Le Tusi Paia—Pe mai le Atua?

O IEOVA, o se Atua e lē gata mai lona malosi ma lana pule, e mautinoa e iai le aiā e talanoa ai ma ana foafoaga faaletagata i so o se auala e finagalo i ai o ia. Afai e finagalo o ia e talanoa mai e ala i le afioga tusia, o le a ia faasaoina foi la lana feau i le faagasologa o tausaga. Pe o le tulaga ea lenei o iai e tusa ai ma le Tusi Paia?

Pe tusa o le 1,500 tausaga a o leʻi afio mai Keriso, ina ua amata ona tusia o le Tusi Paia, sa iai le tele o isi tusitusiga faalotu. Ae peitai, sa oo ina lē aogā nei tusi uma lava ma mulimuli ane ua mou atu. O nisi na eliina aʻe e tagata suesue i le eleele ma ua avea nei ma mea moni ua faaalia i fale mataaga. I le isi itu, o vaega o le Tusi Paia na tusia e sili atu i le tolu afe tausaga ua mavae, sa leʻi taitai lava ona faagaloina, ma o ona kopi, sa faasaoina e oo mai lava i o tatou aso. O se mea mataʻina lenei, ae maise pe a mafaufau atu i le tetee na mapuna aʻe faasaga i le Tusi Paia i le faagasologa o le talafaasolopito. E leai lava se isi tusi na avea ma taulaʻiga o le tele o teteega ogoogo ma le inosia. O le faitauina po o le tufatufaina atu o le Tusi Paia sa faasalaina ai i ni faasalaga, faafalepuipuiina ai, faasatauroina, ma e masani lava ona fasiotia ai.

Ua mafai faapefea i le na o se tusi ona faasaoina i lalo o nei tulaga? Ua taʻu mai e le Tusi Paia lava ia ia i tatou: “O le afioga a [Ieova] e tumau lea e faavavau lava.” (1 Peteru 1:25) O le tumau ma le lē mafaaumatia o le Tusi Paia ua fesoasoani e faailoa mai o ia lava e avea o le Afioga paia a le Atua.

E faaopoopo atu i ai, e ao ona tatou faatalitalia ma le tonu faapea, o le feau a le Atua mo le fanau a tagata o le a mafai ona maua i le lalolagi aoao. Po o le tulaga ea lea o iai le Tusi Paia? O le mea moni, o lea lava! E leai lava se isi tusi i le talafaasolopito e mafai ona sōsō atu i le Tusi Paia e tusa ai o lenei mea. O le faatatauga o le faasalalauina atu o le Tusi Paia ua tusa ua oo atu i le 3,000,000,000 togi. E lē gata i lea, e leai lava se isi tusi ua faaliliuina i le tele o gagana. Ua mafai nei ona  faitauina le Tusi Paia, i le avea o se tusi atoa po o se vaega, i le sili atu i le 1,900 gagana eseese. Ua lipotia mai e le Sosaiete Amerika o le Tusi Paia faapea, ua mafai nei ona oo atu i le 98 pasene o le faitau aofai o le lalolagi. Ua taʻua e le The New Encyclopædia Britannica le Tusi Paia “atonu o se tuufaatasiga o tusi ua sili ona taaʻina ai i le talafaasolopito faaletagata.” O lea, e lē o se manatu faasausili le faamatalaina o le Tusi Paia faapea o le tusi aupito silisili i le lalolagi.

O le ōgatasi o le Tusi Paia lava ia mai le amataga e oo i le faaiʻuga, ua o se faamaoniga malosi lea ia te ia lava faapea, e moni na faagaeeina e le Atua. Pe faaono avea o se mea moni le faatalitalia faapea, o tusitusiga a nisi o tagata eseese e 40 i se vaitaimi e sili atu i le 1,600 tausaga ua mafai ona faamaonia uma ai le ōgatasi ma le matua faavae e tasi? E ono lē mafai lenei mea pe ana tuu atu seʻi maua se avanoa pe i na o se taʻitaʻiga faaletagata. Ae, o le tulaga lenei e tusa ai ma tusi e 66 na o loo faia aʻe ai le Tusi Paia. E na o se malosi sili lava, se atamai na soifua mo se taimi umi e mafai ona faatinoina sea galuega mataʻina.

E Lē Na o se Talafaasolopito

O faamatalaga faatalafaasolopito o loo iai i totonu o le Tusi Paia e matuā ofoofogia lava. Ae o se feau mai le Atua o loo iai na o faamatalaga moni atoatoa faatalafaasolopito, o le a faamaonia ai le faatapulaa o lona aogā mo i tatou. Tatou te manaomia taʻiala ma le atamai aogā, ma e mafai foi ona maua na mea i le Tusi Paia. Mo se faaaʻoaʻoga, ua faalaeiauina i tatou e le Tusi Paia ina ia atiina aʻe “le alofa, o le olioli, o le filemu, o le onosai, o le agalelei, o le faamaoni, o le agamalu, ma le [pulea o oe lava]”—o mataupu na o loo tele ina tusia ai i ona itulau uma. (Kalatia 5:22, 23; Kolose 3:12-14) Ua fautuaina e le Tusi Paia le galue mamafa, le tumamā, le faamaoni, le faamaoni i le faaipoipoga, le faaaloalo ma le alofa i uso a tagata; ma o loo iai le matuā anoanoai o ʻoa o fautuaga faatatau i amioga a tagata i totonu o le aiga ma le nuu.

Pe a faatatauina, o le a tu matilatila mai le aogā moni o le fautuaga a le Tusi Paia. Na te tuusaolotoina i tatou mai le valea ma faiga faaagaga. (Ioane 8:32) E lē mafaatusalia lona atamai aogā. O le mea moni, o loo iai, e aunoa ma le fesiligia le atamai tauatua.

 O le faaupuga faapea “o loo ola le afioga a le Atua, o loo matuā galue foi” ua ōgatasi atoatoa ma le auala e suia moni ai tagata e le Tusi Paia. (Eperu 4:12) E faitau miliona i aso nei ua mafai ona manumalo i uiga totino ma ua suia o latou auala e faaumatia ai i auala sili ona lelei e avea o se iʻuga o le ave i fale o tapulaa a le Tusi Paia.—Efeso 4:22.

O le ā e tupu pe a lē amanaia tapulaa a le Tusi Paia? O le iʻuga o le lē fiafia ma atuatuvale, o taua, mativa, maua i faamaʻi pipisi ona o feusuaiga, ma aiga malepelepe. O mea lava na e ao ona faatalitalia auā o le lē amanaia o le Tusi Paia, o lona uiga o le teena lea o le taʻitaʻiga a le Atua, o lē na foafoaina le tagata ma silafia ona manaoga.

Ua valoia foi e le Tusi Paia le lumanai, o se mea e lē mafai e tagata ona fai. O le tulai mai o malo malolosi o le lalolagi e amata mai ia Papelonia e faagasolo mai ai i senituri o o tatou lava aso, sa faalauiloa mai faavaloaga i le Tusi Paia. (Tanielu, mataupu 2, 7, 8) E faaopoopo atu i ai, i le toetoe lava luaafe tausaga ua mavae, sa faaaofia mai ai i le Tusi Paia se faamatalaga saʻo lelei o tulaga o le lalolagi i lenei 20 senituri. (Mataio, mataupu 24, 25; Mareko, mataupu 13; Luka, mataupu 21; 2 Timoteo 3:1-5; 2 Peteru 3:3, 4; Faaaliga 6:1-8) O le lisi umi o valoaga ua faataunuuina o le Tusi Paia ua faamautinoa ai ia i tatou faapea o faamoemoega mo se lumanai fiafia e pei ona faamatalaina i ona itulau, e moni.

La Tatou Tiute Tauave

O nei mea uma o ni faamaoniga malolosi ia e iloa ai faapea ua fesootai moni le Atua ma tagata. E moni, sa faaauala atu e le Atua lana feau e ala i lima o tagata lē lelei atoatoa. Ae lē o se pogai lea e talitonu ai faapea ua lē moni le Tusi Paia ona faapea o se feau sa tuugutu mai le Atua, pe sa tuuina mai e ala i agelu, pe sa tusia faavavega i le lagi ma tuu lima mai i tagata i le lalolagi.

Ae peitai, o le iloa lelei o le paia, po o le tauatua, o le amataga o le Tusi Paia ua tuuina mai ai ia i tatou se tiute tauave. Ua faatalitalia ma le tonu i tatou e Ieova e faitau e lē aunoa lana Afioga. (Salamo 1:1, 2) O se faitauga Tusi Paia fuatele, e manaomia ai se uiga saʻo. E tatau ona manatua e se tasi faapea, e lē tatau ona faitauina le Tusi Paia e pei o so o se lomiga. E tatau i se tasi ona faalatalata i ai, ‘e lē o le upu a tagata, ae ia pei moni lava o le afioga a le Atua.’—1 Tesalonia 2:13.

O nisi o mea i le Tusi Paia atonu e faigata ona malamalama i ai. Ae ala i le faitau i ai e lē aunoa, e mafai ai e se tagata ona tupu aʻe i le malamalama ma maua atili ai se ata atoa o le finagalo o le Atua ma ana fuafuaga. (Eperu 5:14) Atonu e te lē o mautinoa atoatoa faapea o le Tusi Paia o le Afioga paia a le Atua. Ae e mafai faapefea ona e maumauaʻi i le faaalia o le talitonu po o le lē talitonu pe afai e te leʻi suesueina ma le faaeteete le Tusi Paia?

Ona o le lē mafai ona tetee atu i aso nei uiga lē fia talitonu faatatau i le amataga tauatua o le Tusi Paia, o se suesuega ma le faaeteete la o le Tusi Paia ua faapogaia ai le toatele o tagata mafaufau e faapea mai i upu a le aposetolo o Paulo: “Ia tuu le faamaoni i le Atua, a o le pepelo i tagata uma lava”!—Roma 3:4.

[Siata i le itulau 4]

(Tagaʻi i le lomiga mo le siata atoa)

Ua mafai nei ona maua le Tusi Paia e le 98 pasene o le faitau aofai o le lalolagi

E leai se isi tusi i le talafaasolopito e latalata atu i le Tusi Paia pe a faatusatusa atu i lona faasalalauina i kopi e 3,000,000,000. Ua taʻua e le tusi The New Encyclopædia Britannica le Tusi Paia faapea “ai o le tuufaatasiga ia o tusi e sili atu ona taaʻina ai i le talafaasolopito o le tagata”

[Ata i le itulau 4]

Ua faasaoina le Tusi Paia, a o isi tusitusiga faalelotu sa oo ina avea o ni nai mea faatauvaa i fale mataaga

I luga: Faamatalaga faa-Asuria o le Lolo

Taumatau: O tatalo i le atua o Aikupito o Ra

[Ē Ana le Ata]

O mea uma e lua: Courtesy of the Trustees of The British Museum

[Ata i le itulau 5]

Na tusia e ni tagata eseese e 40 i se vaitaimi e sili atu i le 1,600 tausaga, ae o loo mulimuli pea le Tusi Paia i le matua autū lava e tasi mai le amataga e oo i le faaiʻuga. Ua na o se atamai malosi sili uigaese, na soifua mo se taimi umi e mafai ona oo ai ni auga i sea sauniuniga mataʻina

[Ata i le itulau 5]

O le tulaʻi mai o malo malolosi o le lalolagi mai ia Papelonia e faagasolo mai ai i senituri seia oo mai i o tatou lava aso, sa faasilasila faavaloaga mai i le Tusi Paia. (Tanielu 2, 7, 8)

Taumatau: O Kaisara Aokuso Museo della Civiltà Romana, i Roma

[Ata i le itulau 6]

Toetoe lava luaafe tausaga ua mavae, na valoia ai ma le saʻo e le Tusi Paia tulaga o le lalolagi i aso nei. (Mataio 24, 25; Mareko 13; Luka 21; 2 Timoteo 3:1-5; 2 Peteru 3:3, 4; Faaaliga 6:1-8) O le lē masese o le saʻo o valoaga o le Tusi Paia ua faamautinoa ai ia i tatou faapea e faataunuuina lava le folafolaga a le Atua e uiga i se lalolagi parataiso

[Ē Ana le Ata]

Reuters/Bettmann Newsphotos