Ia Olioli i le Lalolagi Mamā i le Lumanai!

MAEU lo tatou fiafia ona o le a faataunuuina e Ieova, le Atua o le maopoopo ma le mamā, lana uluai fuafuaga e faia le lalolagi atoa i se parataiso! (Isaia 11:6-9) Ua ia folafola mai: “E faapea foi laʻu upu e alu atu ai loʻu gutu, e le foi mai fua ia te aʻu; a e peitai e faia le mea ou te loto i ai.” “E le mafai ona pepelo ai le Atua,” o lea, e lē o ni upu soona lafo nei upu.—Isaia 55:11; Eperu 6:18.

Ua mafai ona tatou maua le mapusaga ona o le a faalaa mai ma le alofa Ieova, a o leʻi oo ina matuā faaleagaina atoatoa e tagata ola uma i le lalolagi i se tulaga ua lē mafai ai ona toe faaleleia!—Faaaliga 11:18.

O le a aveesea e Ieova tagata lē salamo, ma lē pulea i le faapogaia o le polusione, ma i latou o ē e fouvale ma lē amanaia ana mataupu silisili o le maopoopo ma le tumamā. O le a lē faatagaina se tasi na te faaleagaina le Parataiso toe faafoisia.—Faataoto 2:20-22.

I le taimi o le pulega a le Malo o le Atua, i lalo o le faatonutonuga a Keriso Iesu, o le a aʻoaʻoina ai tagata i le pe faapefea ona liaʻiina so o se pogai o le a totoe o le polusione faaletino. Ona oo loa lea i le taimi tatau—ae lē o le taimi lenei—mo auauna uma a le Atua—e faaaafia ai i latou i le faia o se gaoioiga totino po o le aufaatasi foi i le faia o se sao i le faamamāina o le lalolagi atoa i se tulaga sa leʻi faapea ona faia ai muamua.—Faatusatusa i le Esekielu 39:8-16.

O ē o le a faasaoina mai le faaiʻuga o lenei faiga leaga o mea o iai nei, o le a latou lagolagoina lenei polokalama o le faamamāina faaletino faatasi ma lea lava tuutoina aasa, lea o loo latou auai ai i le taumafaiga o le faamamāina faaleagaga o loo faia i aso nei.—Salamo 110:3.

E mautinoa lava le oo mai o se lalolagi ua faamamāina, e taʻitaʻia e le tauiviga sili mo le faamamāaga ua faia mo taimi uma lava, e faataunuuina e le Malo o le Atua. O le a aveesea mea uma lava e faapogaia ai le lē mamā. E lē toe maua ni tusitusiga o ni upu lē faaaloalo i so o se mea. E lē toe iai ni atigi fagu paepae solo, atigi apa, taga pepa iila, pepa pululole ma pepa lole, nusipepa, ma mekasini o paepae solo i so o se matafaga po o nofoaga o parataiso.

Olioli i se lalolagi mamā i le lumanai!

[Ata i le itulau 7]

Po o le a faia sou sao i le faamamāina lea ua toeitiiti ona faia i le lalolagi?