Le Afi i Hele—O Sasao aʻe po o Fai Ifo?

I LE senituri lona 18, sa masani ona faaaogā e le faifeau o le lotu Porotesano o Jonathan Edwards ni faamatalaga malolosi o hele e faamataʻuina ai loto o tagata o ē na nonofo i Amerika faa-Kolone i lena taimi. I le tasi taimi na ia faamatalaina ai se ata o le Atua a o ia faatautauina tagata agasala, e pei o ni apogāleveleve inosia, i luga o se afi mumū. Na aʻoaʻia mamafa e Edwards lana faapotopotoga: “O outou o tagata agasala, ua tautauina outou e pei o ni filo tuaiti, ma le afi o le toasa mai le Atua ua sasao aʻe ai, ma ua sauniuni i so o se taimi lava e susunuina ai, ina ia mū ma motusia uma.”

Ae ui i lea, e leʻi leva lava talu ona mavae le faasalalauina e Edwards o lenei lauga logologoā, ae amata loa ona fai ifo ma faasolo ina mou atu le talitonuga e faatatau i le afi i hele. * Na faapea mai le tusi The Decline of Hell, a D. P. Walker “i le lona fasefulu o tausaga o le 18 senituri, na salalau atu ai le luʻia o le aʻoaʻoga o le faapuapuagatiaina e faavavau o tagata ua taʻusalaina.” I le senituri lona 19, na faaauau ai pea le fai ifo o le talitonuga i le afi o hele, ma i le ogatotonu o le senituri lona 20, na mou ese ai mai i mataupu aloaia o talanoaga, le manatu a Edwards e uiga ia hele i le avea o se ʻafi mumū e faapuapuagatiaina ai ē e faia mea sese, i o latou mafaufau ma o latou tino e faavavau.’ Ua faapea mai se tusitala o Jeffery Sheler: “I le osofaia e le poto i ona po nei ma le faaleaogāina e le mataʻutia o le oti i Hiroshima ma le Tagatavaleina o Tagata Siū, na lē toe avea ai faamatalaga e uiga ia hele o se mea e fefefe ai e pei ona sa iai muamua.”

E toatele faifeau na lē toe fiafia e tautala e uiga i le afi ma le teio. O lauga malolosi e uiga i le mataʻutia o hele ua mou atu i lauga mai pulelaa a le tele o lotu taʻimua o Kerisinetoma. Mo le tele o faifeau, ua avea le mataupu e uiga ia hele ma mataupu ua lē toe aogā mo ni suesuega tāua. I ni tausaga ua mavae, sa faia ai e se tusitala o talafaasolopito a lotu se iloiloga mo se mataupu i le iunivesite e uiga ia hele, ma sa ia siakiina faasino tusi o nisi o tusi a tagata aʻoga. Na te leʻi mauaina ai se faamaumauga se tasi e uiga ia “hele.” E tusa ai ma le mekasini o le Newsweek, na faaiʻu mai ai e le tusitala o talafaasolopito e faapea: “Ua mou atu hele. Ma e leai se tasi na te iloaina.”

Le Toe Foi mai o Hele

Ua mou atu? E leʻi mou uma ese. O se mea e ofo ai, i tausaga faatoʻā mavae atu na toe olaola aʻe ai le aʻoaʻoga ia Hele i nisi nofoaga. O suesuega na faia i Amerika ua faaalia ai le toatele o tagata o ē ua fai mai latou te talitonu ia hele ua faateleina mai le 53 pasene i le 1981 i le 60 pasene i le 1990. E faaopoopo atu i lenei mea, o le faateleina lea i le lalolagi aoao o le talaʻiina o hele e le au faievagelia, ma ua avea  ai ma faamaoniga e faapea, o le toe tuuina o hele i mafaufau o Kerisinetoma o se tulaga mataʻina lea i le lalolagi aoao.

Ae po o aafia ai ea na o tagata mai le au lotu i lenei toe faafouga, po o oo atu foi i taʻitaʻi lotu? O le mea moni e faapea, o le afi i hele lea na talaʻia e Jonathan Edwards i le 250 tausaga ua mavae, e lē o mafai ona galo atu i nisi o taʻitaʻi lotu Kerisinetoma anamua. I le 1991, na faamatala mai ai e le U.S.News & World Report e faapea: “E oo lava i nisi o lotu autū, o loo iai ni faailoga e iloa ai ua amata ona mafaufau atili tagata o loo aʻooga faafaifeau e uiga i le mataupu o hele na i lo o le mea sa iai i le faitau sefulu o tausaga.” E manino la, ina ua mavae tausaga na lē amanaiaina ai, ua toe foi mai ai le aʻoaʻoga i le afi i hele i aʻoaʻoga a lotu i le lalolagi aoao. Ae e ui i lea, po o tumau pea le foliga sasao aʻe o lena afi?

Ua Mapuna aʻe Fesili

Sa leai se taumasalosalo o le faifeau o W. F. Wolbrecht: “O hele lava o hele, ma e leai se manaoga po o manatu o tagata e mafai ona faaitiitia ai le malaia e faavavau.” O le toatele o tagata lotu latou te lē o mautinoa. E ui lava e lē o masalomia le iai o hele, ae o loo iai a latou fesili e uiga i le tulaga o hele. Ua ioe mai se tasi faifeau: “O loʻu foi manatu, o hele e lē taufesiligia lona moni, ua manino lona taʻutino mai i le Tusi Paia, ae o lona uiga saʻo ua avea o se faafitauli.” Ioe, mo le toatele o tagata aʻoga faafaifeau ma tagata lotu, o le fesili i aso nei ua lē o le, “Po o iai ea se hele?” ae “O le ā hele?”

O le a faapefea ona e tali? O le ā sa taʻu atu ia te oe e uiga i le tulaga o hele? Ma aiseā ua avea ai o se faafitauli mo Kerisiano loto faamaoni lenei aʻoaʻoga?

[Faaopoopoga i lalo]

 [Ē Ana le Ata i le itulau 2]

Faavaa: Doré’s illustration of Tumult and Escape for Dante’s Divine Comedy

[Ē Ana le Ata i le itulau 3]

Doré’s illustration of Devils and Virgil for Dante’s Divine Comedy