leai se agasala ae sa o ia foi o se tagata lelei, o se tagata e lē manatu faapito, ma sa ia faataulagaina o ia lava. (Faatusatusa Roma 5:7.) Sa ia auauna ma le lē faavaivai mo manaoga faaleagaga atoa ma le faaletino o tagata. Maeu se maelega na ia faaalia mo le maota o lona Tamā, ma maeu se onosai na ia faaalia i feutagaiga ma ona soʻo! Pagā ni tiga sa finagalo malie o ia e uia i le faia o le finagalo o lona Tamā! I lona tofotofoga i le faatoaga o Ketesemane, ua faapea mai le Tusi Paia: “Ua puapuaga o ia, ua atili ai lana tatalo; o lona afu foi ua pei o ʻaluʻalu toto ua paū ifo i le eleele.” Ioe, na ia “tatalo atu . . . ma aioi atu ma le tagi tele ma loimata.” (Luka 22:44; Eperu 5:7) Maeu le saʻo lelei ona valoia e le perofeta o Isaia lona tofotofoga sili i le Isaia 53:3-7!
13. O le ā le faaaʻoaʻoga lelei na faataatia e Iesu mo i tatou i le āva i lona Tamā faalelagi?
13 Ua tatau foi lo tatou āva ia Iesu ona o le faaaʻoaʻoga lelei na ia faataatia mo i tatou i le āva lea i lona Tamā faalelagi. Ua mafai lelei ai ona ia fai atu: “Ou te ava lava aʻu i loʻu Tamā.” (Ioane 8:49) I taimi uma lava na te avatua ai le āva ia Ieova le Atua e ala i ana upu ma galuega. I lea, ina ua ia faamalōlōina se tagata, ua faapea mai le faamatalaga a le Tusi Paia, e leʻi viia e tagata Iesu, ae ua faapea mai “na latou vivii atu i le Atua.” (Mareko 2:12) O le mea lea, i le faaiʻuga o lana faiva faalelalolagi, sa mafai ai ona faapea atu ma le tonu Iesu i le tatalo i lona Tamā faalelagi: “Ua ou tuu atu le viiga ia te oe i le lalolagi; ua ou faaumaina le galuega na e tuuina mai ia te au, ou te faia.”—Ioane 17:4.
Mea ua Ia Faia mo i Tatou
14. O le ā le mea na faataunuuina e le maliu o Iesu mo i tatou ua ono ma tatau ai lo tatou āva ia te ia?
14 Ma maeu le sili ona tatau le tuuina atu o lo tatou āva ia Iesu Keriso ona o mea uma ua ia faataunuuina mo i tatou! Na maliu o ia mo a tatou agasala ina ia mafai ai ona tatou lelei ma Ieova le Atua. Na fetalai Iesu e uiga ia te ia lava: “O le Atalii o le tagata e lei sau ia ina ia auauna mai tagata ia te ia, a ia auauna atu ia, ma foaiina atu lona ola e fai ma togiola e sui aʻi tagata e toatele.” (Mataio 20:28) I lea, o lona maliu ua mafai ai ona faia mea uma o le a faataunuuina e le Malo mo i tatou o tagata: le ola e lē mafai ona oti i le lagi mo le 144,000 o ē ua avea ma lana faatoanofotane, ma le ola e faavavau i le lalolagi parataiso mo le faitau miliona o isi o ē e faamaonia lo latou faatuatua ma le usiusitai i lalo o tofotofoga.—Salamo 37:29; Faaaliga 14:1-3; 21:3, 4.
15. O le ā le tasi o faaaʻoaʻoga o le faaalia mai e Iesu ia i tatou le uiga o le peresona o lona Tamā?
15 Ua ono foi ma tatau le āva ia Iesu Keriso ona, i le avea o le Faiaʻoga Sili, ua ia faaalia atoatoa ai le finagalo o lona Tamā ma le uiga o lona peresona ia i tatou. Mo se faaaʻoaʻoga, i lana Lauga i luga o le Mauga, sa ia faasino atu i le agalelei faifua o lona Tamā i le tuuina mai o le la ma le timu i luga o ē amio lelei ma ē amio leaga ona ia faapea mai lea: “Ia atoatoa ona lelei o la outou amio, e pei o lo outou Tamā o i le lagi e atoatoa ona lelei o ia.”—Mataio 5:44-48.
16. Na faapefea ona aoteleina e le aposetolo o Paulo le auala o Iesu ua ono ma tatau ai i ai le āva?
16 Sa lelei ona aoteleina e le aposetolo o Paulo le ala o Iesu ua ono ma tatau ai le āva ia te ia ina ua ia tusi: “O ia sa uiga faatasi ma le Atua, e lei manatu ia o se mea faoa ina ia tusa lava o ia ma le Atua; a ua faamaulalo e ia ia te ia, ua uiga o ia faatasi ma le pologa, ina ua faia o ia faapei o se tagata; na iloa foi o ia ua tino mai i le tagata, ua faamaulalo e ia ia te ia, ua na anaana ua oo ina maliu, o le maliu lea i le satauro.”—Filipi 2:5-8.
Auala e Mafai ai ona Tatou Āva i le Alo
17, 18. I ā auala eseese e mafai ai ona tatou avatu le āva ia Iesu Keriso?
17 Talu ai ona e leai se masalosalo i le ono ma tatau o lo tatou āva ia Iesu Keriso, ua oo ai ina tatou fesili: E mafai faapefea ona tatou āva i le Alo? Tatou te faia faapea e ala i le faaalia o le faatuatua i lana taulaga togiola, ma tatou te faamaonia lena faatuatua e ala i le faia o laasaga manaomia o le salamō, liliu, tuuina atu, ma le papatisoga. E ala i le alu atu ia Ieova i le tatalo i le suafa o Iesu, ua tatou āva ai ia Iesu. Tatou te āva atili ia te ia pe a tatou utagia ana upu: “Ai se tasi e fia mulimuli mai ia te au, aua neʻi usiusitai o ia ia te ia, a ia ave e ia lona satauro, i le mulimuli mai ai ia te au.” (Mataio 16:24) Ua tatou āva ia Iesu Keriso pe a tatou utagia ana faatonuga ina ia muai saili pea le Malo o le Atua ma lana amiotonu, ma tatou te āva ia te ia pe a tatou utagia lana poloaiga ina ia faia se sao i le galuega o le faia o soʻo. Tatou te toe āva ai foi ia Iesu pe afai tatou te faaalia le alofa faaleuso lea na ia fetalai o le a mataulia ai ona soʻo moni uma lava.—Mataio 6:33; 28:19, 20; Ioane 13:34, 35.
18 E lē gata i lea, tatou te avatua le āva i le Alo e ala i le aveina e i tatou lava o lona suafa, i le taʻua o i tatou o Kerisiano, ma tatou ola ai i lena suafa e ala i a tatou amio lelei. (Galuega 11:26; 1 Peteru 2:11, 12) Na faapea mai le aposetolo o Peteru e ao ona tatou mulimulitui i tulagaaao o Iesu. (1 Peteru 2:21) E ala i le faaaʻoaʻo ia te ia i a tatou amio uma, ua tatou āva ai foi ia te ia. Ma le mautinoa lava, pe a tatou faamanatuina faaletausaga le Faamanatuga o le maliu o Iesu, ua tatou avatu ai ia te ia se āva faapitoa.—1 Korinito 11:23-26.
19, 20. (a) O ā taui ua taofia e Iesu mo ona soʻo ona o le āva ia te ia, i le taimi nei ma le lumanai? (e) O le ā le mautinoa e mafai ona ia i tatou e tusa ai ma le Alo?
19 O ā taui ua taofia e Iesu mo ona soʻo ona o le mulimuli atu i se auala e āva ai ia te ia? Na ia fetalai: “E moni, ou te fai atu ia te outou, ai se tasi ua ia tuua o fale, po o uso, po o tuafāfine, po o le tamā, po o le tinā, po o le avā, po o le fanau, po o fanua, ona o aʻu ma le tala lelei, e maua lava e ia taisautuaselau i lenei olaga, o fale, ma uso, ma tuafāfine, ma tinā, ma fanau, ma fanua, atoa foi ma sauaga, a o le ola atali e maua ai le ola e faavavau.”—Mareko 10:29, 30.
20 Ua faapea mai mulimuli ane, afai tatou te faia ni faataulagaina ona o Iesu, o le a ia faamautinoa lava i ai ua tauia i tatou. Ua faamautinoa i tatou e Iesu: “O lenei, ai se na te taʻutaʻu aʻu i luma o tagata, o aʻu foi ou te taʻutaʻuina o ia i luma o loʻu Tamā o i le lagi.” (Mataio 10:32) O lea, e pei lava ona āva le Tamā faalelagi ia i latou o ē āva ia te ia, e mafai la ona tatou mautinoa o le a faapena foi i le Alo pele e toatasi o Ieova ona faaaʻoaʻo i lona Tamā i lenei vala, e pei lava ona faia e le Alo i isi mea.
O le a Faapefea ona E Tali?
□ Ua faapefea ona lē āva le toatele o i Kerisinetoma i le Alo?
□ O le ā le faamaoniga na tuuina mai e Iesu e tusa ai o lona uluai soifuaga a o leʻi avea ma tagata?
□ O ā nisi o mafuaaga ua ia i tatou mo le āva ia Iesu?
□ O ā nisi o auala e mafai ai ona tatou āva ia Iesu?
□ O ā aogā e iʻu i ai ona o le āva ia Iesu Keriso?
[Fesili mo le Suʻesuʻega]