Se Parataiso po o se Faatafuna—O Lē Fea E te Loto i Ai?

E LEAI se tasi e mafai ona faaseseina o ia auā ua faaalia moni mai ona foliga po o ai o ia: o se tagata asiasi maimoa mai Europa na manao i se malōlōga ma le naunau e fia olioli i le susulu o le lā i se motu matagofie e pei o se parataiso. I le savalia o fagaoneone lautetele e tuaoi ma le matāfaga, sa ia tauāsaina ai ma le faaeteete lona auala i le tele o atigi fagu o loo paepae solo, atigi apa, taga pepa iila, pepa pululole ma lole, nusipepa, ma mekasini. Ma le manino lava, sa ita o ia ma tau mānatu faapea, po o le parataiso lenei na ala ai ona ia malaga mamao mai.

Pe na oo se mea faapena ia te oe? Aiseā e mafaufau ai pe moemiti tagata i le faia o ni malōlōga i se parataiso, ae i le taimi lava latou te taunuu ai i inā, e foliga mai e matuā lē pulea a latou amio i le faaliliuina o lena parataiso i se faatafunaga moni e lafoai i ai otaota?

E Lē na o le “Parataiso” e Faia Ai

O lenei lē manatu mamafa mo le matagofie, le tumamā, ma le mamā ua iloatino lava e lē fuatasi na o nofoaga “faaparataiso” na e lolofi atu i ai tagata asiasi maimoa. O faalapotopotoga i aso nei ua latou matuā faaleagaina e ala i le polusione toetoe lava o so o se mea. O le anoanoai o pisinisi tetele ua latou faapolusioneina i se fua sili ona telē i le faia o le anoanoai o tone o otaota. O le vale taulima o otaota o mea oona ua soona lafoaʻia, ma le faafuaseʻi ona masaa solo o suāuu, ua faaleagaina ai vaipanoa tetele o lo tatou lalolagi, ua faafaigata ona ola ai nisi.

Ua faia foi e taua mea oona. A o vaavaai atu ma le matataʻu le lalolagi, na faaopoopo atu e le taua i le Fagaloa i Peresia i le 1991 se mea fou. Na susunuina ma le loto i ai e autau a Iraki ni vaieli o suāuu e 600, ma faaliliuina ai Kuwait “i se vaaiga mataʻutia faafaatusa o hele,” e pei ona faamatalaina ai e se nusipepa Europa. Na faaupuina e le mekasini Siamani o le Geo le mataʻutia o le mu faapea “o se mala e sili ona leaga o le siosiomaga ua faia e le tagata.”

Ina ua iʻu le taua i le Fagaloa o Peresia, sa vave lava ona faia se gaoioiga e faamamāina ai. I le na o le tapēina lava o puna o suāuu, sa faaalu ai ni masina se tele o galuega mamafa. Na lipotia mai e le World Health Organization (Faalapotopotoga o le Soifua Malōlōina i le Lalolagi)  faapea, o le faateleina o le polusione i Kuwait atonu o le a faapogaia ai le faateleina o le aofaiga o tagata oti i lena vaipanoa i le 10 pasene.

Itiiti le Mataʻutia ae Matuā Faafiufiu

Mo faaaʻoaʻoga lauiloa uma ma le mataʻina o se fua telē o le faaoonaina o le siosiomaga, ua iai le faitau afe o isi foi faaaʻoaʻoga laiti. E ui lava e itiiti le mataʻutia o le polusione e fai e tagata lafo otaota, ma tusitusiga lē migao a le “au tusiata,” ae ua faia lava so latou sao i le aveesea mai le Lalolagi paneta, o le tulaga e mafai ai ona avea o se parataiso i le lumanai.

I nisi nofoaga e taatele ai le tusitusia o upu masoā i puipui po o pa, o lea ua “moeiini ai mata o tagata i na tusitusiga,” ua lē toe fia pupula i ai. Ua tusitusia foi i tino o nofoa afi, i puipui o fale, ma i pusa telefoni i le auala. E lē toe tau nanāina na tusitusiga i na o i puipui o fale ese mo le lautele.

O nisi aai ua faatumuina i fale tuai ua malepelepe. O vaipanoa e nonofo ai tagata ua matuā faamatagāina i fale palapala ma laufanua otaotā. O taavale malepelepe, o masini ua lē toe faaaogāina, ma lapisi o mea ua taʻei ua faamatagā ai se laufanua e ono matagofie ma manaia i le vaai.

I nisi siomaga, e foliga mai ua lē popole tagata i le faamamāina ma le faamatagofieina o o latou tino. E lē gata i le taliaina e nisi tagata o le faalialiavale i o latou lavalava ma teuga atonu e lē matagofie i le vaai, ae e manaia foi i le vaaiga a le lalolagi. O i latou o ē talisapaia foliga mamā ma teuga mamā, ua manatu i ai faapea o ni teuga faaanamua ua lē toe aogā.

Pagā se Galuega Telē!

Pagā se galuega telē o le faamamāina e tatau ona faia ina ia faaliliuina ai matafaga, vaomatua, atu mauga o lo tatou nofoaga faalelalolagi e avea ma parataiso na o loo faaatagia mai i faavaa felanulanuaʻi o mekasini mo tagata asiasi maimoa—e lē gata i lea, e tele mea e tatau ona faia i aai, taulaga, faatoaga, ma tagata foi ia i latou lava!

Sa fiafia le tagata asiasi maimoa lea na muai taʻua e vaai i se au faamamā o ō atu i le nofoaga lea i se taimi mulimuli ane o le aso, ma aveese na o otaota lapopoa mai lena nofoaga. Ae peitai, sa latou tuua ai pea fasi tioata taʻei, atigi fagu taʻei, momono o fagu, momono o atigi apa inu, faapea ma le anoanoai o muli sikaleti. O lea, e ui lava ina ua uma se faamamāaga, ae sa tumau pea ona iai le anoanoai o mea na foliga mai ai pea le laufanua e pei lava o se faatafunaga na i lo o se parataiso.

O se faamamāaga o le lalolagi atoa ina ia faasaoina le Lalolagi paneta mai le avea o se faatafunaga atoa e lafoai i ai otaota, o le a manaomia ina ia faamamāina ai nei ituaiga uma lava o otaota. Po o iai ni faamoemoega faapea o le a faia se faamamāaga faapena? Afai e iai, e faapefea ona faia? O ai o le a faia? O afea?