“Ua Oo mai le Malamalama i le Lalolagi”
“Ua Oo mai le Malamalama i le Lalolagi”
“[O le faavae lenei mo le faamasinoga], ina ua oo mai le malamalama i le lalolagi, a o tagata, e sili lo latou manao i le pouliuli i lo latou manao i le malamalama.”—IOANE 3:19.
1. Aiseā e ao ai i tagata uma ona manatu mamafa e uiga i le faamasinoga a le Atua?
O LE toatele o tagata i aso nei e faalēpopole tele e uiga i le faamasinoga a le Atua. O nisi ua manatu faapea o le a logolelei ona faamasinoina i latou e le Atua pe afai latou te ō pea i le lotu ma aua le faatigā i o latou tuaoi. Mo le toatele, ua avea aʻoaʻoga a Kerisinetoma e uiga i le afi i hele ma pulekatolio e faaleaogā ai le manatu atoa i le faamasinoga tauatua. Peitai o lenei faagutugutulua ua salalau atu ma pepelo a Kerisinetoma e lē mafai ona suia ai le mea moni faapea o le a faamasinoina e le Atua tagata uma lava i le faaiʻuga. (Roma 14:12; 2 Timoteo 4:1; Faaaliga 20:13) Ma e tele mea o le a faalagolago i lenei faamasinoga. O i latou e logolelei ona faamasinoina o le a maua le meaalofa a le Atua o le ola e faavavau, a o i latou e lē logolelei ona faamasinoina o le a maua le totogi atoa o le agasala: o le oti.—Roma 6:23.
2. O le ā le faavae mo le faamasinoga a le Atua?
2 O le mea lea, ua manatu mamafa ai Kerisiano faamaoni e uiga i le faamasinoga a le Atua, ma latou te faanaunau ma le naunautai e faafiafiaina o ia. E mafai faapefea ona latou faia lenei mea? O loo aumaia i le Ioane 3:19 e Iesu le ki ia i tatou. Ua ia faapea mai: “[O le faavae lenei mo le faamasinoga], ina ua oo mai le malamalama i le lalolagi, a o tagata, e sili lo latou manao i le pouliuli i lo latou manao i le malamalama, auā e leaga a latou amio.” Ioe, o le a faavae le faamasinoga a le Atua i le pe tatou te mananao i le malamamalama na i lo le pouliuli.
“O le Malamalama Lava le Atua”
3. O le ā le pouliuli, ma o le ā le malamalama?
3 I se uiga faaleagaga, e fesootai le pouliuli i le pogisa ma le leai o se faamoemoe o loo iai i le nofoaga o Satani—e ui ina masani ona faafoliga mai Satani o se “agelu o le malamalama.” (2 Korinito 4:4; 11:14; Efeso 6:12) I le isi itu, e fesootai le malamalama i le malamalamaga ma le faapupulaina e sau mai ia Ieova le Atua. Na taʻua e Paulo le malamalama ina ua ia tusia: “Auā o le Atua o le na fai atu ia pupula mai le malamalama mai le pouliuli, ua faapupula mai e ia i o matou loto, ina ia malamalama e iloa ai le mamalu o le Atua i fofoga o Iesu Keriso.” (2 Korinito 4:6) Ua matuā matauina vavalalata lava le malamalama faaleagaga ma Ieova le Atua na ala ai ona tusia e le aposetolo o Ioane: “O le malamalama lava le Atua.”—1 Ioane 1:5; Faaaliga 22:5.
4. (a) Ua faapefea ona faaavanoa mai e Ieova le malamalama? (e) I le ā le auala e mafai ai ona tatou faaalia le naunau i le malamalama?
4 Ua faaavanoaina e Ieova le malamalama e ala i lana afioga, lea ua maua fua i aso nei i tusitusiga i le Tusi Paia. (Salamo 119:105; 2 Peteru 1:19) O le mea lea, na matuā faaalia ai e le faisalamo lona naunau i le malamalama ina ua ia tusia: “Ua tele lava loʻu naunau i lau tulafono; ou te mafaufau i ai i le aso atoa. Ua tausi au tulafono i loʻu loto; ma ou matuā naunau i ai.” (Salamo 119:97, 167) E te naunau ea i le malamalama i le tele e pei ona faamaonia sa faia e le faisalamo? Pe e te faitau e lē aunoa i le Afioga a le Atua, mafaufau loloto i ai, ma taumafai malosi e faatatauina le mea o ia fai mai ai? (Salamo 1:1-3) Afai o lea, o loo e saili la ina ia maua se faamasinoga logolelei mai ia Ieova.
“O Aʻu o le Malamalama o le Lalolagi”
5. O ai ua taulaʻi atu i ai le malamalama tauatua?
5 O loo taulaʻi atu le malamalama foaiola mai ia Ieova i le tagata o Iesu Keriso. I le faatomuaga o le Evagelia a Ioane, tatou te faitau ai: “Sa ia te ia [Iesu] le ola; o le ola foi o le malamalama lea o tagata. Ua pupula mai foi le malamalama i le pouliuli, a e lei talia e le pouliuli.” (Ioane 1:4, 5) O le mea moni, o le iai o se fesootaiga vavalalata faapena a Iesu ma le malamalama ua taʻua ai o ia “o le malamalama moni lea, na te faamalamalamaina tagata uma lava.” (Ioane 1:9) Na fetalai Iesu lava ia: “Manū ou i ai i le lalolagi, o aʻu o le malamalama o le lalolagi.”—Ioane 9:5.
6. O le ā e tatau ona faia e se tagata ina ia maua ai se faamasinoga logolelei e iʻu i le ola e faavavau?
6 O lea, o i latou e naunau i le malamalama e alolofa foi ia Iesu ma faatuatua ia te ia. E lē mafai ona maua o se faamasinoga logolelei e aunoa ma le taunapa ia Iesu. Ioe, na o le vaavaai atu lava ia te ia o se auala tofia o le faaolataga a le Atua, e mafai ai ona tatou maua se faamasinoga logolelei. Na fetalai Iesu: “O lē faatuatua i le Alo, ua ia te ia le ola e faavavau; a o le le faatuatua i le Alo e le iloa e ia le ola, a o le toasa o le Atua o loo tumau lava i ona luga.” (Ioane 3:36) E ui i lea, o le ā le uiga o le faaalia o le faatuatua ia Iesu?
7. O le faatuatua ia Iesu e faatatau foi i le faatuatua ia te ai?
7 Muamua, na fetalai Iesu lava ia: “O lē faatuatua mai ia te au, e le faatuatua mai o ia ia te au, a e ia te ia ua auina mai aʻu. O lē vaai mai foi ia te au, e vaai atu o ia ia te ia ua auina mai aʻu. Ua ou sau o le malamalama i le lalolagi, ina ia le tumau pea i le pouliuli se tasi e faatuatua mai ia te au.” (Ioane 12:44-46) O i latou e alolofa ia Iesu ma faaalia le faatuatua ia te ia e tatau foi ona matuā alolofa ma faatuatua i le Atua ma le Tamā o Iesu, o Ieova. (Mataio 22:37; Ioane 20:17) O i latou uma e faaaogāina le suafa o Iesu i la latou tapuaiga ae lē taulau ona tuuina atu le mamalu silisili ia Ieova, latou te lē o faaalia se alofa moni i le malamalama.—Salamo 22:27; Roma 14:7, 8; Filipi 2:10, 11.
Le ‘Sui Sili’ a le Atua
8. Sa faapefea ona taulaʻi atu le malamalama tauatua ia Iesu a o lumanai foi lona fanau mai faaletagata?
8 E uiga foi le faaalia o le faatuatua ia Iesu i le taliaina atoatoa o lana matafaioi i fuafuaga a Ieova. Na faamatilatilaina le tāua o lenei matafaioi ina ua taʻu atu e le agelu ia Ioane: “O le agaga o le valoaga o le mau lea ia Iesu.” (Faaaliga 19:10; Galuega 10:43; 2 Korinito 1:20) Mai lava i le uluai valoaga i Etena, o valoaga uma ua faagaeeina tauatua o loo faasino atu ia Iesu ma lona tulaga i le galueaiina o fuafuaga a le Atua. I se tulaga faapena, na taʻu atu ai e Paulo i Kerisiano i Kalatia faapea o le feagaiga o le Tulafono sa avea o se ‘taʻitaʻitama agaʻi ia Keriso.’ (Kalatia 3:24) Sa fuafuaina lena feagaiga o le Tulafono anamua ina ia sauniunia ai le nuu mo le afio mai o Iesu o se Mesia. O lea a o lumanai foi lona fanau mai faaletagata, sa taulaʻi atu le malamalama mai ia Ieova ia Iesu.
9. O le ā ua aofia ai i le naunau i le malamalama talu mai le 33 T.A.?
9 I le 29 T.A., na tauaao atu ai e Iesu ia lava mo le papatisoga ma na faauuina ai i le agaga paia, ma avea ai ma Mesia folafolaina. Na maliu o ia i le 33 T.A. o se tagata lelei atoatoa, na toetu mai, ma afio aʻe i le lagi, ma o i inā na ia ofoina atu ai le aogā o lona ola mo a tatou agasala. (Eperu 9:11-14, 24) O lenei faasologa o mea tutupu sa faailogaina ai se tai liliu i feutagaiga a le Atua ma tagata. Ua avea nei Iesu ‘ma Sui Sili o le ola,’ ‘le Sui Sili o le faaolataga,’ ‘le Sui Sili ma o Lē na te Faaatoatoaina lo tatou faatuatua.’ (Galuega 3:15; Eperu 2:10; 12:2; Roma 3:23, 24) Mai le 33 T.A. ma faasolo mai ai, ua amanaia ai ma talia e ē naunau i le malamalama, faapea a aunoa ma Iesu “e leai foi se tasi ua i ai le ola; e leai lava se isi igoa i lalo o le lagi ua foaiina mai i tagata e mafaia ona faaolaina ai o i tatou.”—Galuega 4:12.
10. Aiseā e matuā tāua ai le faalogologo i afioga a Iesu ma usiusitai i ai?
10 E uiga foi le faaalia o le faatuatua ia Iesu i le taliaina o ia o “le Upu” ma o le ‘Faipule Uigaese.’ (Ioane 1:1, LFK; Isaia 9:6) O mea ua tautalagia e Iesu ua atagia ai pea le upu moni tauatua. (Ioane 8:28; Faaaliga 1:1, 2) O le faalogologo atu ia te ia o se mataupu o le ola ma le oti. Na fetalai atu Iesu i tagata Iutaia o ona aso: “O lē faalogo mai i laʻu upu, ma talitonu ia te ia na na auina mai aʻu, ua ia te ia le ola e faavavau; e le oo foi ina [faasalaina] o ia, a ua oo atu ia i le ola, sa i le oti.” (Ioane 5:24) I le uluai senituri T.A., o i latou o ē na faatinoina afioga a Iesu sa faasaoina mai le pouliuli o le lalolagi a Satani ma oo atu ai i le ola, e pei ona taʻua. Sa taʻuamiotonuina i latou faatasi ma se vaaiga i le avea ma suli faatasi ma ia i lona Malo faalelagi. (Efeso 1:1; 2:1, 4-7) I aso nei, o le usiusitai i afioga a Iesu, ua tatalaina ai le auala mo le toatele ina ia taʻuamiotonuina faatasi ma se vaaiga e faasaoina atu ia Amaketo ma oo ai i le ola lelei atoatoa faaletagata i le lalolagi fou.—Faaaliga 21:1-4; faatusatusa Iakopo 2:21, 25.
Le “Ulu o Mea Uma Lava”
11. O le ā le pule silisili na avatu ia Iesu i le 33 T.A.?
11 Ina ua mavae lona toetu, na faaali atu ai e Iesu i ona soʻo se isi vala o le malamalama. Na ia fetalai: “Ua tuuina mai ia te au le pule uma lava i le lagi ma le lalolagi.” (Mataio 28:18) Sa faapea ona siitia ai Iesu i se tulaga maualuga i le faalapotopotoga aoao a Ieova. Ua aumaia e Paulo ni auiliiliga atili ina ua ia faapea mai: “Ua toe faatuina mai [e le Atua Iesu] nai e ua oti, ma faanofo ia te ia i lona itu taumatau i mea o i le lagi, e silisili lava i alii sili uma lava, ma faipule, ma e ua malolosi, ma alii, ma igoa uma lava e taʻua, e le gata i le olaga nei, a e oo foi i lē atali; ua ia tuu foi mea uma lava i lalo o ona vae, ma tuuina atu o ia e fai ma ulu o mea uma lava mo le ekalesia, o lona tino lea.” (Efeso 1:20-23; Filipi 2:9-11) Talu mai le 33 T.A., o le naunau i le malamalama, ua aofia ai le aloaia o lenei tulaga maoaʻe o Iesu.
12. O le ā ua talia ma le fiafia e Kerisiano faauuina mai le amataga lava, ma ua faapefea ona latou faaalia lenei mea i se auala faatino?
12 I le faaiʻuga, o le a tatau ona aloaia e le fanau uma a tagata le pule a Iesu. (Mataio 24:30; Faaaliga 1:7) Peitai, mai lava i le amataga, ua amanaia ai ma le fiafia lea mea, e ē naunau i le malamalama. Ua taliaina e sui faauuina o le faapotopotoga Kerisiano Iesu “o le ulu o le ekalesia.” (Kolose 1:18; Efeso 5:23) Ina ua avea i latou ma vaega o lena tino, ua ‘laveai mai ai i latou nai le pule a le pouliuli ma ua aumaia i le malo o le Alo pele o le Atua.’ (Kolose 1:13) Mai la i lena, ua latou mulimuli ai ma le naunautai i le taʻitaʻiga a Iesu i vala uma o o latou olaga, ma i o tatou aso ua latou aʻoaʻoina ai “isi mamoe” ia faia lea lava mea e tasi. (Ioane 10:16) O se mea e manaomia autū mo le mauaina o se faamasinoga logolelei, o le aloaia lea o le tulaga ulu o Iesu.
13. O anafea na amata faatino ai e Iesu le pule i le Malo, ma o le ā na sosoo ai i inei i le lalolagi?
13 I lona afio aʻe i le lagi i le 33 T.A., sa leʻi faatinoina loa e Iesu lana pule i le mamao atoatoa. E ui ina o ia o le Ulu o le faapotopotoga Kerisiano, ae na ia faatalitali mo le taimi tatau e faatino ai le pule atoatoa i luga o le fanau a tagata lautele. (Salamo 110:1; Galuega 2:33-35) Na oo mai lena taimi i le 1914, ina ua faanofotupuina Iesu o le Tupu o le Malo o le Atua ma amataina ai “aso e gata ai” o lenei lalolagi. (2 Timoteo 3:1) Talu mai le 1919, ua faasolo atu ai le aoaoina o le vaega totoe o ē faauuina i lona faamaeʻaina. Ae maise lava mai le 1935, ua vaevaeina ai e Iesu le fanau a tagata i “mamoe,” o ē o le a ulu atu i “le malo ua saunia mo [i latou],” ma “ʻoti,” o ē o le a ‘ō ese atu i le sala e faavavau.’—Mataio 25:31-34, 41, 46.
14. Ua faapefea ona faaalia e se motu o tagata e toatele le naunau i le malamalama, ma o le ā le iʻuga ia i latou?
14 Ma le fiafia lava, ua faamaonia le lē mafaitaulia o mamoe i nei aso e gata ai. Ua aliali mai i le vaaiga a le lalolagi se motu o tagata e toatele o i latou e faitau miliona le aofai “mai atu nuu uma, ma aiga, ma nuu, ma gagana eseese.” E pei o a latou aumea, le vaega faauuina, ua naunau foi i latou nei e pei ni mamoe i le malamalama. Ua latou “ta foi o latou ofu, ma ua faasinasinaina o latou ofu i le toto o le Tamai mamoe,” ma ua latou alalaga ma le leotele: “O i ai le faaolataga i lo tatou Atua o lē tietie i le nofoālii, atoa ma le Tamai mamoe.” Ona o lenei tulaga, ua maua ai e le motu o tagata e toatele o se vaega, se faamasinoga logolelei. Ua “o mai nai le puapuaga tele” ona sui, ua sao mai i le faaumatiaga o i latou o ē naunau i le pouliuli ia Amaketo.—Faaaliga 7:9, 10, 14.
‘Fanau o le Malamalama’
15. I le ā le auala e faaalia ai i a tatou amio lo tatou gauai i le Tupu, o Iesu Keriso?
15 E ui i lea, e faapefea i ē naunau i le malamalama, a lē o ē faauuina po o isi mamoe, ona gauai atu i se auala faatino ia Iesu o lē ua faanofotupuina e le Atua o se Tupu ma o se Faamasino mataalia? O se tasi o auala o le taumafai lea e agalelei i tagata ua faamaonia e Iesu. A o iai i le lalolagi sa faaalia e Iesu le talisapaia mo uiga e pei o le naunautai, faia ma le loto atoatoa, ma le maelega mo le upu moni, ma sa faailoa mai e ia lava na uiga. (Mareko 12:28-34, 41-44; Luka 10:17, 21) Afai tatou te faanaunau mo se faamasinoga logolelei, e tatau la ona tatou atiina aʻe na uiga.
16. Aiseā e matuā tāua ai ona lafoaia galuega a le pouliuli?
16 Ua patino lava ona moni o lenei tulaga ona ua faasolo ina mafiafia le pouliuli o le lalolagi a Satani a o lalata tele mai le iʻuga. (Faaaliga 16:10) O le mea lea ua matuā talafeagai ai upu na tusi atu e Paulo i Roma: “Ua leva le po, ua lata mai le ao; o lea ia tatou faatea ese ai galuega o le pogisa, a ia tatou oofu i ofu tau o le malamalama. Ia tatou savavali ma le matagofie e tusa i le ao; aua le poula ma le onā, aua le faitaaga ma le matāitu, aua le femisai ma le mataua.” (Roma 13:12, 13) A o avea le ola e faavavau o se meaalofa mai le Atua, o le moni aʻiaʻi o lo tatou faatuatua ma lo tatou naunau i le malamalama e faamaonia lea i a tatou gaoioiga. (Iakopo 2:26) O lea, o le faamasinoga tatou te maua o le a faalagolago lea i le tele ma le faulai tatou te faatinoina ai galuega lelei ma le lafoaia o galuega leaga.
17. O le ā le uiga o le “oofu i le Alii o Iesu Keriso”?
17 Ina ua maeʻa ona avatu lana fautuaga i le Roma 13:12, 13, ona faaiʻu ai lea e le aposetolo o Paulo e faapea: “A ia outou oofu i le Alii o Iesu Keriso; aua foi le sauniuni mo le tino, e oo ai ona tuʻinanau.” (Roma 13:14) O le ā le uiga o le “oofu i le Alii o Iesu Keriso”? O lona uiga e ao i Kerisiano ona mulimuli tuʻi ia Iesu, faaofuina i latou, ia pei o ia, i lana faaaʻoaʻoga ma lona tulaga, i le tauivi e pei o Keriso. Na faapea mai Peteru, “auā na valaauina outou ona o lea lava mea; auā na tigaina Keriso lava o le sui o outou, ua tuuina mai ai e ia le faaaʻoaʻo mo outou, ina ia outou mulimuli atu i ona tulagāaao.”—1 Peteru 2:21.
18. O ā suiga atoatoa atonu e manaomia pe afai tatou te fia maua se faamasinoga logolelei?
18 Ua masani ona aofia ai i lenei mea ni suiga atoatoa i le olaga o se Kerisiano. Na faapea mai Paulo, “auā sa outou pouliuli anamua, a o lenei ua outou malamalama i le Alii; ina savavali ia pei o [fanau o le] malamalama; (auā o le fua o le Agaga, o le agalelei uma lava lea, ma le amiotonu, ma le faamaoni).” (Efeso 5:8, 9) O i latou uma e faatinoina galuega a le pouliuli e lē ni ē e naunau i le malamalama ma o le a lē maua se faamasinoga logolelei seʻi vaganā ua latou faia se suiga.
“O Outou, o le Malamalama o le Lalolagi”
19. O ā auala eseese e mafai ai e se Kerisiano ona faaatagia atu le malamalama?
19 O le manatu faaiʻu, o le naunau i le malamalama o lona uiga o le faaatagia atu lea o le malamalama ina ia mafai ai ona iloa e isi ma tosina ane i ai. “O outou, o le malamalama o le lalolagi.” na fetalai ai Iesu. Ma na ia faaopoopo mai: “Ia faapea ona pupula atu lo outou malamalama i luma o tagata, ina ia latou iloa la outou amio lelei, latou te vivii atu ai i lo outou Tamā o i le lagi.” (Mataio 5:14, 16) O galuega lelei a se Kerisiano e aofia ai le folasiaina o ituaiga uma o le agalelei ma le amiotonu ma le upu moni, ona ua saunia e na uiga lelei se molimau malosi mo le upu moni. (Kalatia 6:10; 1 Peteru 3:1) Ua faapitoa lava ona latou faaaofia ai le talanoa atu i isi e uiga i le upu moni. I aso nei, o le uiga o lenei mea o le auai lea i le tauiviga i le lalolagi aoao o le talaʻia o “lenei tala lelei o le malo . . . e fai ma molimau i nuu uma.” E uiga foi, i le toe asiasi atu ma le onosai i ē naunau, suesueina le Tusi Paia ma i latou, ma fesoasoani ia i latou, ina ia faia galuega e tusa ma le malamalama.—Mataio 24:14; 28:19, 20.
20. (a) E faapeī le pupula o loo susulu atu ai le malamalama i aso nei? (e) O ā faamanuiaga faaʻoaina ua olioli ai i latou o ē ua tali atu i le malamalama?
20 I o tatou aso, faafetai i le galuega talaʻi maelega a Kerisiano faamaoni, ua lagonaina ai nei le tala lelei i le silia i le 200 atunuu, ma ua sili atu ai ona susulu le malamalama i lo se isi lava taimi muamua. Na fetalai Iesu: “O aʻu nei o le malamalama o le lalolagi; o lē mulimuli mai ia te au, e le savali o ia i le pouliuli, a e ia te ia le malamalama o le ola.” (Ioane 8:12) Maeu se olioli i le auai i le faataunuuga o lenei folafolaga! Ua sili atu nei ona matuā faaʻoaina o tatou olaga ua faapea ai ona tatou lē toe tautevateva i le pouliuli o le lalolagi a Satani. Ma o o tatou faamoemoega e matuā matagofie moni lava a o tatou tepa taulaʻi atu i se faamasinoga logolelei mai le Faamasino tofia a Ieova. (2 Timoteo 4:8) Pagā se mala o le a iai pe afai, e oo ina maua le malamalama, ae tatou toe see i tua i le pouliuli ma maua ai se faamasinoga e lē logolelei! I le mataupu o loo sosoo mai, o le a tatou talanoaina ai le auala tatou te tumau mausalī ai i le faatuatua.
E Mafai ona E Faamatalaina?
□ O le ā le faavae mo le faamasinoga a le Atua?
□ O le ā le matafaioi autū a Iesu e uiga i fuafuaga a le Atua?
□ E faapefea ona tatou faaalia tatou te gauai ia Iesu o lē ua tofia e Ieova o se Tupu?
□ E mafai faapefea ona tatou faamaonia i tatou lava o ‘fanau o le malamalama’?
□ I le pouliuli o lenei lalolagi, o le ā le auala ua susulu atu ai le malamalama e leʻi faapea ona iai muamua?
[Fesili mo le Suʻesuʻega]
[Ata i le itulau 10]
I le faaiʻuga, o le a tatau ona aloaia e le fanau uma a tagata le pule a Iesu
[Ata i le itulau 12]
E tatou te faaalia tatou te naunau i le malamalama pe a tatou faaatagia atu i isi