“Ia Lelei le Faiavā i Tagata Uma”

“Ia lelei le faiavā i tagata uma, o le moega foi ia leai sona leaga.”—EPERU 13:4.

1. O le ā ua aʻoaʻoina e le toatele o tagata e uiga i faaipoipoga ua faamanuiaina?

E FAITAU miliona tagata o loo olioli i le tumau pea o a latou faaipoipoga, e ui lava i lenei tupulaga o loo faigofie ona alei faaipoipoga. Ua latou iloaina le auala e manuia ai, e ui lava i eseesega i uiga totino faaletagata ma talaaga. O na faaipoipoga ua maua i Molimau a Ieova. I le tele lava o tulaga, o nei ulugalii ua latou ioeina faapea e iai taimi e lelei ai, e iai foi taimi e leaga ai, e ui lava ina iai ni mafuaaga e fefaitioaʻi ai. Peitai, ua latou aʻoaʻoina le tatau ona onosaia nei faigata laiti e tulai mai ma ia tausisia pea le tumau o le faaipoipoga. O ā nisi o vala ua fesoasoani ia i latou e faaauau ai pea le faaipoipoga?—Kolose 3:13.

2. (a) O ā nisi o vala mautinoa e faatumauina ai le faaipoipoga? (e) O ā nisi o vala e mafai ona faavaivaia ai le faaipoipoga? (Tagai i le pusa i le itulau 14.)

² Ua aumaia le malamalamaga i faamatalaga a nisi o ē o loo fiafia pea ma tumau a latou faaipoipoga faa-Kerisiano. Na fai mai se tane o lē ua 16 tausaga talu ona faaipoipo e faapea: “So o se taimi lava e tulai mai ai se faafitauli, ma te matuā faia lava se taumafaiga ina ia faalogo atu le tasi i le manatu o le isi e uiga i le mataupu.” Ua faamatilatila mai ai se tasi o vala autū o loo manaomia i le tele o faaipoipoga—ia saoloto ma tautala saʻo i fesootaiga. Na taʻua e se avā, ua 31 tausaga talu ona faaipoipo e faapea: “O le uulima ma faia o mea mālie ina ia faatumauina ai le fiafia i le va o i maʻua sa avea pea o se mea autū.” Ma o se tasi lena o auala faaopoopo o fesootaiga. O se tasi ulugalii, sa faaipoipo mo le toeitiiti lava 40 tausaga, sa la faamamafaina le tāua o le iai pea o sina uiga agamalie, o le mafai lea ona taliē ia i laua lava po o le ata o le tasi i le isi. Na la faapea mai foi, e fesoasoani foi lea e mafai ai ona vaai i le mea e sili ona lelei ma le mea e sili ona leaga i tagata taitoatasi ae e mafai pea ona faaalia le alofa faamaoni. Na taʻua e le tane le tatau ona naunau e faatoese pe a iloa ua sese o ia. Pe a iai le agaga o le gauai atu, ona mafai lea ona faia ni fetuunaiga na i lo le motusia faafuaseʻi.—Filipi 2:1-4; 4:5, Kingdom Interlinear.

Le Tulaga Fesuisuiaʻi

3, 4. O ā ni suiga o uiga ua iai i le tulaga o le faamaoni i le faaipoipoga? Pe e mafai ona e aumaia ni faaaʻoaʻoga?

³ I le gasologa o se faitau sefulu tausaga ua mavae i le lalolagi aoao, ua matuā suia atoatoa ai le manatu mamafa e tusa ai ma le tulaga o le faamaoni i faaipoipoga. Ua talitonu nisi tagata faaipoipo faapea e lē sese se faifaiga ma se isi tagata, o se faaupuga faaonaponei lena mo le mulilua, ae maise lava pe afai o loo iloa e le isi paaga faaipoipo ma ua ia taliaina.

⁴ Na taʻua e se tasi ovasia Kerisiano e uiga i lea tulaga e faapea: “Ua matuā lafoaia atoatoa e le lalolagi so o se taumafaiga mamafa ina ia ola ai i lalo o tulafono tau amio. O amioga mamā ua oo ina vaai i ai o se tū faaanamua.” O uiga lauiloa faaletagata i faiga faapolotiki, i taaloga ma faafiafiaga, latou te matuā solia tapulaa a le Tusi Paia e uiga i amioga mamā, ma ua faaauau ona faasilisilia ia tagata. E  matuā leai lava se faailoga e iloa ai le leaga o so o se ituaiga o amioga sese po o le liliu ese mai le faia o le mea saʻo. O le tulaga mamā ma le faamaoni e foliga mai ua seāseā lava ona aogā i ē mauoa, atoa ma ē o loo i tulaga maualuluga. Ona o le mataupu silisili e faapea ‘o le mea e faatatau i le tasi e faatatau foi i le isi,’ ua mulimuli atu ai le toatele o tagata i lea faaaʻoaʻoga, i le taliaina o amioga ua taʻusalaina e le Atua. E pei ona faaalia mai e Paulo e uiga i lena mea e faapea: “Ua latou le lagona se mea, ua tuuina atu i latou ia i latou i le matāitu e fai mea leaga uma lava ma le tuʻinanau i ai.”—Efeso 4:19; Faataoto 17:15; Roma 1:24-28; 1 Korinito 5:11.

5. (a) O le ā le silafaga a le Atua i le mulilua? (e) O le ā e aofia ai i le faaaogāina e le Tusi Paia o le upu “faitaaga”?

⁵ E lē suia tapulaa a le Atua. I lana silafaga o le nonofo faatasi e aunoa ma le faaipoipoina o le faitaaga lena. O le lē faamaoni i le faaipoipoga o le mulilua lava lea. * Na tusi mai ma le manino le aposetolo o Paulo e faapea: “Tou te le iloa ea, o e amio leaga e le fai mo latou tofi le malo o le Atua? Aua neʻi faaseseina outou; o e faitaaga, ma e ifo i tupua, ma e mulilulua, ma e tauātane, . . . e le fai mo latou tofi le malo o le Atua. Sa faapea foi nisi o outou; a ua taeele outou, a ua faapaiaina outou, a ua taʻuamiotonuina outou i le suafa o le Alii o Iesu, i le Agaga foi o lo tatou Atua.”—1 Korinito 6:9-11.

6. O le ā le faalaeiauga e mafai ona tatou maua mai upu a Paulo i le 1 Korinito 6:9-11?

⁶ O se manatu faalaeiau i lena mau o le faamatalaga lea a Paulo e faapea, “Sa faapea foi nisi o outou; a ua taeele outou.” Ioe, e toatele i latou i taimi ua mavae sa taufetuli faatasi ma lenei lalolagi “i lea lava ulavale silisili [“paʻū maulalo,” NW],” ae ua latou lagona nei, ma talia Keriso ma lana taulaga togiola, ma ua faamamāina i latou. Ua latou filifili ai e faafiafia le Atua e ala i le ola i ni olaga mamā ma o le iʻuga ua latou maua le fiafiaga.—1 Peteru 4:3, 4.

7. O le ā le feteenaiga ua iai i le malamalamaga e uiga i “amioga lē tatau,” ma o le ā le vaaiga a le Tusi Paia?

⁷ I le isi itu, o le faauigaga a le lalolagi i amioga lē tatau e matuā lē talafeagai ma le silafaga a le Atua. Ua taʻua e se tasi o lomifefiloi le uiga o le faaupuga “amioga lē tatau” e faapea o se “faaeseesega ma le amioga tatau ua faavaeina.” O le “amioga tatau ua faavaeina,” i ona po nei, lea na te taliaina le feusuaiga a o leʻi faaipoipo ma feusuaiga i fafo atu o le faaipoipoga, faatasi ma le tauatane ma le tauafafine, o mea na ua taʻusalaina mai e le Tusi Paia, o amioga lē tatau. Ioe, i le vaaiga faale-Tusi Paia, o amioga lē tatau o le matuā faasagatau lea i tulafono tau amio tatau a le Atua.—Esoto 20:14, 17; 1 Korinito 6:18.

Aafiaga i le Faapotopotoga Kerisiano

8. E mafai faapefea ona aafia i latou o i le faapotopotoga Kerisiano i amioga lē tatau?

⁸ O amioga lē tatau i aso nei ua matuā taatele, e mafai ona oo ai uunaiga malolosi ia i latou i le faapotopotoga Kerisiano. E mafai ona taaʻina ai i latou e ala i faasalalauga o polokalama o televise, vitiō, ma tusi faitau e uiga i faiga lē tatau faaleituaiga. E ui lava e na o se vaega toaitiiti o Kerisiano ua aafia ai, ae e ao ona iloa faapea, o le toatele o ē ua faateʻaina mai le aufaatasiga o Molimau a Ieova ona o le lē salamō i tulaga tau amio, ia e lē saʻo mo se Kerisiano, e fesootai atu i ni ituaiga o feusuaiga lē tatau. I le itu e lelei, o le vaega tele o i latou sa faateʻaina ua mulimuli ane o latou iloaina o latou sese, ua toe fuatai se auala mamā o le olaga, ma ua toe faafoisia mai ai i latou i totonu o le faapotopotoga.—Faatusatusa i le Luka 15:11-32.

9. E faapefea ona puʻea e Satani i latou e lē mataala?

⁹ E leai se tau masalosalo o loo fealuai Satani  e pei o se leona tagi, o loo sauniuni e ʻaina i latou e lē mataala. O ana gaoioiga faaʻoleʻole, po o “togafiti,” na ua puʻea ai Kerisiano lē mataala i tausaga taitasi. O le agaga lava o lana lalolagi o le manatu faapito, o le ola i se olaga e na o faafiafiaga, ma le lē pulea. O lona faanaunauga lava e na o le faamalieina o tuʻinanauga o le tino. Na te teena le pulea totino.—Efeso 2:1, 2; 6:11, 12, faamatalaga i lalo; 1 Peteru 5:8.

10. O ai ua fetaiaʻi ma tofotofoga, ma aiseā?

¹⁰ O ai i le faapotopotoga e mafai ona fetaiai ma tofotofoga o amioga lē tatau? O le toatele o Kerisiano, po o toeaina i faapotopotoga, po o ovasia femalagaai, po o tagata i Peteli, po o paeonia o loo talaʻi mo le tele o itula i masina taitasi, o mātua o loo tele mea e fai i le tausia o le aiga, ia po o le au talavou o loo fesagaʻi ma omiga mai a latou tupulaga. O tofotofoga i faanaunauga o le tino o se mea ua masani ai tagata uma. O uiga faaleituaiga e ono mafai ona tupu aʻe i se taimi e matuā leʻi faatalitalia lava. I lea na tusi ai Paulo e faapea: “O lenei, o lē manatu o loo o tu ia, ina faaeteete ia neʻi paū. Ua le maua outou e se tofotofoga e ese i lo tagata [“tane ma fafine,” NW].” O se tulaga faanoanoa, peitai o nisi o Kerisiano o loo iai ni o latou tiute tauave, ua lolo atu i lenei mailei o amioga lē mamā.—1 Korinito 10:12, 13.

E Tosina ma Maileia

11-13. O ā nisi o tulaga ua taʻitaʻiina ai i le faia o amioga lē tatau?

¹¹ O ā ni tofotofoga ma ni tulaga ua taʻitaʻiina atu ai nisi i lenei auala valea o le mulilua ma le faitaaga? E tele ma lavelave na mea ma e malolosi ma atonu e eseese mai le isi atunuu i le isi atunuu, po o le isi aganuu i le isi aganuu. Ae peitai, e iai tulaga autū e tutusa ai i le tele o atunuu. Mo se faaaʻoaʻoga, ua lipotia mai e faapea ua fuafuaina e nisi ni faafiafiaga e saoloto ai le faaaogāina o le ava malosi e aunoa ma le faatapulaaina. O nisi e fiafia tele i musika faalelalolagi ma siva e faagaee ai faalogona. I nisi o vaipanoa o Aferika, e iai tamāloloa mauoa—e lē talitonu—o ē e iai a latou palake; o nisi fafine ua tofotofoina i latou ina ia saili atu i tulaga tau tamaoaiga i le avea ma palake e ui lava o loo aafia ai amioga lē tatau. I nisi vaipanoa  ua tuua ai e tane Kerisiano o latou aiga ae ua ō atu i nisi vaipanoa e eli ai le auro po o nisi nofoaga e maua ai tupe. Ia ona tofotofoina ai lea o lo latou faamaoni ma o latou tulaga mamā i ni auala e lē masani ai i lona lava aiga moni.

¹² I atunuu tau atiaʻe ua paʻūū ai nisi i le mailei a Satani e ala i le faatasi soo atu ma se tasi o le isi ituaiga na o i laʻua e aunoa ma se isi latou te toatolu ai—e pei o le faifai pea ona na o i laʻua i se taavale mo ni aʻogā avetaavale. * E iai foi i toeaina o loo faia le galuega faaleoleo mamoe le manaomia ona faaeteete ia aua neʻi na o i laʻua ma se tuafafine pe afai e alu atu e fautuaina o ia. E ono avea le talanoaga ma mea e faaoso aʻe ai ni faalogona ma iʻu ai i se tulaga maasiasi mo i laʻua uma.—Faatusatusa i le Mareko 6:7; Galuega 15:40.

¹³ O tulaga eseese e pei ona taʻua i luga ua taʻitaʻiina atu ai nisi o Kerisiano i le leai o se mataala ma faia ai gaoioiga lē tatau. E pei lava ona sa tupu i le uluai senituri, sa latou faatagaina i latou lava e ‘tosina ma maileia e tuʻinanauga o o latou lava tino,’ lea ua taʻitaʻiina ai i le agasala.—Iakopo 1:14, 15; 1 Korinito 5:1; Kalatia 5:19-21.

14. Aiseā ua avea ai le manatu faapito ma vala autū i tala e uiga i le mulilua?

¹⁴ O le manatunatu ma le faaeteete i ē ua faateʻaina e faaalia ai o gaoioiga lē tatau ua foliga mai o loo iai ni vala ua masani ai. I tulaga faapena e iai le agaga o le manatu faapito. Aiseā ua tatou fai atu ai faapea? Talu ai i le tulaga o le mulilua, e ono oo ai le tiga i nisi o tagata e lē sala. Pe atonu o le paaga faaletulafono. E mautinoa o le fanau, pe afai e iai se fanau, auā pe afai o le mulilua e iʻu ai i le tatalaina o le faaipoipoga, atonu la o le a sili atu ona pagatia le fanau, o ē o loo mananao e ola i se aiga autasi ma le saogalemu. E manatu lava lē ua mulilua e na o lona lava fiafiaga ma lona lelei. O le manatu faapito lena.—Filipi 2:1-4.

15. Atonu o ā nisi o pogai e taʻitaʻiina atu ai i le mulilua?

¹⁵ E masani lava o le mulilua e lē o se gaoioiga e faafuaseʻi ona o se vaivaiga. O se suiga e faasolosolo malie lava ona leaga, ma e faigata foi ona iloa i le faaipoipoga. Atonu o le a vaivai ma faasolo ina leai ni fesootaiga. Ua faaitiitia faalaeiauga mafana. Atonu ua lē taulau ona faailoaina atu le talisapaia o le tasi mo le isi. Atonu foi e lē faamalieina le tane po o le avā i feusuaiga faaleituaiga mo sina taimi. E mautinoa pe a faia le mulilua, ua faaleagaina ai foi le faiā ma le Atua. Ua lē toe manatu i latou ia Ieova faapea o loo soifua, o se Atua e manatu mai i o tatou mafaufauga ma a latou gaoioiga. Atonu o le manatu lena o loo i le mafaufau o le  tagata mulilua, faapea o le “Atua” ua na o se upu, o sē o loo soifua ae e lē o se vaega o le olaga i aso taitasi. Ia ona faigofie ai lea ona agasala i le Atua.—Salamo 51:3, 4; 1 Korinito 7:3-5; Eperu 4:13; 11:27.

Le Ki e Tetee Atu Ai

16. E mafai faapefea e se Kerisiano ona tetee atu i le faaosoosoga o le lē faamaoni?

¹⁶ So o se tane Kerisiano lava po o se avā ua ia iloa ua faaosoosoina o ia i se auala o le lē faamaoni, o ā ni vala e ao ona ia iloaina? Muamua lava, e ao ona manatu i le uiga o le alofa faa-Kerisiano, lea e faavae mausalī i mataupu silisili faale-Tusi Paia. Aua lava neʻi faatagaina le alofa faaletino po o le tuʻinanau faaleituaiga e puleaina ai faalogona o se tasi ma iʻu ai i le paʻū atu i le manatu faapito, e aumaia ai mafatiaga i isi. Na i lo lena, e ao ona iloa le silafaga a Ieova e faatatau i le mataupu. E ao ona iai se vaaiga sili mo le faapotopotoga, ma le faalumaina e aumaia e amioga leaga i le faapotopotoga ma i le suafa o Ieova. (Salamo 101:3) E ono alofia faalavelave e ala i le mauaina o le manatu o Keriso i le mataupu ma ia gaoioi e talafeagai ai. Manatua, e lē uma le alofa lē manatu faapito e pei o Keriso.—Faataoto 6:32, 33; Mataio 22:37-40; 1 Korinito 13:5, 8.

17. O ā faaaʻoaʻoga o le faamaoni ua ia i tatou?

¹⁷ O le ki mo le teteeina, o le faamalosia lea o le faatuatua ma le vaaiga a se tasi i le faamoemoe o i luma. O lona uiga o le faasilisilia lea i le loto faaaʻoaʻoga mataʻina o le faamaoni ua faataatitia mai e tane ma fafine faatuatua anamua, ma Iesu lava ia. Na tusi Paulo e faapea: “O lenei, o i tatou foi, o loo ua vagavagaia e le faapotopotoga o e matamata [“molimau,” NW] mai e faapea ona toatele, ina tatou tuu ese ia o mea mamafa uma, atoa ma le agasala e faalavelavegofie ai i tatou, ia tatou taufetuli ma le onosai i le ala tanu o i o tatou luma, ma ia vaavaai atu ia Iesu o le na te taʻitaʻiina ma le na te faaatoatoaina le faatuatua; o le na onosai i le satauro, na faatauvaa ia te ia le mā, ona o le olioli sa tuu i ona luma, ua nofo foi o ia i le itu taumatau o le nofoālii o le Atua. Auā, ia outou mafaufau i le na onosai i le faatuʻi ese faapena ia te ia o e agasala, neʻi faavaivai o outou loto ma outou le lavatia.” (Eperu 12:1-3) Na i lo le faaleagaina o le faaipoipoga, o le a mafaufau le tagata poto i auala e toe faaleleia ai so o se faaletonu ina ia toe fuataʻiina ai le faaipoipoga, ma i lea auala o le a alofia ai le paʻū atu i le mailei o le faaʻoleʻole ma le pepelo.—Iopu 24:15.

18. (a) Aiseā e lelei ai le mamafa o le upu faaʻoleʻole e faamatala ai le mulilua? (e) E faapefea le silasila a le Atua i le avatuina o tautoga?

¹⁸ Pe o le faaʻoleʻole, o lona uiga o le faalata, o se upu ua malosi tele lona uiga e tusa ai ma amioga lē tatau? O le faalata o le lē faatalitonuina ma le sese o se faatuatuaga po o se mautinoa. E mautinoa o le tautoga o le faaipoipoga e aofia ai le faatuatuaina ma se folafolaga ia alofa ma faapelepele, i taimi o faigata ma taimi e sologa lelei ai, i taimi e lelei ai po o taimi foi e leaga ai. E aofia ai se mea lea e manatu i ai le toatele ua lē toe aogā mo taimi nei tatou te ola ai—o le taʻutinoga e faamautinoa atu i le tautoga o le faaipoipoga. O le faaseseina la o lena faatuatuaga o le faia lea o se mea e faalata ai le tasi o le paaga faaipoipo. O loo faatulaga mai ma le manino i le Tusi Paia le silafaga a le Atua i tautoga e faapea: “Pe a e tautō i se tautoga i le Atua, aua e te faatuai ona avatua; auā e le fiafia lava o ia i e ua valelea; ina e faia le mea ua e tauto ai.”—Failauga 5:4.

19. O le ā le olioli e ese mai le fiafia a Satani pe a lē taulau se tasi o Molimau?

 ¹⁹ Seʻi aua lava neʻi iai se masalosalo e uiga i lenei mea. E pei lava ona iai le olioli tele i le lagi ona o le tagata agasala ua salamō, e faapena foi ona tele le fiafia i le lalolagi i le mano ma mano o au a Satani, o ē vaaia ma ē e lē vaaia, pe afai e lē taulau i se tasi o Molimau a Ieova ona tausisia lona faamaoni.—Luka 15:7; Faaaliga 12:12.

E Iai Faaosoosoga i Tagata Uma

20. E faapefea ona tatou teteeina faaosoosoga? (2 Peteru 2:9, 10)

²⁰ Pe lē mafai ea ona taofia le amioga lē tatau i nisi tulaga? Pe ua malolosi tele ea tuʻinanauga ma Satani, ua faapea ai ona lē mafai e Kerisiano ona teena ma tumau ai i lo latou faamaoni? Ua aumaia e Paulo se faalaeiauga i upu nei: “Ua faamaoni le Atua, o le na te le tuuina atu outou i le tofotofoga e sili i se mea ua outou lavatia, a e sauni foi faatasi ma le tofotofoga se mea e sao ai, ina ia outou lavā oono [“tumau,” NW].” I le lalolagi i aso nei atonu tatou te lē mafai ona alofia ai faaosoosoga uma, ae o lo tatou tatalo atu i le Atua, e mautinoa o le a mafai ai ona tatou onosaia ma manumalo i so o se faaosoosoga.—1 Korinito 10:13.

21. O ā fesili o le a taliina i la tatou suesuega o loo sosoo mai?

²¹ O le ā le fesoasoani ua ofoina mai e le Atua mo i tatou ina ia tatou tumau ai i faaosoosoga ma manumalo ai? O le ā tatou te manaomia taitoatasi ina ia puipuia ai a tatou faaipoipoga, o tatou aiga, faatasi ai ma le suafa lelei o Ieova ma le faapotopotoga? O le a taliina na fesili i le mataupu o loo sosoo mai ai.

[Faaopoopoga i lalo]

Pe E te Manatua?

□ O ā nisi o vala e fesoasoani ina ia faamalosia le faaipoipoga?

□ Aiseā e ao ai ona tatou teena le manatu a le lalolagi i amioga tatau?

□ O ā nisi o faaosoosoga ma tulaga e mafai ona taʻitaʻia ai i le faia o amioga lē tatau?

□ O le ā le ki autū e teteeina ai le agasala?

□ E faapefea ona fesoasoani mai le Atua ia i tatou i taimi o faaosoosoga?

[Fesili mo le Suʻesuʻega]

[Pusa i le itulau 14]

VALA MASANI E FAATUMAUINA AI FAAIPOIPOGA

□ Pipii mau i mataupu silisili o le Tusi Paia

□ Ia malosi le faiā a paaga uma e toalua ma Ieova

□ Ia faaaloalo le tane i lana avā, i ona faalogona ma ona manatu

□ Ia lelei le fesootaiga i aso uma

□ Saili ia faafiafia le tasi i le isi

□ Se uiga e agamalie; e mafai ona ia ʻataʻata i ona lava masei

□ Ia lotomalie e faaali sese; ia lotomalie e faamagalo

□ Ia faaolaola pea faalogona o le alofa

□ Ia autasi i le tausia aʻe ma le aʻoaʻiina o fanau

□ Ia aufaatasi e lē aunoa i tatalo ia Ieova

VALA LĒ MANUIA E FAAVAIVAIA AI LE FAAIPOIPOGA

□ Manatu faapito ma le loto maaa

□ E lē taulau ona galulue faatasi

□ E lē lelei fesootaiga

□ E lē lava talanoa i le va o le tane ma le avā

□ E lē lelei le puleaina o tupe

□ E eseese o faaiʻuga e faia i le feagai ai ma fanau ma/po o fanau a le isi paaga

□ Ua galue mo ni taimi uumi le tane po o le faatamala foi i isi tiute i le aiga

□ Ua lē taulau ona manatu mamafa i manaoga faaleagaga o le aiga

[Ata i le itulau 15]

O le tausia pea o le faaipoipoga ia mamalu e aumaia ai le fiafiaga tumau