Tuugatala ma Evaga a Tama ma Teine
MATAUPU 19
Tuugatala ma Evaga a Tama ma Teine
1-4. (a) Na faapefea lata mai nei ona avea tuugatala o se faiga taatele? (e) I mea e lē avea ai tuugatala o se aganuu, e mafai faapefea ona fuafuaina faaipoipoga? (i) I le iloiloga faaiʻu, o le ā e fuafuaina ai pe faapeī le lelei po o le leaga o ni aganuu?
O LE manaoga o tagata masani taitoatasi ina ia maua le olioli moni mai le olaga. Ua faaalia mai e le Tusi Paia faapea e tatau lenei mea, o loo lisiina mai ai le olioli o se tasi o “fua” o le agaga o le Atua. (Kalatia 5:22) O le toatele o tagata talavou ae maise lava i atunuu i Sisifo, latou te vaai i tuugatala o se auala autū lea o le mauaina o le olioli. E masani ona latou fuafuaina ina ia faaaluina le taimi ma se tasi o le isi ituaiga, e aunoa ma le iai o se tasi e vaavaaia i latou. O le ā e mafai ona fai atu e faatatau i lenei mea?
2 Atonu e te manatu i tuugatala o se mea e masani ai, o se faiga ua faatalitalia, talu ai e matuā taatele lava i le tele o nofoaga. Ae peitai, ua lē o faapena pea, e pei ona faamatalaina mai e le tusi The Family in Social Context: “E pei ona tatou iloa, o tuugatala ai lava na aliaʻe mai ina ua mavae le Taua Muamua a le Lalolagi.” Peitai, i le tele o atunuu, sa lē taitai lava ona avea tuugatala o se aganuu. O le mea moni, e mafai ona lē feiloai lava le faatoanofotane ma le faatoafaiavā o le a faaipoipo seia oo i lo la aso e faaipoipo ai. E faataunuuina e o la mātua fuafuaga mo la la faaipoipoga, pe atonu foi e faia e se “tagata tau faapipii” po o le tagata “ave feau.”
3 O le mea moni, afai e te nofo i le mea e taliaina ai tuugatala ma evaga faapea o se mea e masani ai, o le lē iai la o nei aganuu i nisi o atunuu atonu e foliga mai e faigata tele ona malamalama ai. Ae atonu foi o loo iso faapena tagata o loo nonofo i na atunuu i aganuu o le mea o loo e nofo ai. Atonu latou te manatu i tuugatala ma evaga faapea e lē o se mea poto, pe matavale. Sa faamatalaina e se teine mai Initia i se faufautua lauiloa o faaipoipoga i atunuu i Sisifo e faapea: “O le a matou mafaia faapefea ona iloiloina le uiga o se tama matou te feiloai i ai ma faauo i ai? Matou te laiti ma leai se poto masani. E matutua atu ma atamamai o matou mātua, ma e lē faigofie ona faaseseina i latou e pei o i matou. . . . E tāua tele ona ou iloa o le tane lea ou te faaipoipo i ai, o le tane tonu lea mo aʻu. E faigofie tele ona ou faia se mea sese pe afai ou te suʻea o ia e aʻu lava ia.”
4 O lea, na i lo le faia o se manatu pu moomoo ma mafaufau faapea e na o le pau lava le auala e faia ai mea o le auala lea o loo faia ai e tagata i lou lava nuu, e lelei pe a faalautele ou mafaufauga. Ae sili ai i na mea uma, i le iloiloga faaiʻu, o le auala e faataulauina ai ni mea, o taunuuga, o i inā e filifilia ai pe o le ā le lelei po o le leaga o loo iai nisi o aganuu. I le Tusi Paia i le Failauga 7:8, tatou te faitau i ai: “E sili ona lelei o le iuga o se mea i lona amataga.” Ma e ao ona tatou ioeina faapea, i le tele o atunuu o loo faia ai ma aganuu tuugatala ma evaga, o le pasene tele o faaipoipoga e lē o matuā faamanuiaina tele, ae o loo iʻu i talagā faaipoipoga.
O LE Ā LA E UIGA I TUUGATALA?
5-8. (a) E fesoasoani faapefea ia i tatou le mea ua fai mai ai le Failauga 11:9, 10 ina ia maua ai se vaaiga tumau e faatatau i a tatou amio? (e) Aiseā e mananao ai le toatele o tagata talavou ina ia tuutala?
5 Afai e te talitonu i le fefulifulisaiga o mea, o le a e manao ai ina ia iloiloina e lē gata na o iʻuga e lē tumau o tuugatala ae faapea foi taunuuga tumau. E fesoasoani Lē na Foafoaina i tatou ina ia vaai i mataupu mai lea vaaiga tumau. E finagalo mo i tatou ina ia maua mea o le a aumaia ai ia i tatou le fiafiaga moni ma le tumau. O lea ua ia uunaia ai mai lana Afioga: “Le taulealea e, ina olioli ia i lou tama itiiti, ia fiafia foi lou loto i aso o lou taulealea, ma ia e savali i ala ua e loto i ai, ma mea e vaai i ai ou mata; a ia e iloa e faamasinoina oe e le Atua ona o na mea uma. O lenei, ina faatea ese atu ia le tiga i lou loto, ma tuu ese atu le leaga i lou tino; auā o le tama itiiti ma le taulealea e faatauvaa ia.” (Failauga 11:9, 10) O le ā le uiga o lenei mea?
6 O lona uiga e finagalo Lē na Foafoaina mea ina ia e olioli i lou talavou, ae, i le taimi foi lava lena, aua neʻi auai i amioga o le a afāina tele ai lou olaga mulimuli ane. Ae leaga ua tupu soo tele lenei mea, e pei ona matauina e se tusitala o ona po nei: “O le vaega sili ona toatele o le fanau a tagata ua latou faaaogāina o latou uluai tausaga ina ia avea ai o latou tausaga mulimuli mai o ni tausaga leaga.” E te lē manao ina ia tupu lena mea ia te oe, a ea? E lē finagalo foi le Atua ina ia tupu. Ae peitai, o loo faaalia mai foi e le Tusi Paia i inei i le Failauga e faapea, e tuuaʻia e le Atua tagata talavou mo mea latou te faia. O le a lē avea lo latou talavou ma faamolemolega mo i latou mai le fesagaʻi ai ma taunuuga e iʻu i ai o le auala na latou filifilia e uia.
7 Ua taʻitaʻiina uma atu lea mea i le mataupu e faatatau i tuugatala. Faapefea? Ia, fesili ifo ia te oe lava ia: “Aiseā ou te manao ai e faia tuugatala? O le ā le mea o loo oʻu suʻea e lē mafai ona ou olioli ai, mo se faaaʻoaʻoga, le avea ma se tasi o se vaega? Aiseā ou te manao ai ina ia ma ō toalua ma se tagata o le isi ituaiga?” E lē o le mafuaaga autū ea o le tosinaga tuputupu aʻe e te lagonaina faasaga ia i latou o le isi ituaiga? Ua mafai ona iloa lenei mea mai le mea moni faapea, e masani lava ona avea le lalelei faaletino ma mea e moomia ai se tasi mo le faia o se “tuugatala.”
8 O le toatele o tagata talavou o ē tuutala e lē o matuā mafaufau e faaipoipo i le taimi nei, pe mananao tele foi i tagata o loo latou tuutala e avea ma se paaga faaipoipo. I le tele o nofoaga e manatu ai i le tuugatala o se aganuu, ua na ona vaai i ai o se ituaiga o faafouga o le tino, o se auala ina ia faaaluina ai se afiafi po o se faaiʻuga o le vaiaso. Ma o isi tagata, e faia tuugatala ona o loo faia foi e isi o la latou lava tupulaga, e lē mananao ina ia manatu ia i latou faapea “e fia ese.” Ae peitai, e lē fesiligia le mafai e tuugatala ona taʻitaʻiina atu ai i le “tiga,” ma oo atu ai lava i le “leaga.” Seʻi o tatou iloiloina le pogai e mafai ai.
O IʻUGA E OO I AI I LE FEPAʻIAʻI
9-11. (a) O ā fepaʻiaʻiga o le tino e masani ona aafia i tuugatala? Aiseā ua iai ai le faanaunauga faalenatura ina ia atili faasolosolo malie ona iai faalogona mafana? (e) Aiseā atonu e iʻu ai lenei mea i popolega mo se tagata e leʻi faaipoipo? (i) Afai e taʻitaʻiina atu le fepaʻiaʻiga o le tino i le faitaaga, e mafai faapefea ona iʻu lena mea i ituaiga eseese e tele o mala?
9 O le tele lava o taimi, o tuugatala e aafia ai se fepaʻiaʻiga i le tino—uu lima, feasogiga, po o se mea e sili atu i lena. Muamua lava, atonu o le fiafiaga tele le na o na tago atu i le lima o le isi tagata, e faapogaia ai i se tasi le faalogoina o se faalogona mafana. Peitai, pe a mavae sina taimi, atonu o le a leiloa lona manaia ma atonu e lē toe iai lea faalogona. O se mea e sili atu e pei o le feasogi, atonu e manaia. Ae, o lena foi la mea e mafai ona oo ina avea ma mea masani, ma oo lava ina fiu ai. Aiseā e faapea ai?
10 Ona o le mea o loo aafia ai faalogona tau feusuaiga faaleituaiga, o se vaega uma lava o se filifili o mea tutupu ua fuafuaina ina ia taʻitaʻiina ai i se taunuuga patino. O le sooga muamua, o le uluai paʻi. O le sooga mulimuli, o feusuaiga faaleituaiga, lea e faaalia e le Afioga a le Atua faapea ua teuina mo paaga faaipoipo. O mea uma lava i le va lea e mafai ona taʻitaʻiina atu ai i le sooga mulimuli o le fili fili. O lea la, afai e te leʻi faaipoipo, pe o se mea poto le amata i le sooga muamua, po o so o se isi lava sooga? O le faia faapea e foliga mai e aumaia ai le “tiga.” Aiseā? Auā o le a sauni ai lou lava tino mo se mea e lē tatau ona mauaina i le taimi nei, le sooga mulimuli lea. O le faagaeeina o le faanaunauga mo feusuaiga faaleituaiga ae lē faataunuuina lea faanaunauga, e mafai ona taʻitaʻiina atu ai i le atuatuvale ma popolega o le mafaufau.
11 E lē faaiʻuina e le faitaaga le “tiga.” Na i lo lena, e mafai ona taʻitaʻiina atu ai i le “leaga.” Faapefea? I le tele o auala. E mafai ona maua ai i le maʻi afi. E mafai ona maʻito ai le teine, ma mafai ai e lenei mea ona faamalosia le toalua lea i se faaipoipoga la te leʻi sauniuni moni i ai, ma afāina tele ai lo la fiafiaga i le lumanai. Po o le musu o le taulealea talavou e faaipoipo i le tamaitai talavou, ona saisaitia ai lea o le tamaitai ina ia tausia aʻe le tamaitiiti e ia lava e aunoa ma le iai o se toalua. Po o le faaosoosoina foi o le teine ina ia faia se faapaʻūga tama, lea e faaalia e le Tusi Paia o se ituaiga o fasioti tagata. Ae pe lē o le “leaga” ea lenei? Atonu e te lotomau faapea o le a lē aumaia e tuugatala ia te oe nei iʻuga. Ae o le toatele o ē sa lotomau e pei foi o oe, sa iʻu ina fesagaʻi ma nei faafitauli. O le mea moni lava la, e toe fesiligia lava le fesili pe faamata ua e sauni mo le faaipoipoga pe leai.
LOU TUPUTUPU AʻE TOTINO
12, 13. E mafai faapefea e le tuugatala ona faalavelavea ai le tuputupu aʻe o se tasi? O lea, o ā ituaiga o faiā e mafai ona sili atu ona aogā?
12 E tusa lava pe lē taʻitaʻiina saʻo atu tuugatala i le “leaga,” ae mafai ona iai isi mea e lē lelei ai. O se tasi o ia mea, o le auala o loo mafuli atu ai e faavave faaitiitia ifo lou naunau fiafia i le na o se tagata e toatasi. O le taimi lea mo le tuputupu aʻe o lou lava matua tau faalogona ootia, e mafai ai ona maua aogā e sili atu mai le auaufaatasi ma se vaega o ni tagata eseese e toatele. Afai o loo e iai i le taimi o lou taulealea talavou, aiseā e lē uaʻi muamua atu ai i le avea ma se taulealea moni e ala i le avea o isi taulelea ma au faauoga autū, o ē faaalia le manatu mo le mea saʻo? E te mafaia ona aʻoaʻoina mai ai agavaa ma ala e tele mai ia i latou. Afai o loo e iai i lou tulaga tamaitai talavou, aiseā e te lē muamua ai ona naunau fiafia ina ia e tuputupu aʻe e avea ma tamaitai moni, i le mauaina o aogā mai le auaufaatasi ma i latou o ē o ni tamaitai moni ma o ē mafai ona fesoasoani ia te oe ina ia atiina aʻe agavaa lelei ma ala faatamaitai? O tuugatala e faalavelavea moni ai ma faatelegeseina ai sea tuputupu aʻe.
13 A o leʻi avea tuugatala ma aganuu taatele, sa maua e tagata talavou mea e tele e aumaia ai le olioli ia i latou. E te mafaia foi. E te mafaia ona maua le olioli moni i talanoaga, aʻoaʻoga, atiina aʻe o ni tomai, galue i ni galuega fai, taalo i ni taaloga, alu i isi nofoaga ma matamata i mea. Ma e te mafaia ona maua ai le fiafia tele i le faia o nei mea ma se tasi o lou lava ituaiga pe faia faatasi ma se vaega. O le a e iloaina soo ai faapea o le eseese o tagata i le vaega—o nisi tou te tupulaga faatasi, o nisi e matutua atu, o nisi e laiti ifo—o le sili atu foi lena o le olioli o le a e mauaina.
O AFEA E FAAIPOIPO AI?
14, 15. (a) O le ā sou manatu e faatatau i le fautuaina o le faia o faaipoipoga a talavou mai le 13 e oo i le 19 tausaga? (e) O le ā le tiute tauave ua iai i mātua e tusa ai ma le faananunauga a la la fanau ina ia faaipoipo?
14 Ae peitai, e oo mai le taimi e masani ona manao ai le tagata talavou ina ia faaipoipo. O afea le taimi sili ona lelei mo lea—a o e iai pea i ou tausaga mai le 13 e oo i le 19? O le mea masani lava e leai, auā ua faaalia e mea moni maumaututū faapea, o le tele o faaipoipoga a talavou e i le va o tausaga ia, e lē o iai le manuia lava lea e tasi o loo iai i faaipoipoga ua matua ai i tausaga se tagata po o tagata uma e toalua ia o le a faaipoipo. E pei ona faamatala mai e se tagata poto faapitoa i mea tau va fealoai: “O loo faaalia e suesuega tau iloiloga e faapea, i le tulaga lautele, ua iloagofie lava faaipoipoga a talavou mai le 13 e oo i le 19 tausaga e ala i le maualuga o talagā faaipoipoga po o le lē fiafia e faatusatusa i faaipoipoga e faia a ua matutua.”
15 I le isi itu, e leai se faavae faale-Tusi Paia mo le faasaina maumaututu o faaipoipoga uma i le va o tagata talavou faapena. O le mea masani lava, e faatagaina e tulafono a le nuu i mātua le aiā ina ia faatinoina ai la la faaiʻuga taʻumatuaina ina ia filifili ai le mea la te talitonu o le a sili atu ona lelei mo la la fanau, ma taʻitaʻiina atu ai i le fiafiaga silisili ma maua ai aogā mo i latou. E mafai ona la filifilia pe faatagaina po o le lē faatagaina foi faaipoipoga a o la atalii po o afafine o ē o loo i lalo o la la pule. Ma le mautinoa lava, o le tele o faafitauli o o tatou taimi ma le pasene tele o faaipoipoga lē taulau, e tatau ona faapogaia ai i latou ina ia faaeteete. Ma e tatau ona faapogaia ai foi faapena tagata talavou fai mafaufau ina ia faaeteete—na i lo le ‘faanatinati e faaipoipo ma salamō i taimi paganoa.’ O se mea valea le oso vave atu i se faitotoa ona faapea o loo matala, ae e te lē o iloaina po o le ā le mea o loo iai i le isi itu.
FILIFILIAINA O SE PAAGA FAAIPOIPO
16-19. (a) I nofoaga e faatagaina ai le faia o evaga, o le a faamaonia faapefea le aogā o le faatatauina o le mataupu silisili i le Kalatia 5:13? (e) O le ā le sini e tatau ona iai i evaga? O lea, o le ā e tatau ona nofo sauni i ai i latou o ē auai ai? (i) Aiseā e lelei ai mo oe le faamasani ma se tagata o le isi ituaiga e avea o se tasi o se vaega, na i lo le lua ō toalua na o oulua?
16 I nisi nofoaga, e na o le pau lava le taimi e faatagaina ai se taulealea talavou ina ia faatasi ma se teine talavou, pe afai o loo iai mātua, po o se isi tagata matua atu. Ae peitai, i le tele o atunuu i Sisifo, e mafai e tagata talavou faapena ona faatasitasi e aunoa ma se tagata e vaavaaia. O le fesili la, o le ā e mafai e se tagata talavou ona fai ina ia faamautinoa ai o le a taʻitaʻiina atu lena evaga i se fiafiaga moni ma se faaipoipoga manuia, i nofoaga faapena o loo faatagaina ai le saolotoga tele?
17 E masani ona aumaia e le saolotoga tiute tauave. O lea, afai o le fesili lea ua lua fesagaʻi nei, e lelei ona e manatuaina le mataupu silisili matagofie ua faataatia mai le Tusi Paia i le Kalatia 5:13. O le mea moni, sa tautala le aposetolo o Paulo i inei e faatatau i le saolotoga faaleagaga na aumaia e le faa-Kerisiano ia i latou na taliaina. Ae e faatatauina le mataupu silisili i so o se ituaiga o saolotoga, ae maise lava pe afai tatou te mananao i lo tatou faatinoina o le saolotoga ina ia aumaia ai iʻuga lelei ma le finagalo malie o le Atua. Ua tusi le aposetolo: “Auā le au uso e, ua valaauina outou i le saʻolotoga; tau lava ina neʻi avea le saʻolotoga ma togafiti a le tino; a ia outou auauna le tasi i le tasi i le alofa.” O le alofa moni—mo le Atua ma o tatou tuaoi, o loo aofia ai ma le tagata atonu o loo tatou fai evaga i ai—o le a fesoasoani ia i tatou ina ia alofia ai le faaaogāina o so o se saolotoga tatou te maua i se auala manatu faapito ma faaleagaina ai.
18 Ma le talafeagai ai, e tatau ona faaauau evaga faatasi ai ma le faaipoipoga o sona sini. O lea, e lē tatau ona amataina a o leʻi sauni le tagata ina ia tauaveina tiute tauave faalefaaipoipoga. O le mea moni, e te lē mafaia ona iloaina mai lava i le amataga pe e te manao e faaipoipo i se tagata pe leai. O lea, e alagātatau ai ona aua neʻi vave tele ona mautu lou manatu i so o se tagata e toatasi. Ae e lē o se mafuaaga lea mo le faaauauina o ni “evaga” e na ona faateteine ai pe faateteine solo ai.
19 E tusa lava pe e te “fiafia” i se tasi, o le a poto mo oe mo se vaitaimi ona taumafai e tausia lau aufaatasiga ma se tagata faapena ua na o se tasi o se vaega, i gaoioiga faavaega. Aiseā? Auā, i tulaga faapena, e masani ona mafai ona e iloa lelei ai pe faapeī moni se tagata. O le mafuaaga ona tatou te mafuli uma atu lava e amioaʻi i “tatou lava” i le mea e masani ai pe a tatou lē iai i lalo o le omiga o le lagonaina faapea, e iai se tasi o loo uaʻi faapitoa mai ia i tatou. Ae afai e vavaeese ni tagata e toalua mai le vaega, o le faanaunauga masani lava e amata mai i lena taimi faasolo atu ai, o le amioaʻi lea e pei ona manao le isi tagata ia te oe ina ia e amioaʻi ai, e oo lava i le faaataina mai ai o mea e fiafia pe lē fiafia ai o ia (teine po o le tama). Ma e mafai i nisi taimi ona natiaina ai le tagata moni o loo iai se tasi. Pe a ō toalua, e vave mafai foi e ni tagata e toalua ona aafia i faalogona ootia, ona faapea ai lea ona la amata vaai le tasi i le isi faapea, “e matagofie mea uma e leai se mea e faaletonu ai.” Afai ua faaipoipo ni tagata e toalua ona o ni faalogona faapena ua mapuna aʻe, e masani ona la fesagaʻi ma se tulaga lē manuia e faateʻia tele ai.
20-22. (a) Aiseā e tāua ai le faia o se laasaga faamaoni ma le lē manatu faapito e faatatau i evaga? (e) O le ā e mafai ona e aʻoaʻoina i vaitaimi o le evaga e faatatau i se paaga o loo faamoemoe e te faaipoipo i ai? O ā uiga o le a e manao faapitoa lava ia iai i se paaga?
20 I le tulaga masani, e tausolomua le taulealea i le faia o le evaga, e ala i le faaalia o le naunau fiafia i le tamaitai. Afai e faamaoni [honest] o ia ma manatu mamafa i ai, e i le tamaitai la le aiā e talitonu ai faapea, a itiiti mai, o loo mafaufau o ia e faaipoipo. Ona ā lea? Ia, ona iai lea i le tamaitai le tiute tauave e fesili ai ia te ia lava pe na te talitonu e mafai ona ia mafaufau e faaipoipo ia te ia. Afai e matuā mautinoa e le tamaitai faapea o le a na lē mafaufauina e avea o ia ma ana tane o le a faaipoipo i ai, o le a avea o sona agaleaga le faatagaina o le taulealea ina ia fatufatu aʻe se naunau fiafia loloto ia te ia. Ua loto nisi teine ina ia faatagaina se tasi e faaevaina i latou tau lava ina ia faateteleina ai lo latou foliga fia lauiloa po o le moomia, ma le faamoemoe faapea o le a matauina ai loa i latou e isi taulelea talavou. Ua faia faapena foi e isi taulelea talavou, ma le mafaufau latou te mafaia ona “tuutala i le sili atu i le toatasi le teine,” maua se taimi fiafia ona alu ai lea a o leʻi oo ina matuiā le tulaga e oo i ai. Ae o le faaaogāina manatu faapito faapena o le saolotoga o se tasi e mafai ona faapogaia ai tiga moni ma manuʻa ogoogo atonu e faitau masina po o tausaga e faaleleia ai.
21 E mafai e le saolotoga ina ia faia ai evaga ona aumaia ni aogā pe afai lava e na ona faaaogāina ma le lē manatu faapito. E mafai ona maua ai se avanoa e faamasani lelei ai ma le tagata o loo e mafaufauina e faaalu ai aso o totoe o lou olaga. E faalagolago i le auala e taitoatasi ma faamaoni ai le tasi i le isi, lua te mafaia ai ona iloaina mea e taitoatasi ma fiafia pe lē fiafia ai foi, o tapulaa, amioga masani ma vaaiga, ioe, ma mea e taitoatasi ma feita ai faapea le faafoeina ma le tali atu i faafitauli po o faigata. E tonu lou manao ina ia iloaina mea e pei o le: Pe agalelei o ia (tama po o le teine), lima foai ma manatunatu i isi? Ae ā le faaaloalo i mātua ma tagata matutua? O iai ea ni faamaoniga lelei o le amio solia ma le loto maulalo, pe o le tagata e gugutu ma loto maʻaa? Pe o oʻu vaaia le pulea o ia e ia lava ma le paleni, pe na i lo lena, o le vaivai ma le faatamaitiiti, atonu e musuā pe oo lava i le itaitagofie? Talu ai o le vaega tele o le olaga o le galue, ae ā faailoga o le paiē, le lē maufaatuatuaina po o se uiga o le faataugā tupe? Ae ā fuafuaga mo le lumanai? E manaomia se fanau pe o loo iai se naunau fiafia i se galuega faapitoa? I se tala ua faaulutalaina “Faailoga Mataʻutia i Evaga,” ua taʻua ai e se tasi tusitala: “O la matou suesuega o ulugalii ua faamau pe ua faaipoipo ma le fiafia pe lē fiafia foi, na maua ai o ē ua faaipoipo e lē fiafia, e itiiti mea e malilie faatasi i ai i sini ma uiga tāua o le olaga.”
22 Ae sili ai i na mea uma, e tatau ona e fia iloa pe o le ā le tele o loo faaataina mai ai fuafuaga a le Atua i mea e fiafia i ai ma fuafuaga a le isi. Ioe, a iloa loa na mea uma, e faapeī le talafeagai lelei o oe mo le isi? Afai e iai ni feeseeseaiga matuiā, aua le faavaleaina oe lava i le mafaufau faapea o le a otometi ona foiaina e le faaipoipoga. Atonu o le a na ona atili lagonaina ai le feeseeseaiga ua faapogaia ai.
AMIO FAAMAMALUINA I EVAGA
23-26. (a) O le ā lou lagona e faatatau i le uu lima, feasogiga ma fusifusiga a ni tagata e toalua ua fuafua e faaipoipo? (e) Atonu e taʻusalaina faapefea se tasi i le “mataitu” ma le “amio leaga”? Aiseā e tāua ai ona alofia mea faapena? (Kalatia 5:19, 21)
23 I atunuu ua faatagaina ai e mātua auaufaatasiga e aunoa ma se tasi na te vaavaaia, e masani ai lava i le toalua lea o loo fai evaga ona auai i faailoaga o le alofa mafana e pei o le uu lima, feasogi, e oo lava i le fusifusi. E moni, ua iai i mātua le matafaioi ina ia faatonuina ai o la atalii ma afafine e tusa ai ma faatulagaga la te mananao ina ia latou amioaʻi ai. E mafai e toeaina i le faapotopotoga Kerisiano ona faatonutonu manatu o tagata talavou i mataupu silisili mamā e taʻitaʻiina ai ua maua i le Afioga a le Atua, ma so o se tasi lava o lē manao ma le faamaoni ina ia uia se ala poto i le olaga, o le a lotomalie ma fiafia e utagiaina fautuaga faapena.
24 E lē gata ina matuā faasaina e le Tusi Paia le faitaaga, o le feusuaiga faaleituaiga lea i le va o tagata e leʻi faaipoipoina, o loo aofia ai ma ē ua faamau, ae o loo lapataia mai ai foi faasaga i amioga lē mamā ma le “amio leaga,” lea e mafai ona tupu i le vaitaimi o evaga. (Kalatia 5:19-21) So o se toalua lava e utagiaina nei lapataiga, o le a laveaiina i laua lava mai faanoanoaga e tele ma o le a lē lamatiaina i le faalavelaveina o i laua i le manatuaina pea o nisi o amioga sese. Ae o le ā le amioga lē mamā e tusa ai ma tapulaa a le Tusi Paia? O le ā e mafai ona aofia ai?
25 E mafai ona avea le uu lima o se faailoaga mamā o le alofa mafana i le va o tagata o loo faamoemoe e faaipoipo. E moni, e iai sona aafiaga e faagaeeina ai, ae o se mea e masani ai ma e lē tatau ona leaga. Ia, na o le vaaia lava o le tagata o lē o loo mafaufau e te faaipoipo i ai atonu e faagaeeina ai foi, ‘e tatavale ai le fatu.’ (Pese Solomona 4:9) Ae ui i lea, e manaomia ona tatou manatua faapea, e faateleina e le fepaʻiaʻiga o le tino le “malosi” o le tosinaga faaleituaiga, ona o le natura lea faaletagata. O lea, ona o le iloaina o taunuuga e ono mafai ona iʻu i ai lea atonu e taʻitaʻiina atu i ai, ua sili ai i nisi tagata ona faatapulaaina i latou lava ma matuā taofiofia e tusa ai ma fepaʻiaʻiga o le tino i le vaitaimi o evaga. Ma e lē tatau i se tasi ona taʻu faatauvaaina pe manatu māmā i lo latou tulaga tau loto fuatiaifo.
26 O le feasogi e mafai foi ona avea o se faailoaga mamā o le alofa mafana i le va o ni tagata o loo faamoemoe e faaipoipo—pe atonu foi e leai. O le mea moni, o le fesili, O le ā le mamao e oo i ai le faanaunauga faaleituaiga i le mataupu? O le feasogi e mafai ona faia i se auala e faagaepuina ai le faanaunauga faaleituaiga i le tulaga ua matuā faagaeeina ai faaleituaiga le toalua lea. O le faagaeeina faaleituaiga e saunia ai ni tagata e toalua ina ia faia feusuaiga faaleituaiga, ae o lea faaeaga, e tusa ai ma le tulafono a le Atua, ua taofia mo na o tagata ua faaipoipoina. Afai e faaalia ma le iloa e ni tagata e toalua tulafono a le Atua e ala i le auai ma le loto i ai ma le lē ma i amioga e faagaeeina ai faanaunauga faaleituaiga, pe ala i le loteina o totoga sa po o se isi mea, ua taʻusalaina i laua i le “amio leaga” ma le “mataitu.”
27-30. O ā mafauaaga lelei o loo iai mo le alofiaina o amioga faagaee faanaunauga faaleituaiga a o leʻi faaipoipoina?
27 E tatau lava ona tatou faamaoni ia i tatou lava. Afai tatou te iloa e lē malosi le puleaina o i tatou lava e tusa ai ma nei mea, e lē tatau la ona tatou lamatiaina lo tatou lumanai po o le lumanai o le isi tagata e ala i le faia o mea faapena. Pe o le a e aveina se taavale agaʻi i lalo o se aʻega tafatō fepiopioaʻi pe afai e te iloaina e lē o lelei ona taofi? E tatau ona tonu i lou mafaufau po o le ā o le a fai ma faamautu lou loto e faatatau i nei mataupu, i le taimi a o e te leʻi amata ae lē ina ua uma. O le taimi lava e amata faagaepuina ai tuinanauga faaletino, e masani lava ona faigata ona taofia lo latou fatufatu aʻe. O i latou o ē faatagaina faanaunauga faaleituaiga ina ia fatufatu aʻe i totonu o i latou seia oo i le tulaga o le tuinanau ina ia faia feusuaiga faaleituaiga—ae latou te lē o maua le aiā i nei mea e ala i le faaipoipoga—ua tuuina atu i latou lava i popolega ma atuatuvalega. E pei lava o le faitauina o se tusi mālie—ae na ona iloa ane ua masaesae laupepa o le mataupu mulimuli.
28 O i latou o ē tausia a latou faiā tau i evaga i le tulaga maualuga, o le a sili mamao atu le lelei o le amataga o le faaipoipoga i lo i latou o loo lolo atu i le masaniga mafana e faateteleina ai ma le mautu i se tulaga faifai soo ma le loloto. O le ā le tele o le faaaloalo e mafai ona lagonaina e se teine mo se tasi na te taumafai ina ia ‘teena pea’? Ae o se taulealea talavou o lē faaalia le taofiofi ma le faaaloalo ma le malosi o le lotomamau, na te mauaina le faaaloalo. E faapena ona moni mo se teine. Ma na te manaomia faapitoa lava ona iloaina faapea, a o mafai e ona faalogona ona manaomia le taimi ina ia faagaepuina ai, ae seāseā ona moni lenei mea i se tama. E mafai ona faigofie ma vave faagaeeina faaleituaiga.
29 O le lolo atu i faailoaga faifai soo ma le faateleina o faanaunauga faaleituaiga, e mafai ona taʻitaʻiina atu ai i se faaipoipoga ua faia ae leʻi oo i le taimi e tatau ona fai ai. Ua faapea mai le tusi Adolescence and Youth: “O laasaga amata o evaga e masani lava o faaaliga o le alofa e lē moomia. O le faaipoipoga i lea taimi e mafai ona taʻitaʻiina atu ai se tagata ina ia faatalitalia mea e sili atu mai le faaipoipoga i lo le mea e mafai ona iloaina e so o se faaipoipoga. O le faaumiumi o le evaga e masani ona aumaia ai se malamalamaga e sili atu ona fetaui tonu e faatatau i le isi tagata ina ia maua mai ai se faaipoipoga femalamalamaaʻi.” Mo sea evaga faaumiumi, e ao lava ona faatinoina le taofiofi mamau—neʻi teʻi ua mafai ona vave fatufatu aʻe le malosi o uunaiga faaleituaiga ma avea ai o se lamatiaga moni.
30 E mafai foi ona feosofi aʻe faalētonu ma masalosaloga pe a mavae le faaipoipoga, pe afai e faatagaina faanaunauga faaleituaiga ina ia avea ma mea autū i le vaitaimi o le evaga. Atonu o le a amata taumānatu le toalua lea, Pe na ma faaipoipo moni lava ona o le alofa? Pe sa na ona ma maua i faanaunauga faaleituaiga? Sa avea ea o se filifiliga poto? Atonu foi e mafuli atu le teine e masalomia le moni o le alofa o lana tane, i le taumanatunatu pe na te leʻi faaipoipo ia te ia ona na o lona tino ae lē mo le ituaiga o tagata o loo iai o ia.
31, 32. O le ā e mafai ona fesoasoani i ni tagata e toalua ina ia alofia amioga faagaee faanaunauga faaleituaiga e ono faaleagaina ai la la evaga?
31 O lea, ina ia puipuia oe lava ma lou fiafiaga i le lumanai, alofia tulaga e taʻitaʻiina atu ai i faanaunauga faaleituaiga. O le a lē fesoasoani ia te oe nofoaga tuufua ma le pogisa ina ia tumau ai pea ona faamamaluina le evaga. O le a lē fesoasoani foi tulaga ua oo i le taimi ua nonofo lēleoa ma foliga mai ua leai se isi mea e faia vagana ai le auai i faailoaga o faanaunauga faaleituaga faapena. Ae tele fiafiaga mamā e mafai ona maua mai i gaoioiga e pei o le faasee i le aisa, taalo tenisi po o ni taaloga tali faapena, taumamafa faatasi i se faleʻaiga po o le asiasi atu i se fale mataaga po o se nofoaga o lea lava vaipanoa e manaia ma matagofie. A o olioli i se faalogona o le tuua toatasi ona o le lē faatasi ai ma tagata e te masani totino i ai, o le a ia te oe le malupuipuia o le lē matuā vavaeese mai isi tagata.
32 E faapea foi la, na i lo le mafaufau faatatau na o mea o loo e “misia” e ala i le faaalia o le taofiofi mamau, mafaufau i mea o loo e sauniuni i ai mo le lumanai. I tausaga uma lava la o loo sau, o le a e mafai ai ona toe tepa i tua i lau evaga, e lē ma le lē fiafia po o le faanoanoa, ae ma le fiafia ma le lotomalie.
[Fesili mo le Suʻesuʻega]
[Ata i le itulau 29]
Afai o le evaga o se faasologa o faailoaga o faanaunauga faaleituaiga lē taofiofia, o le a afāina ai faapefea i lenei mea faamoemoega mo se faaipoipoga manuia?
[Ata i le itulau 30]
E tele fiafiaga mamā e mafai ona auai ai se tagata talavou