Le Faamasinoga Mulimuli

“PE A e oti, o le a faapuapuagatia na o lou solu; o le a avea lena o se hele mo ia: ae i le aso o le faamasinoga o le a toe faatasi atu ai lou tino i lou solu, ona e maua ai lea o hele tutusa e lua, o le a āfu toto lou solu, ma o le a tigaina ai lava lou tino.”

O LE auala lenei na faamatalaina ai e le failauga o lona 19 o senituri o C. H. Spurgeon le manatu o patele i le aso faamasino ma puapuaga o lē ua taʻusalaina. E iai foi se talitonuga uigaese e faamataʻu ai faapena o se tagata tusiata Italia o Michelangelo, e pei ona vaaia i ana valiga ata “Le Faamasinoga Mulimuli” (o sona vaega lea ua toe aumaia i luga), i le pa puipui o le falesa o Sistine i Roma. Fai mai le The New Encyclopædia Britannica e uiga i nei valiga ata: “O le Keriso i le Faamasinoga o se atua o faititili na i lo o se faaola Kerisiano, e sili atu ona manatu mamafa i le taʻusalaina o ituaiga faaletagata na i lo o le talia fiafia o ē faamanuiaina i le lagi.”

Le Aʻoaʻoga a Kerisinetoma

I senituri ua mavae, sa avea ai le aso faamasino ma le afi i hele ma mataupu manaomia mo le faia ai o lauga. Mai i a latou pulelaa, e faamalosi atu ai e failauga e pei o C. H. Spurgeon i ni faamatalaga faamamafa, e uiga i puapuaga matagā o loo faatali mai mo ē agasala. I aso nei, ua seāseā lava toe faalogoina na ituaiga o lauga. Ae o le afi i hele ma le faamasinoga mulimuli o loo avea pea o ni aʻoaʻoga aloaia a le tele o lotu.

O le tele lava o lotu a Kerisinetoma pe tele pe itiiti, ua ioe faatasi ma aʻoaʻoga a le lotu Katoliko Roma faapea o faamasinoga a le Atua e oo mai i laasaga e lua. Muamua, e iai le “faamasinoga patino.” Pe a oti se tagata, o lona solu ua manatu i ai e lē oti, o le a faamasinoina loa lava ma tuuina atu i ai se iʻuga a lē o hele ia po o le lagi. * Ona oo mai ai lea i le faamasinoga mulimuli po o le faamasinoga lautele i le iʻuga o le taimi pe a toe faatutuina tino o tagata oti ma toe faatasi atu ma o latou solu e lē mafai ona oti.

I lenei aso faamasino, e nonofo ai pea solu o i le lagi i inā ma o le a toe faatasi atu i tino ua uma ona faia ina ia lē pala. O i latou o  faapuapuagatiaina i hele o le a tumau ai pea foi i inā, ma o le a faatasia atu foi o latou solu i tino o le a toe faatutuina mai, e lē pala. E tusa ai ma manatu o nisi, o le pogai lenei o le a atili ogoogo ai o latou puapuaga. O i latou o ē o loo ola pea o ni tagata e lē oti i latou. E faamasinoina i latou a o ola pea ma ō atu, “o tino ma solu” e pei ona sa iai, e faasasaʻo atu lava i le lagi po o i hele.

O le ono mafai ona tumau i puapuaga lē mataʻua i le afi i hele, ua faia ai le mataupu o le faamasinoga faaiʻu i aao o Iesu Keriso o se mea mataʻutia e mafaufau i ai. Peitai, i le manatu i lenei mea, pe o se mea e te ofo ai le iloa faapea, o le mea moni, o faamasinoga a le Atua e masani lava ona avea o se pogai mo le olioli ma faapea o le Aso Faamasino o le a avea o se tasi o taimi aupito sili ona fiafia ai i le talafaasolopito atoa o le tagata? E mafai faapefea ona moni o lenei mea?

[Faaopoopoga i lalo]

[Ē Ana le Ata i le itulau 3]

Random/Sipa Icono