Atiina aʻe le Uiga Fou i le Faaipoipoga

“A ia toe fuataiina manao o outou loto, ma ia oofu outou i le tagata fou.”—EFESO 4:23, 24.

1. Aiseā e lē tatau ai ona manatu māmā i le faaipoipoga?

O LE faaipoipoga o se tasi lea o laasaga e sili ona tāua e faia e se tasi i le olaga, o lea e lē tatau ai ona ia manatu māmā i ai. Aiseā e faapea ai? Auā e manaomia ai se ioega o le tuuina atu o lou ola atoa i le isi tagata. O lona uiga o le ola faatasi ma le isi tagata i le olaga atoa. E manaomia ai le lelei o faautaga pe afai o lena taʻutinoga e ao ona sologa lelei. E matuā manaomia ai foi se taaʻiga mautinoa e ‘toe fuatai ai le mafaufau ma ia faaofuina ai i le tagata fou.’—Efeso 4:23, 24; faatusatusa i le Kenese 24:10-58; Mataio 19:5, 6.

2, 3. (a) O le ā e manaomia ina ia filifili ai ma le poto se paaga faaipoipo? (e) O le ā e aafia i se faaipoipoga?

² E iai mafuaaga lelei e lē tatau ai ona soona vavevave i le faaipoipoga, ona ua toʻilalo i faanaunauga malolosi o le tino. E manaomia se taimi e atiina aʻe ai uiga totino faatagata matua. E ō mai faatasi le gasologa o le taimi ma le poto masani ma le atamai, lea e mafai ona avea o se faavae mo ni faaiʻuga lelei. O le  filifilia la o se paaga talafaegai mo le olaga atonu o le a sili atu ona faamanuiaina. Ua faapea mai ma le manino se muāgagana faa-Sepania: “E sili ona lelei o le savali toatasi na i lo o se faaipoipoga leaga.”—Faataoto 21:9; Failauga 5:2.

³ O le filifilia o se paaga saʻo e manino lava o le faavae lena mo se faaipoipoga manuia. Ona o lena itu, e tatau ai i se Kerisiano ona faaaogā taʻiala faale-Tusi Paia, ia lē taʻitaʻia e ala i na o faatosinaga faaletino ma faalogona ootia e lē talafeagai ma omiga i faiga alofa faaleituaiga. O le faaipoipoga e sili atu i lo na o le tuufaatasia o ni tino se lua. O le tuufaatasia lea o uiga faaletagata totino se lua, ni aiga se lua ma talaaga o olaga faaleaʻoaʻoga. Atonu foi e aofia ai ni aganuu se lua ma ni gagana se lua. O le aufaatasia o tagata e toalua i le faaipoipoga o lona uiga moni lava o le faaaogāina tatau lea o le laulaufaiva; faatasi ma le malosi e tautala ai, pe lepetia ai pe atiina aʻe ai. Mai nei mea uma lava, ua tatou iloa ai foi le poto o le fautuaga a Paulo ina ia ‘faaipoipo tau o le ua i le Alii,’ o lona uiga, o se tagata talitonu o le tapuaiga moni.—1 Korinito 7:39; Kenese 24:1-4; Faataoto 12:18; 16:24.

Fesagaʻi ma Omiga o le Faaipoipoga

4. Aiseā e mapuna aʻe ai i nisi taimi feeseeseaiga ma maseiga i le faaipoipoga?

⁴ E tusa lava pe iai se faavae lelei, ae o le a iai lava taimi e feeseeseai ai, e omia ai, ma masesei ai. O nei mea ua masani ai i so o se tagata, e tusa lava po ua faaipoipo pe leai. E ono mafai ona mapuna aʻe mafatiaga i so o se faiā ona o faafitauli tau le tamaoaiga ma faafitauli  i le soifua malōlōina. O suiga i faalogona e mafai ona taʻitaʻiina atu ai i feteenaiga o uiga totino i faaipoipoga e sili ona lelei. O le isi vala o le leai lea o se tasi e atoatoa ona lelei i le puleaina o le laulaufaiva, e pei ona faamatala mai e Iakopo e faapea: “Auā o mea e tele e sese ai i tatou uma; a le sese se tasi i le upu, o le tagata lea ua sao, na te mafaia foi ona taofi i le tino uma. . . . E faapea foi le laulaufaiva, o le mea itiiti lea, a ua lafo upu faasili. Faauta, o le afi itiiti e mu ai le vao laau e tele.”—Iakopo 3:2, 5.

5, 6. (a) O le ā e manaomia pe a tupu aʻe se lē femalamalamaaʻi? (e) O le ā le gaoioiga e ono manaomia ina ia toe faaleleia ai se faafitauli?

⁵ Pe a mapuna aʻe omiga i le faaipoipoga, e mafai faapefea ona tatou puleaina? E mafai faapefea ona tatou taofia le lē femalamalamaaʻi mai le faatupuina aʻe o se finauga ma taofia se finauga e oo atu ai i le faamalepeina o le faiā? O i inā la e faaaogā ai loa le malosi lea na te faagaoioia le mafaufau. O lenei agaga e uunaia gaoioiga, lea na te mafai ona faamautinoaina po o le lē faamautinoaina o se mea, e atiina aʻe ai faaleagaga, po o le faavaivaia ai, ua pulea e faanaunauga o le tino. Afai o le agaga e atiina aʻe ai, o le a gaoioi la tagata taitoatasi ina ia toe faaleleia le faafitauli, ia tausia lana faaipoipoga i le auala saʻo. E lē tatau ona avea finauga ma le lē femalilieai e muta ai le faaipoipoga. E mafai ona faamanino le tulaga o mea, ma toe faafoisia mai le femalamalamaai ma le fefaaaloaloai e ala i le faatatauina o fautuaga faale-Tusi Paia.—Roma 14:19; Efeso 4:23, 26, 27.

⁶ Ua talafeagai lelei ai lava upu a Paulo i nei tulaga e faapea: “O lenei, ia oofu outou i le alofa mutimuti vale, ma le agalelei, ma le loto maulalo, ma le agamalu, ma le onosai, faapei o e ua filifilia e le Atua, o e ua paia ma ua alofaina; ia fefaapalepaleai, ma ia fefaamagaloai outou, pe afai ua agaleagaina se tasi e se tasi; faapei ona faamagalo mai Keriso [“Ieova,” NW] ia te outou, ia faapea foi outou. A o le alofa, e lautua lea i nei mea uma, o le fusi lea e atoatoa ona lelei ai.”—Kolose 3:12-14.

7. O le ā le faafitauli atonu o loo iai i nisi o faaipoipoga?

⁷ E faigofie ona faitauina le mau lena, ae i lalo o omiga i le olaga i aso nei e masani lava ona lē faigofie ona faatatauina. Atonu o le ā le faafitauli autū? I nisi taimi, atonu e iai se Kerisiano o loo ola i se olaga uigalua e aunoa ma lona iloaina. I le Maota o le Malo, o loo faatasi ai o ia ma uso, ma e gaoioi ai o ia ma le agalelei ma le magafagafa. Ae, pe a toe foi atu i le aiga, i le faasologa o mea e masani ai i le aiga, e foliga mai ai na te faagaloina lana faiā faaleagaga. I inā e na ona faapea o le tane po o le avā, “se tamaloa” ma “se fafine.” Ma i lalo o omiga, atonu o le a la faia ai ni upu lē agalelei, e lē taitai lava ona faia a o iai i le Maota o le Malo. O le ā le mea ua tupu? Ua faafuaseʻi lava ona mou atu le Faa-Kerisiano. Ua galo i le auauna a le Atua o loo avea pea o ia ma uso po o se tuafafine Kerisiano i le aiga. O le malosi lea e galueaiina le mafaufau ua avea nei ma mea lē mautinoa na i lo le mautinoa.—Iakopo 1:22-25.

8. O le ā e ono iʻu i ai pe afai ua iai se uiga o le lē mautinoa i le malosi o loo galueaiina le mafaufau?

⁸ O le ā le uiga? Atonu o le a lē toe tausia e le tane lana avā ‘e tusa ai ma le poto, i le avatuina ia te ia o le ava auā o le ipu e sili ona vaivai o ia.’ O le a lē toe faaaloalo foi le avā i lana tane; ua lē toe iai foi sona “loto agamalu ma le filemu.” O le malosi lea e galueaiina le mafaufau ua faaletino na i lo le faaleagaga. Ua matuā pulea atoa e le “mafaufau faaletino.” O le ā la e mafai ona faia e faatumauina ai lena malosi e uunaia gaoioiga, ina ia faaleagaga ma e mautinoa? E tatau ona faamalosia lo tatou itu faaleagaga.—1 Peteru 3:1-4, 7; Kolose 2:18.

Faamalosia le Malosi

9. O ā filifiliga e ao ona tatou faia i le olaga i aso taitasi?

⁹ O le malosi e uunaia ai gaoioiga, o se faanaunauga faalemafaufau lea, e mafai ona oso  aʻe pe afai o le a tatou faia ni faaiʻuga ma ni filifiliga. Ua ofoina mai e le olaga se faasologa faifai pea o mea e filifili ai—le lelei po o le leaga, le manatu faapito po o le lē manatu faapito, se olaga tatau po o se olaga lē tatau. O le ā o le a fesoasoani ia i tatou e faia faaiʻuga saʻo? O le malosi lea e galueaiina le mafaufau, pe afai o loo faaautū i le faia o le finagalo o Ieova. Na tatalo le faisalamo e faapea: “Ieova e, ia e aʻoaʻo mai ia te au i le ala o au tulafono, ona ou anaana lava lea i ai seia oo i le gataaga.”—Salamo 119:33; Esekielu 18:31; Roma 12:2.

10. E mafai faapefea ona tatou faamalosia le malosi o loo galueaiina le mafaufau i se auala mautinoa?

¹⁰ O se faiā malosi ma Ieova o le a fesoasoani lea ia i tatou e faafiafiaina ai o ia ma liliu ese ai mai le mea leaga, e aofia ai le lē faamaoni i le faaipoipoga. Na faalaeiauina Isaraelu ina ia “faia le mea lelei ma le tonu i luma o Ieova [lo latou] Atua.” Ae sa faatonuina foi i latou e le Atua e faapea: “Outou e ua alolofa atu ia Ieova, ia outou ʻinoʻino i mea leaga.” E tusa ai ma le tulafono lona fitu o Tulafono e Sefulu e faapea: “Aua e te mulilua,” sa tatau i tagata Isaraelu ona ʻinoʻino i le mulilua. Na faaalia mai i lena faatonuga le mataʻutia o le silasila a le Atua i le lē faamaoni i le faaipoipoga.—Teuteronome 12:28; Salamo 97:10; Esoto 20:14; Levitiko 20:10.

11. E mafai faapefea ona tatou faamalosia atili le malosi o loo galueaiina o tatou mafaufau?

¹¹ E mafai faapefea ona tatou faamalosia atili le malosi lea na te galueaiina le mafaufau? E ala i le talisapaia o gaoioiga faaleagaga ma o latou aogā. O lona uiga e tatau ona tatou faataunuuina le manaoga o le suesueina o le Afioga a le Atua e lē aunoa ma aʻoaʻo ina ia fiafia i le talanoaina faatasi o manatu ma fautuaga a Ieova. E ao ona pei o tatou faalogona alofa o faalogona alofa na sa i le faisalamo: “Ua ou saili ia te oe ma loʻu loto atoa; aua neʻi ou sese i au poloaiga. Ua ou teu i loʻu loto lau afioga, ina neʻi ou agasala ia te oe. Ieova e, ia e aʻoaʻo mai ia te au i le ala o au tulafono, ona ou anaana lava lea i ai seia oo i le gataaga. Ia e aʻoaʻo mai ia te au, ona ou anaana lea i lau tulafono, ma ou tausia ma loʻu loto atoa.”—Salamo 119:10, 11, 33, 34.

12. O ā mea e mafai ai ona tatou autasi i le faaatagiaina atu o le mafaufau o Keriso?

¹² O lenei ituaiga o talisapaia mo mataupu silisili amiotonu a Ieova e faatumauina e lē gata i le suesueina o le Tusi Paia, ae i le auai foi e lē aunoa i sauniga faa-Kerisiano ma le auai faatasi i le faiva faa-Kerisiano. O nei taaʻiga malolosi e lua e mafai ona faamalosia ai e lē aunoa le malosi o loo galueaiina o tatou mafaufau ina ia faaatagia ai pea le mafaufau o Keriso i lo tatou ala lē manatu faapito o le olaga.—Roma 15:5; 1 Korinito 2:16.

13. (a) Aiseā e avea ai le tatalo o se vala tāua i le faamalosiina o le malosi lea o loo galueaiina le mafaufau? (e) O le ā le faaaʻoaʻoga na faataatia e Iesu i lenei tulaga?

¹³ O le tasi vala o loo faamatilatilaina mai e Paulo i lana tusi i tagata Efeso e faapea: “Ia outou tatalo i le Agaga i aso uma lava i talotaloga ma faatoga uma.” (Efeso 6:18) E manaomia ona tatalo faatasi le tane ma le avā. E masani lava i na tatalo ona tatala ai le loto ma taʻitaʻiina atu ai i ni talanoaga mafana e faaleleia ai so o se faaletonu. I taimi o tofotofoga ma faaosoosoga, e manaomia ona tatou liliu atu i le Atua i le tatalo, e talosaga atu mo le fesoasoani, mo le malosi faaleagaga ina ia faia ai le mea e talafeagai lelei ma le manatu o Keriso. E oo foi ia Iesu o lē e lelei atoatoa na ia liliu atu i lona Tamā i le tatalo i le tele o  taimi, e ole atu ia te ia mo le malosi. Sa moni ana tatalo ma sa sau mai lona loto. E faapena foi i aso nei, i taimi o faaosoosoga, e mafai ona tatou maua le malosi e faia ai le faaiʻuga saʻo e ala i le valaau atu ia Ieova e fesoasoani mai ia i tatou ina ia tetee atu ai le tuʻinanau o le tino ma le solia ai o le tautoga o le faaipoipoga.—Salamo 119:101, 102.

Faaaʻoaʻoga Eseese i Amioga

14, 15. (a) Sa faapefea ona tali atu Iosefa i le faaosoosoga? (e) O le ā na fesoasoani ia Iosefa e tetee atu ai i le faaosoosoga?

¹⁴ E mafai faapefea ona tatou fesagaʻi ma faaosoosoga? I lenei itu ua ia i tatou faamatalaga manino i le va o auala na uia e Iosefa ma Tavita. Ina ua taumafai ma le faatauanau le avā a Potifara e faatosina le tama aulelei o Iosefa, o lē na foliga mai sa nofofua i lena taimi, sa iʻu lava ina ia tali atu ia te ia i lona faapea atu: “E leai se sili ia te au i le fale nei, ua na [o lau tane] le taofi sina mea ia te au, ua na o oe, auā o oe lona faletua; pe faapefea ona ou faia lenei mea leaga tele ma ou agasala ai i le Atua?”—Kenese 39:6-9.

¹⁵ O le ā na fesoasoani ia Iosefa e faia le mea saʻo a o foliga mai sa faigofie lava ona ia paʻū ai? Sa ia te ia le malosi e galueaiina ai lona mafaufau. Sa matuā manatu mamafa o ia i lana faiā ma Ieova. Sa ia iloa, o le faitaaga ma lenei fafine alofa faavalea o le a lē gata o le a agasala ai i le tane a le fafine ae e sili ona mataʻutia o le a ia agasala ai i le Atua.—Kenese 39:12.

16. Sa faapefea ona tali atu Tavita i le faaosoosoga?

¹⁶ E ese mai i lena mea, o le ā na tupu ia Tavita? O ia o se tane faaipoipo, ma sa tele ana avā e pei ona sa faatagaina ai e le Tulafono. I se tasi afiafi sa ia mataʻia mai ai i lona maota se fafine o loo taele. O le fafine lalelei o Patesepa, le avā a Uria. Sa manino lava le tatau ona faia e Tavita se filifiliga o se gaoioiga o le a fai—o le faaauau pea ona tilotilo a o tuputupu aʻe i lona loto le faanaunauga malosi po o le liliu ese ma teena ai le faaosoosoga. O le ā na ia filifili e fai? Sa ia aumaia le fafine i lona maota, ma la faia ai loa le mulilua. O le mea sa sili ona matuā leaga lava, ona o ia sa faapogaia le fasiotiga o le tane a le fafine.—2 Samuelu 11:2-4, 12-27.

17. O le ā e mafai ona tatou malamalama i ai e uiga i le tulaga faaleagaga o Tavita?

¹⁷ O le ā le faafitauli o Tavita? Mai lana taʻutinoga mulimuli ane o lona salamō o loo i le Salamo e 51, ua mafai ai ona tatou malamalama i mea moni. Na ia faapea mai: “Le Atua e, ia e faia se loto mamā mo aʻu; ma ia e faafouina se loto mau i totonu ia te au.” Ua mautinoa mai ai faapea i le taimi o lona faaosoosoga, sa lē ia te ia se agaga mamā ma le lotomau. Atonu sa ia lafoaia le faitauina o le Tulafono a Ieova, ma ua iʻu ai ina vaivai lona itu faaleagaga. Pe atonu foi na ia faatagaina lona tulaga ma lona malosi o ia o le tupu e faaleagaina ai lona mafaufau ma ia paʻū atu ai i tuʻinanauga malolosi. E mautinoa, o le malosi e galueaiina lona mafaufau i lena taimi sa manatu faapito ma agasala. O lea, na mulimuli ane ai ona iloaina lona manaomia ‘o se loto fou, se loto mau.’—Salamo 51:10; Teuteronome 17:18-20.

18. O le ā le fautuaga na aumaia e Iesu e faatatau i le mulilua?

¹⁸ Ua faaleagaina nisi faaipoipoga faa-Kerisiano talu ai ona ua faatagaina e le tasi o le paaga po o paaga uma foi i laʻua lava e paʻūū atu i le tulaga o le vaivai faaleagaga e pei o le mea na oo i ai le Tupu o Tavita. O lana faaaʻoaʻoga e ao ona lapataia ai i tatou ina ia teena le faaauau pea ona tilotilo i le isi fafine, po o le isi tamaloa, faatasi ma ni tuʻinanauga alofa, auā e mafai ona iʻu ai i le mulilua. Na faaalia e Iesu faapea sa ia malamalama lelei i faalogona ootia faaletagata i lenei tulaga, auā na ia faapea mai: “Ua outou faalogo, na fai mai i e anamua, Aua e te mulilua. A ou te fai atu aʻu ia te outou, ai se vaai atu i le fafine ina ia manao i ai, ua uma ona mulilua ma ia i lona loto.” I lea tulaga, o le malosi e galueaiina le mafaufau e manatu faapito ma lē mamā, e lē faaleagaga. O le ā la e mafai ona fai e Kerisiano ina ia alofia ai le mulilua ma tausia ai a latou faaipoipoga i le fiafia ma le faamalieina?—Mataio 5:27, 28.

 Faamalosia le Fusi o le Faaipoipoga

19. E faapefea ona faamalosia se faaipoipoga?

¹⁹ Na tusi mai le Tupu o Solomona e faapea: “Afai foi e faamanumalo mai se tasi i so laua, e teteeina atu o ia e le toalua; o le maea foi e sāutuatolu e le vave motusia.” E mautinoa, i se faaipoipoga autasi e mafai e i laʻua e toalua ona tutū faatasi i le taimi o faigata e sili atu na i lo le toatasi. Ae afai o le la fusi e pei o le maea sāutuatolu e ala lea i le faaaofia ai ma le Atua, o le a matuā mausalī la le faaipoipoga. Ma e mafai faapefea ona iai le Atua i totonu o le faaipoipoga? E ala i le faatatauina e le ulugalii o ana mataupu silisili ma ana fautuaga mo le faaipoipoga.—Failauga 4:12.

20. O le ā le fautuaga a le Tusi Paia e mafai ona fesoasoani i se tane?

²⁰ E mautinoa lava, afai e faatatauina e le tane fautuaga o loo aumaia i mau o loo mulimuli mai, o le a sili atu la ona lelei le faavae o lana faaipoipoga mo le mauaina o le manuia:

“Ia faapea outou tane, ia nonofo faatasi ma i latou ma le poto, ia ava i le avā, auā o le ipu ia ua sili ona vaivai ia te oe, mona ua tofia faatasi i le ola e foaifuaina mai, neʻi faalavelaveina a outou tatalo.”—1 Peteru 3:7.

“O outou tane, ia outou alolofa atu i a outou lava avā, faapei o Keriso foi ona alofa mai i le ekalesia, ma foaiina mai e ia ia te ia e fai mona sui. O loo faapea ona tatau ona alolofa o tane i a latou lava avā, faapei o latou lava tino; o le alofa i lana lava avā, o loo alofa o ia ia te ia lava.”—Efeso 5:25, 28.

“O lana tane foi ua vivii ia te ia. E toatele fafine e amio lelei i latou, a o oe, ua faasilisili oe ia i latou uma.”—Faataoto 31:28, 29.

“Afai e savali se tagata i luga o malala ola, e le mu ai ea ona vae? E faapea foi le ua alu atu i le avā a le la te tuaoi, ai se tago ia te ia, e le faasaoina o ia. O lē mulilua . . . na te faaumatia e ia lona lava ola.”—Faataoto 6:28, 29, 32.

21. O le ā le fautuaga a le Tusi Paia e mafai ona fesoasoani i se avā?

²¹ Afai e uaʻi atu se avā i manatu faale-Tusi Paia o loo mulimuli mai, o le a saosaolaumea la i le faatumauina o lana faaipoipoga:

“Ia faapea outou fafine, ia usiusitai i a outou lava tane, afai foi e le faalogo nisi i le upu, ia maua i latou i le amio lelei a avā, a e leai se upu, pe a latou vaai ane i a outou amio le gaoiā ma [lo outou] mataʻu.”—1 Peteru 3:1-4.

“Ia avatu le tane i le avā le agalelei e tatau ai [i feusuaiga], ia faapea foi le avā i le tane. . . . Aua neʻi faafiti le tasi i le tasi, seia iloga lava lua te loto gatasi ai i nai aso.”—1 Korinito 7:3-5.

22. (a) O ā isi vala mo le faaleleia o le faaipoipoga? (e) O le ā le silasila a Ieova i le alei?

²² Ua faaalia mai foi i le Tusi Paia e faapea o le alofa, le agalelei, le agamalu, le onosai, le malamalama, le faalaeiau, ma le viiviia, o nisi na o vala e matuā manaomia mo le tautele o le faaipoipoga. Afai e aunoa se faaipoipoga ma na mea, o le a pei la o se laau totō e aunoa ma le la ma le vai—e seāseā fua mai. O lea seʻi avea ia le malosi o galueaiina o tatou mafaufau e faamalosia ai i tatou e fefaalaeiauaʻi ai ma toe fefaafouina ai a tatou faaipoipoga. Manatua o Ieova e ʻinoino i le alei.’ Afai ua faatinoina le alofa faa-Kerisiano, e lē tatau la ona iai se avanoa mo le mulilua ma le faamalepeina o le faaipoipoga. Aiseā? Ona “e le uma le alofa.”—Malaki 2:16; 1 Korinito 13:4-8; Efeso 5:3-5.

Pe Mafai Ona E Faamatalaina?

□ O le ā le faavae mo se faaipoipoga fiafia?

□ E mafai faapefea i le malosi o loo galueai ina le mafaufau ona aafia ai se faaipoipoga?

□ O le ā e mafai ona tatou faia ina ia faamalosia ai le malosi o loo galueaiina o tatou mafaufau?

□ Na faapefea ona eseese gaoioiga a Iosefa ma Tavita ina ua faaosoosoina?

□ O le ā le fautuaga faale-Tusi Paia o le a fesoasoani i tane ma avā ina ia faamalosia ai le fusi o le faaipoipoga?

[Fesili mo le Suʻesuʻega]

[Ata i le itulau 18]

Pe o tatou ola ea i se tulaga uigalua —e agalelei i le faapotopotoga ae ʻinaʻinā i le aiga?