Aiseā ua Faatali Umi ai i le Foiaina o le Finauga?

PE TUSA ma le 6,000 tausaga ua mavae, sa leai se finauga i le pule silisiliese a le Atua. I le faaumaina o ana galuega ofoofogia o le foafoaga, “ua silasila atu le Atua i mea uma ua na faia, faauta foi, ua matuā lelei lava.” (Kenese 1:31) Ona ia ulu atu loa lea i se vaitaimi umi o le ‘malōlōga’; o le mea moni, e lē faapea ona ua vaivai lona tino. Na i lo lea, sa ia malōlō, ina ua ia faaiʻuina ana galuega faalefoafoaga i le lalolagi, i le mautinoa faapea o lana fuafuaga lelei faatatau i nei mea o le a matuā manuia atoatoa.—Kenese 2:1-3; Isaia 55:11.

O le ā lena fuafuaga? Sa tuu e Ieova le uluai ulugalii faaletagata i se nofoaga sa taʻua o le faatoaga i Etena. O la la uluai avega tauave o le tausia lea o lo la aiga parataiso, e aofia ai le anoanoaʻi o manu eseese. Sa tatau foi ona la fanauina mai ni fanau ma tausia i latou. I se taimi, a o tuputupu aʻe lo la aiga, sa tatau ona la faalauteleina le Parataiso e oo atu i tuluʻiga o le lalolagi e le usiusitai i le poloaiga a le Atua e ‘faatoilalo le lalolagi.’ I lea, o le a avea ai mulimuli ane le lalolagi o se aiga matagofie, e faatumuina i se aiga fiafia, autasi e auauna i lo latou Tamā faalelagi. O le uluai fuafuaga lena a le Atua.—Kenese 1:27, 28; 2:8, 15, 20-22.

Pe o le a auai Atamu ma Eva i le faataunuuina o lenei fuafuaga matagofie e oo atu i lona iʻuga? Sa faalagolago lena mea i lo la faaauau  ona felagolagomaʻi ma lea fuafuaga e ala i lo la usiusitai i Lē na Foafoaina i laua. O lo la usiusitai e lē tatau ona faia tauaso, ma le lē mafaufau i ai. Sa tuuina atu ia i laua le saolotoga e filifili ai, ona sa finagalo le Atua ia i laua ina ia auauna ia te ia mai o la loto talisapaia. I le avea o se faamanatu vaaia o lana pule silisiliese amiotonu, na ia saunia ai se tofotofoga faigofie. Sa ono mafai ona la aai mai so o se mea sa saunia i totonu o le faatoaga seʻi vagana ai le mea e tasi. Sa iai se laau e fua lea na fetalai le Atua faatatau i ai: “O le aso e te ʻai ai e te oti ai lava.”—Kenese 2:16, 17.

O nei upu ua taʻu mai ai ia i tatou faapea sa leʻi foafoaina Atamu ma Eva ina ia matutua ma oti. E faatoʻā oo mai lava le oti, pe afai la te lē usiusitai i lenei poloaiga faigofie. Ana faapea sa tumau Atamu ma Eva i le usiusitai i le Atua, semanū o la ola pea i le lalolagi e oo mai i aso nei, o ni mātua o se aiga e iai ni fanau lelei atoatoa i le lalolagi aoao.—Tagai i le mataupu silisili ua taʻua i le Salamo 37:29.

Ae peitai, o se tasi o meafaiola agelu a le Atua, ua taʻua nei o Satani, sa oo ina suesue masei i le auala o le pulega a le Atua. Sa ia uunaʻia Eva ina ia ʻai mai le laau faasaina, i le fautuaina ma le faaʻoleʻole faapea, e ala i le tutoatasi mai le pule silisiliese a le Atua, o le a sili lea ona lelei mo ia. E ui i lea, o le aano moni lava o le gaoioiga a Satani, sa faanaunau ina ia avea ma atua o le aiga o loo fāi mai o le fanau a tagata.—Kenese 3:1-5; Mataio 4:8, 9; Ioane 8:44.

Ona sa tuuina atu e Ieova i le uluai ulugalii faaletagata mea uma na la manaomia, sa tatau ai la ia Eva ona ia siitia lona silisiliese ma teena le fautuaga pepelo a Satani. Ae ui i lea, ma le faanoanoa lava, sa ia agaʻi atu lava ma solia le tulafono a le Atua. Mulimuli ane, sa filifili ai foi Atamu e aufaatasi atu ma lana avā i lona auala valea. I lea, ua fouvale ai le ulugalii loto maʻaa, faapea foi ma Satani, faasaga i le Atua, ma na lagā ai i lea le finauga i le pule silisiliese tauatua.—Kenese 3:6.

E Manaomia se Taimi e Foia ai Finauga Matuā Tāua

Sa ono mafai ona faaumatia e Ieova le au fouvale e toatolu i tuā i inā. Ae o le a lē foia atoatoa ai fesili na lagā e ala i la latou fouvalega. Pe mafai e le tagata ona pulea ma le manuia o ia lava e aunoa ma le Atua? Pe sa avea o se faamasinoga tonu i le vaega a le Atua ona tapa le gauaʻi atu i lana pule silisiliese? E lē gata i lea, i le manatu atu i le amioga a le uluai ulugalii, pe iai ea ni tagata o le a filifili ma le lē manatu faapito e auauna i le Atua i o latou lava loto faitalia—tusa lava pe tofotofoina e Satani? (Iopu 1:7-11; 2:4) O le a umi se taimi e manaomia e taliina ai nei fesili. O le a umi foi se taimi e manaomia ina ia manumalo ai mai āuga o lena uluai fouvalega, ma faataunuuina ai le fuafuaga a le Atua e faia le lalolagi o se parataiso e faatumuina e se aiga o tagata e lē agasala. O loo tatou faatali pea i le iʻuga faaiʻu o nei finauga.

I le ōgatasi ma lana tulafono, na aveesea ai e le Atua mai ia Atamu ma Eva le faaeaga o le ola e faavavau. Sa lē toe aogā ona la auai i le faataunuuina o lenei fuafuaga sili. Ae peitai, a o leʻi feoti i laua, sa faatagaina i laua e fanauina ma tausia ni fanau. E moni ua lē o toe mafai nei e Atamu ma Eva ona tuufaasolo atu i a la fanau le ola malosi matagofie, e lē agasala. (Roma 5:12) Ae e ui lava ina fananau mai tupulaga na mulimuli ane i le lē lelei atoatoa ma pagatia i le oti, ae e toatele tagata na maua le avanoa e faaalia ai po o fea o latou tutū ai e tusa ma le finauga sili i le pule silisiliese.

Foiaina o le Finauga

O le a faapefea ona foia e le Atua nei mataupu faatatau i lana pule silisiliese? I lona uiga, o fesili na laga i tuā i Etena ua taliina nei. I le faitau afe o tausaga o le talafaasolopito o le tagata, ua avea o se faamaoniga tiga faapea, o le mau a Satani faapea e sili ona lelei mo Eva pe a tutoatasi mai le Atua, sa o se pepelo. O le pulega faaletagata na te lē amanaia le Atua o le a faaauau pea ona lē taulau. E pei ona fai mai le Tusi Paia: “E pule ai le tasi tagata i le tasi, e leaga ai o ia lava.”—Failauga 8:9.

I le isi itu, e tele mea lelei ua faamaumauina i tausaga ua leva talu mai ona agasala Atamu ma Eva. E toatele le fanau a tagata ua latou faaalia le pipii atu lē motusia i le pule silisiliese a Ieova, o le faaaʻoaʻo aupito sili ona mataʻina “o le Atalii o le tagata,” o Iesu Keriso lava ia.  (Mataio 20:18; Eperu 11:1–12:3) O i latou o ē ua mulimuli atu i tulafono a le Atua ma iloa lelei lana pule silisiliese ua latou iloa faapea, o le auala moni lenei e silisili ona lelei. Ua latou tofo i le moni o le faataoto: “O le faamanuia a Ieova, o lea e faatamaoaiga aʻi; na te le faaopoopo i ai se tiga.” (Faataoto 10:22) E lē gata i lea, faafetai i le sauniuniga o le toetu, o le a mulimuli ane oo atu i le faia o so latou sao i le faataunuuga o le fuafuaga sili a le Atua.—Ioane 5:28, 29.

E lē o faagaloina e Ieova lana uluai fuafuaga. O i latou e teena lana pule silisiliese o le a lē faatagaina e pule i le lalolagi e faavavau, ma ua lapatai mai le Tusi Paia faapea ua lē o toe umi ae gaoioi loa le Atua faasaga ia i latou. Ua tatou faitau ai: “Ua faaalia mai foi le toasa o le Atua mai le lagi i le amio faalematau.” (Roma 1:18) O lenei faailoa mai o loo sau o le toʻatamaʻi o le Atua, lea ua taʻua e le Tusi Paia o Amaketo, o le a faaalia ai ma le lē fesiligia faapea o loo soifua moni lava o ia. E na o i latou lava e talia lana pule silisiliese o le a faasaoina i lena mea o le a tupu. “O e amio saʻo, latou te mau i le nuu; ma e ua sao a latou amio, e faatotoeina ai i latou; a e vavaeeseina o e amio leaga ai le laueleele, e liaiina ai foi o e amio pepelo.”—Faataoto 2:21, 22.

Le Finauga Sili ma Oe

I le iloa e uiga i nei mea moni, ua tatau ai ia i tatou taitoatasi—ona faia se filifiliga—e pei o Atamu ma Eva. Pe o le a tatou taumafai e ola e tutoatasi mai le Atua? Pe o le a tatou gauai atu i lana pule silisiliese? Ia manatua, o le finauga matuā sili ona tāua lenei o loo fesagaʻi ma oe i aso nei. O isi finauga, atonu e foliga mai e tāua, e feagai lea ma lou olaga i le taimi nei. A o le finauga lea e faatatau i le ola e faavavau. O le filifiliga e te faia o le a aafia ai lou lumanai e faavavau.

E mafai faapefea ona e faaalia faapea e te talia le pule silisiliese a le Atua? E ala i le suesueina ma le filigā o lana Afioga, le Tusi Paia, ma saili ina ia usiusitai i lona finagalo i le auaufaatasi lea ma isi Kerisiano moni. (Sefanaia 2:2, 3) Afai e te faia faapea, o le a e maua le faamoemoe fiafia o le vaaia o le faataunuuga o le fuafuaga sili a le Atua. O le a e vaai ai i le faamaoniga o lenei folafolaga ofoofogia: “E toe itiiti, ona leai lea o le tagata amio leaga; . . . A o e agamalu, e fai mo latou le nuu; e faafiafia foi i latou ia te i latou ona o le manuia e tele.” (Salamo 37:10, 11) Maeu se iʻuga matagofie mo i latou uma o ē gauai atu i le pule silisiliese a le Atua! Maeu se pogai malosi mo le faia o se filifiliga poto e uiga i lenei mataupu aupito sili ona tāua!