O le Soifuaga o Iesu ma Lana Faiva

Faailoaga Faaiʻu, ma le Penetekoso 33 T.A.

I SE taimi faapitoa, ua faia ai e Iesu se fuafuaga mo le toʻa sefulutasi uma o ona aposetolo ina ia latou feiloai ma ia i se mauga i Kalilaia. E foliga mai na taʻu atu foi i isi soʻo e uiga i le feiloaiga, ma e sili atu i le 500 tagata o loo faapotopoto ai. Ua faamaonia maeu se fiafia ua iai i lenei tauaofiaga ina ua faailoa atu Iesu ma amata ona ia aʻoaʻo i latou!

Faatasi ai ma isi mea, ua faamatala atu e Iesu i le motu o tagata e toatele faapea, ua tuuina mai e le Atua ia te ia le pule uma lava i le lagi ma le lalolagi. “O lea, ia outou ō atu,” ua ia apoapoai atu ai, “ma fai tagata o nuu uma lava ma soʻo, ia papatisoina i latou i le suafa o le Tamā ma le Alo ma le agaga paia, ia aʻoaʻo i latou ia tausi i mea uma lava ua ou poloai atu ai ia te outou.”

Seʻi mafaufau i ai! O tane, fafine, ma tamaiti ua latou maua uma lava lenei tofiga ina ia faia se sao i le galuega o le faia o soʻo. O le a taumafai tagata tetee e taofia la latou talaʻiga ma le aʻoaʻo atu, a ua faamafanafana atu Iesu ia i latou: “Faauta! ou te ia te outou i aso uma lava seʻi oo i le faaiʻuga o le faiga o mea.” Ua faatasi pea Iesu ma ona soʻo e ala i le agaga paia, ina ia fesoasoani ia i latou e faataunuu la latou faiva.

Ua faailoa atu e Iesu o ia ua soifua mai i ona soʻo mo se vaitaimi e 40 aso mulimuli ane talu lona toetu mai. I taimi o nei faailoa mai, ua ia faatonu atu ai i latou e uiga i le Malo o le Atua, ma ua ia faamamafa atu ia i latou po o ā o latou tiute tauave i le avea o ona soʻo. I se tasi o taimi ua oo lava foi ina faailoa atu o ia i lona afa uso o Iakopo ma faamautinoa atu ai ia te ia lenei o lē sa lē talitonu muamua faapea o Ia moni lava o le Keriso.

A o iai pea le au aposetolo i Kalilaia, e foliga mai faapea ua faatonu atu e Iesu i latou ina ia toe foi atu i Ierusalema. Ina ua feiloai ma i latou i inā, ona ia fetalai atu lea ia i latou: “Aua tou te ō ese ma Ierusalema, ae ia faatalitali pea mo le mea na folafola mai e le Tamā, lea na outou faalogo ai mai ia te aʻu; auā o le mea moni, na papatiso Ioane i le vai, ae o le a papatisoina outou i le agaga paia, e lē o toe umi ni aso pe a mavae lenei mea.”

Mulimuli ane ona toe feiloai foi lea o Iesu ma ona aposetolo ma taʻitaʻi ia i latou i fafo atu o le aai e oo atu i Petania, lea e taatia i le malifa i sasae o le Mauga o Olive. Ua ofo lava, ona e ui lava i mea uma na ia fetalai atu ai e uiga i le lē o toe umi o se taimi ona ia tuua lea o le lalolagi mo le lagi, ae o loo latou  talitonu pea faapea o le a faavaeina lona Malo i le lalolagi. O lea ua latou fesili atu ai: “Le Alii e, o ona po nei ea e te toe fuataʻi ai le malo ia Isaraelu?”

Na i lo le toe taumafai e faasaʻo o latou mafaufauga sese, ua na ona tali atu ai Iesu: “E lē o sa tou aiā le iloa o taimi ma tau ua tuu e le Tamā i lona lava finagalo.” I lea, ua ia toe faamamafa atu ai le galuega e tatau ona latou faia, i lona fetalai atu: “E maua e outou le mana pe a afio ifo i o outou luga le agaga paia, e fai foi outou ma molimau ia te aʻu i Ierusalema atoa ma Iutaia uma lava ma Samaria e oo lava i tuluʻiga o le lalolagi.”

A o latou vaavaai atu pea, ae amata loa ona siitia Iesu agaʻi i le lagi, ona punitia loa lea o ia e se ao mai la latou vaai. Ina ua uma ona faaliliueseina lona tino faaletino, ona afio aʻe loa lea o ia i le lagi o se peresona agaga. A o pulatoʻa atu pea le toʻa sefulutasi i le lagi, ae faaali mai loa ni tagata se toalua e oofu i ofu sisina i o latou tafatafa. Ona fesili atu lea o nei agelu ua liutino: “Tagata o Kalilaia e, aiseā ua outou tutū ai ma vaavaai atu i le lagi? O Iesu lena ua aveina aʻe nai ia te outou i le lagi, o le a faapena lona toe afio mai, e pei ona outou vaavaai atu i ai i lona afio aʻe i le lagi.”

O le auala ua seʻi faatoʻā tuua ai e Iesu le lalolagi ua faia e aunoa ma le tatāina o ni faailipu ma sa na o ona soʻo faamaoni o loo latou vaavaai i ai. O lea, o le auala foi lena o le a toe afio mai ai—e aunoa ma le ilia o ni pu leo tetele ma e na o ona soʻo faamaoni foi latou te iloa faapea ua toe afio mai o ia ma ua amata lona faatasi mai i le mana o le Malo.

Ua ō ifo nei le au aposetolo mai le Mauga o Olive, ua sopoia atu le Vanu o Ketarono, ma toe ulu atu i Ierusalema. Ua latou nonofo ai pea i inā ona o le usiusitai i le poloaiga a Iesu. I le sefulu aso mulimuli ane, i le Tausamiga faa-Iutaia o le Penetekoso 33 T.A., a o faapotopoto pe tusa ma le 120 soʻo i se potu i luga i Ierusalema, ae faafuaseʻi ona faatumuina le fale atoa i se taalili e pei o se matagi ua agi malosi mai. Ua oo ina vaaia ni laulaufaiva e pei o ni afi, ma ua taitasi ma nofo i luga o i latou uma o iai, ma ua amata ai ona tautala le au soʻo i gagana eseese. O le liligiina ifo lenei o le agaga paia lea na folafola mai e Iesu! Mataio 28:16-20; Luka 24:49-52; 1 Korinito 15:5-7; Galuega 1:3-15; 2:1-4.

◆ Ia te ai ua fai atu i ai e Iesu faatonuga faamavae i se mauga i Kalilaia, ma o ā nei faatonuga?

◆ O le ā le faamafanafanaga ua saunia e Iesu mo ona soʻo, ma o le a faapefea ona ia faatasi pea ma i latou?

◆ Mo le ā le umi ae faailoa Iesu i ona soʻo ina ua mavae lona toetu, ma o le ā ua ia aʻoaʻo ia te i latou?

◆ O ai le tagata e manino lava sa lē avea o se soʻo a o leʻi maliu Iesu, lea ua faailoa i ai Iesu?

◆ O ā feiloaiga faaiʻu e lua ua faia e Iesu ma ona aposetolo, ma o le ā ua tupu i nei feiloaiga?

◆ E faapefea ona toe afio mai Iesu i le auala lava lea e pei ona ia afio ese atu ai?

◆ O le ā ua tupu i le Penetekoso 33 T.A.?