Tausia o ē Matutua—Luʻi ma Taui

SA MATUĀ olioli lava Shinetsu, o se faifeau Kerisiano i lona tofiga. E toatolu lona aiga, e aofia ai ma le tinā o lana avā. Sa latou galulue fiafia lava ma se faapotopotoga toaitiiti o Molimau a Ieova, i le aʻoaʻoina o tagata i le Tusi Paia, seia oo i se tasi aso na fesiligia ai o ia ina ia mafaufau pe manao e faimalaga ma lana avā e asiasi i isi faapotopotoga. O lenei mea, e manaomia ai ona fesuisuiaʻi mea e nonofo ai i vaiaso uma. Sa matuā fiafia lava o ia i lea fuafuaga, ae o ai o le a tausia le tinā o lana avā?

E toatele aiga o le a fesagaʻi ma luʻi faapena mulimuli ane—le tulaga e sili ona lelei e tausia ai mātua ua matutua. E masani lava ona lē manatu mamafa i lea tulaga a o malōlōina ma malolosi ma faigaluega mātua. Ae peitai, o nai mea iti e mafai ona faaalia ai ua faagasolo ina matutua i latou, e pei o le tetete o lima a o taumafai e tui se filo i se nila, po ua lē mafai foi ona manatua ni mea a o latou taumafai e tomānatu i se mea na tuusese i le taimi mulimuli na latou vaaia ai. O lea, e masani lava ona iai se mea e tupu faafuaseʻi po o se maʻi e faailoa atu ai i se tasi ni mea o latou manaomia. Ma e tatau ai ona faia i ai se gaoioiga.

I nisi atunuu, e olioli ai lava mātua i lo latou soifua malōlōina lelei ma filifili ai e nonofo na o i latou ma a latou paaga i taimi mulimuli o le olaga na i lo o le nonofo ma a latou fanau. I isi atunuu, e pei o le tele o Atunuu i Sasae ma atunuu o Aferika, o se tū masani mo tagata matutua le nonofo faatasi ma a latou fanau, ae maise lava le atalii ulumatua. E moni lenei mea, ae maise lava pe afai o se tasi o mātua ua faataotolia. Mo se faaaʻoaʻoga, i Iapani, o i latou ua taʻi 65 tausaga ma sili atu le matutua ma ua faataotolia mo se taimi umi, pe tusa ma le 240,000 o loo tausia i o latou fale e o latou auaiga.

Avega Tauave Tau Amio ma Faale-Tusi Paia

E ui lava o loo tatou ola i le tupulaga ua avea ai le toatele ma ē “alolofa i latou ia i latou,” ua leai se “lotoaiga,” e manino mai ai o loo ia i tatou se avega tauave tau amio ma faale-Tusi Paia mo tagata ua matutua. (2 Timoteo 3:1-5) O Tomiko o lē o loo ia tausia lona tinā matua, o loo maua i le maʻi o neura e tete lima (le Parkinson’s disease), sa ia faaalia le lagona o se avega tauave tau amio i lona faapea mai e uiga i lona tinā: “Sa ia tausia aʻu mo le 20 tausaga. O lenei la ua ou manao e faia foi faapena ia te ia.” Na apoapoai mai le Tupu poto o Solomona: “Ia e faalogo i lou tamā, o le na fanaua oe; aua foi e te ʻinoʻino i lou tinā pe a loomatua o ia.”—Faataoto 23:22.

E lē avea le lē fiafia i lotu ma le fia taui ma sui o se matua lē talitonu ma pogai e lē tausia ai le faatonuga faale-Tusi Paia. Sa faagaeeina le aposetolo Kerisiano o Paulo e tusi faapea: “A e afai e le tausi e se tasi i lona aiga, afai foi e le sili ona tausi i e mau ma ia, ua faafitia e ia le faatuatua, e sili foi lona leaga i le ua le faalogo [“faatuatua,” NW].” (1 Timoteo 5:8) Sa faataatia e Iesu le faaaʻoaʻoga mo i tatou, ina ua avea lona sauniunia o le tausiga o lona tinā ma se tasi o ana gaoioiga mulimuli a o leʻi maliu o ia.—Ioane 19:26, 27.

Feagai ai ma Faigata na Fetaiai

E tele fetuutuunaiga e manaomia ona faia e tagata uma pe a toe faatasitasi aiga ina ua mavae ni tausaga se tele o nonofo valavala. O nei suiga, e manaomia ai le matuā sili ona tele o le alofa, le onosai, ma le femalamalamaaʻi. Afai e siitia atu le atalii matua, po o se isi atalii po o se afafine i le fale o mātua, o le a tulai mai ai ni tulaga fou e matuā ese lava. Atonu o le a iai se galuega fou, aʻoga fou mo le fanau, ma se  tuaoi fou e ao ona faamasani i ai. E masani lava ona faateleina ai tiute mo le avā.

E faapena foi le faigata mo mātua ona fai ni fesuiaiga. Atonu ua masani lava i laʻua i le na o i laʻua, sa toʻafilemu, ma saoloto; nei la ua pisapisaō fanau a a la fanau ma a latou uō. Ua masani lava i laʻua i le faia o a la filifiliga, ma o le a lē fiafia i so o se taumafaiga e faatonu ai i laʻua. E toatele mātua sa vaavaai atu i le aso o le a ō mai ai a latou fanau ma o latou aiga ma nonofo faatasi ma i latou, ua fau ai ni fale eseese e latalata ane po o le toe faia foi o ni faaopoopoga i o latou fale e fesootai auala, ina ia mafai ai e tagata uma ona fai a latou lava mea.

A o le fale e laitiiti tele, e manaomia ai ona faia ni suiga tetele, ina ia maua ai le avanoa mo ē fou o le a taunuu mai. Sa ata se tasi tinā ina ua ia manatua le lē fiafia o lana fanau teine e toafā ina ua laʻu atu meafale ma isi mea i o latou potu moe ina ia faaavanoa ai se mea mo lo latou tinā matua ua 80 tausaga le matua. Peitai, e masani lava o le tele o nei faafitauli e mafai lava ona foia pe afai e iloa e tagata uma le manaomia ona faia o ni fesuiaiga ma manatua le apoapoaiga a le Tusi Paia faapea o le alofa ‘e lē sailia e ia lona lava lelei.’—1 Korinito 13:5.

Le Leiloa o le Saolotoga

E ono tupu mai se faafitauli matuiā mo se fafine Kerisiano pe afai e lē auai lana tane i lona faatuatuaga, ma filifili ai o le a siitia atu le aiga e nonofo faatasi ma ona mātua. O mea e manaomia mo le tausiga o le aiga e ono foliga mai e toetoe lava a lē mafai ona paleni ma ona tiute tauave faa-Kerisiano faapea ma isi tiute. Na faapea mai Setsuko: “Sa lagona e laʻu tane faapea o se tulaga mataʻutia le tuua na o lona tinā ua matuā matua lava na o ia i le fale, ma sa manao ai o ia ina ia ou nofo i le fale i taimi uma lava. A ou taumafai ou te alu i se sauniga, e ita o ia ma faitio. Muamua, ona o loʻu talaaga faa-Iapani, sa oo ai foi ia te aʻu le lagona o se mea sese le tuu na o ia i le fale. Ae mulimuli ane, sa ou iloa ai faapea e mafai lava ona foia faafitauli.”

Sa faapena foi le faafitauli o Hisako. Na faapea mai o ia: “Ina ua matou siitia atu e nonofo ma le aiga o laʻu tane, ona o lona fefe i ni manatu e ono oo i le auaiga, sa manao ai o ia e suia laʻu lotu ma ia taofia aʻu gaoioiga faalotu. I le tulaga sili ona leaga, a oo i Aso Sa ona ō mai lea o auaiga na e nonofo latalata ane e asiasi mai, sa faigata ai ia te aʻu ona ou alu i sauniga. E lē gata i lea, e mananao tamaiti e taaalo ma fanau a uso ma tuafāfine o lo latou tamā na i lo o le ō atu i sauniga. Sa ou iloa ai ua afaina lo matou tulaga faaleagaga. Sa tatau ona ou tū mausalī ma faamatala i laʻu tane faapea o laʻu lotu o se mea e lē mafai ona suia e pei o se ofu, ae sa tāua ia te aʻu. I le faagasologa o taimi, na faia ai fesuiaiga i le aiga.”

O nisi sa mafai ona foia le faafitauli i le mauaina o le tele o taimi e ala i le faia o ni tagata  teufale faavaitaimi, e ō atu e fesoasoani mo le tasi pe lua aso i le vaiaso. O isi ua maua ni taimi mo ni malaga totino pupuu ma gaoioiga faa-Kerisiano e ala i le sailia o le fesoasoani a a latou fanau, auaiga taulata mai, e oo lava i uō i le faapotopotoga. O tane foi latou ua mafai ona tuuina atu se fesoasoani i pō po o faaiʻuga o vaiaso pe a iai i latou i le fale.—Failauga 4:9.

Ia Fesoasoani ia i Latou e Gaoioi

O le fesoasoani i tagata matutua e gaoioi, o se tasi lea luʻi e ao ona faafesagaia. O nisi tagata matutua e fiafia e faia se sao i le faia o le kuka ma isi galuega i le fale. Latou te lagona le manaomia o i latou pe a talosaga atu i ai e vaai tamaiti, ma e fiafia e tausia sina tamai togalaau ʻaina, teuina fugalaau, po o le faia o nisi matātā.

Ae peitai, o isi, e na o le mananao lava e momoe i le aso atoa ma faatalitali e fai atu ni mea mo i latou. Ae o le fesoasoani ia i latou e gaoioi i le faia o le mea e mafaia, e foliga mai e tāua lea mo lo latou lelei, le soifua umi, ma le ala o le mafaufau. Sa iloa e Hideko faapea e ui lava ua alu lona tinā i le nofoa faataavalevale, ae o le aveina o ia i sauniga, o se gaoioiga tonu lena na manaomia e lona tinā. Sa faafeiloaia o ia ma le mafana e tagata uma ma sa faaaofia foi o ia i talanoaga. O le uaʻi atu o manatu ia te ia, na iʻu ai ina lotomalie e suesueina le Tusi Paia ma se tasi fafine matua. O se ulugalii faaipoipo, o ē na iai so la matua na maua i le maʻi e faaletonu le mafaufau (Alzheimer’s disease), sa la ave o ia i a latou sauniga faa-Kerisiano. Sa la mātauina faapea, “E masani lava ona lē manao o ia e fai se mea, ae e fiafia lava o ia i sauniga. Sa talia ma le mafana o ia, o lea e alu atu ai o ia ma le loto naunau i sauniga. Ua ma iloa e matuā aogā tele mo ia.”

O Shinetsu, lea na taʻua i le amataga o le mataupu, sa mafai ona foia lona faafitauli i le sailia o se fale mautotogi mo le tinā o lana avā, e tū i le ogatotonu o le oganuu lea e auauna ai o se faifeau faimalaga. I inā e nonofo ai o ia ma lana avā i le va o ana asiasiga i faapotopotoga eseese i vaiaso taitasi. Na faapea mai lana avā, o Kyoko: “Ua lagona e loʻu tinā ua avea o ia o se vaega tāua o la ma galuega ma na ia lagona e manaomia o ia. E fiafia tele o ia pe a talosaga atu i ai laʻu tane e kuka se meaʻai faapitoa.”

Feagai ai ma le Tulaga Tagata Matua

A o faasolo ina matutua mātua, e eseese lava tulaga e ono aliai mai i le tulaga matua, o lea e manaomia ai ona sili atu ona matuā uaʻi totoʻa i ai. Ua galo ia i latou aso, taimi, tau, ma folafolaga. E ono mafai ona galo ia i latou le otiina o o latou lauulu ma faamamā o latou lavalava. E mafai ona oo lava ina galo ia i latou le ofuina o latou ofu ma taeele. E toatele ua oo ina fenuminumiai, a o isi ua matuā faigata lava ona momoe i le po. Ua tauau ina fai atu soo i se mea ma oo ina lē fiafia pe a faamanatu atu i ai. Ua oo ina faaseseina ma faafenuminumiai i latou e o latou mafaufau. Atonu o le a finau maumauaʻi mai faapea e iai sa latou mea ua gaoia, pe faapea mai foi e iai ni tagata gaoi o loo taumafai e osofai mai le fale. O se tasi aiga e toafā ni tama teine, sa manaomia ona onosaia le faitioina pea o i latou e aunoa ma ni faamaoniga, i le faia o ni amioga sese faaleituaiga. Na latou fai mai: “O se mea sa logovale, ae na matou iloa le tatau ona matou onosaia ia tuuaʻiga ma taumafai e suia le mataupu e talanoa i ai. O le finau i le Tinā matua, sa leai lava se aogā.”—Faataoto 17:27.

E Manaomia ona Faamalie Faalogona Ootia

O le avea ma tagata matua, e aumaia ai tofotofoga i tagata matutua. E iai maʻi faigata, le lē mafai ona fealuai, ma e ao foi ona onosaia mafatiaga o le mafaufau. E toatele ua iai le lagona faapea ua leai se taʻitaʻiga po o se fuafuaga i o latou olaga. Atonu ua oo ia i latou se lagona faapea ua fai i latou ma avega mamafa ma faaalia ai le faanaunauga faapea ua fia oti. E manaomia ona ia i latou le lagona faapea o loo alofagia, e faaaloalogia, ma faaaofia i latou i galuega i le aiga. (Levitiko 19:32) Na faapea mai Hisako: “Matou te taumafai pea e faaaofia Mama i a matou talanoaga pe a iai o ia, i le avea o ia ma mataupu o le talanoaga i avanoa e mafai ai.” O se tasi aiga sa taumafai e toe faamalosia  le faaaloalo totino o lo latou augā tamā matua e ala i le talosaga atu ia te ia na te taʻitaʻia le talanoaina o le mau faale-Tusi Paia i aso taitasi.

E tatau lava ona matuā taumafai se tasi e tausia se vaaiga saʻo e uiga i tagata matutua. O tagata mamaʻi ua faataotolia e lē fiafia pe a latou lagona faapea ua manatu māmā ia i latou, pe tausia foi i latou i se auala lē faaaloalo. Na faamatala mai e Kimiko faapea: “Sa mataala pea Tinā,” o lē na nonofo faatasi ma le tinā o lana tane sa lē atoatoa le malosi, “ma sa ia iloa lelei lava pe a ou lē tuuina atu loʻu loto atoa i le tausiga o ia po ua taʻu faatauvaaina foi o ia.” Sa tatau foi ia Hideko ona galue o ia faatatau i ona uiga totino. “Muamua sa ou ita pe a faapea o le a ou tausia le tinā o laʻu tane. Sa avea aʻu ma paeonia, o se faifeau e galue faataimi atoa a Molimau a Ieova, ma sa ou misia lava le faiva. Ona oo lea ina ou iloa e tatau ona suia oʻu mafaufauga. E ui lava e tāua le faiva mai lea fale i lea fale, ae o le galuega foi lenei, sa avea o se vaega tāua i le utagiaina o poloaiga a le Atua. (1 Timoteo 5:8) Sa ou iloa le manaomia ona ou atiina aʻe se alofa e sili atu ma le tigā alofa pe afai ou te manao ina ia ou olioli. E faalavelavea lava aʻu e loʻu loto fuatiaifo pe afai e na ona ou faia o mea e aunoa ma le mafaufau i ai faapea o se tiute. Ina ua tupu se faalavelave faafuaseʻi ia te aʻu ma ua ou matuā tiga ai lava, sa ou mafaufau i le tinā o laʻu tane ma tiga sa oo ia te ia. Ina ua mavae lena, sa faigofie ai lava ia te aʻu ona faaalia le mafana ma le tigā alofa e sili atu.”

E Manaomia Foi e Ē Tausia se Tausiga

E lē tatau foi ona faagaloina le manaomia ona faaalia o le talisapaia mo lē o loo paʻū atu i ai le avega tauave o le tausia o mātua matutua. (Faatusatusa i le Faataoto 31:28.) E toatele fafine latou te tausisia pea o latou tiute tauave e aunoa ma le faalogoina o ni upu o le talisapaia. Ae peitai, pe a tatou manatunatu i mea o aafia i la latou galuega, e mautinoa ai lava le matuā alagatatau o na faaupuga. Atonu o le a faaopoopo atu isi mea e faamamā, le tatāina o lavalava, ma le faia o le kuka. Manatunatu foi i malaga e faia i le falemaʻi pe vaai foi se fomaʻi, faapea le fafagaina o le tagata matua e maʻi. Na faapea mai se tasi fafine ua leva tausaga o ia tausia le tinā o lana tane: “Ou te iloa e faigata i laʻu tane ona faaupu mai lona talisapaia, ae na te faaalia mai ia te aʻu i isi auala lona talisapaia o mea o loo oʻu faia.” O nai upu faigofie e pei o le faafetai e foliga mai ai ua sili ona aogā mea uma.—Faataoto 25:11.

E Iai Foi Taui

O le tele o aiga o ē na tausia mātua matutua mo le tele o tausaga ua faapea mai, o lenei mea na fesoasoani ia i latou e atiina aʻe uiga tāua faa-Kerisiano: e pei o le onosai, le faataulagaina totino, le alofa lē manatu faapito, le filigā, le loto maulalo ma le agamalu. E toatele aiga ua tosina vavalalata ai o latou faalogona ootia. O se avanoa faaopoopo lea e talanoa umi ai ma mātua ma iloa lelei ai i latou. Na faapea mai Hisako e uiga i le tinā o lana tane: “Sa o se olaga faatupu naunau lona soifuaga. Sa tele faigata na oo ia te ia. Sa oo ina ou faamasani ia te ia, ma ou talisapaia ai nisi o ona uiga sa ou leʻi iloa muamua.”

Na faamatala mai e Kimiko, o lē na tausia mātua o lana tane ma lona tinā matua ua faataotolia i le maʻi e faapea: “Sa iai se taimi muamua, ae ou te leʻi suesueina le Tusi Paia, na ou manao ai e tatala laʻu faaipoipoga ma sola ese mai lea tulaga. Ona ou faitau ai lea i le Tusi Paia o loo faapea mai, e ao ona tatou ‘tauasiasi atu i fafine ua oti a latou tane i o latou tiga.’ (Iakopo 1:27) Ua ou fiafia ona sa ou faia le mea e sili ona lelei, ma i le taimi nei, e leai lava se tasi o le aiga ua faitio mai e uiga i oʻu talitonuga. Ua mamā loʻu loto fuatiaifo.” Na faapea mai se isi: “Ua vaaia e oʻu lava mata le matuā leaga o āuga o le agasala a Atamu ma ua sili atu ai nei ona ou talisapaia le manaomia o le togiola.”

Po o le a lē pine ae e faafeiloaia fiafia isi tagata o lou aiga i lou fale? Pe atonu o le a e siitia atu foi tou te nonofo ma ou mātua ua matutua? Po o ia te oe se lagona tiga? O se tulaga e mafai ona malamalama lena. O le a iai ni fetuutuunaiga e ao ona faia. Ae o le a e iloa le ʻoa o taui o le a e maua mai i le fesagaʻia ma le manuia sili.

[Ata i le itulau 24]

E manaomia e tagata mātutua le alofa ma le faaaloalo