Le Pogai e Ao ai ona E Auai

O LE a e mauaina ni aso aogā se fā o faatonuga faaleagaga i le Tauaofiaga Itumalo, o “Aʻoaʻoga Mai le Atua” lea o le a faagasolo i masina o le tau mafanafana i atunuu i le lalolagi aoao. I le Iunaite Setete lava ia, e sili atu i le 150 o nei faatasitasiga o le a faia ia Iuni, Iulai, ma Aokuso. I le tele o aai, o le a amataina le polokalama i le Aso Tofi i le 1:20 i le afiafi ma faaiʻuina i le Aso Sa i le 4:15 i le afiafi. O le a avea lipoti a misionare ua toe foi atu i o latou atunuu moni mo lenei fuafuaga fiafia ma tumutumuga i nisi o na tauaofiaga.

E tusa lava pe e te matua pe laitiiti—se tane, se avā, se tamā, se tinā, se talavou, po o se tamaitiiti—o le a e mauaina nei aʻoaʻoga o le a tauaaoina i se auala manino ma faagaee loto o le a aogā ia te oe. Mo se faaaʻoaʻoga, e toatele i latou i aso nei e fesili mai faapea, O le ā le fuafuaga o le ola? I le taeao o le Aso Faraile, o le a e olioli ai e faalogologo i le talanoaina o lenei fesili ma o le a faafiafiaina foi oe i manatu o le a e mauaina mai e fesoasoani ai i isi ina ia malamalama i lenei mataupu.

I le polokalama o le afiafi o le Aso Faraile o le a faamamafa ai vaega e uiga i le “Faia le Faaipoipoga ma Fusi e Tumau,” “Galue Mamafa mo le Faaolataga o Lou Aiga,” ma “Mātua—E Manaomia e a Outou Fanau se Uaʻi Faapitoa.” I le taimi lava e maeʻa ai le talanoaina o nei matua, ona taulaʻi atu lea o le faalogo i faafitauli o loo fesagaʻi ma le au talavou i aso nei ma pe faapefea ona latou faafetaiʻaia ia toʻatugā. E ao ona faalaeiauina i latou e le tala faaonaponei o lona matua e faapea Talavou o loo Manatuaina Lē na Foafoaina i Latou i le Taimi Nei.

I le Aso Toonai o le a faamamafa ai e le polokalama valoaga a Iesu i aso e gata ai ae maise lava ana upu e faapea: “A mavae atu le puapuaga o ia ona aso, ona faapogisaina loa lea o le la.” (Mataio 24:29) O le a e manao e faalogologo i le talanoaga e faatatau i le taimi e tupu ai lena puapuaga. O le a toe autalu ai foi e le polokalama o le Aso Toonai faamaumauga po o lipoti a Molimau a Ieova i aso nei ma faaalia ai mea ua latou faataunuuina.

I le Aso Sa, o le a faia ai le isi tala, e faapea lona matua Aua neʻi Faaseseina Outou e Lē Ulagia le Atua, o le a tataʻi ai i tatou i le luʻi e fesagaʻi ma le faamaoni o se Kerisiano ona o le taatele o vitiō ma musika i aso nei. O le lauga lautele i le afiafi o le a faamamafaina ai le matua e faapea “Aʻoaʻoga Aogā mo o Tatou Aso Faigata.” O le a faaiʻuina le polokalama i le lapataiga “Ia Taofimau Pea i Aʻoaʻoga Mai le Atua.”

O le mea moni, o le a faaoaina oe e ala i lou auai i na aso e fā! E valaaulia ai ma le mafana oe ina ia e auai. Ina ia sailia se nofoaga e latalata atu i lou aiga, ia faafesootai atu se Maota o le Malo o Molimau a Ieova i lou lava vaipanoa po o le tusi atu foi i ē na lolomia lenei mekasini pe tagai foi i Le Olomatamata o Fepuari 15 lena o loo iai tuatusi o nofoaga mo nei tauaofiaga i atumotu o le Pasefika.