“Saili i le Filemu ma Tausisi i ai”
“Saili i le Filemu ma Tausisi i ai”
“Ia viia Ieova, o lē e saafi i le filemu o lana auauna.” —SALAMO 35:27, “NW.”
1. O le ā le filemu o loo tatou olioli ai i aso nei?
MAEU se olioli i le maua o le filemu i lenei lalolagi fevaevaeai! Maeu le fiafiaga e tapuai ia Ieova, ‘le Atua e ona le filemu,’ ma auai i faamanuiaga o lana ‘feagaiga o le filemu’! Maeu le faafouina, i totonu o omiga o le olaga, e iloa ‘le manuia [filemu, NW] mai le Atua, o loo silisili lava i mea uma e manatu i ai’ ma tofo i le ‘noataga o le filemu’ ua faapea ona autasia ai tagata o le Atua e tusa lava po o le ā lo latou atunuu, gagana, ituaiga, po o le talaaga faavafealoai!—1 Tesalonia 5:23; Esekielu 37:26; Filipi 4:7; Efeso 4:3.
2, 3. (a) A o tumau tagata o le Atua o se vaega atoa, o le ā atonu e tupu i Kerisiano taitoatasi? (e) O le ā ua uunaia tatou e le Tusi Paia e fai?
2 I le avea ma Molimau a Ieova, tatou te faapelepele i lenei filemu. Peitai, e lē mafai ona tatou tafili saunoa ai. E lē otometi ona tausisia le filemu ona e faapea o loo tatou auaumea faatasi ma le faapotopotoga Kerisiano pe ona ua avea ma vaega o se aiga Kerisiano. A o tumau o se lafu e tasi le vaega totoe faauuina ma ana aumea o “isi mamoe” seia oo i le iʻuga, e mafai ona leiloa le filemu o nisi tagata ma paʻūū ese ai.—Ioane 10:16; Mataio 24:13; Roma 11:22; 1 Korinito 10:12.
3 Na lapataia e le aposetolo o Paulo Kerisiano faauuina i ona aso: “Le au uso e, ia outou, neʻi ai i so outou le loto leaga ma le le talitonu, tou te o ese ai i le Atua soifua.” (Eperu 3:12) E faatatau foi lenei lapataiga i le motu o tagata e toatele. O lea ua uunaia ai Kerisiano e le Tusi Paia: “Saili i le filemu ma tausisi i ai. Auā o fofoga o [Ieova, NW] o loo faasaga i e amiotonu, e liliu mai foi ona taliga i a latou faatoga. A o fofoga o [Ieova, NW] o loo faasaga ma le toasa i e fai amio leaga.”—1 Peteru 3:10-12; Salamo 34:14, 15.
“O le Loto i la le Tino”
4. O le ā e mafai ona faavevesia lo tatou filemu ma le Atua?
4 O le ā e mafai ona faauilavea i lo tatou tausisia o le filemu? Ua taʻua e Paulo se tasi mea ina ua ia faapea mai: “O le loto i la le tino o le oti lea; a o le loto i la le Agaga o le ola lea ma le [filemu, NW]; auā o le loto i la le tino o le ita lea i le Atua.” (Roma 8:6, 7) O la le “tino,” o loo faatatau e Paulo i lo tatou tulaga augavale o ni tagata lē lelei atoatoa ua tuufaasolo mai i ai faanaunauga agasala. O le toilalo i faanaunauga o le tino augavale o le a faatamaʻia ai lo tatou filemu. Afai e faia ma le lē salamō e se Kerisiano se amioga lē mamā, pepelo, gaoi, faaaogā fualaau oona, pe solia le tulafono tauatua i nisi auala, ua ia faavevesia ai la le filemu ma Ieova lea sa ia olioli ai muamua. (Faataoto 15:8, 29; 1 Korinito 6:9, 10; Faaaliga 21:8) E lē gata i lena, afai na te faatagaina mea faitino ia sili atu ona tāua ia te ia na i lo mea faaleagaga, ua matuā faamataʻuina ai lona filemu ma le Atua.—Mataio 6:24; 1 Ioane 2:15-17.
5. O le ā e aofia i le tausisia o le filemu?
5 I le isi itu, na faapea mai Paulo: “O le loto i la le Agaga o le ola lea ma le [filemu, NW].” O le filemu o se vaega o fua o le agaga, ma afai tatou te toleniina o tatou loto e sapaitalia mea faaleagaga, ma tatalo mo le agaga o le Atua e fesoasoani mai ia i tatou i lenei itu, ona tatou alofia ai lea “o le loto i la le tino.” (Kalatia 5:22-24) I le 1 Peteru 3:10-12, e fesootai le filemu ma le amiotonu. (Roma 5:1) Ua tautala Peteru faapea o le tausisi i le filemu e aofia ai le ʻalo ese mai le leaga ae fai le mea lelei.’ E mafai ona fesoasoani le agaga o le Atua ia i tatou e “tausisi atu i le amiotonu” ma faasaoina ai lo tatou filemu ma le Atua.—1 Timoteo 6:11, 12.
6. O le ā se tasi o avega tauave a toeaina e faatatau i le filemu o le faapotopotoga?
6 O le tausisia o le filemu o se popolega tele lea i toeaina i le faapotopotoga. Mo se faaaʻoaʻoga, afai e taumafai se tasi e faaofi mai ni faiga lē mamā, ua iai i toeaina le avega tauave e puipuia ai le faapotopotoga i le taumafai lea e aʻoaʻia lē ua agasala. Afai na te talia le aʻoaʻiga, o le a ia toe maua lona filemu. (Eperu 12:11) Afai e leai, atonu e tatau ona lafoaia o ia i fafo ina ia mafai ai ona faasaoina le faiā filemu a le faapotopotoga ma Ieova.—1 Korinito 5:1-5.
Filemu ma o Tatou Uso
7. O le ā se faaaliga o ‘le loto i la le tino’ ua lapataia ai e Paulo Kerisiano i Korinito?
7 ‘O le loto i la le tino’ e lē gata e mafai ona faaumatia ai lo tatou filemu ma le Atua ae faapena foi i la tatou faiā lelei ma isi Kerisiano. Na tusi atu Paulo i Korinito: “Ua faaletino pea outou; auā ina o i ai ia te outou le mataua, ma le misa, ma fevaevaeaiga, ua le faaletino ea outou, ma savavali i la tagata?” (1 Korinito 3:3) O le mataua ma misa e matuā tuufaafeagai ma le filemu.
8. (a) O le ā e mafai ona tupu i se tasi e faapogaia le mataua ma femisaʻiga i le faapotopotoga? (e) O le ā e faalagolago i ai lo tatou filemu ma le Atua?
8 O le saveuina o le filemu o le faapotopotoga i le faapogaia o le mataua ma misa e matuā mataʻutia. Sa lapatai mai le aposetolo o Ioane, ina ua tautalagia se uiga e fesootai ma le filemu o se fua o le agaga: “Afai e faapea mai se tasi, Ou te alofa i le Atua, a e ita i lona uso, o le pepelo lava ia; auā o le le alofa i lona uso ua ia vaai atu i ai, pe mafai faapefea ona alofa o ia i le Atua ua ia le vaai atu i ai.” (1 Ioane 4:20) I se auala tali tutusa, afai e faapogaia e se tagata le mataua po o femisaʻiga i le va o uso, pe mafai moni ea ona ia maua le filemu ma le Atua? E mautinoa e leai! Ua uunaia i tatou: “Ia faaauau ona olioli, ia fetuutuunaʻi, ia fefaamafanafanaʻi, ia loto gatasitasi, ia ola fifilemu; ona ia te outou lea o le Atua e ona le alofa ma le filemu.” (2 Korinito 13:11, NW) Ioe, afai e faaauau ona tatou ola fifilemu o le tasi i le isi, ona ia i tatou lea o le Atua e ona le alofa ma le filemu.
9. E faapefea ona tatou iloa o le a iai i Kerisiano feeseeseaʻiga ma feteenaʻiga i nisi taimi?
9 E lē o le uiga o lenei mea e faapea o le a lē taitai ona iai ni feeseeseaʻiga i le va o Kerisiano. I vaiaso mulimuli ane i le Penetekoso, sa iai se feteenaʻiga i le faapotopotoga fou Kerisiano e uiga i le faasoasoaina o meaʻai i aso fai soo. (Galuega 6:1) I se tasi o mea na tupu sa taʻitaʻia ai le feteenaʻiga i le va o Paulo ma Panapa i le ‘pasae aʻe o le ita.’ (Galuega 15:39) Sa tatau ona tomatauina e Paulo Evotia ma Sunetui, o ni tuafafine e lē masalomia le lelei, ma le maelega, ina “ia tasi lo la manatu, i le Alii.” (Filipi 4:2) E lē tioa la ona avatu e Iesu se fautuaga auiliili i le auala e foia ai fevesiaiga o le filemu i le va o Kerisiano ma faamatilatila ai le vave taulimaina loa o na faafitauli! (Mataio 5:23-25; 18:15-17) O le a ia lē aumaia lenei fautuaga pe ana fai na te lē faatalitalia ni faafitauli i le va o ona soʻo.
10. O ā tulaga e manu aʻe i nisi taimi i se faapotopotoga, ma o le ā le avega tauave ua faatietie atu e lenei mea i ē uma e aafia ai?
10 O lea, i aso nei, e matuā ono mafai ona tausuai se tasi i se tala e leʻi mafaufauina po o sina mata faasiasia mai se aumea Kerisiano. Atonu e matuā ilitata i le isi se uiga o se tasi tagata. E mafai ona felaasaʻi uiga totino faaletagata. Atonu e matuā gaulēmalie se tasi i se faaiʻuga a toeaina. I le tino o toeaina lava latou, atonu e taofiofi mamau nauā se tasi toeaina ma taumafai e pulea isi toeaina. Ae ui ina moni e tutupu na mea, e tatau pea ona tatou sailia le filemu ma tausisi i ai. O le luʻi, o le faafoeina lea o ia faafitauli i se auala faa-Kerisiano ina ia faasaoina “le noataga o le filemu.”—Efeso 4:3.
11. O ā sauniuniga ua faia e Ieova e fesoasoani ai ia i tatou ia tausisi i le filemu ma isi?
11 Ua faapea mai le Tusi Paia: “Ia viia Ieova, o lē e saafi i le filemu o lana auauna.” (Salamo 35:27, NW) Ioe, e finagalo Ieova ia tatou maua le filemu. O lea, ua ia faia ai ni sauniuniga matilatila se lua e fesoasoani ia i tatou ia tausia le filemu i lo tatou lotolotoi atoa ma ia. O se tasi o ia mea o le agaga paia, lea ua avea ai le filemu o sona fua, faatasi ma isi uiga toafilemu e fesootai, e pei o le onosai, agalelei, agamalu, ma le lē gaoiā. (Kalatia 5:22, 23) O le isi o le poto tauatua, lea ua tatou faitau ai: “O le poto mai lugā e muamua ona mamā, i le ua filemu, e agamalu, e ganagofie, e tumu i le alofa ma fua lelei.”—Iakopo 3:17, 18.
12. O le ā e ao ona tatou faia pe afai e saveuina lo tatou filemu ma o tatou uso?
12 O le mea lea, pe afai e saveuina lo tatou filemu ma isi, e ao ona tatou tatalo mo le poto mai luga e faailoa mai ia i tatou le auala e gaoioi ai, ma e ao ona tatou ole atu mo le agaga paia ia faamalosia i tatou e faia le mea saʻo. (Luka 11:13; Iakopo 1:5; 1 Ioane 3:22) I le ōgatasi ma tatou tatalo, e mafai ona tatou tagaʻi i le puna o le poto tauatua, le Tusi Paia, mo se taʻiala, atoa ma le siakiina o lomiga faale-Tusi Paia o loo maua mo se fautuaga i le auala e faatatau ai Mau. (2 Timoteo 3:16) Atonu foi tatou te fia sailia se fautuaga mai toeaina i le faapotopotoga. O le laasaga faaiʻu o le mulimuli lea i le taʻiala ua aumai. Ua faapea mai le Isaia 54:13: “E aʻoaʻoina lau fanau uma lava e Ieova; e tele foi le [filemu, NW] o lau fanau.” O lona uiga e faalagolago lo tatou filemu i lo tatou faatinoina o mea ua aʻoaʻoina ai i tatou e Ieova.
“Amuia Ē Faatupuina le Filemu”
13, 14. (a) O le ā le uiga o le faaupuga a Iesu o “ē faatupuina le filemu”? (e) E mafai faapefea ona avea i tatou ma ē faatupuina le filemu?
13 Na fetalai Iesu i lana Lauga i le Mauga: “Amuia ē faatupuina le filemu; auā e taʻua i latou o atalii o le Atua.” (Mataio 5:9) O le “filemu” i inei e lē faatatauina i se tasi e lē soona tautala lona olaga. O le uiga o le uluai upu Eleni o “ē faatupuina le filemu.” O lē faatupuina le filemu e tomai i le faafoisia o le filemu pe a faavevesia. E ui i lea, e sili atu ona tāua, o lē faatupuina le filemu e tauivi ia alofia le saveuina muamua o le filemu. ‘E pulea e le filemu lona loto.’ (Kolose 3:15) Afai e tauivi auauna a le Atua e avea ma ē faatupuina le filemu, o le a faaitiitia la faafitauli i lo latou va.
14 O le avea ma lē faatupuina le filemu e aofia ai le iloaina o o tatou lava vaivaiga. Mo se faaaʻoaʻoga, atonu o iai i se Kerisiano le lotoa pe ilitata ma itaitagofie. A oo la i omiga, e mafai i ona faalogona tigā ona galo ai ia te ia mataupu silisili o le Tusi Paia. Ua lē tupu fua lenei mea i tagata lē lelei atoatoa. (Roma 7:21-23) E ui i lea, o le feitagaʻi, femisaʻi, ma le lotoa ua lisiina mai o ni galuega a le tino. (Kalatia 5:19-21) Afai tatou te iloa o ia i tatou na uiga—pe afai foi e faamanatu mai e nisi ia i tatou—e ao ona tatou tatalo ma le naunautai ma faaauau pea mo le agaga o Ieova e atiina aʻe ia i tatou le lē gaoia ma le agamalu. Ioe, e ao i tagata uma lava ona tauivi e galueaiina na uiga o se vaega o lona peresona fou.—Efeso 4:23, 24; Kolose 3:10, 15.
15. E faapefea ona feteenai le poto mai lugā ma le lotomaʻaa faavalevalea?
15 I nisi taimi, e faavevesia ai se faapotopotoga po o le tino o toeaina e se tasi e lotomaʻaa, e tautū pea i lana lava auala. E moni, a oo mai i le tulafono tauatua, e ao i se Kerisiano ona taofiofi mamau, pe lē fetuutuunai foi. Ma afai tatou te lagona e mafai ona aogā i isi se manatu lelei o loo ia i tatou, e leai la se mea e sese ai i le faaleoina atu o i tatou lava ma le tonu, pe afai tatou te faamatalaina atu a tatou mafuaaga. Peitai tatou te lē mananao e pei o i latou o le lalolagi o ē ‘lē gauai i so o se ioega.’ (2 Timoteo 3:1-4) O le poto mai lugā e filemu, ma agamalu. O i latou e gaoioi e faatuina se ala o le lotomaʻaa e lē masuia, e ao ona utagia le fautuaga a Paulo i tagata Filipi e ʻaua neʻi faia se mea e tasi ma le finau vale.’—Filipi 2:3.
16. E faapefea i le fautuaga a Paulo i le tusi o Filipi ona fesoasoani ia i tatou e foia le finau vale?
16 I le tusi lava lena e tasi, ua timaʻi mai ai Paulo e ao ona tatou ‘loto maulalo,’ ia faamaoni ona ‘manatu e sili isi ia i tatou.’ O le matuā tuufaafeagai lava lenei o le finau vale. O se Kerisiano taʻumatuaina e lē muai mafaufau e faamalosia ona lava manatu i isi, i le faasaoina po o le puipuia o lona lava tulaga ma le pule. O le a feteenai ai lenei ma le apoapoaiga a Paulo e ʻaua le taitasi ma vaavaai mo lona lava lelei, ae vaavaai foi mo le lelei o isi.’—Filipi 2:4; 1 Peteru 5:2, 3, 6.
Upu Filemu
17. O le ā le faaaogāina sese o le laulaufaiva e mafai ona saveuina ai le filemu o le faapotopotoga?
17 O se tasi e tausisi i le filemu e faapitoa lava ona faaeteete i lona faaaogāina o le laulaufaiva. Ua lapatai mai Iakopo: O “le laulaufaiva, o le mea itiiti lea, a ua lafo upu faasili. Faauta, o le afi itiiti e mu ai le vao laau e tele.” (Iakopo 3:5) O le faitala e faamanuʻa ai, le faitioina faananā o isi, o upu lē alofa ma le soona lafo, le muimui ma le faameo, atoa ma le faatagā faamaoni ina ia maua ai se lelei totino—o na mea uma o galuega ia a le tino e saveu ai le filemu o tagata o le Atua.—1 Korinito 10:10; 2 Korinito 12:20; 1 Timoteo 5:13; Iuta 16.
18. (a) I se tulaga e faaaogā sese ai le laulaufaiva ae leʻi fuafuaina, o le ā le ala saʻo mo ē uma ua aafia ai? (e) Afai ua mafua ona lafo ni upu faatigā e se tasi ona o le ita, e faapefea i Kerisiano taʻumatuaina ona tali atu?
18 E moni a, na faapea mai Iakopo: “E le mafai e se tasi tagata ona faalata i le laulaufaiva.” (Iakopo 3:8) E oo foi i Kerisiano taʻumatuaina i nisi taimi e tautatala i mea latou te matuā faanoanoa ai lava mulimuli ane. Tatou te faamoemoe uma o le a faamagalo i tatou e isi i na mea sese e pei foi ona tatou faamagaloina i latou. (Mataio 6:12) O nisi taimi e matuā pasae aʻe ai le ita e ono lafo ai ni upu faatigā. Ae o le a manatua e lē na te faatupuina le filemu faapea “o le tali filemu e liliueseina ai le ita; a o le upu faatiga e tupu ai le ita.” (Faataoto 15:1) E masani a, ona tau lava ina matuā manava i totonu ma teena le tali atu o upu maʻemaʻeā i ni upu e sili atu ona maʻemaʻeā. Mulimuli ane, pe a toʻa mālie le ita, o sē e faatupuina le filemu e telē le loto, na te iloa le auala e faagalo ai mea na taʻua i vevesiga i lena taimi. Ma o le a iloa foi e se Kerisiano loto maulalo le auala e faatoese ai ma taumafai e fofō so o se manuʻa na ia faapogaia. O se faailoga o le malosi tau amio le mafai ona faapea atu ma le faamaoni, “Ua ou sese.”
19. O le ā ua tatou aʻoaʻoina mai le auala na avatu ai fautuaga a Paulo ma Iesu?
19 E ono tatau ona faaaogā le laulaufaiva e tomatauina ai isi. Sa aʻoaʻia e Paulo i le lautele Peteru ina ua sese ona ia gaoioi i Anetioka. Ma na avatu e Iesu se fautuaga malosi i ana feau i faapotopotoga e fitu. (Kalatia 2:11-14; Faaaliga, mataupu 2, 3) Afai tatou te suesueina ia faaaʻoaʻoga, tatou te aʻoaʻoina ai e lē ao ona mālū naua le fautuaga, ona e leiloa ai lona tāua. E ui i lea, sa lē ʻinaʻinā pe sauā Iesu ma Paulo. Na lē avea a la fautuaga o se ala e sasaa atu ai o laʻua lava faagaulemalie. Sa la taumafai ma le faamaoni e fesoasoani i o la uso. Afai e lagona e le tagata o avatua le fautuaga e lē mafai ona ia pulea atoatoa lona laulaufaiva, e mafai ona ia filifili e malōlō ma seʻi fai ifo laitiiti ona faatoʻā tautala ai lea. Auā a lē o lena, atonu o le a ia tautala atu i ni upu faatigā ma faapogaia ai se faafitauli matuiā na i lo le mea o loo ia taumafai e faafoe.—Faataoto 12:18.
20. O le ā e ao ona puleaina mea uma tatou te talanoa ai pe faatatau i o tatou uso ma tuafafine?
20 E pei ona muai taʻua, e fesootai vavalalata le filemu ma le alofa o ni fua o le agaga. Afai o mea tatou te talanoa ai i o tatou uso—pe faatatau ia i latou—o se faaaliga lea e lē aunoa o lo tatou alofa mo i latou, o le a saosaolaumea la i le filemu o le faapotopotoga. (Ioane 15:12, 13) E tatau ona faia a tatou tautalaga “ma le alofa, ia faamāi i le masima.” (Kolose 4:6) E ao ona susua, e pei ona tatau ai, ia tosina i le loto. Na fautua mai Iesu: “Ia ia te outou le masima, ma ia fifilemu outou ia te outou.”—Mareko 9:50.
“Ia Outou Finafinau”
21. O le ā ua faamaonia e uiga i tagata o le Atua i a latou sauniga faalevaiaso ma taimi o fonotaga ma tauaofiaga?
21 Na tusia e le faisalamo: “Faauta, o le mea e matuā lelei ma le matagofie lava, pe a nonofo faatasi lava o uso.” (Salamo 133:1) E moni, tatou te fiafia e faatasitasi ma o tatou uso, ae maise lava i a tatou sauniga faalevaiaso ma taimi o fonotaga ma tauaofiaga tetele. I na taimi e faamaonia ai lo tatou filemu e oo foi i tagata i tua.
22. (a) O le ā le filemu pepelo e lē o toe mamao ae manatu atunuu ua latou ausia, ma e taʻitaʻia ai i le ā? (e) O le ā le filemu moni o le a taʻitaʻia i ai le feagaiga o le filemu a le Atua?
22 E lē o toe mamao ona manatu lea o atunuu ua latou ausia le filemu e aunoa ma Ieova. Ae a o latou faapea mai, ua ‘Filemu ma saogalemu!’ ona oo faafuaseʻi lea o le faaumatiaga ia i latou uma lava e lē o filemu ma le Atua. (1 Tesalonia 5:3) A maeʻa lena, ona faasolo loa lea ona faamalōlō e le Perenise sili o le Filemu le fanau a tagata mai iʻuga malaia ina ua leiloa le filemu o le tagata ma le Atua i le amataga. (Isaia 9:6, 7; Faaaliga 22:1, 2) Ona faaiʻu ai lea o le feagaiga o le filemu a le Atua, i le nofo filemu o le lalolagi aoao. E faapena foi i manu o le fanua o le a oo ina mapu mai le feainaʻi.—Salamo 37:10, 11; 72:3-7; Isaia 11:1-9; Faaaliga 21:3, 4.
23. Afai tatou te faapelepele i le faamoemoe o se lalolagi fou filemu, o le ā e ao ona tatou faia nei?
23 Maeu le mamalu o le a iai i lena taimi! O e tepa taulai atu ea i ai ma le naunau? Afai o lea, ia “tausisi i le filemu ma tagata uma.” Saili nei le filemu ma ou uso, ae maise lava ma Ieova. Ioe, “ua outou faatalitali i ia mea, o lea ia outou finafinau ai lava ina ia maua outou e ia ma le [filemu, NW], ua le ponā, ma le le mataʻuleagaina.”—Eperu 12:14; 2 Peteru 3:14.
O E Manatua?
□ O le ā e mafai ona talepeina lo tatou filemu ma Ieova?
□ O ā ituaiga o feeseeseaʻiga atonu e manaomia ona foia i le faapotopotoga?
□ O ā sauniuniga ua faia e Ieova e fesoasoani ai ia i tatou e sailia le filemu ma tausisi i ai?
□ O ā uiga faaletino e mafai ona saveuina ai le filemu o le faapotopotoga, ma e mafai faapefea ona tatou faafetaiaʻia?
[Fesili mo le Suʻesuʻega]
[Ata i le itulau 16]
E tele le filemu o i latou e aʻoaʻoina e Ieova
[Ata i le itulau 18]
Maeu le matagofie o le filemu o uso o loo auauna autasi!