Aiseā ia Oofu ai i le Loto Maulalo?

NA SEʻI faatoʻā uma lava ona faitauina e le tusitala Amerika o Edgar Allan Poe lana tala fou i ni ana uo. Sa latou ula atu i ai ma faapea atu ua ia faaaogā soo le igoa o le toa. O le ā le uiga na faaalia e Poe? Na manatua e se tasi uo faapea: “Na lē mafai e lona agaga faamaualuga ona talia ni aʻoaʻiga i luma o tagata, o lea, na oso vave aʻe lona ita, na ia togi ai i le afi musaesae pepa uma lava a o leʻi mafai e ana uo ona taofia o ia.” Na leiloa ai se tala “matuā malie, e saoloto atoatoa mai lona uiga masani . . . o le loto tiga.” O le loto maulalo sa ono faasaoina ai le tala.

E ui lava ona o le faamaualuga e faia ai e tagata ni mea e lē atamai, ae ua salalau atu foi lea uiga i le lalolagi. Ae e ao i auauna a Ieova ona ese i latou. E tatau ona latou oofu i le ofu talafeagai lelei o le loto maulalo.

O le ā le Loto Maulalo?

Sa faasino atu e le aposetolo o Paulo i le ofu matagofie faa-Kerisiano o le loto maulalo ina o ia tusi atu i uso talitonu i le aai anamua o Kolose. Na ia uunai atu: “Ia oofu outou i le alofa mutimuti vale, ma le agalelei, ma le loto maulalo, ma le agamalu, ma le onosai, faapei o e ua filifilia e le Atua, o e ua paia ma ua alofaina.”—Kolose 3:12.

Ioe, o le loto maulalo o le ‘faamaualalo o le mafaufau.’ O le “maulalo o le mafaufau; leai se faamaualuga; e loto agamalu.” O se tagata loto maulalo e iai le “agaga loto maulalo; e lē faamaualuga.” E “matuā faaaloalo loloto o ia.” (The World Book Dictionary, Tusi I, itulau 1030) O le loto maulalo e lē palaai pe loto vaivai. E moni lava o le faamaualuga e faaatagia ai le vaivai, ae o le faaalia o le loto maulalo e masani lava ona manaomia ai le lototele ma le malosi.

I le Tusi Paia, o se upu Eperu ua faaliliuina “ia e faamaulalo oe lava” o lona uiga faaletino ia “soli oe i lalo.” I lea, na fautua mai ai le tusitala poto o le Faataoto: “Loʻu atalii e, afai . . . ua maua oe i upu a lou gutu, . . . ia laveaiina oe, pe a oo mai le pule a lau uo ia te oe; alu ia, ina ifo, [ia soli oe i lalo] ma e nati atu i lau uo.” (Faataoto 6:1-3) O lona uiga, ia lafoai le faamaualuga, ia iloa lelei lou sese, ia faasaʻo mea.

E Tatau ona Moni

E lē o tagata uma e foliga mai e agamalu, e loto maulalo moni. O nisi tagata e foliga mai e agamalu, ae matuā faamaualuluga lava ma o le a leai se mea e taofia ai i latou mai le faia o so o se mea ina ia maua ai le mea o latou mananao i ai. Ona iai foi lea o i latou o ē o faaaogā le ofu o le loto maulalo sese ina ia faaofo ai isi. Mo se faataʻitaʻiga, na fetaiaʻi le aposetolo o Paulo ma nisi o ē na faaalia le “faafia loto maulalo [NW],” ma na ia faaalia faapea so o se tasi e faia lenei mea, “o loo faafefeteina lona lava mafaufau faaletino.” O se tagata faapena sa sese lona mafaufau faapea, o le mauaina o le finagalo malie o le Atua sa faalagolago i le pe ʻai, inu, pe paʻi atu o ia i nisi o mea, pe sa tausi i ni aso faalelotu pe leai. E moni, atonu sa foliga mai o ia o se tagata faaaloalo i le lotu ma loto maulalo, ae sa le aogā lona faaaloalo pepelo. (Kolose 2:18, 23) O le mea moni, sa taʻitaʻiina atu ai o ia e manatu faapea o le taui o le ola, sa tuuina atu ia i latou o ē na lafoaia mea faitino. Sa faapogaia ai foi e lea mea se ituaiga faaʻoleʻole o le manao i mea faitino, ona o faasāsāaga matuiā na taulaʻi atu ai manatu i mea faitino na sa ia taʻutino mai e inoino i ai.

I le isi itu, o le loto maulalo moni e taofiofia ai se tagata mai le faaalia o le faatāuaina o ia lava i mea tau lavalava, teuga, ma tifiga o le olaga. (1 Ioane 2:15-17) O se tagata e ofu i le loto maulalo e lē uaʻi atu ma le lē tatau ia te ia lava po o ona tomai. Na i lo lea, o le loto maulalo e fesoasoani ia te ia e feagai ma isi i se uiga magafagafa ma ia vaai ai ia te ia lava e pei ona silasila ai o le Atua ia te ia. Ma o le ā le uiga o lea?

 Silafaga a Ieova

Ina ua sauni atu le perofeta o Samuelu e faauuina se tupu fou mo le nuu o Isaraelu, sa manatu o ia faapea ua filifilia e Ieova Eliapo le atalii o Iese. Ae na tulei le Atua ia Samuelu: “Aua e te vaai i lona tino, po o le maualuga o lona tino, auā ua ou tetee ia te ia; auā e le vaai Ieova pei o le vaai o tagata, auā e vaai tagata i le tino, a e [vaai] Ieova i le loto.” Na teena uma le toafitu o atalii o Iese. Sa filifilia e le Atua Tavita, o lē na faamaonia o se tagata faamaoni ma le loto maulalo.—1 Samuelu 13:14; 16:4-13.

O le ofu o le loto maulalo na te leoleomaluina i tatou mai le oo ina faamaualuga ma tetee malosi—ma lē fiafia i ai le Atua. “E tetee atu le Atua i e faamaualuga, a e foai mai le alofa tunoa i e faamaulalo.” (Iakopo 4:6) O lona manatu o loo faaalia i upu a le faisalamo: “O loo maualuga Ieova, a e silasila mai o ia i le ua faamaulalo; a o le ua faamaualuga, e silafia mamao mai e ia.” (Salamo 138:6; 1 Peteru 5:5, 6) Ua faaalia manino mai i lenei fesili na tuuina mai i le Mika 6:8 mea o manaomia e le Atua mai ana auauna: “ Se a foi se mea e finagalo ai Ieova ia te oe, pe a le o ia mea, ia fai le amiotonu, ia naunau i le alofa, ma ia feooai ma lou Atua ma le loto faamaulalo?”

Na Faaalia e le Atua ma Keriso

E lētioa ona faatalitalia i tatou e Ieova ia faaalia le loto maulalo! Ona o se tasi lea o ona lava uiga. Ina ua uma ona faasaoina o ia e le Atua mai ona fili, ona pese ai lea o Tavita: “Ua e [Ieova] foaiina foi ia te au le talita o le olataga, . . . o lou agamalu ua faasilisiliina ai aʻu.” (Salamo 18:35; 2 Samuelu 22:1, 36) E ui lava o loo i le lagi aupito sili ona maualuga Ieova, ae ua “faamaulaloina e ia ia ia e silasila mai i le lagi atoa ma le lalolagi. Na te faatulaiina mai le tagatālautele nai le efuefu, na te faaeaina le ua mativa nai le faatāfuna; ina ia faanofo faatasi o ia ma alii.” (Salamo 113:5-8) Ua faaalia e le Atua le loto maulalo e ala i le faatinoina o le alofa tunoa agaʻi i le fanau agasala a tagata. O lana feutagaiga ma ē agasala ma i le aumaia o lona Alo o le taulaga mo agasala, o faaaliga ia o lona loto maulalo, alofa, ma isi uiga.—Roma 5:8; 8:20, 21.

O Iesu Keriso, o lē sa “agamalu ma le loto maulalo,” ua ia faataatia le faaaʻoaʻo silisili faaletagata o le loto maulalo. (Mataio 11:29) Na ia taʻu atu i ona soʻo: “O sē faamaualuga o ia ia te ia, e faamaulaloina lea; a o sē faamaulalo o ia ia te ia, e faamaualugaina lea.” (Mataio 23:12) Ua lē na o ni upu e tau ina faamalie ai. I le po a o leʻi maliu o ia, na mulumulu ai e Iesu vae o lona au aposetolo, ua faia ai se auaunaga e na o pologa latou te faia e tusa ai ma le aganuu. (Ioane 13:2-5, 12-17) Sa auauna ma le loto maulalo Iesu i le Atua a o leʻi afio mai i le lalolagi, ma na faaalia le loto maulalo talu lona toe faatuina i se tulaga faaeaina i le lagi. O lea, na apoapoaia ai e Paulo uso talitonu ina ia ‘manatu e sili isi ia i latou’ ma ia maua le uiga loto maulalo o Iesu Keriso.—Filipi 2:3, 5-11.

Talu ai ona ua faaalia e le Atua ma Keriso le loto maulalo, o i latou la o faanaunau i le mauaina o le faamaoniga tauatua, e tatau ona faaalia mai lenei uiga. Afai sa tatou faasausili i nisi o taimi, o se mea atamai ona faamaulalo o i tatou lava ma tatalo atu mo le faamagaloga a le Atua. (Faatusatusa 2 Nofoaiga a Tupu 32:24-26.) Ma na i lo le manatu tele la ia i tatou lava, e manaomia ai ona tatou faatatauina le fautuaga a Paulo: “Aua le manatu i mea silisili, a ia feoai ma e ua faamaulalo.” (Roma 12:16) E mafai faapefea la ona aogā ia i tatou ma isi le loto maulalo?

 Aogā o le Loto Maulalo

O le tasi aogā o le loto maulalo e faapea, na te taofiofia i tatou mai le gugutu e uiga ia i tatou lava. I lea, ua tatou faasaoina ai le ita o isi ma alofia ai le faamaasiasia o i tatou lava pe a latou lē amanaia a tatou mea ia e fai. E ao ona tatou gugutu e uiga ia Ieova, ae lē ia i tatou lava.—1 Korinito 1:31.

O le loto maulalo e fesoasoani ia i tatou ia maua le taʻitaʻiga tauatua. Na auina atu e Ieova se agelu ia Tanielu i se faaaliga ona sa faamaulalo e lena perofeta o ia lava i luma o le Atua pe a saili mo se taʻitaʻiga ma se malamalamaga. (Tanielu 10:12) Ina o le a taʻitaʻieseina e Esera tagata o Ieova mai Papelonia ma le tele o auro ma ario e faamatagofie ai le malumalu i Ierusalema, sa ia faalauiloa atu se anapogi ina ia mafai ai ona latou faamaulalo i latou i luma o le Atua. O le iʻuga? Sa puipuia e Ieova i latou mai osofaiga a fili a o alu le faigamalaga mataʻutia. (Esera 8:1-14, 21-32) I le pei o Tanielu ma Esera, seʻi o tatou faaalia le loto maulalo ma saili le taʻitaʻiga a Ieova na i lo le taumafai e faataunuuina tiutefai mai le Atua i lo tatou lava atamai ma le malosi.

Afai tatou te oofu i le ofu o le loto maulalo, o le a tatou faaaloalo ai i isi. Mo se faaaʻoaʻoga, o tamaiti e maua le loto maulalo e faaaloalo ma usiusitai i o latou mātua. O Kerisiano loto maulalo e faaaloalo foi i o latou uso talitonu mai isi atunuu, lanu, ma talaaga eseese, auā o le loto maulalo tatou te lē faailoga tagata ai.—Galuega 10:34, 35; 17:26.

O le loto maulalo na te siitia le alofa ma le filemu. O se tagata loto maulalo e lē fetauaʻi ma ona uso talitonu i le taumafai ina ia faatuina ona aiā tatau atonu o manatu i ai. Sa faia e Paulo na o mea e atiina aʻe ai ma e lē faalavelavea ai se loto fuatiaifo o se uso. (Roma 14:19-21; 1 Korinito 8:9-13; 10:23-33) E fesoasoani foi ia i tatou le loto maulalo e siitia le alofa ma le filemu e ala lea i le faamagaloina o isi ona o ni a latou agasala faasaga ia i tatou. (Mataio 6:12-15; 18:21, 22) O le loto maulalo na te uunaia i tatou ina ia alu atu i se tagata o tatou agasala i ai, ia ioe i lo tatou sese, ia talosaga atu mo lana faamagaloga, ma ia faia le mea tatou te mafaia ina ia foia ai so o se mea sese atonu na tatou faia. (Mataio 5:23, 24; Luka 19:8) Afai e faalatalata mai ia i tatou se tagata na tatou faia i ai se mea sese, e uunaia i tatou e le loto maulalo ina ia faasaʻo mataupu i se auala filemu i le agaga o le alofa.—Mataio 18:15; Luka 17:3.

O le faaolataga e faalagolago i le faaalia o le loto maulalo. Mo se faaaʻoaʻoga, ua faapea mai e uiga i le Atua: “E te faaolaina [tagata loto maulalo]; a o loo e silasila ifo i e faamaualuga, ina ia e faamaulaloina i latou.” (2 Samuelu 22:28) Pe a ‘tietie atu i le ala o le upu moni, loto maulalo, ma le amiotonu’ le Tupu o Iesu Keriso, ona ia faasaoina ai lea o i latou ua faamaulaloina i latou lava i ona luma ma i luma o lona Tamā. (Salamo 45:4) O i latou e faaalia le loto maulalo e mafai ona latou maua se faamafanafanaga i upu ia: “Ia outou saili ia Ieova, outou uma ua agamalu i le nuu, o e ua faia lana faamasinoga; ia outou saili le amiotonu, ia outou saili le agamalu, atonu e lilo ai outou i le aso o le toasa o Ieova.”—Sefanaia 2:3.

Loto Maulalo ma le Faalapotopotoga a le Atua

O le loto maulalo ua na taʻitaʻiina tagata o le Atua e talisapaia lana faalapotopotoga ma nonofo ai e avea o ē tausisi i le faamaoni. (Faatusatusa Ioane 6:66-69.) Afai e lē tuuina mai ia i tatou se faaeaga o le auaunaga o tatou faamoemoe e maua, o le loto maulalo o le a fesoasoani ia i tatou ina ia felagolagomai ma i latou o amoina le tiute tauave i totonu o le faapotopotoga. Ma o lo tatou felagolagomai ma le loto maulalo o le a faataatia ai se faaaʻoaʻoga lelei.

I le isi itu, o le loto maulalo na te taofia i tatou mai le faaalia o le lē taulau e tusa ai ma o tatou faaeaga i le auaunaga i totonu o tagata o Ieova. Na te taofia i tatou mai le sailia o viiga mo galuega ia ua faaeaina ai i tatou e faia i totonu o le faalapotopotoga a le Atua. E lē gata i lea, afai ua faaeaina i tatou e auauna e avea o ni toeaina, o le loto maulalo o le a fesoasoani ia i tatou e tausia ma le agamalu le lafu mamoe a le Atua.—Galuega 20:28, 29; 1 Peteru 3:8.

 Loto Maulalo ma le Aʻoaʻiga

O le ofu o le loto maulalo e fesoasoani ia i tatou e talia le aʻoaʻiga. O tagata loto maulalo e lē pei o le Tupu o Usia o Iuta, o lē sa oo ina faamaualuga lona loto ma ia faia ai i se auala faamalosi tofiga faaositaulaga. Sa ia ‘gaoioi ma le lē faamaoni faasaga ia Ieova ma alu atu ai i le malumalu ina ia faamu mea manogi i luga o le fata faitaulaga e mu ai mea manogi.’ Ina ua ita tele Usia i faitaulaga ona o le faasaʻoina o ia, ona taia ai lea o ia i le lepela. Pagā se taui ua totogia ona o le leai o se loto maulalo! (2 Nofoaiga a Tupu 26:16-21; Faataoto 16:18) Aua lava neʻi pei o Usia ma faataga le faamaualuga e taofia oe mai le talia o le aʻoaʻiga mai le Atua e ala i Lana Afioga ma le faalapotopotoga.

E tusa ai ma lenei mea, na taʻu atu ai e Paulo i Kerisiano faauuina Eperu: “Ua galo foi ia te outou le apoapoaiga o loo fetalaia mai ia te outou pei ona tautala i fanau, Loʻu atalii e, aua le faatauvaa i lou manatu le aoaiga a le Alii o [Ieova]; aua foi le faavaivai pe a aoaiina oe e ia. Auā o le ua alofagia e le Alii [Ieova], ua aoai atu o ia ia te ia; ua sasaina foi e ia atalii uma ua talia e ia. . . . O aoaiga uma foi a o i ai, e le manatu i ai o se mea e olioli ai, a o le mea e faanoanoa ai; a e mulimuli ane e fua mai ai le fua o le amiotonu e manuia ai e ua aʻoaʻoina ai.” (Eperu 12:5-11) Ia manatua foi, “o aoaiga foi e aʻoaʻoina ai, o le ala o le ola lea.”—Faataoto 6:23.

Ia Tumau Pea ona Oofu i le Loto Maulalo

Maeu le tāua o le ofuina pea e Kerisiano o le ofu o le loto maulalo! Na te uunaia i tatou ina ia finafinau i le avea o ni ē folafola o le Malo, i le molimau atu ma le loto maulalo mai lea fale i lea fale i le sailia o i latou “ua saunia [ma le tonu] mo le ola e faavavau.” (Galuega 13:48; 20:20) E moni, e fesoasoani le loto maulalo ia i tatou e tumau ai pea i le usiusitai i le Atua i vala uma lava, e tusa lava pe itagia e tagata tetee faamaualuga o tatou ala amiotonu.—Salamo 34:21.

Ona e uunaia e le loto maulalo i tatou ia ‘faalagolago ia Ieova ma o tatou loto atoa,’ ua ia faasaʻoina ai o tatou ala. (Faataoto 3:5, 6) O le mea moni, e na o lo tatou oofu lava i le uiga lelei e mafai ai ona tatou savavali moni ma le Atua ma olioli ai i lana faamaoniga ma le faamanuiaga. E pei ona tusi le soʻo o Iakopo: “Ina faamaulalo ia i luma o le Alii [o Ieova], ona faamaualugaina lea o outou e ia.” (Iakopo 4:10) O le mea lea, seʻi o tatou oofu i le loto maulalo, lena ofu matagofie na faia e Ieova le Atua.