Fesili Mai le Au Faitau

Pe afai e gasegase se Kerisiano pe o loo fai-malaga foi, ma ua lē mafai ai ona ia auai i le faamanatuina o le Faamanatuga, pe e ao la ona ia faamanatuina i le masina e sosoo mai ai?

I Isaraelu anamua, sa faamanatuina ai faaletausaga le Paseka i le aso lona 14 o le uluai masina, o Nisani (po o Apipa). Ae ua tatou iloaina se sauniuniga faapitoa i le Numera 9:10, 11 e faapea: “Ia e fai atu i le fanauga a Isaraelu, ia faapea atu, Ai se tasi e ia te outou po o a outou tupulaga amuli e leaga i le tagata oti, po o se tagata e mamao i se malaga, e fai pea e ia le paseka ia Ieova. O le masina e lua [e taʻua o Iyyar, po o Ziv], i lona aso e tasi le sefulu ma le fa i le afiafi latou te fai ai, latou te aai ai ma areto e le faafefeteina ma laau oona.”

Mātau, sa leʻi taʻua e lenei sauniuniga ni aso se lua e filifili ai mo le faia o le Paseka (Nisani 14 po o Ziv 14), ma saoloto ai so o se tagata Isaraelu e filifili, e faalagolago i se taimi e avanoa ai. O le sauniuniga mo le tausamiga o le Paseka i le masina lona lua sa faatapulaaina. Sa faatagaina ai na o se tagata Isaraelu o lē sa lē mamā i le taimi o le sauniga ia Nisani 14 pe sa iai i se mea e mamao ese mai i le nofoaga sa masani ona faia ai le faamanatuga.

Na pau lava le vaitaimi ua faamauina sa taatele ona faia ai faapea, o le taimi lea ina ua toe faaolaola e le Tupu faamaoni o Esekia le faamanatuina o le Tausamiga o Areto Lē Faafefeteina. Talu ai sa leai se taimi e sauniuni ai mo le uluai masina (sa leʻi sauniuni ositaulaga ma e leʻi faapotopotoina foi tagata), o lea na faamanatuina ai i le aso lona 14 o le masina lona lua.—2 Nofoaiga a Tupu 29:17; 30:1-5.

Sa tausia pea la e tagata Iutaia le Paseka i le aso na uluai faatulaga ai e le Atua seʻi vagana ai na tulaga lē maalofia. (Esoto 12:17-20, 41, 42; Levitiko 23:5) Na faia e Iesu ma ona soʻo le faamanatuga e pei ona faatonuina ai e le Tulafono, ma ia lē faatalalē i ai i lenei aso. Ua taʻu mai e Luka: “Ona oo mai ai lea o le aso o areto e le faafefeteina, e tatau ona fasi ai o le paseka. Ona aauina atu lea e [Iesu] o Peteru ma Ioane, ua faapea atu, Lua te o e sauni le paseka mo i tatou, tatou te aai ai.”—Luka 22:7, 8.

O le sauniga lena na faatulaga ai e Iesu le faamanatuga faaletausaga lea ua iloa e Kerisiano o le Talisuaga Afiafi a le Alii. E lē tatau ona manatu faatauvaa i le tāua o le auai atu o Kerisiano i lea sauniga. O le sauniga e silisili ona tāua lenei o le tausaga i Molimau a Ieova. Ua faaalia i fetalaiga a Iesu le mafuaaga; na ia fetalai: “Tou te faia le mea nei e fai ma faamanatuga ia te au.” (Luka 22:19) O lea, e ao i Molimau a Ieova uma ona fuafua mamao ina ia mautinoa e leai se isi mea e toe faalavelavea ai i le aso o le faamanatuga. O le a faamanatuina le Talisuaga Afiafi a le Alii i le Aso Lua, Aperila 6, 1993, pe a mavae le goto o le la i lo outou lava atunuu.

I nisi tulaga lē maalofia ae seāseā lava tutupu, e pei o se gasegase po o ni faafitauli i femalagaiga, atonu o le a taofia mai ai se Kerisiano mai le auai atu e pei ona sa ia fuafuaina. O le ā la e ao ona faia i sea tulaga?

I le taimi o le faamanatuga, e tauaao faasolosolo atu ai le areto ma le uaina, ma o le a tagofia e i latou o ē ua faauuina e le agaga paia o le Atua ma ua filifilia mo le ola i le lagi. (Mataio 26:26-29; Luka 22:28-30) Afai o se tasi e tagofia i tausaga taitasi le areto ma le uaina, ae i lenei tausaga ua faataotolia o ia i le aiga po o le falemaʻi foi ona o se gasegase, o le a fuafuaina la e toeaina o lana faapotopotoga ina ia oo atu se tasi o i latou e auina atu se areto ma le uaina i lē ua gasegase, ia talanoaina ni mau o le Tusi Paia e talafeagai ma lea sauniga, ma ia tautūina atu foi i ai le areto ma le uaina. Afai o loo toesea mai se Kerisiano faauuina mai lana faapotopotoga, e ao ona ia fuafua ia alu atu i se faapotopotoga i le vaipanoa o le a iai o ia i lena aso.

E tusa ai ma lenei faatulagaga, o le a na o tulaga ai lava ua matuā lē maalofia, e mafai ai e se Kerisiano faauuina ona ia faamanatuina le Talisuaga Afiafi a le Alii i le isi 30 o aso mulimuli ane (e tasi le masina oso), ina ia ōgatusa ma le poloaiga i le Numera 9:10, 11 ma le faataʻitaʻiga i le 2 Nofoaiga a Tupu 30:1-3, 15.

E lē aofia ai i lenei poloaiga ina ia tagofia le areto ma le uaina, i latou e i le vasega o “isi mamoe” a Iesu, o ē o iai le faamoemoe o le ola e faavavau i se lalolagi parataiso. (Ioane 10:16) E tāua lo latou auai atu i le faamanatuga faaletausaga, ae latou te lē tagofiaina le areto ma le uaina. Afai la e gasegase pe faimalaga se tasi o i latou, ma lē o mafai ona auai atu i se faapotopotoga i lena afiafi, e mafai lava la ona ia faitauina mau o le Tusi Paia ua talafeagai (e aofia ai le tala i le uluai amataina e Iesu o le faamanatuga) ma ia tatalo atu ina ia faamanuia e Ieova lenei faatasiga i le lalolagi aoao. Ae e lē manaomia ona faia so o se fuafuaga faaopoopo mo se sauniga po o se talanoaga faapitoa faale-Tusi Paia i se masina mulimuli ane.