Le Aso Faamasino—O se Taimi o le Faamoemoe!

AFAI e faamataʻuina oe i le manatu e uiga i le aso faamasino, ae aiseā e te lē suesue ai po o le ā o fai mai ai le Tusi Paia e uiga i ai? Mo se faaaʻoaʻoga, pe moni ea faapea pe a faaooina atu e le Atua le faamasinoga i tagata agasala, e lafoina ea i latou i le afi i hele?

Ia, sa saʻo le uluai manatu faamauina e uiga i le faamasinoga tauatua i le amataga o le talafaasolopito o le tagata. Sa maua e Atamu ma Eva le avanoa e ola ai e faavavau i luga o se lalolagi parataiso. (Kenese 1:26-28; 2:7-9, 15-25) Ae peitai, sa la agasala ma oo mai ai i lalo o se faamasinoga tuufaafeagai. O le iʻuga? Na aveesea e le Atua le meaalofa o le ola. I se isi faaupuga, na oti i laua. Na taʻu atu e le Atua ia i laua: “E te ʻai foi au mea e ʻai ma le afu o ou mata, seia e toe foi atu i le eleele; auā na faiina aʻi lava oe; auā o le efuefu oe, e te toe foi atu lava i le efuefu.”—Kenese 3:16-19.

Sa o se faamasinoga ogoogo lenei, ae sa tonu. Ma e mautinoa lava e leʻi aafia ai le afi i hele. Ina ua oti Atamu ma Eva, na foi atu i laua i le efuefu. Sa lē toe iai i laua. E leai lava se mea o taʻua mai ai e le Tusi Paia faapea sa ola se vaega o Atamu po o so o se isi lava tagata mai le oti ina ia faapuapuagatiaina e faavavau i se isi mea. Na i lo lea, ua tatou faitau ai: “O e ua ola, ua latou iloa e oti i latou; a o e ua oti, latou te le iloa se mea.”—Failauga 9:5.

Sa e iloa o le mea lenei ua fai mai ai le Tusi Paia? Pe sa e iloa foi faapea e leʻi faaaogāina lava e le Tusi Paia le faaupuga “solu e le mafai ona oti”? Na i lo lea, ua faapea mai: “O le solu e agasala, e tatau ona oti ia.” (Esekielu 18:4, King James Version) Ua ōgatasi atoatoa lenei manatu ma le mataupu silisili a le Tusi Paia: “O le totogi o le agasala o le oti lea.” (Roma 6:23, KJ) O lenei tulafono ua aafia uma ai i tatou. O i tatou uma lava o fanau na tupuga mai ia Atamu agasala, o lea ua agasala ai i tatou uma ma maua ai le totogi o le agasala, o le oti. E pei ona fai mai le Tusi Paia: “Ua oo mai le agasala i le lalolagi i le tagata e toatasi, o le oti foi ona o le agasala; ona tuufaasolo mai ai lea o le oti i tagata uma lava, auā ua agasala uma lava.” (Roma 5:12, KJ) O le Aso Faamasino o se vaega autū lea o le faatulagaga a le Atua e faasaoina ai i tatou mai lenei tulaga.

Le Faavae mo le Aso Faamasino

E tusa ai ma le Tusi Paia, ua toetoe lava 2,000 tausaga ua mavae, talu ona faataatia e le Atua le faavae mo le mea o le a tupu i le Aso Faamasino. Na faia lenei mea ina ua afio mai  Iesu i le lalolagi ma ofoina atu lona soifuaga lelei atoatoa faaletagata e fai ma sui o i tatou. Na faamatala e Iesu lava ia: “Ua faapea lava ona alofa mai o le Atua i le lalolagi, ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola e faavavau.”—Ioane 3:16.

Afai tatou te faatuatua ia Iesu, ona tatou maua lea o aogā mai lana taulaga i se auala faaleagaga e oo lava i le taimi nei. Ua faamagaloina e le Atua a tatou agasala ma faataga i tatou e faalatalata atu ia te ia. (Ioane 14:6; 1 Ioane 2:1, 2) Ae ona o loo tumau pea ona avea i tatou o ni tagata agasala lē lelei atoatoa, ua tumau ai pea ona tatou mamaʻi faaletino ma oti ai mulimuli ane. Tatou te leʻi maua lava le ola e faavavau lea na folafola mai e Iesu. O lenei mea o le a oo mai e avea o se iʻuga o le Aso Faamasino.

Le Aso Faamasino

Na vaaia e le aposetolo o Ioane se vaaiga o le Aso Faamasino, ma na faapenei ona ia faamatala mai: “Na ou iloa se nofoalii tele sinasina, ma lē o loo tietie ai, o lē na sosola ese ai le lagi ma le lalolagi ai ona luma; ma ua leai se mea la te tutū ai. Ona ou iloa lea o ē ua oti, o ē faatauvaa ma ē silisili, o tutū i luma o le Atua; ona fofola lea o tusi: ona fofola lea ma le isi tusi, o le tusi lea o le ola: ona faamasinoina ai lea o ē ua oti e tusa ma na mea ua tusia i tusi, e tusa ma a latou galuega.”—Faaaliga 20:11, 12, KJ.

Ioe, e tusa ma le vaaiga a Ioane, o le Aso Faamasino o le a pulea e le Atua lava ia. Ae o loo aafia ai foi se isi. Na faamatalaina e le aposetolo o Paulo: “O le [Atua] ua tofia le aso, o le a ia faamasinoina ai le lalolagi i le amiotonu e le tagata ua faauuina e ia.” (Galuega 17:31, KJ) O ai lena tagata? O Iesu, o lē na faapea mai o ia lava: “E lē faamasino e le Tamā i se tasi, ae ua ia tuuina mai le faamasinoga uma i le Atalii.” (Ioane 5:22, KJ) O lea, o Iesu o le a avea ma Faamasino tofia a le Atua i le Aso Faamasino.

O le tala lelei lenei mo le fanau a tagata. Ua faaalia i Evagelia o Iesu o se tagata e matuā alofa mutimutivale. E lē faamaualuga o ia pe manao tele ae “agamalu ma loto maulalo.” (Mataio 11:29; 14:14; 20:34) Tatou te fiafia e iai i aao o se faamasino faapena.

O Afea o le a Faia Ai?

O afea la, le Aso Faamasino? Fai mai le Faaaliga o le a oo mai pe a “sosola ese ai le lagi ma le lalolagi.” Ua faamanatu mai ai ia i tatou e lenei mea upu a le aposetolo o Peteru: “A o le lagi nei ma le lalolagi ua tuu ona o lea lava afioga, ia taofia mo le afi i le aso e faamasino ai ma fano ai tagata faalematau.” (2 Peteru 3:7) Po o le a susunuina le lagi faitino? E leai, e manino lava le Tusi Paia e uiga i lenei manatu. O le a lē taitai lava ona faaumatia le lalolagi faitino. “O le lalolagi . . . [o le a] lē aveesea e faavavau.” (Salamo 104:5, KJ) Ua faaalia i faamatalaga e lagolago ai upu a Peteru faapea o le faiga o mea a le lalolagi faalemataʻu o iai nei lea o le a faaumatia. O tagata faalemataʻu o le a tafiesea, ae lē o le Lalolagi paneta.—Ioane 12:31; 14:30; 1 Ioane 5:19.

O nei tagata faalemataʻu o le a faaumatia i le mea ua taʻua e le Tusi Paia o le taua o Amaketo—lea e masani ona faaalia e lenei mekasini, ua lē o toe umi se taimi ona oo mai loa lea. (Faaaliga 16:14, 16) Mulimuli ane, o le a tuuina ai Satani lava ia i le to e lē gata ma taofia ai mai le aiā fua i faiga faaletagata mo le afe o tausaga, ma o lenei afe tausaga o le umi moni lea o le Aso Faamasino. (Faaaliga 19:17–20:3) O le ā e tupu i tagata faamaoni pe a faaumatia tagata faalemataʻu ia Amaketo? O le a faasaoolaina atu i totonu o le Aso Faamasino. Ua tatou faitau ai: “Ma e ua sao a latou amio, e faatotoeina ai i latou [i le laueleele]; a e vavaeeseina o e amio leaga ai le laueleele, e liaiina ai foi o e amio pepelo.”—Faataoto 2:21, 22.

I le lagolagoina o lenei mea, ua taʻu mai e le Tusi Paia e uiga i “le motu o tagata e toatele mai atu nuu uma, ma aiga, ma nuu, ma gagana eseese e le ma faitaulia e se tasi,” o ē o le a aliai mai i luga o le lalolagi a o leʻi oo ia Amaketo. O i latou nei “e o mai nai le puapuaga tele”; i se isi faaupuga, ua latou sao mai i le iʻuga o lenei lalolagi faalemataʻu e pei lava ona sao o Noa mai le iʻuga o le lalolagi o ona aso. (Faaaliga 7:9-17;  2 Peteru 2:5) Pe sa e iloa faapea o lenei motu o tagata e toatele faavaomalo o Kerisiano mataalia o loo iai e oo lava i le taimi nei? O i latou nei ua faamoemoe e faasaoina atu i le puapuaga tele ma ola ai e faavavau i le lalolagi. O lo latou iai o se faamaoniga mautinoa lea o le lata tele mai o le Aso Faamasino.

O Ai o le a Faamasinoina?

O lenei motu o tagata e toatele o le a faamasinoina i le Aso Faamasino. Ae o le a lē na o i latou. Ua faaauau le faamatalaga a Ioane: “Na avaʻe foi e le sami ē na oti sa iai; na avaʻe foi e le oti ma hele ē na oti sa iai: ona faamasinoina ai lea o i latou, o tagata uma e tusa ma a latou galuega.” (Faaaliga 20:13, KJ) O le isi lenei faamaoniga atili e iloa ai faapea e lē faapuapuagatiaina tagata e faavavau i hele. Afai e avaʻe e hele na tagata oti o iai, o le a mafai faapefea la ona iai e faavavau se tasi i inā? O le mea moni, o le hele a le Tusi Paia o le tuugamau taatele o le fanau a tagata, o inā e nofo ai le tagata oti e lē toe iloa se mea e faatali ai mo le toetu. I le Aso Faamasino, o le a matuā faagaogaoina atoatoa ai hele mai ona tagata oti.—Failauga 9:10.

O ai o le a toe faatutūina mai le oti i le Aso Faamasino? Na faapea mai le aposetolo o Paulo: “O le a iai le toetu o ē ua oti, o ē amiotonu ma ē amioletonu.” (Galuega 24:15, KJ) O lea, o auauna faamaoni a le Atua, “o ē amiotonu,” o le a toe faatutuina. Ae o le a faapena foi le numera lē mafaitaulia o isi, “o ē amioletonu.” E mautinoa lava, o le a faaaofia e le toetu i latou uma lava o ē ua maliliu ma o loo iai pea i le tuugamau—seʻi vagana ai nisi o ē sa matuā matuiā a latou agasala ma ua uma ai ona faamasinoina i latou e le Atua e matuā lē aogā i ai le ola.—Mataio 12:31.

Le Faamasinoga

O le ā la e tupu i le motu o tagata e toatele o ē ua faasaoina ma ē o le a toe faatutuina i le Aso Faamasino? Ua faapea mai le Tusi Paia: “Ona faamasinoina ai lea o ē ua oti e tusa ma mea ua tusia i tusi, e tusa ma a latou galuega.” O le taimi lenei mo se iloiloga totoʻa. O i latou uma lava o ē lotomalilie e gaoioi e tusa ma ‘mea ua tusia i tusi’—e mautinoa o mea e manaomia e le Atua mo le fanau a tagata i lena taimi—o le a tusia i “le tusi o le ola.” (Faaaliga 20:12, KJ) O le a iai i latou i le auala e maua ai le ola e faavavau!

O lea, i le iʻuga, o le a aumaia ai e le maliu faataulagaina a Keriso aogā faaletino! O i latou ua tusia i le tusi o le ola i lena taimi o le a lē toe paʻū atu i maʻi ma le oti. Na i lo lea, o le a auaumalie ona toe faafoisia mai i latou i le lelei atoatoa faaletagata, faatasi ai ma le ola e faavavau na folafolaina mai ia i latou o ē faatuatua ia Iesu. Maeu se faamoemoe mataʻina! Ae ui lava i lea, o nisi e mautinoa lava o le a faaalia lo latou mumusu e usiusitai i ‘na mea o tusia i tusi.’ O le ā e tupu ia i latou? Latou te lē maua le ola e faavavau. Na i lo lea, fai mai le Tusi Paia: “Ai se tasi na iloa ua lē tusia lona igoa i le tusi o le ola, na lafoina lea i le lepa afi.”—Faaaliga 20:15, KJ.

Po o le afi i hele lenei o loo tautalagia e Kerisinetoma? E leai, auā i le fuaiupu o loo mulimuli mai, ua tatou faitau ai: “Na lafoina foi le oti ma hele i le lepa afi. O le oti faalua lea.” (Faaaliga 20:14, KJ) Afai e lafoina hele i le lepa afi, e lē mafai la ona avea le lepa afi lava ia ma afi i hele. Ae lē gata i lea, o le oti e lē o se mea malō e mafai ona sii i luga ma togi i se mea. O lea, o le lepa afi e tatau ona faafaatusa. O le ā? Fai mai le Tusi Paia: “O le oti faalua lea.” Pe a lafoina le oti ma Heitisi i le lepa afi, ona la “oti” ai lea, ua lē toe iai. E faapena foi le fanau a tagata fouvale, o ē o le a iʻu i le oti ma lē toe iai. O le oti faalua la lenei, e aunoa ma se faamoemoe o le toetu.

Aso Faamasino—O se Taimi o le Faamoemoe

O lea, pe a tatou manatu i le Aso Faamasino, e lē ao ona tatou matataʻu pe soona faaalia le lē fiafia. O le Aso Faamasino o se taimi o le faamoemoe, o se taimi e toe faafoisia ai i le fanau a tagata le ola e faavavau na leiloa ia Atamu. Seʻi faalogo atu i faamanuiaga o le a ia aumaia ia i latou o ē na faamaonia le faamaoni i le faamasinoga: “Faauta, ua faatasi ma tagata le fale fetafai o le Atua, e mau foi o ia ma i latou; e fai foi i latou mona nuu, e ia te i latou le Atua  lava, o lo latou Atua ia. E sōloiesea foi e le Atua loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga; auā ua mavae atu mea muamua.”—Faaaliga 21:3, 4.

I le faaiʻuga o le afe o tausaga o le Aso Faamasino, o le a iʻu ai ina lelei atoatoa tagata faamaoni uma lava mai vaega uma o le lalolagi. O le a “toe ola” mai i latou i le uiga atoatoa, ma o le a faataunuuina e le Aso Faamasino lana fuafuaga. (Faaaliga 20:5) I lea, ua fai mai ai le Tusi Paia, o le a faatagaina atu ai Satani e faasese le fanau a tagata mo le toe avanoa mulimuli lava. (Faaaliga 20:3, 7-10) O i latou o ē tetee ia te ia i le taimi faaiʻu lea, o le a olioli i le faataunuuga atoatoa o le folafolaga a le Tusi Paia: “E fai lava le nuu [le lalolagi] mo tagata amiotonu, e nonofo ai pea i latou.”—Salamo 37:29.

Maeu se sauniuniga matagofie ua iai le Aso Faamasino! Ma maeu le mataʻina o le mafai ona tatou sauniuni nei i ai, e ala i le suesueina o le Tusi Paia, aʻoaʻoina o le finagalo o le Atua, ma faatatauina lenei finagalo tauatua i o tatou olaga! E lē tioa ona faailoa e le faisalamo le olioli pe a manatu i le faamasinoga a le Atua ina o ia tusi: “Ia fiafia le lagi, ia olioli foi le lalolagi; ia taalili mai le sami ma mea ua tumu ai. Ia fiafia lava le laueleele ma mea uma o i ai; ona alalaga fiafia ai lea o laau uma o i le vao matua, i luma o Ieova; auā o loo afio mai, auā o loo afio mai e faamasino le lalolagi.”—Salamo 96:11-13.