Fesili mai le Au Faitau

▪ O le ā le fautuaga faavae ua ofoina atu i le Faataoto 27:23 i leoleo mamoe faaleagaga faapea foi ma Kerisiano lautele?

Ua faitauina faapenei le mau: “Ia e matuā iloa tino o au mamoe, ma e mafaufau i ou lafu.” (Faataoto 27:23) Sa masani lava ona faaaogāina lenei mau e faamalosiau ai i leoleo mamoe faaleagaga ina ia faaalia le naunau ma ia faamasani i le tulaga ma faafitauli o Kerisiano i totonu o le faapotopotoga. E alagātatau se faamalosiau faapena, ona talu ai e faatusaina e le Tusi Paia toeaina i leoleo mamoe ma le faapotopotoga i se lafu mamoe. (Galuega 20:28, 29; 1 Peteru 5:2-4) Ae, e ui lava o le faatatauga lena o le mataupu silisili i luga, ae o lenei fuaiupu ua lē faasino faapitoa i leoleo mamoe faaleagaga.

Ua aofia ai i le tusi o Faataoto le tele o fuaiupu e tutū maʻoti e avea o ni faamatalaga malolosi o fautuaga, ae o le Faataoto 27:23 o se vaega lea o vasega o fuaiupu: “Ia e matuā iloa tino o au mamoe, ma e mafaufau i ou lafu; auā e le faavavau le oloa; e le oo foi le pale i lea tupulaga ma lea tupulaga. [Ua mavae atu le mutia lanu meamata, ma ua aliaʻi mai le vao muʻa, ua aoaoina foi laau afu o mauga, NW.] O tamai mamoe e maua ai ou ofu o le tau foi o le fanaua, o ʻoti poa ia. E lava foi suāsusu o ʻoti, e ʻai ai oe, e ʻai ai foi lou aiga; e maoona ai foi ou teine e auauna.”—Faataoto 27:23-27.

O lenei fasi fuaitau faagaeeina ua na matuā viiviia se ituaiga o olaga e faailogaina e le filigā, galue mamafa, faigofie, ma le iloa lelei o lo tatou faalagolago atu ia Ieova. Ua ia faia faapea e ala i le faatāuaina o le olaga faafaifeau o se leoleo mamoe Isaraelu, pe atonu i le faaeseesega ai i se olaga matalasi sa faavae i faiga faapisinisi ma le mauʻoa vave.

O “le oloa,” po o le maua vave o le tamaoaiga i faiga faapisinisi e faatasi ma iʻuga e taʻutaʻua ai (“le pale”), e mafai ona vave mavae atu, e pei ona o le a molimauina e le toatele. E tele lava mea e mafai ona fai atu ai e uiga i se olaga faigofie, e pei o le olaga lena na mulimuli ai leoleo mamoe anamua i le tausia o lafu mamoe. O lena auala o le olaga sa lē faigofie i le uiga faapea e saoloto mai le popole. Sa manaomia e se leoleo mamoe ona uaʻi atu i lana lafu, i le faamautinoaina ua puipuia mamoe. (Salamo 23:4) Afai i le tausia o i latou, na te maua se mamoe maʻi pe manuʻa, e mafai ona ia ūʻuina lea mamoe i le suauu e faamālū ai. (Salamo 23:5; Esekielu 34:4; Sakaria 11:16) I le tele lava o mea, o le leoleo mamoe sogasogā na te iloa lelei ana mamoe o le a vaai ua fua mai ana taumafaiga—le faateleina mālie o lana lafu.

O se leoleo mamoe galue mamafa ma le faaeteete na te maua le puna maufaatuatuaina o fesoasoani—o Ieova. Faapefea? Ia, ua saunia e le Atua o tau ma tausaga e masani lava ona iʻu ina maua ai le vao e lava e mafai ai ona fafaga le lafu. (Salamo 145:16) Pe a oo ina suia le tau, ona mou atu lea o le mutia lanu meamata mai fanua laugatasi maulalo, atonu o anoanoai i fanua maualuluga, o i inā atonu o le a avatu i ai e se leoleo mamoe mataalia ana manu.

Ua taʻua i le Faataoto 27:26, 27 se iʻuga e tasi o lena galuega—meaʻai ma lavalava. E ioeina faapea, o le faamatalaga e lē o ni meaʻai felanulanuai eseese po o ni meaʻai faapitoa, e lē o aumaia ai foi se manatu o le tagata faigaluega faapea o le a faatalitalia lavalava i faiga faaonaponei po o ʻie aupito sili ona taugatā. Ae afai sa lotomalie o ia e faia se taumafaiga, sa mafai e le leoleo mamoe ma lona aiga ona maua le suāsusu (ma maua ai foi le sisi), faapea foi ma le vulu mo le lalagaina o ofu malolosi.

O lea, o le fautuaga: “Ia e matuā iloa tino o au mamoe” e lē faatatauina i na o ovasia faaleagaga; ae mo Kerisiano uma lava. Ua faamamafaina ai le tāua o lo tatou lotomalie i meaʻai ma lavalava na maua mai galuega mamafa, ma le filigā, i le faatuatua faapea o le a lē tuulafoaiina i tatou e le Atua. (Salamo 37:25; 2 Tesalonia 3:8, 12; Eperu 13:5) I le faatusatusaina o le Faataoto 27:23-27 ma le fautuaga i le Luka 12:15-21 ma le 1 Timoteo 6:6-11, ua tatou iloa ai nei le maeu o le tausisi pea o le fautuaga a le Atua i lenei mataupu. O lea, e ao ia i tatou taitoatasi ona toe faitau le Faataoto 27:23-27, ma fesili ifo ia te oe lava, ‘Pe o oʻu teulotoina lenei mea ma faatatauina i loʻu olaga i aso fai soo?’

[Ē Ana le Ata i le itulau 25]

Pictorial Archive (Near Eastern History) Est.