Le Finauga Sili—O le ā lea?

O LE Ā le finauga sili ua fesagaʻi ma i tatou taitoatasi? Po o le siisii ea o peau o le sami ma uiga e lē masani ai o le tau ona o le vevela o le kelope? Po ona o le faaitiitia o le ea-osone, ua oo ai ina aliali atu i ave mataʻutia o le la e afaina ai? Po o le pasae aʻe ea o le faitau aofai o tagata, lea ua tutupu sautualasi aʻe ai isi faafitauli faalekelope, e pei o le mativa ma le solitulafono? Po ona o le popole i le faatamaʻiaga o le lē mafaitaulia o le faitau miliona i se taua faaniukelea, faatasi ai ma so o se tasi o le au faasaoina malaia o le a mulimuli ane maliliu i le tigā mai le malūlū, matelaina, po o le taia e ave malolosi o le la?

Ina ua uma ona talanoaina nei mea ma isi mataupu, i le 1989, ona faaiʻu mai lea e le mekasini Scientific American e faapea: “O le mautinoa mai o taua faaniukelea ua leai ai se faaletonu ai i le aumaia o le tulaga aupito sili ona mataʻutia i . . . le faasaoina.” Po o le taua faaniukelea ea la o le finauga sili lea o loo fesagaʻi ma i tatou?

Le Finauga Sili

Faatasi ma le suiga i tulaga faapolotiki talu mai le 1989, e foliga mai e itiiti se manatu i le taua faaniukelea. Ae, a umi la ona iai pea auupega faaniukelea, o le a latou aumaia ai se faamataʻu mataʻutia i le fanau a tagata. Peitai, o faamatalaga i le 1990 Britannica Book of the Year ua faasino atu i se isi mataupu faigatā. E tusa ma lenei tusi faamaumau, e sili atu i le 230 miliona tagata o loo ʻaināina le lalolagi, e lē talitonu i le Atua. Ua faaalia e isi puna faapea o le isi faitau miliona faaopoopo ua taaʻina e filosofia i Sasae ua faatagaina ai le manatu faapea e leai Sē na Foafoaina mea. E lē gata i lea, a o talitonu le faitau selau miliona i Lē na Foafoaina mea, ae o o latou manatu e uiga ia te ia e matuā ese mamao lava. Ma i le tele o itu, o a latou gaoioiga ua aumaia ai le faalumaina i Lē ua latou fai mai o loo latou tapuai atu i ai.—2 Peteru 2:1, 2.

Afai o soifua le Atua—ma e matuā mautinoa o loo soifua moni o ia—e mautinoa lava la o le finauga sili i aso nei e tatau ona aafia ai o ia. Aiseā na ia foafoaina ai le fanau a tagata? O le ā la tatou avega tauave agaʻi ia te ia? O le a faapefea ona ia gaoioi i le auala ua faaleagaina ai e tagata le lalolagi? Ma o le a faapefea ona ia tali atu i le luʻi ua faaalia e ala i le mumusu o le toatele e talitonu ia te ia pe gauaʻi atu i lona finagalo? O le mea moni, o le finauga sili o loo fesagaʻi ma i tatou taitoatasi o le pe tatou te talia pe teena le pule silisiliese a le Atua, “o lē na o ia e ou le suafa o IEOVA.”—Salamo 83:18, King James Version.

 Le Amataga o le Vateatea

E moni, ia i latou o ē e lē talitonu i le Atua, ua avea ai la tatou avega tauave ia te ia e lē o se finauga. Ae so o se tasi lava o lē na te vaavaai ma le faamaoni i le fuafuaina ma le matagofie o lo tatou aiga faalelalolagi ua faamalosia e ioe mai faapea, e tatau lava ona iai se Tufuga sili. E moni, ua tuuesea e le toatele o saienitisi le Atua mai le ata, i le taumafai e faamatalaina mea ofoofogia o le natura o loo siomia ai i tatou. Mo se faaaʻoaʻoga, e toatele ua faapea mai, o le vateatea na tupu aʻe i le tulaga ua iai nei mai si mea itiiti e matuā laitiiti lava na i lo o se mata o se pine, faapea na teʻi lava ua tupu aʻe “i se tulaga faalenatura,” e aunoa ma le manaomia o Sē na Foafoaina. Ae peitai, ina ua uma ona faamatalaina se tala fou lauiloa i le pe na faapefea ona amata le vateatea, ua ioe ai se tagata suesue i mea tau i le tulafono ma le malosi faalenatura o Hanbury Brown, i lana tusi The Wisdom of Science, e faapea: “I le toatele o tagata, ou te matea, e foliga mai lena mea e pei o se togafiti taumatemate na i lo o se faamalamalamaga.” Ua faaiʻu mai Polofesa Brown e faapea “o le amataga ma le fuafuaga o le lalolagi” o ni “mealilo sili ia” e foliga mai ua lē mafai e le faasaienisi ona foia.

Ua faaalia e saienitisi faapea o le malosiaga ma mea e faitino, e vavalalata lava lo la sootaga, ma faapea e mafai ona faaliliuina mea e faitino i le malosiaga ma le malosiaga i mea e faitino. E pei ona vaaia i pomu faaniukelea, o sina aofaiga itiiti lava o se mea e faitino, e maua mai ai se aofaiga tele o le malosiaga. O fea la o iai le puna o malosiaga uma e pei ona vaaia i le 100,000 miliona o fetu i lo tatou aniva, faapea foi ma le sili atu i le 1,000 miliona o aniva na o loo faia aʻe ai le vateatea vaaia?

Ua faapea mai le Tusi Paia: “Seʻi tetepa ae i luga, ma outou vaai, po o ai ea ua na faia nei mea? Na te taʻitaʻiina mai a latou ʻau ua faitauina; na te valaau ia te i latou uma i o latou igoa; ona o le tele o lona malosi ma lona mana tele; e leai so latou e le iloa.” O ai Ia lena? Ua faamauina e le Tusi Paia le tali: “O aʻu o Ieova, o loʻu igoa lea; o loʻu mamalu foi ou te le avatua lea i se tasi.”—Isaia 40:26; 42:5, 8.

O le manatu faapea na teʻi lava ua iai le lalolagi faatasi ma le vateatea uma ua aveesea ai le mamalu ua ono ma tatau i Lē na Foafoaina mea, o Ieova le Atua. (Faaaliga 4:11) Ua aveesea ai foi se faanaunauga malosi e faia se gaoioiga e tatau ai i le lalolagi. Afai sa iloa e tagata faapea o i latou e tali atu i le Atua mo mea ua latou faia i lana foafoaga, semanū o le a sili atu ona latou gaoioi ma le faaeteete e tusa ai ma ia mataupu e pei o le polusione, faaitiitia o le osone ma le vevela o le kelope.

Le Amataga o le Ola

Seʻi manatu foi i le fesili: Na faapefea ona amata le ola? Ua aʻoaʻoina e tagata faapea o le ola na teʻi lava ua iai e aunoa ma le faalavelave ane o le Atua. Ae o lenei mea e feteenaʻi ma se mataupu silisili faasaienitisi e mautu ma lelei le faavae. I se tasi taimi sa talitonuina faapea o aviivii sa maua mai i otaota o povi, o anufe e mai tino mamate, ma isumu mai le palapala. E oo lava i le faagasologa o le senituri na mavae atu nei, na aʻoaʻo ai e saienitisi faapea o meaola ninii e lē mafai ona vaaia e mata, na ō mai i mea e leai ni ola. Ae o manatu faapenei sa lē faamaonia e Redi, Pasteur, ma isi saienitisi. Ua taʻua i le tusi The World Book Encyclopedia (lomiga o le 1990) e faapea: “Ina ua mavae suesuega a Pasteur, ona talia ai lea e le toatele o tagata suesue i mataupu tau i le tino ma le ola le manatu faapea o ola uma lava e sau mai i mea e iai le ola.”

Ae peitai, ua manatu saienitisi faapea sa iai se eseesega i mea i aso lava la ua leva. Ua latou fai mai faapea, o le uluaʻi sela ola lava e tasi na teʻi lava ua tupu aʻe mai se paluga faatasi o mea e leai ni ola lea latou te taʻua o le paluga o mea tutupu i le talafaasolopito anamua, na o loo iai vailaau manaomia mo le ola. “O le tupu faafuaseʻi, ma o le faafuaseʻi na o ia, na faia na mea uma, mai le paluga o mea tutupu i le talafaasolopito e oo atu i le tagata,” ua faalauiloa mai ai e Christian de Duve i le A Guided Tour of the Living Cell.

I le tautala e uiga i le Atua, ua faapea mai le Tusi Paia: “O loo ia te oe le puna o le ola.” (Salamo 36:9) O lenei faamatalaga e ōgatasi moni lava ma le mea ua matauina—faapea o le ola na o le mea lava sa iai muamua le ola e sau ai. Ae peitai, talu ai ua filifili le faasaienisi autū e manatu i se tasi o meaalofa aupito sili ona tautele a le Atua, o le ola, e pei o se mea na teʻi ua tupu, ua lagona ai e le toatele o tagata faapea e lē o sa latou avega tauave i le  Atua le auala o faaaogāina ai o latou olaga. I lea ua latou solia ai tulafono a le Atua, tetee le tasi i le isi, gaoi e le tasi o mea a le isi, fasioti e le tasi le isi, ma le faamaumauina o tupe e tele, taimi, ma le tomai i le fuafuaina o auupega e fasioti ai tagata e fasia ma faatamaʻia ai i se tulaga e matuā lava lona mataʻutia.

Foiaina o le Finauga

E ese ai mai tagata e lē talitonu i le Atua ma tagata e lagolagoina faiga faaonaponei, e lē mafaitaulia foi isi ua latou faafitia le pule silisili ese a le Atua. E matuā toatele le aofai o tagata i aso nei ua faapea mai e talitonu i le Atua, ma e sili atu i le 1,700 miliona ua latou taʻua i latou lava o Kerisiano. Mo le faitau senituri, sa vivii atu ai i le Atua lotu a Kerisinetoma i luma o le lautele i a latou sauniga. Ae o fea o tutū moni ai le vaega toatele o na tagata e 1,700 miliona i le mataupu i le pule silisiliese a le Atua?

Ua faaalia uma e tagata taitoatasi ma malo lo latou lē faaaloalo mo lea pule e ala i le faasagatau i poloaiga patino a le Atua. O atunuu o loo faapea mai o i latou o Kerisiano ua latou faia gaoioiga sauā lē faaleatua, e aofia ai ma taua e lua aupito sili ona leaga i le talafaasolopito o le tagata—ma o taʻitaʻi lotu “Kerisiano” i itu uma e lua o loo latou faamanuia atu i na taua! E ala i lena pepelo, ua latou matuā suiseseina ai le Atua. E pei ona taʻua i le Tusi Paia: “Ua latou taʻu ane ua latou iloa le Atua, a e faafiti ia te ia i a latou galuega.”—Tito 1:16.

Ae peitaʻi, o le Atua, “e le mafaia e ia ona faafiti ia te ia.” (2 Timoteo 2:13) Ua tatau ona oo mai le taimi o le a ia foia ai vala uma o lenei finauga i le pule silisiliese ina ia ōgatasi ma lana lava fuafuaga faatulagaina: “E iloa ai lava e i latou o aʻu lava o Ieova.” (Esekielu 38:23) Ae aiseā ua saga umi ai pea ona ia faatali? O le a faapefea ona foia le faafitauli i le iʻuga? Ma e mafai faapefea ona e faia ni filifiliga saʻo i lenei mataupu aupito sili ona tāua?

 [Ē Ana le Ata i le itulau 2]

Cover background: U.S. Naval Observatory photo

[Ē Ana le Ata i le itulau 3]

Le vaaiga i tua atu o le ata: Le ata o le U.S. Naval Observatory