Le Auala e Faaolaolaina ai e Ieova Lana Galuega

I LE faitau taʻi sefulu tausaga lata mai nei, na oo ai Molimau a Ieova i se tuputupu aʻe mataʻina. I le na o le sefulu tausaga ua mavae, na faatoateleina ai i latou mai faapotopotoga e 42,600 e oo atu i se aofaiga e 60,192 i atunuu e 212. E tusa ai ma lenei mea, ua fesili ai nisi: Ua faatupeina faapefea le galuega a Molimau? Ua fiafia le Sosaiete o le Olo Matamata e taliina lenei fesili ma fesili e fesootai atu i ai i totonu o lenei mataupu.

Pe faia e Molimau a Ieova le sefuluaʻi?

E leai. I Isaraelu anamua, na poloaia ai le sefuluaʻi i lalo o le Tulafono Faa-Mose ina ia lagolagoina ai tagata faigaluega o le malumalu a le Atua, o le au sa Levī ma le au ositaulaga. (Numera 18:21, 24-29) Sa leai ni fanua faaituaiga a i latou nei e ese ai mai nisi o aai, o lea na latou manaomia ai lea lagolagosua faapitoa. E faaopoopo atu i ai, sa saoloto tagata Isaraelu faamaoni ina ia avatuina meaalofa tauofo mo ni galuega faapitoa, e pei o le fausiaina o le fale fetafai, ma mulimuli ane, o le malumalu.—Esoto 25:1-8; 1 Nofoaiga a Tupu 29:3-7.

Ae peitai, ina ua maliu Iesu, o loo faapea mai le Tusi Paia “ua ia faaumatia foi . . . le tulafono lea i poloaiga i upu faasino.” (Efeso 2:15; Kolose 2:13, 14) I nisi upu, i le silafaga a le Atua, sa lē toe aogā le Tulafono i tagata Iutaia po o Kerisiano. O le mea lea, faatasi ai ma isi vala o le Tulafono, e pei o taulaga e masani ai i le malumalu, sa lē toe manaomia le sefuluaʻi i le au faatuatua.

I le va o Kerisiano, ua uunaia le faia o foai e ala i le alofa, ae lē o le tulafono. Sa faamatalaina e le aposetolo o Paulo le mataupu silisili ina ua faamaopoopoina se meaalofa mo Kerisiano o loo iai le manaomia i Iutaia. Sa ia faapea mai: “Ia taitoatasi ma foai e pei ona filifili i lona  loto; aua ma le tiga, aua foi ma le faatauanauina; auā e alofa le Atua i le ua foai ma le loto malie.” (2 Korinito 9:7) Ua faataʻitaʻia e Molimau a Ieova lenei auala faale-Tusi Paia e faatatau i foai tauofo.

Pe tou te sailia se fesoasoani e ala i taumafataga saili tupe, teutusi e ao i ai ni tupe, talanoaga mo le faatupeina, ma auala tali tutusa faapena e faatatau i le sailia o ni tupe?

E leai, e tau lē faamalosia pe togafalea Kerisiano moni i le faia o foai e ala i le faatosinaina i ni taui ua faaaliali atu i o latou luma. Ua faaalia e vaega faalotu o loo sailia fesoasoani e ala i le faia o bingo, pasā, lūlū, faafiafiaga suetupe, le faaavanoa atu o nofoa o falesa e faaaogā i nisi mea ae totogi, po o le feaveaia o ipu e ao ai tupe, faapea latou te lē o avatuina i o latou tagata meaʻai faaleagaga, ma o lea, e lē o faagaeeina ai ma le saoloto e le agaga o le Atua o latou tagata lotu ina ia foaiina atu ni tupe. E faapena foi i latou o ē sailia fesoasoani e ala i faiga faaanamua o le sefuluaʻi.—Mataio 10:8.

Tou te faatupeina faapefea galuega e pei o le fausiaina o Maota o Malo fou ma ofisa o lala, faapea foi ma la tou faatelega i le ofisa ulu i le lalolagi atoa i Brooklyn ma Patterson, i Niu Ioka?

E liligiina ifo e Ieova lona agaga paia i luga o ana Molimau, o loo mafai ai ona “latou agalelei atu, ia tamaoaiga i galuega lelei, ia mataalofa, ia latou avatu fua a latou mea, ia latou teua oloa mo i latou lava, o le faavae lelei mo aso atali, ina ia latou fetagofi atu i le ola e faavavau.” (1 Timoteo 6:18, 19) E uunaia e lenei agaga Molimau a Ieova ina ia lagolagoina ai le galuega o le Malo i so o se auala.

Mo se faaaʻoaʻoga, i le 1989, sa faaaluina ai e Molimau e 3,787,188 i atunuu e 212 itula e 835,426,538 i le aʻoaʻoina i isi o le Afioga a le Atua. Ma na latou faia ai ni suesuega faale-Tusi Paia e 3,419,745 ma tagata fiafia e lē aunoa. O so o se tupe alu lava e aumaia i le faia o lenei galuega sa faatupeina e le tagata lava ia. Sa tauia e Ieova lea galuega alofa faatasi ai ma se faatelega e 263,855 Molimau fou na papatisoina.

Ua uunaia foi e se agaga tali tutusa faapena o le foai atu, Molimau ma tagata loto fiafia ina ia lagolagoina le galuega i se auala tau tupe. Latou te lagolagoina so o se galuega tau fausiaina atonu e manaomia, e pei o le toe faaleleia po o le toe faatelēina o la latou Maota o le Malo po o le Maota o Fonotaga po o le fausiaina o se maota fou, e ese ai mai le fesoasoani i le totogiina o tau masani a a latou lava faapotopotoga. I tausaga taitasi, sa ao ai ona fausiaina se numera tele o Maota o Malo, ona o le vave o le tuputupu aʻe, o le tau o nisi maota e faitau selau afe talā. O le tupe alu mo nei maota sa faatupeina e Molimau o lea lava vaipanoa e auala i a latou meaalofa tauofo ma galuega.

E lē gata i lea, o le tele o atunuu ua faatetelēina  ai fale lomitusi ma fale faaofisa o lala, faapea foi ma fale e nonofo ai—po o le fausiaina o fale fou—ina ia faanonofoina ai tagata faigaluega ua faatoateleina faapea ma mea mo galuega ua manaomia e le faalapotopotoga o loo tuputupu aʻe. Ua lagolagoina foi lenei mea i foai tauofo ma galuega, e pei ona iai galuega o le fausiaina ma le toe faaleleia i Brooklyn ma Patterson, i Niu Ioka. I mea e mafai ai, e faatupeina ai e Molimau o lea lava vaipanoa le galuega o le fausiaina. O nisi o tulaga, e fuafuaina ai e le Sosaiete o le Olo Matamata ina ia mauaina e lala le fesoasoani—le tulaga tau tupe ma le ituaiga o galuega ua faia ma le tomai—mai isi atunuu. O lea, ua faia ai se “faatatau,” i lalo o le faatonutonuga a le Sosaiete.—2 Korinito 8:14.

Aiseā tou te lē faia ai ni falemaʻi po o ni falemaʻi a tagata taitoatasi ma auai i galuega fesoasoani ma isi auaunaga faavafealoai e pei ona faia e le tele o vaega faalotu?

E vave lava ona tali atu Molimau a Ieova i faalavelave faafuaseʻi ona o iʻuga e oo i ai pe a mavae se taua po o se faalavelave tau natura pe a latou mafaia. O le mea moni, e masani lava o latou e muamua i se nofoaga o faalavelave ma mea taumafa, lavalava, ma tagata tauofo ina ia fesoasoani i le toe fausiaina. Ae peitai, e lē faia e Molimau a Ieova ni falemaʻi po o ni falemaʻi a tagata taitoatasi, e pei lava ona latou lē puleaina ni matagaluega tau fuimū po o leoleo, o mea o loo faasaoina ai foi le ola.

O latou o ni faifeau ua tuuina atu o le tala lelei, ma o la latou tofiga o le talaʻi atu ma aʻoaʻo le tala lelei o le Malo o le Atua i le lalolagi uma e fai ma molimau a o leʻi oo mai le iʻuga. (Mataio 24:14) E pei ona fetalai Iesu, ua tele le seleselega ae toaitiiti le au faigaluega. O le a lē faamagaloina le lafoaia o lenei galuega sili ona tāua ae ina ia faia ai isi gaoioiga, e tusa lava pe o le ā le taʻuaogāina.—Mataio 9:37, 38.

E pei ona tupu, o le toatele o Molimau a Ieova o ni fomaʻi, tagata tausi maʻi, ma ni tausi maʻi fesoasoani. Ae latou te manatu i lenei galuega o se mea faaopoopo i la latou galuega autū, le faiva faa-Kerisiano.

Pe mauaina e so o se tagata galue faaofisa po o sui o le Sosaiete o le Olo Matamata ni tupe faasili mai a tou galuega tau lomitusi ua faatelēina?

Ina ia faamamafa atu, e leai lava! I le tulafono, o le Sosaiete e lē o se faalapotopotoga e faia  ai ni tupe faasili. E leai ni tagata e o latou le faalapotopotoga, leai ni tagata e faisea i ai, e oo lava i ni totogi. Ua faia e faifeau taitoatasi i le ofisa ulu, o loo aofia ai le peresitene a le Sosaiete ma faatonu sili, se tautoga faatulafonoina e faatatau i le mativa. Na te mauaina mea taumafa, le mea e nofo ai, ma le tausiga faafomaʻi e manaomia, faapea foi ma se tupe itiiti e totogiina atu mo tupe alu a le tagata lava ia. Afai e faimalaga se Molimau ona o pisinisi a le Sosaiete, e masani lava ona totogia e le Sosaiete.

E faaopoopo atu i ai, e leai se mea i le lalolagi e totogia ai e se faifeau le faia o ni faaipoipoga, papatisoga, po o ni falelauasiga. Ma e leai foi ni totogi ulufale po o ni tupe e aoina i lauga lautele po o tauaofiaga.

Talu ai e lē taitai ona feaveaia ni ipu e aoina ai ni tupe, e mauaina faapefea e faapotopotoga meaalofa ina ia faafetaiaia ai a latou tupe alu?

E iai pusa mo meaalofa i Maota o Malo ina ia mafai ai e tagata ona faia ni foai tauofo pe a mananao ai. (2 Tupu 12:9) E talisapaia foai uma e tusa lava pe telē pe itiiti. (Mareko 12:42-44) E faatasi i le masina ona faitauina e le faifeau o loo vaaia le tala o le tupe a le faapotopotoga se faamatalaga puupuu i le faapotopotoga e faailoa atu ai ia i latou le aofaiga o meaalofa ua mauaina, tupe faaalu, ma foai ua faia e le faapotopotoga i le Sosaiete o le Olo Matamata ina ia lagolagoina ai le galuega o le talaʻiga i le lalolagi aoao ma isi galuega fai.

Pe a malamalama tagata i lenei faatatauga, latou te saoloto e faia sa latou sao pe a mananao ai, e taitoatasi ma fai “faatatau . . . ma lona manuia.” (1 Korinito 16:2) O le faiga lenei i faapotopotoga taitasi o faapotopotoga e sili atu i le 66,000 i le lalolagi aoao.

I le Penetekoso sa tutusa ai le faiga e uluai Kerisiano o mea uma. Pe faia faapea e Molimau a Ieova?

Sa tupu se tulaga faafuaseʻi mulimuli mai i le Penetekoso 33 T.A. ina ua nonofo pea i Ierusalema tagata Iutaia mai nofoaga mamao o ē na faatoʻā uma ona faaliliuina i le Faa-Kerisiano ina ia maua atili ni faamalamalamaga faaleagaga. Sa latou manaomia ai ni mea e nonofo lē tumau ai ma ni mea taumafa; o le mea lea, sa faia ai e Kerisiano o lea lava vaipanoa se faatauga tauofo o mea totino ma se fetufaaiga tutusa o mea na maua mai ai ina ia saunia ai mea mo se vaitaimi umi atu o le aufaatasiga. (Galuega 2:1, 38-47; 4:32-37) Sa leai se tasi na faamalosia ina ia faatauina atu se mea pe foai ane foi. (Galuega 5:1-4) O lenei tausia tutusa o mea sa lē avea o se faakomunisi, e pei ona manatu i ai nisi. Sa na o se faatatauga lē tumau. Ina ua toe foi atu Kerisiano i o latou aiga, ona gata foi lea.

Pe tou te aʻoaʻoina faapea o le foai atu o mea faitino o se auala lea o le togiolaina o agasala?

E mamao lava mai lena! O loo faapea mai le Tusi Paia: “Ua outou iloa e lei togiolaina outou i mea e pala, o le ario po o le auro, nai la outou amio le aoga na tuuina mai e o outou tamā; a o le toto tāua o Keriso pei o lo le tamai mamoe e le ponā lava, e leai foi sona leaga.”—1 Peteru 1:18, 19.

E tuu atu le faatuatua o Molimau a Ieova i le taulaga togiola a Iesu mo le faaolataga. Latou te lē faia ni meaalofa tauofo ma faatalitalia faapea o le a aumaia e lenei mea ia i latou le faaolataga. Ae ui i lea, latou te iloaina faapea e manaomia ni tupe e tele ina ia faasalafaina atu ai le tala lelei o le lalolagi fou amiotonu a le Atua. (2 Peteru 3:13) Ma latou te lagona faapea o le saosaolaumea i lea faalauiloaga o se faaeaga ua tuuina mai e Ieova.

Ina ua faia se meaalofa tele mo le malumalu a Ieova na tuu e fausiaina e lona atalii o Solomona, sa tatalo le Tupu o Tavita: “Ieova e, e ou le silisili ese, ma le malosi, ma le matagofie, ma le mamalu, ma le malualii; auā o ia te oe mea uma o i le lagi ma le lalolagi; . . . A o ai ea aʻu nei? O ai ea foi loʻu nuu, ina ua matou mafaia ona fai taulaga ma le loto faapenei? Auā mai ia te oe mea uma lava; o au mea foi ua matou foaiina atu ai ia te oe.”—1 Nofoaiga a Tupu 29:11, 14.

I aso nei, e lagona ai e Molimau a Ieova faapea ma isi tagata e mafuli atu i le amiotonu lea lava auala e tasi sa lagona e Tavita. Latou te fiafia e maua le faaeaga o le faia o meaalofa ina ia lagolagoina ai le galuega o le viiaina o Ieova, i le iloatinoina faapea o mea uma latou te avatu i lana auaunaga e sau mai ia te ia lava. E faamanuia e Ieova lea agaga, ma o le auala lenei na te faaolaolaina ai lana galuega.

[Pusa i le itulau 21]

LE AUALA E FAI MEAALOFA AI NISI I LE GALUEGA O LE MALO

□ MEAALOFA: E mafai ona auina saʻo atu foai tauofo o tupe i le Watch Tower Bible and Tract Society of Pennsylvania, 25 Columbia Heights, Brooklyn, New York 11201, po o le ofisa o le lala a le Sosaiete i lea lava vaipanoa. E mafai foi ona faameaalofa atu mea totino e pei o fanua, faapea foi ma maa tāua po o isi mea tāua. E tatau ona auina faatasi atu nei meaalofa ma se tusi puupuu faapea o lea le foai tuusaʻo.

□ FAATATAUGA O FOAI UA FAIA I LALO O TUUTUUGA: E mafai ona avatu tupe i le Sosaiete o le Olo Matamata i se tulaga o se mavaega, faatasi ai ma le maliega faapea ina neʻi teʻi ua manaomia totino, o le a toe faafoi atu i le tagata na foai ane.

□ INISIUA: E mafai ona taʻua faapea o le Sosaiete o le Olo Matamata o le a ia mauaina se maliega o le inisiuaina o le ola o se tasi po o se fuafuaga tau litaea po o le penisiona. E tatau ona logoina le Sosaiete i so o se faatatauga faapena.

□ MAVAEGA: E mafai ona tuuina ni teuga tupe i fale tupe i mavaega mo le Sosaiete. Afai e faia lenei mea, faamolemole logo le Sosaiete. E mafai foi ona foai atu ni oloa, ni tupe e toe totogiina mai faatasi ai ma se tupe faasili mo tupe na nonoina atu, ma fanua i lalo o se faatatauga ina ia aogā mo le tagata na foaia i le vaitaimi o lona olaga. E faalēaogāina e lenei faiga le tupe alu ma le lē mautinoa o le faamaoniga aloaia o le uili, a o faamautinoaina faapea e mauaina e le Sosaiete le mea totino pe a maliu.

□ UILI: E mafai ona tuuina atu fanua ma tupe i le Sosaiete o le Olo Matamata e ala i se uili ua faatulafonoina. E tatau ona auina atu se kopi i le Sosaiete.

Tusi mai i le Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201, po o le ofisa o le lala a le Sosaiete i lea vaipanoa, mo ni faamatalaga atili ma fautuaga e faatatau i ia mataupu.

[Ata i le itulau 22]

Se vaega o le nofoaga tutotonu tau aʻoaʻoga faale-Tusi Paia a Molimau a Ieova ua fausiaina nei i Patterson i Niu Ioka

[Ata i le itulau 23]

E faaolaolaina e Ieova le galuega o le fausiaina e ala i ona tagata o loo faia foai tauofo