Ua Ou Maua le Lotomalie i le Auauna atu i le Atua

E PEI ONA FAAMATALAINA E JOSHUA THONGOANA

I tuā i le 1942, sa ou matuā fenuminumiai ai lava. Sa ou suesueina tusi sa faasalalauina e le Ekalesia Aso Fitu, ma lomiga na faasalalauina e le Sosaiete o le Olo Matamata. I le pei o tagata Isaraelu anamua, sa ou “faaletonu i manatu e lua.”—1 Tupu 18:21.

SA AAUINA mai ia te aʻu e le Ekalesia Aso Fitu ni lesona ua lomia sa taʻua o le “Leo o Valoaga.” Sa ou fiafia e taliina a latou fesili, ma na latou folafola mai e aumaia ia te aʻu se tusipasi matagofie pe afai e pasi uma aʻu suega. Ae sa ou matauina o le “Leo o Valoaga” ma lomiga a le Sosaiete o le Olo Matamata sa aauina mai i le meli mai le aai o Aferika i Saute o Cape Town. Sa ou taumānatu: ‘Pe masani nei faalapotopotoga? Pe tutusa a latou aʻoaʻoga? Afai e leai, o ai la e saʻo?’

Ina ia foia le mataupu, sa ou aauina atu ni tusi e tutusa lelei i faalapotopotoga taitasi. Mo se faaaʻoaʻoga, sa ou tusi atu i le Sosaiete o le Olo Matamata: “Pe tou te iloa tagata ia e fesootai ma le ‘Leo o Valoaga,’ ma afai tou te iloa, o le ā sa outou tala e uiga i a latou aʻoaʻoga?” Mulimuli ane, na ou maua mai ai ni tali mai nei vaega uma. O le tusi mai le Sosaiete o le Olo Matamata na faapea mai latou te iloa le “Leo o Valoaga” ae na faamatala mai o a latou aʻoaʻoga e pei o le Tolutasi, ma le toe afio mai o Keriso i le lalolagi i le tino, e lē faale-Tusi Paia. I la latou tusi, sa aumai ai ni mau e faamaonia ai le lē moni o nei aʻoaʻoga.—Ioane 14:19, 28.

O le tali mai i le “Leo o Valoaga” sa na ona faapea mai latou te iloa “tagata o le Sosaiete o le Olo Matamata,” ae latou te lē ioe i a latou aʻoaʻoga. E leai ni mafuaaga na tuuina mai. O lea, na ou filifilia ai le Sosaiete o le Olo Matamata, o le sui faaletulafono lea ua faaaogāina e Molimau a Ieova. I aso nei, ina ua mavae le 50 tausaga o auaufaatasi ma Molimau, maeu loʻu fiafia ona ua ou faia le filifiliga saʻo!

Talaaga Faalelotu

I le 1912, na ou fanau ai i se nuu maotua na taʻua o Makanye, i le itu i sasae o le aai o Pietersburg, i Aferika i Saute. I tulaga tau lotu, o Makanye sa i lalo o le pulega a le Lotu Egelani i lena taimi, o lea, sa avea ai aʻu ma sui o lena lotu. Ina ua sefulu oʻu tausaga, ona siitia atu lea o lo matou aiga i se oganuu na pulea e le Lotu Misiona a Luteru mai Perelini [Lutheran Berlin Mission Church], ma sa auai foi oʻu mātua i lena lotu. E leʻi pine lava ae ou agavaa e auai i le sauniga o le Komenio ma ia tagofia se fasi falaoa ma sina miti o le uaina, ae sa leʻi faamalieina ai oʻu manaoga faaleagaga.

Ina ua uma le valu tausaga i le aʻoga, ona auina atu lea o aʻu e loʻu tamā i le Aʻoga  Faafaiaʻoga i Kilnerton, ma i le 1935, na maua ai loʻu Tusipasi o le Tausaga Tolu, e faailoa ai ua ou agavaa e avea ma faiaʻoga. O se tasi o faiaʻoga sa ma galulue faatasi o se tamaitai talavou, o Caroline. Sa ma faaipoipo, ma mulimuli ane na fanau ai e Caroline se pepe teine na faaigoaina ia Damaris. I ni nai tausaga mulimuli ane, na avea ai aʻu ma faiaʻoga ulu i le Aʻoga i Sehlale i se nuu maotua o Mamatsha. Ona sa pulea le aʻoga e le Lotu Toefuataiina mai Holani, na matou ō atu ai foi i lena lotu, ma auai e lē aunoa i ana sauniga. Sa matou faia lenei mea ona o se mea masani, ae ou te leʻi maua ai se lotomalie.

Se Taimi o Suiga

I se tasi Aso Sa i le 1942, sa faia ai a matou aʻogā pese i le falesa ae sa fotuai mai loa se taulealea talavou paʻepaʻe i le faitotoa ma ni tusi se tolu na lomia e le Sosaiete o le Olo Matamata—Creation, Vindication, ma le Preparation. Sa ou manatu faapea atonu o le a manaia tusi e teuteu ai laʻu fata tusi, o lea na ou talia ai mo na o le tolu seleni [30 sene]. Sa ou iloa mulimuli ane, o le tagata lea o Tienie Bezuidenhout, o se tasi o Molimau a Ieova, ma sa na o ia lava i lenei oganuu. I le isi asiasiga a Tienie, na ia aumaia ai se laau puʻeleo ma tāina ai nisi o lauga a le Faamasino o Rutherford. Sa ou matuā fiafia lava i le lauga faapea “Snare and Racket” (O le Mailei ma le Faitogafiti), ae sa lē fiafia i ai Caroline ma loʻu tuafafine laitiiti o Pisila, lea sa matou nonofo faatasi. I le asiasiga lona tolu a Tienie, na ia aumaia ia te aʻu le laau puʻeleo ina ia mafai ai ona ou tāina lauga mo aʻu uō.

I se tasi aso, sa ou suʻe faatopetope ai i itulau o le tusi Creation ma na ou tau ai i se mataupu faapea “O Fea o Iai Ē ua Oti?” Sa amata ona ou faitau ma le faamoemoe o le a ou aʻoaʻoina e uiga i le olioli ua maua e agaga ia ua ō atu i le lagi. Ae i le tuufaafeagai ma mea na ou faatalitalia, na taʻua i le tusi faapea, o ē ua oti o loo i o latou tuugamau ma ua lē iloa se mea. O mau mai le Tusi Paia, e pei o le Failauga 9:5, 10, na sii mai e lagolagoina ai le manatu. O le isi mataupu sa faaulutalaina “Fafaguina Ē ua Oti,” ma na siiina mai ai le Ioane 5:28, 29 e faamaonia ai faapea o ē ua oti ua lē toe iloa se mea ma o loo faatali mo se toetu. Sa saʻo lenei i loʻu manatu. Sa faamalieina ai aʻu.

I lena taimi, i le 1942, na ou motusi ese ai aʻu fesootaiga ma le “Leo o Valoaga” ma amata ona ou talanoa atu i tagata e uiga i mea na ou aʻoaʻoina mai lomiga a le Sosaiete o le Olo Matamata. O se tasi na muai tali fiafia mai o laʻu uō, o Iuta Letsoalo, o lē sa ma vasega faatasi i le Aʻoga Faafaiaʻoga i Kilnerton.

Sa ma ō atu ma Iuta i a ma uila vilivae mo le 32 maila [51 kilomita] ina ia auai i se fonotaga a Molimau Aferika i Pietersburg. Ina ua mavae lea, sa masani ona ō mai ai uō mai le mamao o Mamatsha e fesoasoani mai ia te aʻu i le avatuina o le feau o le Malo i oʻu tuaoi. Mulimuli ane, i se isi fonotaga i Pietersburg, ia Tesema i le 1944, sa ou papatiso ai e faailoa ai loʻu tuuina atu ia Ieova.

Ua Tali Fiafia mai Loʻu Aiga ma Isi

Sa faaauau pea e Caroline, Pisila, ma loʻu afafine o Damaris ona ō atu i le Lotu Toefuataiina Holani. Ona tupu ai lea o se faalavelave. Na fanau e Caroline la ma tama lona lua—o se pepe tama na foliga mai e malōlōina sa ma  faaigoaina ia Samuelu. Ae na faafuaseʻi lava ona maʻi ma oti ai. Sa lē mafai ona ofoina mai e uō faalelotu a Caroline se faamafanafanaga, ua latou faapea mai e manao le Atua e avatu la ma tama ina ia faatasi ma ia i le lagi. I le mafatia tele, sa fesili ai pea Caroline faapea: “Aiseā ua aveesea ai e le Atua la ma tama?”

Ina ua logo tala Molimau i Pietersburg e uiga i lo ma puapuaga, sa latou ō mai ma aumai ia i maʻua faamafanafanaga moni e faavae i le Afioga a le Atua. Na mulimuli ane faapea mai Caroline: “E saʻo le mea o fai mai ai le Tusi Paia e uiga i le pogai o le oti, e uiga i le tulaga o ē ua oti, ma e uiga i le faamoemoe i le toetu, ma sa matuā faamafanafanaina moni ai lava aʻu. Ou te manao ia ou iai i le lalolagi fou ma toe faafeiloaia laʻu tama mai le tuugamau.”

Sa lē toe alu loa Caroline i le lotu, ma i le 1946, na papatisoina ai i latou, o ia, Pisila, ma Iuta. Ina ua faatoʻā mavae lava lona papatisoga, na alu atu ai loa Iuta e tatalaina le galuega talaʻi i se oganuu maotua e taʻua o Mamahlola, ma e oo mai lava i le asō o loo auauna pea o ia o se faifeau paeonia faataimi atoa.

Ina ua alu Iuta, sa na o aʻu lava le tane na vaaia la matou faapotopotoga, lea na faaigoaina ia Boyne. Ona siitia mai lea o Gracely Mahlatji i la matou oganuu, ma mulimuli ane ona ia faaipoipo atu lea ia Pisila. I vaiaso taitasi uma, ma te feauauaʻi ai ma Gracely i le faia o lauga lautele i le gagana Sepedi, o le gagana masani a tagata Aferika o lea nuu. Ina ia saunia ni lomiga faale-Tusi Paia mo tagata, na talosaga mai ai le Sosaiete ia te aʻu ina ia ou faaliliuina lomiga i le gagana Sepedi. Sa ou maua le lotomalie e vaai atu o loo maua ai e tagata aogā mai nei lomiga.

Ina ia faalauiloaina a matou sauniga, na matou faatauina ai se laau puʻeleo faatasi ma se pusa lapoa faaleotele leo ina ia mafai ai ona tāina lauga i la matou oganuu atoa. Sa matou nonoina se taavale toso e tosoina e asini ina ia ave ai lenei masini mamafa mai lea nofoaga i lea nofoaga. O le iʻuga, na faaigoaina ai i matou e o matou tuaoi o “Tagata o le Lotu a Asini.”

I lena taimi na faaauau ai pea ona tuputupu aʻe si a matou tamai faapotopotoga. Mulimuli ane, sa avea ai foi oʻu tuafāfine matutua e toalua ma a la tane ma Molimau, ma sa tumau pea lo latou faamaoni seia oo ina maliliu. E toatele foi i latou mai le faapotopotoga i Boyne (lea ua taʻua nei o Mphogodiba) sa aapa atu mo le galuega faaevagelia faataimi atoa, ma e toatele o loo auai pea i lena auaunaga. Nei la, ua iai faapotopotoga e lua i lenei vaipanoa tele o nuu maotua e tūtū solo, ma o se aofaiga o tagata talaʻi e sili atu i le toʻa 70 o loo maelega pea i le galuega talaʻi.

Se Galuega Fou

I le 1949, na ou lē toe galue ai o se faiaʻoga ae sa avea loa aʻu ma faifeau paeonia sauatoa. O loʻu tofiga muamua lava, o le asiasi atu lea i tagata uli e faigaluega i faatoaga, o ē sa nonofo i faatoaga a tagata papaʻe i le nuu e igoa o Vaalwater i le Setete o Transvaal. O nisi tagata e ona faatoaga sa latou lagolagoina le aiaiga na faatoʻā faia i le faaeseeseina o lanu i Aferika, ma sa maumaututū ai ina ia faailoa atu e tagata uli lo latou manatu o i latou e sili ona faatauvaa na i lo o tagata papaʻe, ma e ao ona latou auauna i o latou matai papaʻe. O lea, ina ua ou talaʻi atu i tagata faigaluega uli, sa manatu sese ai nisi tagata papaʻe ia te aʻu faapea sa ou talaʻia le faia o se fouvalega. Na oo lava ina tuuaʻia aʻu faapea o se tagata Komunisi ma faamataʻuina ai le fanaina o aʻu.

Sa ou logoina atu lenei tulaga i le ofisa o le lālā o le Sosaiete o le Olo Matamata, ma sa leʻi pine ae siitia atu aʻu i se isi tofiga i se nuu maotua e igoa ia Duiwelskloof. O le taimi foi lena na faamavae ai laʻu avā mai le galuega faiaʻoga ae aufaatasi ma aʻu i le auaunaga faapaeonia. I le tasi aoauli o le 1950, ina ua ma foi mai le auaunaga i le fanua, sa ma maua ai se teutusi telē mai le Sosaiete. Na faateʻia i maʻua ona sa iai i totonu se tusi e valaaulia ai aʻu ina ia ou alu atu mo se aʻoga e toleniina ai e avea o se ovasia faimalaga. Mo le tolu tausaga, sa ma asiasi atu ai i faapotopotoga i Aferika i Saute, ma i le 1953 na tofia ai i maʻua i Lesotho, o se atunuu o loo taatia i le totonugalemū o Aferika i Saute.

Le Faiva i Lesotho ma Botswana

Ina ua amata la ma auaunaga i Lesotho, sa tele lava ni tala feaveai faapea sa masani ona avea tagata ese ma taulaʻiga a tagata sa fai ma o latou vaisū le fasioti tagata. Sa ma popole, ae  o le alofa o o matou uso i Sotho ma lo latou agaga talimālō na vave ai ona fesoasoani ia i maʻua e faagalo na mataʻu.

Ina ia auauna i faapotopotoga i Atumauga o Maluti i Lesotho, sa masani ona ou malaga i se vaalele, ae tuua laʻu avā i nuu i auvae mauga, ma o i inā sa ia faaauau ai pea i le auaunaga faapaeonia seia ou toe foi mai. Sa faafeao ma le agalelei aʻu e uō mai lea faapotopotoga i lea faapotopotoga e fesoasoani ai ina ia aua neʻi oʻu fesēaʻi i luga o mauga.

I se tasi taimi, na taʻu mai ai ia te aʻu e faapea, ina ia oo atu i le isi faapotopotoga, e ao ona matou āsā le Orange River e ala i le tietie i se solofanua. Sa faamautinoa mai ia te aʻu faapea e filemu laʻu solofanua, ae sa lapatai mai foi e tatau ona faaeteete auā a aave tele le vai, ona taumafai lea o solofanua e lafoai a latou avega. Sa ou popole auā e lē o aʻu o se tagata e poto e tietie i solofanua pe iloa foi aau. Sa leʻi pine lava ae matou taunuu i le vaitafe, ma na oo le loloto o le vai i le nofoa o solofanua. Sa matuā oo ia te aʻu le fefe o lea na ou tiaʻi ai le faagutu ae pipii atu i fulufulu i le ua o le solofanua. Maeu se mapusaga ina ua matou taunuu saogalemu i le isi itu o le vaitafe!

Sa lē mafai ona maua lelei saʻu moe i lena po ona ua ōia uma oʻu tino mai le tietiega solofanua. Ae ona sa faaalia e uō le matuā talisapaia o le asiasiga, na vave ai ona teʻa uma na faalogona. Ina ua amata laʻu asiasiga matagaluega i Lesotho, na maua ai se tumutumuga e 113 le au talaʻi. I aso nei, ua tupu aʻe ai lena fuainumera i le 1,649.

I le 1956 na suia ai le tofiga o la maʻua talaʻiga i le Bechuanaland Protectorate, lea ua taʻua nei o Botswana. O Botswana o se atunuu e sili atu ona telē, ma sa manaomia ai ona ō i vaega e sili ona mamao ina ia ausia uma ai le au talaʻi. Sa ma faimalaga a lē o se nofoaafi po o se loli. E leai ni nofoa, o lea sa ma nonofo ai i le fola o le loli ma a ma atopaʻu. O se mea masani lo ma oo atu i le mea na ma faataunuu i ai, ua matuā pefua uma ma vaivai. Sa talia pea i maʻua e o ma uso Kerisiano, ma o o latou foliga fiafia na faafouina ai i maʻua.

O le taimi lena, sa faasā ai lomiga a le Sosaiete i Botswana, o lea, sa faia ai ma le matuā faaeteete la matou galuega talaʻi mai lea fale i lea fale, e aunoa ma le faaaogāina o lomiga a le Sosaiete. I se isi taimi na maua ai i matou o galulue e latalata i le nuu o Maphashalala ma sa puʻe faapagotaina ai i matou. I le matou tali atu sa matou faitau atu i ai le Tusi Paia, ma faasino atu i lo matou tofiga e pei ona faamauina i le Mataio 28:19, 20. E ui ina sa faafiafiaina nisi o le au faufautua, ae sa poloai le alii sili ina ia sasaina Molimau i lena aai. Ae o se mea na faateʻia ai i matou, ona sa talosaga se taʻitaʻi lotu i le alii sili ina ia alofa ma faamagalo i matou. Sa gauai le alii sili, ma na faasaolotoina ai i matou.

E ui lava i le sauāina ma le faasāina o a matou lomiga, ae sa faaauau pea ona agaʻigaʻi i luma le galuega o le Malo. Ina ua ou taunuu i Botswana, sa iai se tumutumuga e 154 o le au talaʻi. Ae i le tolu tausaga mulimuli ane ina ua tatalaina le sā, na oso aʻe ai i luga le fuainumera i le 192. I aso nei, ua iai le 777 Molimau a Ieova i lena atunuu.

Aʻoaʻo atu ma Faaliliuga

Sa iai se taimi, sa faaaogā ai aʻu e fai ma faiaʻoga i le Aʻoga o le Faiva o le Malo mo toeaina Kerisiano. Mulimuli ane, sa ou olioli i le faaeaga o le avea ma faiaʻoga i le Aʻoga o le Auaunaga mo Paeonia. Sa ma  auauna faavaitaimi foi ma laʻu avā i le lālā i Aferika i Saute. I na tulaga, sa ou fesoasoani ai i le faia o faaliliuga, ae sa galue Caroline i le umukuka.

I se tasi aso i le 1969, na faalatalata mai ai ia te aʻu le ovasia o le lālā o Frans Muller ma faapea mai: “Uso Thongoana, ou te fia vaai ia te oe ma lou faletua i loʻu ofisa.” I inā, na ia faamatala mai ai faapea, ua filifilia i maʻua faatasi ma isi e avea ma sui usufono i le Tauaofiaga o le “Filemu i le Lalolagi (Peace on Earth)” e faia i Lonetona i le 1969. Sa ma olioli foi i le agaga talimālō alofa na faaalia e o tatou uso i Egelani ma Sikotilani, ma sa matuā faateleina ai lo ma talisapaia o le mafutaga faaleuso i le lalolagi aoao.

Mo le fasefulu tausaga ua mavae, sa avea pea Caroline ma aumea faamaoni i la ma galuega o ni faievagelia faataimi atoa. Sa ma aufaatasi i le tele o le olioli ma nisi o faanoanoaga. E ui ina ua maliliu le toalua o la ma fanau, ae na tupu aʻe si a ma tama o Damaris, ma avea o se Molimau lelei ma sa auai foi i le galuega faaliliu i le lālā i Aferika i Saute.

Ona o o ma soifua malōlōina, ua lē toe mafai ai ona ma auai i le galuega femalagaaʻi, o lea mo ni nai tausaga ua mavae, sa ma galulue ai o ni paeonia faapito i se faapotopotoga i Seshego, o se aai i Aferika e latalata i Pietersburg. O loo oʻu auauna ai e fai ma ovasia taʻitaʻi. O loo faapea mai le Tusi Paia “o i ou luma [o Ieova] le fiafia e malie ai,” ma ua ou maua moni lava le olioli ma le lotomalie i le auauna atu i le Atua i Aferika i saute.—Salamo 16:11.

[Ata i le itulau 26]

Le talaʻi atu i le aai o Seshego, i Aferika i Saute