“Talofa! Pe E te Silafia o Ai le Suafa o le Atua?”

I LE ofisa o le lālā a Molimau a Ieova i Pasili, na maua mai ai le tusi o loo faamatalaina i lalo mai se auuso masaga o ni tuafāfine e taʻi sefululua tausaga le matutua i le aai o Fortaleza:

“I tuā i le 1990 ina ua oo a ma aʻoga i le vasega lona lima, sa taupule ai la matou aʻoga i se aso e fai ai la matou faaaliga faasaienisi, tusigā ata ma aganuu. Sa ma faamatala i lo ma faiaʻoga e ma te mananao i la ma faatulagaga ia ʻese mai i sauniuniga a isi tamaiti aʻoga o loo fuafua e fai. Talu ai ona sa faalogo muamua lo ma faiaʻoga o ma talanoa e uiga ia Ieova ma le Tusi Paia, na ia taʻu mai ai e faapea: ‘E mafai la ona oulua tusia e uiga i lo oulua Atua!’

“Sa ma vāai i lenei fuafuaga o se avanoa lelei lea e avatu ai se molimau ma na ma filifili ai loa e tuu faatasi a ma tusitusiga ma se faaaliga o lomiga faale-Tusi Paia ia e taulaʻi tonu i le suafa o Ieova. Na ma sauniunia ma faatelēina le kopi o upu foi nei o loo i le Salamo 83:18 ma faapipii i se ata o se Tusi Paia o loo tatalaina. Sa ma tuuina foi i luga o le laulau faaliliuga eseese o le Tusi Paia o loo iai le suafa o Ieova. I luga lava o le laulau lea, sa ma faaalia ai foi ni lomiga eseese faale-Tusi Paia. I le faatausiʻusiʻuga lava o le laulau, na ma faatūina ai se vitiō (video) ma se televise e faaali ai i tagata asiasi mai se faataʻitaʻiga o le faaaogāina o le suafa o Ieova i se ata tifaga lauiloa.

“A o faagasolo pea le faaaliga, e oo mai loa se tagata i la ma laulau, ona ma faapea atu loa lea i ai: ‘Talofa! Pe e te silafia o ai le suafa o le Atua?’ A uma ona tuu lea o le avanoa i lea tagata e tali mai ai, ona ma faaauau lea faapea: ‘Tagai mai i inei! O nisi nei o faaliliuga o le Tusi Paia o loo faaalia ai o lona suafa o Ieova,’ a o ma faasino atu i ai le suafa mai Tusi Paia eseese e pei o le João Ferreira de Almeida, The Jerusalem Bible, ma le New World Translation. A uma lena, ona ma fetagofi foi lea ki le televise e faaalia ai le vaaiga lea e faamatilatilaina mai ai e le tagata autū o le ata, e faapea o Ieova o le suafa lea o le Atua. A faaalia e tagata le naunau, ona ma avatua loa lea i ai o se mekasini po o se sāvali o loo iai nisi faamatalaga atili.

“Sa oo mai se tasi talavou i le ma laulau ma talosaga mai mo le tusi Questions Young People Ask—Answers That Work. Sa iloilo e lo ma faiaʻoga le tusi Faia o Lou Olaga Faaleaiga ia Fiafia ma na ia faapea mai: ‘Oka! Maeu se tusi ina a manaia!’ E oo ane i le faaiʻuga o le faaaliga, e 7 tusi, 18 sāvali, ma mekasini e 67 ua alu. Sa tauia i maʻua i le tulaga tolu i le faaaliga. Ae o le tumutumuga o na mea uma, na matuā faafiafiaina i maʻua ona o lenei faaeaga e faalauiloa atu ai le suafa o le Atua o Ieova.”