O Ē Faasusulu Atu le Malamalama—Mo le ā le Fuafuaga?
O Ē Faasusulu Atu le Malamalama—Mo le ā le Fuafuaga?
“Ua ou tofia oe e fai ma malamalama o nuu ese.”—GALUEGA 13:47.
1. Sa aafia faapefea le aposetolo o Paulo i le poloaiga ua faailoa mai i le Galuega 13:47?
FAI mai le aposetolo o Paulo: “Ua faapea ona poloai mai o le Alii [“Ieova,” NW] ia te i matou, Ua ou tofia oe e fai ma malamalama o nuu ese, ina ia avea oe ma faaolataga e oo i le tuluʻiga o le lalolagi.” (Galuega 13:47) E lē gata ina sa ia tautala ai, ae na ia iloa foi lona uigā. Ina ua avea o ia ma Kerisiano, sa tuutoina atu loa e Paulo lona ola i le faataunuuina o lena poloaiga. (Galuega 26:14-20) Faamata ua faaee mai foi lena poloaiga ia i tatou? Afai o lea, aiseā ua tāua ai i o tatou aso?
Ina ua ‘Mou Ese le Malamalama’ Mai Tagata
2. (a) A o ulu atu le lalolagi i le taimi o lona iʻuga, o le ā na tupu ua matuā āfaina ai lona tulaga faaleagaga ma amio? (e) Na faapefea ona tali atu se failautusi a Peretania i le mea na ia vaaia o tupu ia Aokuso 1914?
2 Na ulu atu lenei lalolagi i le taimi o lona iʻuga, a o leʻi fananau mai le toatele o tagata o loo soifua i aso nei. Sa vave le tutupu faasolosolo mai o ni mea tetele. Na lafoina ifo i le lalolagi, Satani le Tiapolo, o lē ua taʻimua i le faagaeeina o le pouliuli faaleagaga ma itu tau amio. (Efeso 6:12; Faaaliga 12:7-12) Ua uma ona olopalaina le lalolagi i lana taua muamua. I le tau amataga o Aokuso 1914, ina ua mautinoa le oo mai o le taua, na tulaʻi ai le failautusi o le vā i fafo a le malo o Peretania o Sir Edward Grey, i le faamalama o lona ofisa i Lonetona ma faapea mai: “Ua mou ese atu faamoemoega pupula i Europa atoa; o le a tatou lē toe vaaia nei faamoemoega i o tatou olaga.”
3. Sa faapeī le taulau o taʻitaʻi o le lalolagi i taumafaiga e faaleleia le lumanai o tagata?
3 I se taumafaiga ina ia faafoisia mai na faamoemoega pupula, na faavaeina ai Malo Sosoo i le 1920. Peitai sa na ona taupulapula mai o na faamoemoega. I le faaiʻuga o le taua lona lua a le lalolagi, sa toe taumafai foi taʻitaʻi o le lalolagi, e ala i le faalapotopotoga o Malo Aufaatasi i lena taimi. Ae o le mea lava e tasi, sa matuā lē pupula mai lava na faamoemoega. Peitai, a manatu atu i le tele o mea na tutupu talu ai nei, sa talanoa ai taʻitaʻi o le lalolagi i se “faiga fou o le lalolagi.” Ae e faigata tele ona faapea atu ua uma ona aumaia e so o se “lalolagi fou” ua latou saunia, le filemu ma le saogalemu moni. I le tuufaafeagai, ua faaauau pea ona avea fetauaiga i meatau, le feainaʻi o tagata, le solitulafono, le leai o ni galuega, le mativa, le faaleagaina o le siosiomaga, ma maʻi tigā e aveesea ai le fiafiaga o tagata i le olaga.
4, 5. (a) O anafea ma sa faapefea ona ufitia le aiga faaletagata i le pouliuli? (e) O le ā e manaomia ina ia maua ai se mapusaga?
4 O le tulaga moni, na mou ese atu faamoemoega o tagata a o leʻi taitai ona oo mai i le 1914. Na tupu lena i le 6,000 tausaga ua mavae i Etena, ina ua filifili o tatou uluai mātua faaletagata e faia a laua lava faaiʻuga e aunoa ma le manatu i le finagalo faaalia o le Atua. O mea e loto mafatia ai na tutupu i le aiga faaletagata talu mai lena taimi, ua na o ni vaega ia o loo pulea e le mea ua faailoa mai e le Tusi Paia o “le pule a le pouliuli.” (Kolose 1:13) Na avea le taaʻiga a Satani le Tiapolo ma itu na aumaia ai e le uluai tagata o Atamu le agasala i le lalolagi; ma ona o Atamu, ua oo mai ai le agasala ma le oti i tagata uma. (Kenese 3:1-6; Roma 5:12) O lea, na lē toe maua ai e tagata le faamaoniga a Ieova, le Puna o le malamalama ma le ola.—Salamo 36:9.
5 Na pau le auala e mafai ai ona toe faasusulu mai le malamalama, pe toe maua ai le faamoemoe mo so o se tagata, pe afai latou te maua le faamaoniga a Ieova le Atua, o Lē na Foafoaina le tagata. Ona faatoʻā mafai lea ona aveesea le faasalaga o le agasala, o “le ie ufiufi, o loo ufitia aʻi nuu uma.” E mafai faapefea ona fai lena mea?—Isaia 25:7.
O Lē na Foaiina mai e Fai ma “Malamalama o Nuu Ese”
6. O ā faamoemoega ofoofogia ua faaavanoa mai mo i tatou e Ieova e ala ia Iesu Keriso?
6 A o leʻi tutuliesea Atamu ma Eva mai le Parataiso, na valoia e Ieova se “fanau” o le a avea ma faaola o ē alolofa i le amiotonu. (Kenese 3:15) Ina ua mavae le fanau mai o lena Fanau folafolaina o se tagata, ona faapogaia lea e Ieova o le toeaina o Simeona i le malumalu i Ierusalema, ina ia faailoa atu lena fanau, o “le malamalama e faamalamalama aʻi nuu ese.” (Luka 2:29-32) I le faatuatua i le taulaga o le ola faaletagata lelei atoatoa o Iesu, ua mafai ai ona saoloto tagata mai le taʻusalaina ona o le agasala tuufaasolo. (Ioane 3:36) E tusa ai ma le finagalo o Ieova, ua mafai nei ona latou tepa taulai atu i le ola lelei atoatoa e faavavau, e fai ma vaega o le Malo faalelagi po o ni ona tagatanuu i se lalolagi parataiso. Maeu se sauniuniga ofoofogia!
7. Aiseā e faatumulia ai i tatou i le faamoemoe ona o valoaga i le Isaia 42:1-4 ma o latou faataunuuga i le uluai senituri?
7 Ua avea Iesu Keriso lava ia ma faamautinoaga o le faataunuuga o na faamoemoega matagofie. I le sootaga ma le faamalōlōina e Iesu o tagata sa pagatia, na faatatau ai ia te ia e Mataio le mea o loo tusia i le Isaia 42:1-4. Ua faapea mai se vaega o lena mau: “Faauta i laʻu auauna, ou te taofia o ia i luga; o le na aʻu filifilia ua fiafia i ai loʻu loto; ua ou tuuina atu loʻu Agaga i ona luga; na te avatua le faamasinoga mo nuu ese.” Ma pe lē o le mea ea lena o loo manaomia e tagata o atunuu uma? Fai mai atili le valoaga: “Na te le alaga, na te le leo tele, e le lagona foi lona leo i le ala. O le u gapēpē na te le gausia; o le vavae ua mu itiiti na te le tineia.” I le ōgatasi ma lenei, sa lē soona faia ai e Iesu tagata o ē sa pagatia. Na ia faaalia le alofa mutimutivale mo i latou, sa aʻoaʻoina i latou i fuafuaga a Ieova, ma sa faamalōlōina foi i latou.—Mataio 12:15-21.
8. I le ā le uiga na foaiina mai ai Iesu e Ieova “e fai ma feagaiga a le nuu” ma “le malamalama o nuu ese”?
8 Na faailoa atu Lē e ana lenei valoaga i lana Auauna o Iesu ma faapea atu: “O aʻu o Ieova, na ou valaauina oe i le amiotonu; ou te taofimauina lou lima, ma aʻu leoleo ia te oe, ou te avatua foi oe e fai ma feagaiga a le nuu, o le malamalama o nuu ese, e faapupula i mata o e tauaso, e aumaina i fafo nai le fale puipui le ua fusifusia, atoa ma e ua nonofo i le pogisa ia aumaia i latou nai le fale ua taofiina ai.” (Isaia 42:6, 7) Ioe, ua foaiina mai e Ieova Iesu Keriso e fai ma feagaiga, o se faamautinoaga aʻiaʻi o le folafolaga. Maeu le faalaeiauina ai i lena mea! Na faaalia e Iesu le naunau moni i tagata a o iai o ia i le lalolagi; sa oo lava foi ina foaiina atu lona ola mo tagata. O ia lenei ua faaee atu i ai e Ieova le pule i luga o atunuu uma. E letioa ona taʻua o ia e Ieova o le malamalama o nuu. Na fetalai Iesu lava ia: “O aʻu nei o le malamalama o le lalolagi.”—Ioane 8:12.
9. Aiseā sa lē taumafai atoatoa ai Iesu e faaleleia le faiga o mea sa iai i lena taimi?
9 O le ā le fuafuaga na avea ai Iesu ma malamalama o le lalolagi? E mautinoa lava e lē mo se fuafuaga faalelalolagi po o se faiga e pupū i mea faitino. Sa ia lē taumafai e faasaʻoina faiga faapolotiki sa iai i lena taimi, ma na te leʻi taliaina foi se tulaga tautupu mai ia Satani, le alii o le lalolagi, pe mai tagata. (Luka 4:5-8; Ioane 6:15; 14:30) Na faaalia e Iesu le alofa tele mo i latou sa pagatia ma na ia avatua ia te i latou le mapusaga i ni auala sa lē mafai ona faia e isi. Peitai, na ia silafia, e leai se mapusaga tumau e mafai ona maua i totonu o le sosaiete a tagata ua faasalaina e le Atua ona o le agasala tuufaasolo, ma o loo puleaina e au a agaga leaga lē vaaia. Ona o le malamalama faaleatua, na faaautū ai e Iesu lona olaga atoa i le faia o le finagalo o le Atua.—Eperu 10:7.
10. I ā auala ma o le ā le fuafuaga na avea ai Iesu ma malamalama o le lalolagi?
10 I ā la auala ma o le ā le fuafuaga na avea ai Iesu ma malamalama o le lalolagi? Na ia tuutoina atu ia lava i le talaʻia o le tala lelei o le Malo o le Atua. (Luka 4:43; Ioane 18:37) I le molimau atu i le upu moni e uiga i fuafuaga a Ieova, na faapaia ai foi e Iesu le suafa o lona Tamā faalelagi. (Ioane 17:4, 6) E lē gata i lena, i le avea ma malamalama o le lalolagi, na ia folasia ai mea sese a lotu ma saunia ai le saolotoga faaleagaga mo i latou sa nofo pologa i lotu. Na ia faaalialia i lumamea Satani o sē e lē vaaia o loo puleaina i latou o ē faatagaina i latou lava na te faaaogāina. Sa faailoa manino mai foi e Iesu galuega a le pouliuli. (Mataio 15:3-9; Ioane 3:19-21; 8:44) I se tulaga matilatila, sa ia faamaonia o ia o le malamalama o le lalolagi, e ala i le foaiina atu o lona ola faaletagata lelei atoatoa e fai ma togiola, ma tatalaina ai le ala mo i latou o ē faatuatua i lenei sauniuniga ina ia faamagaloina a latou agasala, ina ia maua ai se faiā faamaonia ma le Atua, atoa ma le faamoemoe o le ola e faavavau e fai ma sui o le aiga aoao o Ieova. (Mataio 20:28; Ioane 3:16) Ma o le mea mulimuli, ona o le tausisi i le tuutoina faaleatua lelei atoatoa i lona olaga atoa, na faasilisilia ai e Iesu le pule silisiliese a Ieova ma faaalia ai le pepelo a le Tiapolo, lea ua mafai ai ona maua aogā e faavavau mo ē alolofa i le amiotonu. Ae pe na o Iesu ea lē e faasusuluina atu le malamalama?
“O Outou, o le Malamalama o le Lalolagi”
11. Ina ia avea i latou ma ē faasusulu atu le malamalama, o le ā sa tatau ona faia e soʻo o Iesu?
11 Na fetalai atu Iesu i ona soʻo, i le Mataio 5:14: “O outou o le malamalama o le lalolagi outou.” Sa manaomia ona latou mulimuli i ona tulaga aao. I le auala sa latou ola ai, ma la latou talaʻiga, sa manaomia ona latou faasinoina atu isi ia Ieova, o le Puna o le malamalama moni. I le faaaʻoaʻo ia Iesu, sa manaomia ona latou faalauiloa atu le suafa o Ieova ma ia faasilisilia Lana pule silisiliese. Sa manaomia ona latou folafola atu le Malo o le Atua ua na o lea le faamoemoe o tagata, e pei ona faia e Iesu. Sa manaomia foi ona latou faaalialia mea pepelo a lotu, o galuega a le pouliuli, atoa ma lē o loo leaga o i tua o na mea. Na tatau i soʻo o Keriso ona taʻuina atu i tagata i so o se mea, le sauniuniga alofa a Ieova mo le faaolataga e ala ia Iesu Keriso. Ma e maeu le maelega na faatinoina ai e uluai Kerisiano lena tofiga, e amata mai i Ierusalema ma Iutaia ma faasolo ane ai i Samaria, e pei ona poloaiina ai e Iesu!—Galuega 1:8.
12. (a) E faapeī le mamao na faasusulu atu ai le malamalama faaleagaga? (e) O le ā sa faailoa e le agaga o Ieova ia Paulo i le Isaia 42:6, ma e ao faapefea i lena valoaga ona aafia ai o tatou olaga?
12 Peitai, sa lē gata ai i lena oganuu le talaʻiina o le tala lelei. Na poloaia e Iesu ona soʻo ina ia “fai nuu uma lava ma soo.” (Mataio 28:19) I le taimi o le faaliliuina o Saulo o Taso, sa patino lava ona faaali atu le Alii e faapea, e tatau ona talaʻi atu Saulo (o lē na avea ma aposetolo o Paulo) e lē gata i tagata Iutaia, ae faapea foi ma tagata o Nuu Ese. (Galuega 9:15) Ona o le fesoasoani a le agaga paia, na talisapaia ai e Paulo le mea na aofia ai i lena galuega. Na ia iloa faapea, o le valoaga i le Isaia 42:6, lea sa faataunuu tonu ia Iesu Keriso, ua avea foi o se poloaiga e faatatau ia i latou uma o ē faatuatua ia Keriso. O lea, i le Galuega 13:47, na taʻua ai e Paulo, ina ua ia siiina mai le Isaia: “Ua faapea ona poloai mai o le Alii [“Ieova,” NW] ia te i matou, Ua ou tofia oe e fai ma malamalama o nuu ese, ina ia avea oe ma faaolataga e oo i le tuluʻiga o le lalolagi.” Ae faapefea oe? Po ua teu loto ea ia te oe lena matafaioi ina ia avea o sē faasusulu atu le malamalama? Po o faaautū ea lou olaga i le faia o le finagalo o le Atua, e pei o Iesu ma Paulo?
Ia Taʻitaʻia i Tatou e le Malamalama ma le Upu Moni Mai le Atua
13. E tusa ai ma le Salamo 43:3, o le ā la tatou tatalo naunautai, ma o le ā ua ia puipuia mai ai i tatou?
13 Afai tatou te taumafai i ni a tatou lava taumafaiga e ‘toe faafoi mai faamoemoega’ ina ia faapupula ai le lumanai o tagata, o le a tatou matuā misia ai la le manatu tāua o le Afioga faagaeeina a le Atua. Peitai, e tusa lava po o ā mea o loo faia e le lalolagi lautele, ae ua vaavaai atu Kerisiano moni ia Ieova o ia o le Puna moni o le malamalama. Ua pei la latou tatalo o le tatalo o loo faamauina i le Salamo 43:3, e faapea: “Ia e aauina [atu] lou malamalama ma lau upu moni, ia la taʻitaʻi mai ia te au, ia la faaoo ia te au i lou mauga paia ma lou malumalu.”
14, 15. (a) I ā auala ua aauina atu ai nei e Ieova lona malamalama ma lana upu moni? (e) E mafai faapefea ona tatou faaalia o loo taʻitaʻia moni i tatou e le malamalama ma le upu moni a le Atua?
14 O loo faaauau pea ona tali mai Ieova i lena tatalo a ana auauna faamaoni. Ua ia auina mai le malamalama e ala i le faailoaina mai o lana fuafuaga, i le faapogaia o ana auauna e malamalama i ai, ma i le faataunuuina o le mea ua ia folafola mai. A tatou tatalo atu la i le Atua, ua lē na o se mea lea e masani ai, e tau ina faafoliga atu e paia. O lo tatou faanaunauga moni, ia taʻitaʻia i tatou e le malamalama e sau mai ia Ieova, e pei ona taʻua e le faisalamo. Tatou te talia le avega tauave e ō mai faatasi ma le mauaina o le malamalama ua saunia e le Atua. E pei o le aposetolo o Paulo, ua tatou iloa, o le faataunuuina o le Afioga a Ieova, e ō mai faatasi lea ma le poloaiga e faatatau i tagata uma lava o ē faatuatua i ai. Tatou te lagona foi le nofo aitalafu i isi tagata, seʻi vaganā ua tatou avatu ia i latou le tala lelei ua tuuina mai ia i tatou e le Atua mo lena fuafuaga.—Roma 1:14, 15.
15 O le malamalama ma le upu moni ua aauina mai e Ieova i o tatou aso, e faaalia ai ua faatinoina nei le pulega a Iesu Keriso mai lona nofoalii faalelagi. (Salamo 2:6-8; Faaaliga 11:15) Na valoia faapea e Iesu, i le taimi o lona faatasi mai i le tulaga tautupu, o le a talaʻia atu ai lenei tala lelei o le Malo i le atu laulau uma e fai ma molimau. (Mataio 24:3, 14) O loo faia nei lena galuega, ma i se tulaga tele i le lalolagi atoa. Afai o loo avea lena galuega o se mea e sili ona tāua i o tatou olaga, o loo taʻitaʻia la i tatou e le malamalama ma le upu moni a le Atua, e pei ona taʻua e le faisalamo.
Ua Susulu atu le Mamalu o Ieova
16, 17. Sa faasusulu atu faapefea e Ieova lona mamalu i lana faalapotopotoga e pei o se fafine i le 1914, ma o le ā le poloaiga na ia avatu i ai?
16 Ua faamatala mai e le Tusi Paia i ni upu faagaee loto, le auala ua faasusulu atu ai le malamalama o le Atua i tagata i so o se mea. Fai mai le Isaia 60:1-3, lea o loo faatatau i le “fafine” a Ieova, po o lana faalapotopotoga faalelagi o auauna faamaoni: “Tulai ia, [“oe le fafine,” NW], ina malamalama ia, auā ua oo mai lou malamalama; ua alu ae foi le pupula o Ieova i ou luga. Auā faauta mai, e ufitia le lalolagi i le pouliuli, e ufitia foi nuu i le pogisa; a e afio ae Ieova i ou luga, ma le pupula o Ieova e aliali mai lea i ou luga. E o mai nuu ese i lou malamalama, o tupu foi e o mai i latou i le pupula o lou alu ae [“malamalama,” NW].”
17 Na susulu atu le mamalu o Ieova i lana faalapotopotoga faalelagi e pei o se fafine i le tausaga e 1914. Ina ua mavae se vaitaimi umi o faatalitali, ona ia fanaua lea o le Malo faa-Mesia, lea ua avea ai Iesu Keriso ma Tupu. (Faaaliga 12:1-5) Ua susulu atu le malamalama ofoofogia o Ieova faatasi ma lana faamaoniga i lena pulega, o le pulega tonu mo le lalolagi uma.
18. (a) Aiseā ua ufitia ai le lalolagi i le pouliuli, e pei ona valoia i le Isaia 60:2? (e) E mafai faapefea ona faasaoina tagata taitoatasi mai le pouliuli o le lalolagi?
18 I le tuufaafeagai, o loo ufitia le lalolagi i le pouliuli ma o loo iai atunuu i le pogisa mafiafia. Aiseā? Auā ua teena e atunuu le pulega a le Alo pele o le Atua, ae e talia pulega faaletagata. Ua latou manatu faapea, e ala i le soloia o se tasi pulega ae faatūina mai se tasi, o le a foia ai o latou faafitauli. Peitai, ua lē aumaia ai e lena mea le vaifofo o loo latou faamoemoe i ai. Latou te lē o iloa lē o loo i tua o na mea, lea na te puleaina atunuu mai le nofoaga o agaga. (2 Korinito 4:4) Ua latou teena le Puna o le malamalama moni ma o le mea lea ua latou pouliuli ai. (Efeso 6:12) Peitai, po o ā lava mea e faia e atunuu, ae e mafai ona faasaoina tagata taitoatasi mai lena pouliuli. I le ā le auala? E ala lea i le faatuatua atoatoa i le Malo o le Atua ma gauai atu i ai.
19, 20. (a) Aiseā e faasusulu atu ai le mamalu o Ieova i soʻo faauuina o Iesu, ma ua faapefea foi ona faia faapea? (e) O le ā le mafuaaga na tofia ai e Ieova ona tagata faauuina e avea ma ē faasusulu atu le malamalama? (i) E pei ona valoia, ua faapefea ona tosina mai “tupu” ma ‘atunuu’ i le malamalama mai ia Ieova?
19 E lē o faatuatua Kerisinetoma i le Malo o le Atua ma e lē o gauai atu i ai. Ae o loo faia faapea e soʻo o Iesu Keriso ua faauuina i le agaga. O le iʻuga, ua susulu atu ai le malamalama o le faamaoniga a Ieova le Atua i nei sui vaaia o lana fafine faalelagi, ma ua faaalia atu foi lona mamalu ia te i latou. (Isaia 60:19-21) O loo latou olioli i le malamalama faaleagaga, lea e leai se suiga faapolotiki a le lalolagi po o se faiga tau tamaoaiga e mafai ona aveesea. Ua faasaoina i latou e Ieova mai Papelonia Tele. (Faaaliga 18:4) O loo latou olioli i lana faamaoniga ona ua latou taliaina lana aʻoaʻiga ma faasilisilia ma le faamaoni lana pule silisiliese. Ua ia i latou ni faamoemoega pupula mo le lumanai, ma ua latou olioli i le faamoemoe ua ia folasia i o latou luma.
20 Ae o le ā le fuafuaga ua feagai ai Ieova ma i latou i lenei auala? E pei ona fetalai lava ia i le Isaia 60:21, ina ia mafai ai ona ‘viia’ o ia, ia mafai ai ona faapaiaina lona suafa ma ia mafai ai ona tosina atu isi ia te ia o le Atua moni e toatasi—ma iʻu ai i lo latou manuia e faavavau. I le ōgatasi ma lenei mea, na talia ai e nei tagata tapuai o le Atua moni le igoa o Molimau a Ieova i le 1931. Pe na avea la latou molimau atu, ma itu na tosina ane ai “tupu” i le malamalama na latou faasusulu atu, e pei ona valoia e Isaia? Ioe! Peitai, e lē o ni taʻitaʻi faapolotiki ia o le lalolagi, ae o le vaega totoe o le aofaiga o i latou o ē o le a avea ma tupu faatasi ma Keriso i lona Malo faalelagi. (Faaaliga 1:5, 6; 21:24) Ae faapefea ‘atunuu’? Pe sa latou tosina atu ea i lenei malamalama? O le tulaga moni lena! E leai se atunuu faapolotiki e tasi ua tosina atu i ai, peitai, ua gasolo ane se motu o tagata e toatele mai atunuu uma latou te tutū i le itu o le Malo o le Atua, ma ua latou faatalitali ma le naunau atu e faasaoina i le lalolagi fou a le Atua. O le a avea moni lava o se lalolagi fou e tumu i le amiotonu.—2 Peteru 3:13; Faaaliga 7:9, 10.
21. E mafai faapefea ona tatou faailoa atu tatou te lē o misia le fuafuaga o le alofa tunoa o Ieova i le foaiina mai o le malamalamaga e uiga i lona finagalo?
21 Po o oe ea o se tasi o lena vao tagata o loo tuputupu aʻe o ē faasusulu atu le malamalama? Ua foaiina mai e Ieova ia i tatou le malamalamaga e uiga i lona finagalo, ina ia mafai ai ona avea i tatou o ni ē faasusulu atu le malamalama e pei o Iesu. I le faaalia o le maelega i le galuega ua tuuina mai e Ieova i ana auauna i o tatou aso, talosia ia tatou faailoa atu uma lava, tatou te lē o misia le fuafuaga o le alofa tunoa o le Atua ua faasalafa mai ia i tatou. (2 Korinito 6:1, 2) E leai lava se isi galuega e sili atu ona tāua i o tatou aso. Ma e leai foi se isi faaeaga silisili e mafai ona fai mo i tatou, na i lo o le vivii atu ia Ieova e ala i le faasusuluina atu i isi o le malamalama ofoofogia e sau mai ia te ia.
E Faapefea ona E Tali Mai?
□ O ā mafuaaga autū o faafitauli tigā o tagata?
□ I ā auala na avea ai Iesu ma ona soʻo ma “malamalama o le lalolagi”?
□ Ua faapefea ona taʻitaʻia i tatou e le malamalama ma le upu moni a Ieova?
□ Ua faapogaia faapefea e Ieova lona mamalu ina ia susulu atu i lana faalapotopotoga?
□ O le ā le fuafuaga ua tofia ai e Ieova ona tagata e fai ma malamalama?
[Fesili mo le Suʻesuʻega]
[Ata i le itulau 9]
O le mea na tupu i Etena, e fesoasoani lea ia i tatou e malamalama ai i faafitauli tigā o tagata i aso nei
[Ē Ana le Ata]
Tom Haley/Sipa
Paringaux/Sipa